2010年2月5日星期五

風水報告

(刊於2010年2月5日am730)

星期三,里昂發表虎年風水指數,吸引大棚記者,鬼佬仲多過唐人,呢份半認真半攪啅頭大行報告,本小利大。同日晚黑,差佬商罪科,漏夜拘捕小甜甜遺產案男主角陳振聰,風水的確可以令人發達,又未必次次可以趨吉避兇。

香港班極度有銀士,越有錢,越迷信。小甜甜慳儉鐘意食麥記,但由搵老公到搵老公替工,都靠風水師指點迷津,只要佢肯信,億億聲燒錢都唔係問題。

陳振聰故事話我地知,真正搵大錢嘅風水師,真又好假又好,多數係你同我都未聽過嘅「世外高人」,陳振聰自動蒲頭之前,知名度等如零,順叔可以寫包單,李嘉誠御用風水師係邊個,行出街,全港有六百九十九萬九千人會唔識得佢。

從呢個角度睇,亦即係話,隨便可以在SEVEN、報攤買到嘅風水運程,好打有限,真係有料到,已經俾超級富豪收埋左。同一道理,將風水報告,引伸到大行報告,一樣啱用,真正有價值嘅投資建議,唔會輕易咁唔駛錢話你知,報紙電視可以隨便收到嘅「大行報告」,全部都係SELL SIDE聲音,有幾何,你會聽到邊個BUY SIDE或者芬佬,會到大家分享佢地內部研究結果?

講到呢到,作為一個財經茄哩啡,順叔都要幫自己兜翻,在香港,唔駛錢可以睇得到,又有價值嘅,得兩樣,一樣係郊外風境,另一樣,仲駛問,就係am730。