2012年2月10日星期五

三一兩睇(下)

梁穩根: 表你有冇?

上國講到,舊年差一步就在香港上市的三一重工(600031),董事長梁穩根,既被無聊財富榜評為「中國首富」,又啱啱宣布衝出世界收購「血拼」為民族品牌爭光,收購德國混凝土泵生產商普次邁斯特(Putzmeister),連做載兩頂向來被投資者視為大吉利是的高帽。

藝高人膽大,兩件事發生之時,圍繞梁穩根出現的政壇風向,出奇咁配合三一重工的發展需要,時機上配合得咁好,斷估唔係偶然,而係背後唔少精心計算的成果。

舊年「富豪榜」公布之時,三一重工正積極籌備香港上市,四圍見芬佬做投資者推介,冇幾耐,就傳出梁穩根可能棄商從政,甚至已經通過審查,有機會在今年18大被選為中共中央委員的驚人消息,需要知道,舊年「中國民企」個招牌,喺外國被人唱到花晒,投資者變晒驚弓鳥,三一重工以「最巨型民企」身份嚟香港集資,如果老闆被唱到有機會晉身中共權力核心,就算只係煲水新聞,亦曲線話咗俾全世界聽,三一重工冇乜政治計時炸彈。

三一重工上星期宣布收購海外行家,又撞啱德國總理默克爾訪華,中國德國就算貌合神離,始終各有所求,人哋女總理六年嚟第五次訪華,仲帶埋德國商界,包括普次邁斯特老闆嚟中國,三一重工可以大大聲咁講,兩國總理「共同見證」中德兩國呢單歷嚟最大型企業併購。

溫總: 中國冇胃口買起歐洲

默克爾今次訪華,其實應北京邀請,不過在國內同埋歐洲,反應唔係咁好,英文傳媒有啲甚至用「來自歐洲的乞米婆」形容默克爾,話佢要請求中國「買起歐洲」,舊年G20在11月開會前,本來成個勢好似要出手義助歐洲兼拯救地球,希臘突然殺出個公投,北京嗱嗱聲縮手,今次默克爾再嚟北京,雖則挾住份最新出爐的歐盟財政契約,但係只係換嚟北京口頭上的支持,總理溫家寶就講明歐洲仍然要靠「自身努力」,冇拍心口話一定會大手購入歐債。

歐洲係中國最大貿易夥伴,中國亦想減持美元資產好耐,歐元生生性性的話,一家便宜兩者著,但係從國務院啲乜乜物物研究員在官方傳媒的撰文睇嚟,中國投資外儲策略,除咗係減持美債,仲想「債權變股權」,即係話唔好買咁多公仔紙,買多啲實業實物最實際,所以就算溫總講到話「沒能力沒胃口」買起歐洲,近來唔少中國企業,其實衝緊去歐洲買嘢,例如山東重工旗下個濰柴集團,舊年底就在意大利買咗件遊艇公司,徐公機械聽講亦在國做緊大刁。


普次邁斯特個老闆80歲人,家族生意想賣盤,據內地傳媒呢兩日報道,除咗三一重工之外,國內主要競爭對手中聯重科(1157)其實都已有興趣,甚至已經向發改委申請「路條」,呢個係正常程序,不過聽講因為咁樣,破壞咗同普次邁斯特的保密協議,結果被梁穩根得米,同德國佬傾掂數先向發改委申情,先暫後奏,監管部門係咪都俾佢食糊,應該可以進一步引證梁穩根呢位「中國首富」,政治上係咪咁有牙力。

中國重工機械市場,在廿年前,本地品牌同埋外國品牌,市場佔有率幾乎係一九之比,今日世界輪流轉,三一重工等土炮公司,已經搶佔咗近9成市場,可以跑得咁快,主要原因,斷做係因為中國基建及建築固定投資急增,鑿山掘泥起重,其實唔需要乜嘢精密工程,粗粗地就用得,所以外國公司好快被打殘,但同時亦代表市場好爛做,三一重工下一步發展,就係要升呢,買德國工程老牌公司,買技術買國際市場份額兼即時省靚招牌,亦係好正路做法。

既係中國最有銀資本家,又講到有機會進入中共權力核心,仲配合國策衝出世界,三位一體,不得了,故事係咪太完美,今期睇兩睇,三一重工捲土重來香港上市再講。


關連文章:
三一兩睇(上)
三一兩睇(下)
伸延閱讀:
1. 梁穩根: 中德聯婚 手錶定情
2. 中國證券報: 三一德國併購(PDF)
3. 三一重工並購資金遭遇質疑

2012年2月9日星期四

三一兩睇(上)


三一重工梁穩根雙喜臨門

今期開三一重工(600031) ,生產重型機械,最巨型A股民企。

中國重工企業,唔少在香港上市,三一重工就有一隻掘煤的三一國際(631)H股,工程機械製造商,舊年之前,屬於一個好多資金追捧的明星行業,鐵路及房地產投資雙雙降溫,相關股份亦開始跑輸。三一重工舊年嚟香港H股上市,聽講胃口高達260億港銀,見晒人紅衫魚都出埋,臨門一腳撻Q,斷估好快會捲土重來,財經茄哩啡啱啱開始睇呢隻嘢,暫時冇乜特別感覺,今期先在表面一層睇兩睇。

過去十幾廿年,對中國有鐵佬嚟講,有兩頂避之則吉的高帽,載在頭上多數大吉利是,光環變魔咒,第一個係「中國首富」,第二個就係「走出去」海外併購為民族品牌爭光。前者,例如比亞迪(1211)的王傳福,同埋恒大地產(3333)的許家印,做咗「首富」之後,公司股價同家身大幅縮水;中國企業衝出國外收購「血拼」,除咗部分全地球都係咁掘的天然資源大刁,暫時冇邊間叫做修成正果。

三一重工創辦人梁穩根,最近連戴兩頂高帽,先係幾個富豪榜,評為「中國首富」,上星期宣布夥拍中信集團旗下基金,投資約26億元人仔,收購德國混凝土泵生產商普次邁斯特(Putzmeister)。

富貴如浮雲,唔少人估計,「取之有道」的長實(001)主席李嘉誠,貴為「香港首富」,私人財產可能多唔過百足咁多爪的新世界(017)主席鄭裕彤。十個有錢佬,斷估十個唔知道自己個袋有幾多錢,幫有銀士數銀紙的「富豪榜」,其實無聊到爆,中國企業家做嘢好多太勇,外國投資者對中國概念亦每每熱炒過籠,「中國富豪榜」的最大作用,可能係睇睇邊個行業開始出現過熱現象。

富豪榜在內地亦有「殺豬榜」之稱,源於在唔理黑貓白貓的年代的所謂「原罪」,摸住石頭踩著鋼線搶住先富起來的一班,或多或少有啲嘢唔見得光,樹大即招風。梁穩根是少數冇靠地產起家的「首富」,亦是受惠於A股市場的變革第一個「首富」。

文革結束高考恢復,幾代人齊齊爭崩頭,相對於在66至68年大學畢業、命運最悲淒的「老三屆」,77至79年考入大學的「新三級」,出咗唔少猛人,包括好多規劃並見證過去中國經濟黃金十年的監管機構最高層,梁穩根屬於「新三級」人物,那些年知識份子從商,黑貓白貓之間肯定更多心理包袱,唔夠勇唔夠狠,晉身巨富例子不多,梁檼根算得上異數,經營民企代表成為龍頭,經營政治亦有一手。

舊年「財富榜」公布之時,聽講內地傳媒打鑼都搵唔到梁穩根,原來跟副總理王岐山去咗華盛頓,成為中美戰略與經濟對話的隨團商界代表之一,呢位民企「第一人」,亦係共產黨員,已經做咗3屆全國人大代表, 07年17大被選為為共產黨代表大會代表,舊年內地傳媒更一度盛傳,中共組織部已完成梁穩根的考察,今年18大梁穩根將會成為中央委員或後補委員之一咁話。

中共中央委員會有204個成員,後補委員有167件,最實際權力,就係可以參與推舉中央政治局幾個常委,要晉身呢個決定中共最核心權力的核心權力組織,閒閒地二三十年黨齡未死未落馬先排到隊。

梁穩根絕對唔係最資深共產黨代表,但肯定係最有錢一個,如果中共俾首富資本家行入權力最高層,即時成為最具代表性的「先進生產力的發展需求」的代表,合否出現呢個變數,緊要過薄稀來做唔做到政治局常委。當然啦,內地傳媒熱炒梁穩根棄商從政之時,三一重工正準備在香港上市,呢單料最大作用,就係淡化投資者對「首富魔咒」的忌諱。

三一兩睇,下回再續,睇睇三一重工的海外併購。

關連文章:
三一兩睇(上)
三一兩睇(下)

民意調查 vs 學術研究

以下呢個短片,好扼要又清楚咁,解釋咗「民意調查」,同埋「學術研究」的分別。




2012年2月7日星期二

超人大飛機(中)


上回講到,長實(001)主席李嘉誠同中國航空工業國企打交道多年,長和系在中航工業旗下三間香港上市公司,先後作出股權投資,十幾廿億銀貨仔,呢批貨本來已經封晒塵,但近來開始重新增持,好似對民航工業國企重現興趣。

航空產業已經被列入「戰略性新興產業」,中國要打造國產大飛機,決心同射人上月球一樣咁大,07年已經立項,多多錢都肯投資,唔似得十幾年前咁,要四圍揼愛國資本家心口;近十年嚟,長和系在內地亦冇乜大手筆投資,諗唔到乜嘢理由,李超人忽然會有興趣,重鎚出擊幫手打造大飛機,進入一個重未落手落腳的實業領域,長和系未來縱使繼續增持中航工業系股份,最有機會組成「戰略聯盟」拍住上的,可能只有在深圳的地產項目。

每個成功商人,搜集市場資訊、建立人脈關係都有自己一套,例如長實99年幫手買殼投資中航國際香港(232)之後,高層葉德銓一直坐住非執行董事職位,唔通「小霍建寧」食飽飯冇嘢做咩;又舉個例,深圳中航(161)舊年9月29日,喺香港起壇,宣布並慶祝42億元人仔收購系內12間公司雜碎業務的重組大刁基本完成,據中航工業官方網頁資料,「香港首富李嘉誠也特地趕到現場」表示祝賀。

9月29日國慶前夕,香港啱啱扯8號波,股市都停市,誠哥如果風雨不改親自出席,咁就認真俾臉,唔單止咁,中航工業副總理顧惠忠,早兩個月在《中國航空報》寫咗篇「與李嘉誠先生面對面」的文章,透露中航工業一班高層,在國慶前夕拜訪咗誠哥,介紹中航工業最新情況,並且「歡迎李嘉誠先生進行戰略投資」,在長江中心60樓食飯灌酒期間,顧惠忠呢位長江商院EMBA畢業生,話自己被超人風采深深折服云云。

長和系同中航工業系統淵源深厚,超人對內地民航工業國企,肯定知道唔少一般散戶甚至芬佬未能掌握的資訊,之不過,又未必代表佢老人家一面倒睇好,超人做大刁,由幾十年前買和黃(013)到十幾年前賣橙,出晒名冇手影捉,中航工業重組沙塵滾滾之際,長和系密密增持相關公司股份,甚至超過權益披露水平,更似係一項畫公仔畫出腸的「禮貌式」投資,特登做俾人睇,驚死人唔知佢什係好支持中國民航工業,如果真係要捉手影,最多只可以話,近年中國民航工業的發展,以致中航工業的一系列重組,最近重新吸引到超人的眼球。

如果要詳細講中航工業系統的重組,可能上中下左右前後都講唔晒,複雜到無倫,一間上市公司,分分鐘有四五層控股關係,新新舊舊上市非上市,分司名又極度相似,可能越講越亂。

深圳中航的3個不同招牌
(即係自己都未知自己想做乜)

好簡單咁講,香港上市的深圳中航同埋中航國際香港,都只係中航工業的「曾孫」公司,亦係民航工業國企當年「軍轉民、內轉外」時期,「不務正業」的後遺產物,兩間公司英文名,都係「CATIC」行頭,即係「中國航空技術進出口總公司」的代稱,「中國航空技術進出口總公司」08年之後,「軍民分立」,變成「中航國際」,雖然仍然有做民航用品出口,但基本上係中航工業非核心產業的整合平台,逾千億元資產,好大部分位於深圳,亦係集團內最有可能最快「整體上市」的資產。

「中航國際」總裁,叫做吳光權,2010年開始,做埋深圳中航同埋中航國際香港兩個香港上市平台的話事人,中航國際香港英文名,最近已經改咗用中航工業招牌「AVIC」行頭,但係深圳中航,網頁招牌轉咗冋「AVIC」,但上市公司仲係叫「CATIC」,未來公司個招牌點變法,可能預示咗企業重組的方向,包括會唔會成為「中航國際」上市的整合平台,定係繼續做收買佬,併購系內雜碎業務。

下回再續。


關連文章:
超人大飛機(上)
超人大飛機(中)
超人大飛機(下)

伸延閱讀:
1. 顧惠忠: 與李嘉誠面對面
2. 李嘉誠八號波撐深中航場
3. 財經茄哩啡: 打造大飛機(上)(下)
4. GOW財茄台: 鐵翼長空四十年

2012年2月6日星期一

超人大飛機(上)


今期開飛機。

前年11月,財經茄哩啡寫過兩篇「打造大飛機」,話中國大國堀起,誓要打造國產大型民型客機。砌一架「大飛機」差唔多要由500萬嚿零件,負責呢個國家兼民族任務的國企系統,架床疊屋的複雜程度不惶多讓,不如將範圍縮窄,試吓跟住長和系投資內地民航工業的足跡,睇睇幾隻在香港上市的相關國企搞緊乜。

呢個工業股版塊,以前除咗部分中資投行,冇乜分析員留意,上個月中,高盛破天荒將中國民用航空及國防工業,納入分析範圍,5間進入高盛分析雷達的公司,包括龍頭國企中航工業的香港上市旗艦中航科工(2357),目標價睇4.4元,仲有中航科工下面兩間A股公司哈飛航空(600038)及洪都航空(600316)。大行報告幾癈都好,越多分析員跟,即係越多機構投資者會留意。


投資大行最重要的一項無形資產,或者叫生財工具,其實係幫有銀士提供金融服務,日日望住最世界最聰明或最有錢的人點樣投資,好多事可以「先知先覺」。高盛香港最大客仔之一的長實(001),舊年11月,大約每股3. 4元價錢,增持中航科工股份,H股持股量突破5%,倉位在聯交所權益披露系統曝光,超人同「大飛機」突然扯上關係,唔少人忽然驚覺,原來長實主席李嘉誠,對中國民航工業好有興趣。

超人商業手腕,點樣將股權投資同人脈網絡砌埋一嚿,凡人唔係咁易理解。聯交所權益披露,只係話你知長實在中航科工長倉,在兩個月前突破5%的披露水平,冇講幾時開始買入,實情係,超人同中國民航工業,已經扯上關係最少15年,分分鐘中航科工03年香港上市時,長實已經開始投資。

中航工業旗下最少20間上市公司,唔計中油潔能(260),在香港控制3個上市平台,中航科工之外,有隻H股叫做深圳中航(161),1997年香港上市時候,長實已經係「策略股東」,舊年8月,長實和黃分別再增持深圳中航H股,合共持股超過一成,計埋非流通內資股的話,長和系在深圳中航持股量大約有6%。

長實在中航科工持股(H股)
長實在深圳中航持股(H股)

最後,仲有一隻中航國際香港(232),相信唔係好多人留意,就算有留意,都唔會好多人記得,呢隻嘢盤古開天之前,叫做「遠東鋁質」,1999年4月,中航技術進出口總公司,透過收購「遠東鋁質」借殼上市,成為中航工業在香港唯一非H股上市平台,呢單刁,當在香日長實亦有份參與,當日持股量超過9%,之後十幾年滄海桑田,「遠東鋁質」變成今日的中航國際香港,股東結構大變,長實持股被大幅溝淡,係咪仲持有中航國際股權,已經搵唔到資料證實。

近十年來,國有資產嚟香港股市玩,唔好話借殼走後門,做紅籌都難,全部要透過監管較嚴謹的H股上市,在2000年9月,中航國際香港當時的行政總裁單祖茂,接受香港一份報章專訪時表示,中航技術同長實,早在1994年已經間接入股「遠東鋁質」,到98年,李嘉誠及當時的中航工業總經理朱育理,「商談合組一家公司,藉此支持內地航空工業發展後,才有買殼的構想」,據單祖茂透露,當時國務院總理朱鎔基親自批示「這是最後一家」。(註)

睇完一大堆新聞兼舊聞,可以得出兩個唔會錯得去邊的結論,第一,李超人同中國民航工業相關國企,淵源甚深,建立一定脈關係,甚至曾經有意「合組一家公司」,以「支持內地航工業發展」;第二,長實和黃在中國民航工業,已經投資多年,雖然只係十零廿億銀貨仔,相關股權投資亦已經倉底封晒塵,但最近半年開始重新增持,再次展現出投資興趣。

下回再續。

關連文章:
超人大飛機(上)
超人大飛機(中)
超人大飛機(下)

伸延閱讀:
1. (註)星島日報: 中航技術借殼遠東鋁質,朱總批示「這是最後一家」
2. 財經茄哩啡: 打造大飛機(上)(下)
3. GOW財茄台: 鐵翼長空四十年

2012年2月5日星期日

中行百年


中國銀行(3988)近排喜事多,成為全國唯一入選「全球重要系統性銀行」,2月5日,慶祝成立100周年。

1912年1月24日,孫大炮批准將「大清銀行」改為「中國銀行」,同年2月5日在上海正式成立,成為當時民國政府的中央銀行,直至1928年南京政府將中國銀行改組為「國際匯兌銀行」,中行先不再承擔央行功能。

百歲生日,中行班大佬近排亦好高調,頻頻在官方傳媒發表偉論阿支阿左,咁高興,中行或者中銀香港(2388),唔知會唔會順手派吓特別股息呢?

中行在上海漢口路3號舊址














伸延閱讀:
1. 中國銀行集團跨境人民幣結算量突破1.7萬億元
2. 中國銀行高層最新發言