Best Blogger Tips

2012年10月18日星期四

老共BB班(下)

(刊於2012年10月18日am730)

大圈小圈子

上回講到,將2,270件十八大黨代表名單,減咗37個「陽光運作」的選舉單位2,155個黨代表,剩低115件神秘人,就係唯一冇公開選舉結果的三個選舉單位、港澳台代表的名單,有疑似高人飛鴿傳書,話財經茄哩啡呢份土炮Shortlist好流,因為港澳台代表加埋,只係得28件,香港工委只係分到10張櫈仔咁話。落差去咗邊度,Q知咩,或者去咗幾十件「南海諸島」代表,或者「特邀老餅」啩。

所以話,連新疆西藏的黨代表兼候選名單都公開晒,在香港澳門咁國際化的黨代表,反而收收埋埋,又要威又要摺埋載頭盔,唔肯堂堂正正行出嚟晒見人,呢啲可能正正係香港抗共情緒的主要根源所在。

繼續BB班,如果將中國共產黨的權力架構形象化,就係一個好扁的金字塔,8千萬黨員,選2千幾個黨代表,上面有個幾百友「中央委員會」,再上面有個廿幾件的「中央政治局」,再上就係大家都熟悉的、兩隻手數晒的「政治局常委」,塔尖有條「總書記」。十七選咗204個「中央委員」,仲有167件候補委員,上面有25件「中央政治局」委員,再上有「9常委」,傳緊十八大的「政治局常委」會9變7,係唔係就要下個月開估。

老共黨代表大會休會期間的最高領導機關,就係「中央委員會」,所謂「民主集中制」,十八大的重頭戲之一,就係透過差額選舉,選出大約二百零件中央委員,候選名單點搞出嚟,老共自然有其規則潛規則,十八大選完中央委員之後,基本上收檔,跟住新鮮出爐的中央委員,就會舉行第一次全體會議,即係咩嘢「一中全會」,選埋權力金字塔上的其他位置,包括中央紀律委員會,當然仲有中央軍委, 10年前十六大一中全會,繼續選啱啱退任總書記的江澤民做中央軍委主席,據前香港特首董建華所講,十八大會沿用同一軌跡。

好喇,成個中國共產黨的權力交接儀式大功告成,跟住就係其他門面功夫,包括選人大。

可能老共習慣咗愛國愛黨,所以成日黨國不分,搞到香港人好多時人大代表同黨代表都分唔清楚,全國人民代表大會,即係好似香港立法會的民意代表,亦係中國的最高權力機關,都係5年一任,不過而家只係去到第11屆,下年1月聽講會選出3千幾件新任人大代表,跟住大約在3月舉行十二屆全國人大第一次會議,到時就會選出國家主席,同埋國務院總理,共產黨、國家、政府最高話事人選好晒之後,大家埋位做嘢。

可以見到,大陸成個政經體制,已經變成五年又五年的循環單位,老共黨大會去到第18屆,人大12屆,主導社會經濟發展藍圖的五年規劃,去到第12個,去到下年下屆國務院上位,「十二五」已經玩咗年幾兩年,新政府只可以執手尾,或者在老共眼中,一個同權力交接唔係咁對稱的規劃時間表,可以更加穩定啩。

點都好,如果由翻呢個五年單位睇中國的金融改革,十六大胡溫政權上位之後一兩年,跟手成立咗銀監會、國資委呢類監管機構,發改委亦係2003年改組強化職能,一線財金官僚,包括人行行長周小川,銀監會主席劉明康等,都係十六大之後陸續上位,坐足近10年。

不過真正大刀闊斧的改革,好似人民幣匯改,大型國有銀行引入外國策略投資者改革上市、股權分置改革等,都在十六大之後,相對冇乜政治干擾的的5年進行,2007年十七大後準備交接,又要玩新一輪爭櫈仔遊戲,反而冇乜特別成績做到出嚟。

用翻同一軌跡嚟睇,十八大勝利開檔之後,應該會有啲新政新作風,包括股市匯市的進一步改革,不過當然啦,大前提係今後10年好似之前10年咁,相對穩定,呢家嘢,冇人敢包的。

關連文章:
1. 老共BB班(上)(中)(下)

伸延閱讀:
1. 太陽報馮海聞: 中共黨代會的魔鬼細節
2. 太陽報古呂: 十八大民主在中委選舉
3. 德國之聲: 北載河汛期無捕獲

沒有留言:

發佈留言