2012年4月13日星期五

放任你上


生有限活無限

任你上

今期開城市電訊(1137)

港股電訊傳媒界,今期熱煲兩單刁,一單堅料一單流電,一個電訊魔童一個傳媒狂人,城電扑鎚悉售香港固網電訊業務,壹傳媒(0282)否認台灣業務賣盤傳聞。

壹仔台灣賣盤單料,由寶島吹過嚟,財經茄哩啡之前已經講過,壹仔最大價值,就係在兩岸關係之間的輿論價值,鬧得越出位越有統戰價值,主席黎智英肯放手收嗲賣盤的話,肯定大把人接,唔排除有中間人向潛在買家摟刁放風,壹仔蝕到喊亦係事實,不過肥佬黎近年在台灣坐落唔少地皮,唱佢莫財,不如話佢已經六十有四,無心戀戰仲有可信性。

城電主席王維基,雖然已經升呢「魔佬」多年,不過仲係五十出頭,最少仲有十幾年衝,呢個時候選擇盡沽本業套現,瞓身搞香港免費電視,就有少少十年前仍當盛年的肥佬黎殺入台灣的味道。

王維基1992年在加拿大回流香港創辦城電,20年時間,累計大約投資20個億(港元,下同),賣盤一索50個億,20億派特別股息,自己有十億八億銀落袋,到呢一刻為止,對股東算係有交待。大佬,售價差唔多往績市盈率17倍,多年想甩身重新上路的電盈(0008)主席李澤楷,應該恨到口水流。

搞電視燒銀紙,壹仔在台灣前車可鑑,燒到而家市值得16億元,對一間一年蝕幾個億的傳媒公司,市場已經好俾面;搞傳媒拍劇鬥內容,更加唔似得搞電訊舖渠鬥格價,香港傳媒市場,太多要影響力唔要錢的老闆,冇人會執粒,搞到個市越嚟越爛,城電變身後前途,好睇魔佬人生下半場其實想要乜。

性格決定命運,唔係講笑的,加拿大悶到可以數楓葉,中學已經搞補習社仲摟自己老師秘撈的王維基,30出頭人生軌跡回撥香港,驟眼睇,似命中定數。城市電訊上軌道之後,變成一間超悶的成熟企業,悶到王維基08年有時間幫亞視打工,旋風式空降在親中地頭,做亞視行政總裁12日後又旋風式「辭職」,表面上好似貫徹王維基「坐唔定」的性格,但亞視12日,對一個由細創業的人嚟講,唔會係即興動作,休息「15分鐘進入下半場」,城電申請免費電視牌照,電訊變傳媒,絕對有跡可尋。

人不可貌相,睇相亦要觀人,同城電多年嚟的廣告一樣,王維基係個鍾意在激烈矛盾中突出自己的人,搞得出「任你上」的女人海報,失驚無神又會整句「生有限活無限」的廣告哲學,佢當日行入亞視,到今日透過城電大搞電視,似係貪玩動作,不過佢自己幾次公開講過,除咗娛樂,最重要係為香港同香港文化,甚至講到要為13億人做啲嘢咁一本正經,唔通真係好似王維基當日離開亞視後,同志雲大師焗飯時咁講,到咗人生呢個階段,「仲做生意就好傻」,應該做啲「自己冇嘅嘢」?

王維基已經講到明,未來會投資最少25億銀搞電視,未來4年可能會年年蝕錢,城電做電視,如果唔係當生意咁做,對股東肯定唔係好消息。

而家講緊政府會發三張免費電視牌照,單嘢已經拖咗好耐,唔知等代言人埋位定拗唔掂數,商台當年續牌個大頭佛,到今日都仲講緊,免費電視影響力可以更大,不過好出奇地,冇聽過有積極「走出去」的中資機構,有意染指新牌照,咁就奇怪囉,未發牌,城電又夠薑先賣主業咁破釜沉舟,好似坐定粒六,又係奇奇怪怪。

當日亞視背後股東,既然同王維基有偈傾,斷估唔會因為佢玩得咁簡單,城電如果攞到牌照,財經茄哩啡思疑,城電未來仲有可能引入其他策略股東,甚至係有中資背景的水喉,故事情節純粹猜測,如有雷同,實屬巧合。

傳無限,媒有限,放任你上?

關連文章:
1. 電視風雲(下)

同場加映

王維基焗飯

2012年4月12日星期四

昆侖之尻


對呢隻嘢有興趣,可以當教育電視咁睇。

BTW,當年屈原《天問》,「崑崙懸圃,其尻安在」,冇理由問緊崑崙條賓周喺邊;日本漢語保留大量中國古字,往往比中文字保留更多古意,日文個「尻」字,講緊某地方的最後或最底部位,用GOOGLE IMAGE搜索「女尻」,會出現大量的屁股圖片,日本人亦有「澤尻」呢個姓氏,甚至出現「澤尻里蓧野」呢類咁不幸的名字...

所以順叔好相信,「尻」呢個漢字,最初其實講緊屁股,唔係賓周,謝謝收看。

昆侖氣概(下)

上回講到,昆侖能源(0135)去年中完成收購中石油(0857)「陝京三線」的6成權益,成為近年香港上市公司收購國有資產最筍一單交易,令天然氣管道成為2011年最大盈利貢獻來源,不過靠阿媽在天然氣管道主幹線壟斷性優勢做批發,似乎唔係昆侖能源未來的業務重點。

大家要留意天然氣及液化天然氣(LNG)的分別,昆侖能源另外兩大嚿業務,包括 LNG加工儲運,仲有天然氣銷售,先至係公司未來重點發展的業務。

昆侖能源在江蘇及大連,有兩大LNG接收站,主要為入口LNG提供裝卸儲存服務,一年加埋可以處理750萬噸LNG;另外偏及全國15座LNG加工廠,暫時每日可以處理138萬立方米天然氣,未來兩年全面投產後,產能將狂增至2,000萬立方米一日,成為「國內陸上最大的LNG生產及供應商」,投資咁多落LNG配套設施,因為最終一項「天然氣銷售」,其實重點亦係講緊LNG,主力賣液體唔係賣氣體。

根據昆侖能源星期三出爐的年報,所謂「以氣代油」的戰略,主力其實推廣LNG「動力燃料」在城市公交、重型卡車、內河船舶及油田鑽機的應用,中央政府要推廣LNG應用,昆侖能源亦係推動LNG作為主要「動力燃料」的政策工具,市政府及大型運輸企業要配合國策,效率應該遠高過特區政府推廣石油氣的士。

昆侖能源的天然氣銷售,其實亦包括城市管道燃氣,同新奧燃氣(2688)等民企爭飯食,日前就有內地傳媒報道,昆侖能源及中國燃氣(0384)附屬公司的職員,在南京爭地盤差啲大打出手。巨型國控油氣公司,近來日日俾人鬧,靠壟斷地位迫死民營企業,所以中石化要加入戰團,都係拍住新奧,國企民企聯手收購中國燃氣。中石油幾乎壟斷天然氣上游供應,昆侖能源更加唔可以公開做到絕,似乎因為係咁,昆侖能源呢方面反而一直收收埋埋,從來冇透露有乜策略,亦冇披露呢個高增長的最下游零售市場,佔天然氣銷售比重幾多。

唔計聯營公司貢獻,昆侖能源最好賺的生意,就係天然氣管道,就係靠去年才完成交易的「陝京三線」交易,同類筍嘢,阿媽冇講明會陸續有來,大家可以留意吓,中石油並未為管理層引入購股權計劃,昆侖能源三名最高管理層,包括主席李華林,反而先後獲授近1億股昆侖能源認股權,絕大部分在2007年開始授出,當中超過一半,今年1月6日行使咗,行使價只係HK$4.186,現市值沽出的話,獲利超過5億港銀。(相關權益披露

李華林在中石油,只係官至「董事會秘書」,可以話係董事長蔣潔敏條靚,大佬一年人工唔過一球,條靚在子公司又可以賺幾個億,你話合唔合理呢?昆侖能源在2007年開始向管理層大送購股權之後,同時又開始積極向天然氣業務轉型,甚至可以向阿媽買件超筍貨,你話又有冇咁啱呢?呢個就係在上集所提及,昆侖能源作為紅籌,資本市場操作可以更「靈活」的最佳例子,大家記住,睇國企紅籌公司年報,最緊要望吓管理層購股權有冇重大變動,好多時都同公司股價表現有直接關係。

無論中石油未來仲有冇好嘢益阿仔都好,昆侖能源賣氣體又好賣液體都好,專注天然氣呢個獲得國策大力支持的高增長行業,對股東始終係好事,昆侖能源係貴得有道理的,近年啲股票越貴,投資者似乎越有興趣。

十二五規劃對天然氣應用冇訂定量化目標,不過多年來多個官方提法好一致,要在2015年,將天然氣在能源消費的比重,由目前3.8%,提高到8.3%,屬於一個天文數字的增幅既然講到係「以氣代油」及「氣化長江」的政策工具,斷估昆侖唔會無端端變返做中國神油,目前市值大約1000億元,未來幾年膨脹多一倍,冇乜難度,當然啦,呢個增幅未必完全來自股價的自然增長,更大可能來自股本的擴張及收購,買啲乜嘢返來,就要邊行邊睇了。

關連文章:
1. 昆侖氣概(上)(中)(下)
2. 國民爭氣
3. 群鴻氣海(上)(下)

伸延閱讀:
1. 第一財經: 南京化工園燃氣爭奪戰
2. 新世紀周刊: 昆侖能源股權激勵模式引發爭議
3. 蔣潔敏: 不管油價漲跌都該投資中石油
4. 新華網: “十二五”天然氣發展任務艱巨

2012年4月11日星期三

昆侖氣概(中)

上回講到,昆侖能源(0135)自2010年改名,專注天然氣業務,感覺上擺脫咗過去十幾年定位不清的問題,投資者感受到公司改變策略的「氣慨」,但唔係咁多人講得清楚昆侖能源業務的「概要」。

根據昆侖能源上月底公布的2011年全年業績,淨賺56億銀(港元,下同),較轉型前未重列的2010年純利,勁升1.3倍,盈利水平創下歷史新高,來自天然氣業務的收益,已經超過公司比重5成,公布業績後嚟一劑大型配股,折讓7.6%,集資過百億元,反而成為機構投資者大手入貨機會,高盛啱啱在星期二出咗份報告,嗱嗱聲將昆侖能源放入咩嘢確信買入名單,睇HK$16.7。

呢隻嘢唔係唔買得,不過管理層講到業務策略,有時好似武俠片咁,又「以氣代油」又「氣化長江」,散戶要押注落去,最好先搞清楚昆侖能源的搵食地盤,在燃料供應鏈的上游定下游、做批發定零售、賣氣體定液體等問題,仲有同中石油(0857)母子分工的問題。

香港散戶最熟悉的燃氣公司,首推中華煤氣(0003),不過相信絕大部分香港人,唔會留意屋企燒緊的「煤氣」其實燒緊乜,又或者中華煤氣由邊度輸入生產「煤氣」的燃料,將香港代入中國市場,昆侖能源可以話做緊埃克森美孚等外資能源公司在香港的角色,佔據燃料供應鏈的中下游位置,既是住宅燃料的批發中介,亦是動力燃料的零售公司。

昆侖能源基本上有四大嚿業務:石油勘探開採、天然氣管道、液化天然氣(LNG)加工儲運、天然氣分銷。

昆侖能源在中國神油年代,買落幾塊老油田,位處秘魯塔拉拉等地,雖然又老又遠又散,勝在投資早成本低,仍然有咬口,一年賺十零廿個億,夠晒穩定,最正路發展,係同阿媽玩交換禮物,剝離非核心業務,換取中石油的天然氣資產,不過中石油唔等錢使,反而有相當誘因,在個仔快高長大之前,提高現時約5成的控股比例,就算中石油未來進一步射筍嘢俾昆侖能源,最大機會仍然係收新股。

中石油管理層,多次講明支持昆侖能源「以氣代油」的戰略,不過從來冇用「旗艦」嚟形容昆侖能源的天然氣業務,中石油2011年超過2,800億元人民幣的資本性支出當中,有22%,投資在「天然氣與管道」,遠遠超過昆侖能源的整體資本開支,即係話昆侖能源及中石油母子之間,天然氣業務仍然有大量重疊的地方。

如果大家睇開中石油的業績推介,每年例牌有一頁,講下中石油油氣管道建設的情況,當中天然氣管道,越嚟越多越嚟越長,因為中石油既控制全國主要氣田,亦負責主要輸氣管的鋪設,唔計規劃中的俄羅斯緬甸等入口大氣喉,全國橫七縱八14條在建主要天然氣管道,中石油擁有11條,包括「西氣東輸」一二線,同埋「陝西-北京」一二三線(下稱「陝京三線」),十幾條天然氣管道幹線,亦係中國鼓勵使用天然氣的最重要政策工具,北京控股(0392)、新奧燃氣(2688)等燃氣零售公司的,共係接駁入屋的「支氣管」,「主氣管」其實被中石油呢個「總批發商」鍊住。

昆侖能源在2010年底,220億元向中石油收購「中石油北京天然氣管道公司」60%權益,主要資產其實就係「陝京三線」,聽過名就知道主要向北京地區供應天然氣,交易舊年下半年先正式獲批完成,但已經成為昆侖能源2011年最賺錢一嚿業務,稅前盈利貢獻43億元,可以話係近年香港上市公司收購國有資產最筍的一件貨,另外4成權益,北控咬住,唔知係咪買路錢,但係北控成功控制氣源供應話事權,呢個亦係北控在同類公司當中,始終被看高一線的原因。

講到呢度,大家可以見到,昆侖能源最大增長潛力,其實就係「天然氣管道」呢個最重要上游區域,問題係,中石油冇講到會繼續有同類筍貨益昆侖能源,亦唔見得條條氣管好似「陝京三線」咁好賺,最重要一點,昆侖能源未來業務重點,似乎睇重液體多過氣體,零售多過批發。

下回再續。

關連文章:
1. 昆侖氣概(上)(中)(下)
2. 國民爭氣
3. 群鴻氣海(上)(下)

伸延閱讀:
1. 第一財經: 南京化工園燃氣爭奪戰
2. 新世紀周刊: 昆侖能源股權激勵模式引發爭議
3. 蔣潔敏: 不管油價漲跌都該投資中石油
4. 新華網: “十二五”天然氣發展任務艱巨

2012年4月10日星期二

昆侖氣概(上)

今期開昆侖能源(0135),一間在香港上市近40年,但企業價值同埋市場認知一直保持相當距離的公司。

先講歷史,呢隻嘢盤古開天,叫做「富輝企業」,1973年已經上市,幾十年控股權轉手幾次,包括90年代初掛住「Paragon」的招牌時,捲入轟動一時但糾纏十幾年的聯合集團(0373)造數案,直至1994年中國石油天然氣集團入主,成為第一批在香港買殼上市的國控紅籌。

當年金融資訊唔似今日咁氾濫,上市公司記錄亦唔係咁易搵得返,昆崙能源前世的殼股歷史已經鮮為人知,亦無謂多講,重點係當年巨型國企在香港資本市場活動,做嘢未必百分百乾手淨腳,所以同類故事股事,97年後幾乎絕跡,昆崙能源因此成為極少數以紅籌身份上市的大型國企,呢類在海外註冊的國企,以前可能出於國有資產流失的憂慮,鮮被委以重任獲注重要資產,回歸A股市有一定難度,但昆崙能源經過近年洗底後,已經成為中海油(0883)級數的戰略性企業,資本市場操作主要在香港進行,靈活性反而較H股高。

97年香港主權回歸,股市主題熱炒紅籌,昆侖能源當年叫做「中油(香港)」,雖然變身中石油集團第一個海外上市平台,但係從來冇好好向投資者解釋本身定位同埋母公司動向,當年唔清唔楚反而容易炒上炒落,話「中油(香港)」係中石油整體上市旗艦又得,話佢係中石油注入海外資產上市平台都得,幾毫子舞到幾蚊雞,「中油(香港)」被人當做中國神油咁炒,直至2000年4月,中石油(0857)以H股在香港上市,亦係中國神油所有憧憬幻滅一刻,「中油(香港)」從此踏入定位不清的迷失十年。

中石油同母公司中國石油天然氣集團,中英文名都極度相似,本身油氣業務,由國內到海外都出現重疊,巨型國企初嚟資本市場報到,亦唔識得做投資者關係,壓在最下面的「中油(香港)」,角色更加尷尬,坐住幾個山旯旮海外油田,96年以嚟年年有錢賺,但在機構投資者眼中,始終上唔到大枱,「中油(香港)」最常被提及的「賣點」,竟然變成私有化,不過私有化偏偏又係國企最罕見的一個動作。

可以見到,由97年的中國神油年代,到2000年中石油H股上市後的迷失十年,「中油(香港)」只係另一隻市值較大件的僵屍級紅籌,一係唔知自己做緊乜,一係投資者唔知佢做緊乜,唔清唔楚唔上唔落,呢個情況在2010年終於出現改變。

2010年中石油香港上市十周年,系內架構重組,「中油(香港)」獲得全新定位,負責集團內的「天然氣下遊終端銷售及應用業務」,同年3月正式改名做「昆侖能源」。

任何一間公司轉變企業形象,例如改吓門市門面,品牌顏色咁,可以視為公司有意發奮圖強之象,一間巨型國企旗下一間子公司改變策略,專注做國家積極鼓勵發展的戰略性業務,更加值得留意,過去兩年,昆侖能源股價累積升幅超過5成,就係僵屍級國控企業「轉性」的最佳例子之一。

今日幾乎人人都識得講,中國國策鼓勵使用天然氣,昆侖能源又係中石油系內專營天然氣業務的上市平台,不過唔係見到太多人講得出,全國橫七縱八的天然氣運輸管道當中,昆侖能源佔據邊幾條「氣脈」,亦唔係咁多人講得清,上游到下游,氣田開發到供氣入屋,昆侖能源在市場邊一個部分運作,換句話講,今日投資者普遍認同昆侖能源的投資價值,但仍然有唔少人唔知公司做緊乜,企業價值同市場認知之間,仍然有相當距離。

昆侖懸圃,氣慨似吞天下,其尻安在,投資者最需要明的,其實仍然係最簡單的,公司業務及行業概要,下回再續。

關連文章:
1. 昆侖氣概(上)(中)(下)
2. 國民爭氣
3. 群鴻氣海(上)(下)

伸延閱讀:
1. 第一財經: 南京化工園燃氣爭奪戰
2. 新世紀周刊: 昆侖能源股權激勵模式引發爭議
3. 蔣潔敏: 不管油價漲跌都該投資中石油
4. 新華網: “十二五”天然氣發展任務艱巨