2010年8月7日星期六

體育戰場(下)

(刊於2010年8月6日am730)

上回講到,大陸體育服飾品牌,時裝舖當便利店咁做,舖頭通街係,靠加盟店谷大銷售。

無辦法,幾個新興品牌,包括安踏(2020)特步(1368)同埋361度(1361),老闆都係姓丁,都係福建幫,在鞋都晉江做山寨廠起家,將盤生意發大嚟做,又係採用相同策略,鬥燒錢賣廣告其實只係頭盤,主菜在全國鬥快鬥多插旗開舖。

用361度做例子,06年,授權零售門店數目,只有1,391間,到上月底公布第二季銷售數據,已經增加到6,927間,國產老大哥李寧(2331),講緊市佔率多過特步一倍,至09年底,都係得6,854間特許經營店,加埋395間直接經營店舖。

嚴格嚟講,361度已經唔係一間零售公司,而係總批發商,將貨賣俾30間獨立分銷商,再批發落下面迅速膨脹嘅特許經營網絡,本身生產力再支持唔住業務增長,生產外包比例亦越嚟越高,即係話,生產及零售,產業鏈一頭一尾,361度下放咗大部分控制權,將精力集中在建立品牌形象及擴充銷售網絡。

呢種模式,可以令收入出現爆炸性增長,短跑冇問題,但長途賽韌力就唔會好高,成盤生意真正存貨風險,亦唔會在財務報表反映。所以呢類公司,除咗同你講整體收入增長點勁點勁,同店銷售數字,多數收收埋埋,因為唔慌靚仔。361度上個月第一次公布,至4月第二季度,同店銷售按年增長16.9%,算唔錯,不過經營超過兩年「同店」,只有2 千間左右,如果去開廣州,大家可以去上下九步行街望望,7間361度分店,幾多間可以繼續挨落去。

家陣中國內需咁火爆,幾乎將塊布拮三個窿當衫賣,搵個名人宣傳就賣過億件,唔敢同市場唱對台,作為上市保薦人,美銀美林上個月再唱好361度,睇HK$6.9,幾乎等如一年前招股價一倍,如果閣下係361度大股東,應該都抵受唔住誘惑,減持多少套現開心吓。

體育服飾,唔係講緊女人街賣胸圍,而係經營一個消費品牌,跑得出,回報可以好驚人,二十年前,Nike股價都係三四蚊美金左右,而家超過70美元,不過而家幾個主要國產品牌,自己地頭都未夠過江龍砌,海外市場,更加未有人夠膽走出去,李寧國際市場銷售,只係佔總收入百分之一多少少。

省招牌,李寧叫做最有心機,最近的起心肝改革,將個嘜頭「L」字斬頭,話代表「李寧交叉」,仍然擺脫唔到老翻Nike陰影(索性將李寧京奧飛身點火個動作變做商標,可能仲有代表性),新口號,明顯先英後中,「Make the Change」仲算可以,「讓改變發生」,就冇喱氣勢,講到尾,超越唔到人哋宣傳策略思維,照跟一個嘜頭一句號,冇可能超越「Just Do It」加個「剔」,中國體育品牌要衝出世界,難過見到中國國腳有球技又有球品。

關連文章:
1. 體育戰場(上)(下)

2010年8月5日星期四

體育戰場(上)

(刊於2010年8月5日am730)


今期開大陸體育服飾品牌。

先多咀講句,順叔普通話唔掂,撐硬廣東話。

廣州人,認為羊城有今日經濟成就,靠自己,相對有中央大力支持嘅北京上海,同阿爺有一定疏離感。廣東話,保留唔少古雅言聲韻,相對受到東北滿語污染嘅普通話,更似「漢語」,有人夠膽建議,加大力度煲冬瓜「教化」廣東人,認真唔化。

上星期去咗廣州,發現四圍裝修趕工,天未光已經沙塵滾滾,唔少人冇覺好瞓,更大鑊者,主要公路封鎖重鋪,交通癱瘓,全市塞車,加埋天口熱空氣差,成個廣州聲載道,不滿亞運擾民,袁崇煥熱血名句此起彼落。所以推普廢粵搞出大頭佛,與其講乜嘢「深層次矛盾」,不如話係廣州人反亞運情緒一次反彈。


聽講廣州亞運,投資超過二千億 (人民幣,下同),超過三年市政府財政收入,問題係,由奧運到國慶到世博,大型盛事,大陸同飽睇到飽飽滯滯,廣州亞運,已經食到水尾,如果唔收得,唔單止市政府頭痕,消費品牌落重本靠亞運宣傳,亦等如掟錢落海。

例如舊年六月先上市嘅361度(1361),一擲3.5億,搶咗個亞運服裝「高級合作夥伴」嚟做,加埋其他相關行銷及贊助費用,出錢出衫出波鞋,大大話話投資6億,集資所得,一炮過燒咗三分一。

廣州市中心,最出名零售購物區,叫上下九,一條800米步行街,順叔特登由頭行到尾,一路行一路數,竟然發現到7間361度分店(天氣太熱冇行番轉頭數多次), 服裝店當SEVEN咁做,一條街開7間鋪,唔難理解,點解大陸體育服飾品牌,增長可以咁凌厲。

靠加盟店谷銷售,其實係同業行規,後起之秀要搶市場份額,市場推廣及擴充銷售網絡,要更加進取,大陸體育服飾品牌,近年唔少嚟咗香港集資,唔難發現,越遲上市,市佔率越低,但分店及銷售按年增幅,越驚人。

08年6月,證監會《雙重存檔簡訊》就曾經披露,審核過一間大陸零售股上市申請個案,銷售增長顯著,但業務記錄期間大部分收入,來自大量特許經營店,加盟時被屈購入最低購貨量,即係話公司上市前成功谷大銷售,但大量加盟店日後能否繼續生存,過海神仙,另一件事。

明天再續,睇睇呢個增長模式有乜問題。

關連文章:
1. 體育戰場(上)(下)