2012年9月8日星期六

切條撚咩



潮語,難明。

本來無碌柒,何處切條撚。

究竟賭緊乜,咩先叫做「切」?

2012年9月7日星期五

中遠艦隊(下)

COSCO's SOS

2007年,係中國遠洋 (1919)的高峰期,當時人仔對港元啱啱一算,波羅乜海指數過萬點,中國遠洋純利近200億元(人民幣,下同),相當於現在市值的6成。

在咁風光一刻,中國遠洋的艦隊,做集裝箱的,有144艘船舶,總運力435,138標準箱(TEU,20呎標準貨櫃),同時擁有全球最大支的乾散貨船隊,419條,當中217艘自己擁有,總運力近3,300萬載重噸(Dead Weight Tonnage),規模可能仲大過東海艦隊。

去到今年6月底,中國遠洋的乾散貨艦隊仲有357艘,自己坐住227條,總運力同2007年相若,但仍然係全球最大的一支乾散貨艦隊,家吓波羅乜海指數跌到唔夠1千點,中國遠洋自然蝕到阿媽都唔認得。

中國遠洋的船隊規模,聽講同兩三年前的高峰期,已經少咗百幾艘,應該係租少咗,從近兩年財務數字嚟睇,應該係向母公司中遠集團租少咗船,同時做多啲集裝箱貨運、加大碼頭及物流業務投資,中遠集團仍然擁有近800艘商船,5,600萬載重噸,中國第一世界第二,可以想像,中遠集團呢間國資委樓下的央企,蝕得更加跨張,蝕到阿公都唔認得。

造船同造飛機一樣,唔係今日訂貨明天送到,所以中國遠洋雖然調整緊艦隊規模,但同時每年仲要為以前落咗柯打的新船訂單找數,暫時仲有18艘乾散貨船,同埋22艘集裝箱船訂單,2012年的預計資本開支,仍然會按年上升74%至153個億。

中國絕大部分央企,都在自己地頭搵食,有阿公照住,不過航運公司的收入面向全球,可以話係參與國際市場競爭最多的「中國代表隊」,航運央企近兩年齊齊蝕到燶,既反映國企在國際市場的競爭力,亦反映咗國企用阿公錢投資,最緊要威,好似中國遠洋在董事長「Captain Wei」魏家福的帶領之下,太過著眼於建立「全球最大」艦隊,市況逆轉時完全冇晒轉身的靈活性,將中國遠洋同東方海外(0316)比較吓就知道,近兩年盈利雖然大跌,但未至於蝕到入肉,東方海外近年表現出嚟的,正正係一個跌過仆街過的老牌航運公司的沉著及穩健。

航運央企蝕到阿媽都唔認得,魏家福上星期公布成績時表示,已經向國務院上書,應該離不開「國貨國運」呢味,不過近年連華能(0902)及寶鋼等大型國企,都開始自己建立船隊,控制運輸成本, Captain Wei的「SOS」唔知有冇人會睬佢。

阿公打救船公司,查實早有前科,不過唔係國企,而係前特首董建華的東方海外,呢個打救一家船公司同時統戰一個未來香港特首的故事,可能大家都耳熟能詳,不過順叔一直都好想知道,2003年長實(0001)在權益披露新例下曝光的10%東方海外持股,究竟幾時落注。

董伯伯當年好想搞大香港航運,航運發展局、港口發展局、物流發展局,各自焗咗一個出嚟,但2005年腳痛之後,冇人再理呢三個乜局物局,梁振英做咗特首,新人舊風,又話要搞翻香港做「航運服務中心」,開邊辦,暫時未知,不過上個星期,聽講Captain Wei就摸咗落嚟香港同梁振英見面,一個最蝕錢的央企老總,一個面對最大政治壓力的地方領導,真係唔知邊個向邊個SOS先好。

根據梁振英之前接受外國傳媒訪問時透露的口風,計劃在香港搞多啲航運服務,要同倫敦拗吓手瓜咁,中遠集團樓下,仲有一間中遠國際(0517),就係提供航運服務,查實做緊乜,財經茄哩啡唔係太清楚,不過中遠集團早幾年被阿公勒令「棄陸」,撤出地產業務,帶脅中遠國際出售遠洋地產(3377)股權套現,而家仲坐住一大嚿現金,現股價3蚊港紙左右,現金每股3個6毫4。

中遠國際同中國遠洋唔同,唔係一盤可以蝕到入肉的生意,仲有薄利,現價計,中遠國際的航運服務本業,免費奉送再每股倒貼幾毫子,先會有人要,唔通因為準備大搞航運服務的嗰位叫梁振英,所以連累中遠國際搭沉船,都變埋「負資產」?

關連文章:
1. 中遠艦隊(上)(下)
2. 兩條沉船
3. 價值缺失(上)(下)

2012年9月6日星期四

中遠艦隊(上)

今期開中國遠洋(1919),呢個行業涉及太多專業知識,不過跌到「海嘯價」,不妨望望,當係研究筆記。

中國遠洋下面有間中遠太平洋(1199),94年已經在香港上市,主要做碼頭同埋集裝箱產銷租賃生意,2003年仲做過香港藍籌,到2005年阿媽中國遠洋H股上市,兩母子名稱又似號碼又似,唔熟悉航運業的香港投資者,搞到唔知「貓貓狗狗」定「貓狗貓狗」。

散戶唔熟悉遠洋集團呢個央企體系,無可厚非,要了解中國遠洋這間公司的起點,反而係要確保自己知道,航運業係一個幾咁複雜的行業,有興趣可以是但搵幾個專業網站望吓,例如Lloyd’s List,可能發現好多意想不到的新聞,大路消息例如對沖運費期貨衍生工具的金融消息、氣氛變化令國際航線的調整,小路報道例如某國家財長換人對入口關稅的影響、熔盛重工(1101)大股東張志熔涉及中海油收購加拿大尼克森石油內幕交易等等等等,原來航運業人士都會留意,可見呢行幾難搵食。

好多人講到香港上市的航運股,例牌會講吓個乜嘢「波羅的海乾散貨運指數」,呢個指數講緊乜,順叔只係知條皮毛,講緊反映乾散貨運運費的變化,另外唯一可以了解的,就係呢個指數,07及08年曾經衝到接近12,000點樓,5年時間,最近夠膽跌到6百幾點,一定要解釋呢個咁驚人跌幅的話,財經茄哩啡只能粗略估計,2007年前後資源價格大牛市,全球乾散貨運需求急升,不過好似中國遠洋呢啲雄心壯志的船公司,做大咗個頭,新船柯打兼運力大增,近幾年都消化唔到,再簡單啲睇,坐船坐飛機都要面對燃料成本的波幅,不過國泰(0293)的貨運運費,又或者機票價錢,最少唔會5年跌95%咁跨張。

一個幾乎日日聽到的指數,查實亦大有文章,所謂「乾散貨運」,講緊礦砂煤炭等唔需要裝入「集裝箱」,堆滿一倉就可以起錨開船,亦即係話,下次如果有人同你講,「波羅的海乾散貨運指數」上升,東方海外(0316)前景看俏的話,就要小心的,因為東方海外主要做集裝箱貨運,同波羅的海冇乜太大直接關係。

講到呢度,又可以見到,航運最少可分「乾散貨運」同「集裝箱」兩大嚿,但係下面又細分各種各樣的船種,貨物種類、碼頭設施、可唔可以通過蘇彝士運河等等等等,都係船公司需要考慮的因素。

講咗咁多,大家可以想像吓,一間好似中國遠洋的大型航運公司,在預測未來收入增長時,等如要預測全球經濟走勢,仲有5年可以插95%的乾散貨運運費變化,跟住預測吓自己要買幾多租幾多新運力,使唔使對衝燃料成本或者運費變化,咁多變化因素,一個唔覺意,設想同現實有少少出入,可能有幾千隻船瞓喺度,而家唔係一隻二隻大眼雞,而係維修管理泊位費全部不菲的「艦隊」,聽講一隻船放落水日行夜行,燈油火臘維修費遠低過泊在碼頭晒太陽,蝕到阿媽都唔認得。

唔怪得同樣做航運生意,和黃(0013)永遠只係做碼頭,做到全球最大,保證有相對穩定收入,又可以掌握到全球經濟活動的脈脈,2011年,中遠太平洋都有幾個億純利,佢阿媽就醜死鬼,年營業額689億元(人民幣,下同),結果蝕咗100個億,成為最蝕錢的國企,今年上半年又蝕49個億,分分鐘可以再度「兩連冠」。

航運公司的外在因素難以預測,中國遠洋蝕到入肉,外行人查實亦不難睇到內在原因,例如呢間央企及管理層的「性格」。中國遠洋董事長叫做魏家福,聽講以前有廿幾年行船經驗,所以鐘意人哋叫佢做「Captain Wei」,企業掌舵人既以船長自居,目光自然遠大,所以好景嗰幾年,成日講到要建立一支全球最大的艦隊。

下回再續。

關連文章:
1. 中遠艦隊(上)(下)
2. 兩條沉船

2012年9月5日星期三

大話東北遊(下)


天水圍的中與港

繼續講陰謀論,查實仲可以話,將香港樓價炒高其實亦係港深融合的大方略,樓價越高,越有需要搵土地供應,發展新界東北及深圳河套等邊境區域亦越少阻力,港深融合,深圳拉低香港樓價地價,大家可以想像吓,邊啲人最唔高興,要大發神功,忽然高舉良心同埋「香港核心價值」,力場扮主場。

國民教育及新界東北兩大熱門話題,幾年前已經始諮詢,完全炒唔起,疑似地下黨員梁振英做咗特首之後,又可以即時反枱,香港好似變成冷戰戰場咁,就快要在深圳河起道柏林圍牆再實施種族隔離政策,用上面的陰謀論解釋其實亦講得通。

如果真係有呢啲陰謀方略,又實行得天衣無縫,坦白講,夾在中間的香港人,唯有講個服字,不過中國規劃真係咁英明神武,唉,強國就唔會搞到一鑊粥啦。

講到新界東北發展,仲想講一個好殘酷的現實,香港地產市場好似好透明,一個個物業成交價,是但一個地產代理網免費任睇,不過涉及超巨型的土地轉換新城市規劃,就算所有嘢攤開晒任睇,普通人可以掌握的,少之又少,相對大型地產商的「物業資料庫」,更係999條牛對半條毛。所有人都認同規劃一個新城市,越透明越好,諮詢更耐更佳,不過同時亦要有心理準備,有財力可以長坐、有眼線可以落寶的地產商,晨早打晒釘等收成,講到尾,政府話要開發新界東北,已經講咗十幾年。

好似恒基地產(0012)咁,同新界的收地公司鄉親父老合作無間,鄉議局大樓開幕剪綵,恒地高層黃浩明站在第一排,多年嚟收收埋埋唔少農地,去到舊年底,新界土地儲備4,190萬平方呎,新界東北佔510萬平方呎,講緊政府計劃動用400億元(港元,下同),買回大約2,852萬平方呎土地,按比例粗略計算,恒地無需承擔樓市風險下可以收回70個億,當然啦,恒地買農地成本從來冇公布,相信亦永遠唔會公布。

動用公帑回收一個地區的所有私人土地,政府自己做整體規劃發展,查實仲有一個更大更具爭議先例,叫做天水圍。

七十年代尾,成個天水圍,被長實(0001)及華潤控股的地產公司買起咗,港英政府在82年,實際用14個億買返488公頃土地,但將最中心的近40公頃土地留俾發展商,最神奇係,政府竟然加入賣地條款,限制附近的商鋪供應,唔會導致發展商的商舖「在商業上不可行」,即係唔可以有競爭,睇睇當日完全冇公布的神奇條款:

“…some commercial accommodation for neighbourhood shops ...... being provided only to such extent as is calculated not to render the commercial accommodation to be provided by TSW (有關地產公司) on the 38.8 hectares NOT commercially viable.”

悲情城市點解咁悲情,呢個「天水圍的中與港」的故事,同後來「天水圍的夜與霧」有乜關係,得閒再講,不過可以一提,政府早兩日終於宣布,天水圍可以有個合法平民墟市,又會咁啱?

呢度只係想講,政府話想用400個億收回新界東北,只係自己估估吓的數口,仲要同大地主恒地講數,最後要用幾多錢,恒地又開出乜嘢條件,仲有好多變數。

恒地四叔做香港磚頭,近十幾年明顯比唔上新地(0016)幾個細侄,不過斷估四叔同新界收地的「艇仔」,及市區收樓的田生地產(0183)好熟,除咗幾千萬呎農地,市區舊數重建項目樓面亦有143萬呎,收地打釘越做越大,最近另一間舊樓收賣佬金朝陽(0878),亦泊埋四叔碼頭做大坑重建項目, 政府要在舊樓重建及新界開闢新的住宅供應,四叔呢盤「磚頭收買佬」生意應該終於係時候收成。

四叔早幾個月,好罕有咁上咗北京做善事,唔知同乜人見過面,不過接受記者訪問時,又好罕有咁,直接向政府提出疏理樓市的建議,包括動用部分儲備提供按揭俾市民買樓,貸富於民,仲有「年輕港人港地」,部分單位只賣俾剛畢業的後生仔或者幫佢地上車。

四叔最偉大的建議,當然唔少得免收農地補地價,等地產商可以興建低成本的小型單位,拍心口話如果農地免地價,恒地2年就可以推出10,000個400呎單位添。

三十幾年前,新界土地契約年期問題,成為英國佬試探中國收回香港立場的突破口,天水圍計劃亦成為保證香港前途信心的代名詞,當年長實押咗買落呢塊奇貨可居的大漁塘,無論身邊合作股東點變,始終咬住冇放口,最後證明,就算唔計因為呢個項目而索到的政治風向,本身已經係天水圍發展的大贏家。

香港主權回歸15年的今天,政治又有變天之色,今次可以大展身手的,輪到恒地四叔?

關連文章:
1. 大話東北遊(上)(中)(下)
2. 新界阿凡達(上)(中)(下)
3. 當奴作首(上)(下)
4. 財政失算(上)(下)

伸延閱讀:
1. 立法會有關天水圍發展會議記錄(第14頁開始)
2. SCMP: 82年官商協議限制商業發展種下天水圍「悲情」禍端
3. 明報: 天水圍官地突拍板開天光墟

2012年9月4日星期二

大話東北遊(中)

今期講緊香港房策地政的熱門話題辭彙,上回講到,「劏房」多數有獨立廚廁,相對於香港房屋赤貧象徵的「籠屋」及「板間房」,劏房的出現,查實反映今日香港的樓市,中產都開始貧窮化,特首梁振英上任兩個幾月,先話增加青年宿舍,上星期的「梁十招」,再話要「活化」工業大廈做住宅用途,正正係針對呢個現象。

劏房有劏得合法與不合法之分,影響人命安全的,講乜都得,不過完全合乎法例的劏房,有價有市,要「Say Hi」的話,應該「Say hi to Uncle 當奴」,要全面取締呢個香港樓市污點中的污點的話,應該先修改法例準許在天橋底瞓街,或者在政府總部門口扎營露宿。

以前港英政府年代,寮仔部拆咗間木屋,會有徒置區或者臨時安置區呢類臨時房屋,順叔當年住過,大部分粗口同埋性知識就係在當年的公廁兩壁學識,不過呢啲殖民地時代的貧窮圖騰,又點可以在回歸強國後的香港出現,所以最多好似前前朝董伯伯咁,「升呢」做「中轉房屋」,滿足臨時房屋的需要。

到2012年的今日,更加唔可以同人講中產都被逼到冇瓦遮頭,唔通在晒咗太陽十幾年的西九乜乜文化區,搭幾萬個複式臨時安置區單位咩,所以而家見到好似石峽尾第一代公屋「活化」做青年宿舍,工業大廈「活化」成住宅,政策功能同當年的臨屋區冇乜分別,升咗呢咁解。

大眾住宅市場的房屋供應,需要時間規劃,例如學校及交通配套咁,住宅群唔係話變就變出嚟。如果純粹針對中產住屋貧窮化的現象,年青單身人士流動性高彈性亦高,好多人其實唔需要政府的長時間房屋資助,最多需要一兩年有瓦遮頭的緩衝,香港搞到今時今日,政府查實都冇謂咁要臉,在新土地供應未能推出前,在臨時房屋搞多啲新意思。

前朝當奴曾經放寬公屋的入息上限,將更多低收入家庭納入廉租屋的福利網,不過呢,復建居屋,好似係當奴「做好呢份工」的不成文「選舉承諾」咁,放寬居屋的入息限制,當然唔會出現在政策議題,「梁十招」最後一式「活化」工廈,隱約見到梁振英的居屋政策,將中產住屋貧窮化個波,擲向私人市場解決。

如果梁振英的房屋政策大幅左轉,照目前向左走向右走都被人鬧爆的討論邏輯嚟講,應該又會被人指住佢搞福利主義,散盡儲備博取掌聲,如果「活化」工廈計劃,變相放寬法例容許大量合法劏房臨時性出租,唔知又有幾多人接受到;如果係降低補地價要求,鼓勵工廈業主改建平價私人住宅,又唔知有幾多人狂鬧政府益地產商。

講咗咁多,查實想講一個最老土的道理,當年小學作文寫議論文時老師教的,無論企邊一邊都好,正反論據都要諗吓,好似新界東北的發展計劃,前日趕投趕命趕稿,用咗呢個敏感惹心話題,而家都有啲後悔,不過既然開咗頭,就繼續大話東北,提出咗啲非主流觀點。

最根本一點,如果增加供應係疏理樓市的王道正藥,開發新界土地,係增加供應的少數選擇之一,如果唔可以填海,又唔發展新界,唔通真係要好似當奴咁講,香港人要折墮到掘地窿鑿岩洞嚟住,市區土地就算仲有幾多公頃,終於有用盡一日,始終要好似當年沙田大埔咁,開發新住宅區域新市鎮,最正路睇,新界東北的問題,係點規劃,而唔係一切不變唔發展。

香港有正義傳媒話,開發新界東北係「割地」,純粹講陰謀論,順叔查實相信阿公諗住好似質澳門食橫琴咁,割幾忽深圳地俾香港,因為香港話五十年不變,不過冇講「香港」的地域不變,「割地」俾香港,之後仲一定有普選,因為唔係700萬人普選,而可能係1400萬人普選,問你死未,咁樣政治上仲實際,經濟上又可以為深圳土地增值,國際上仲可以同人講,香港一國兩際,拉動咗中國民主進程添。

下回再續,繼續陰謀論。

關連文章:
1. 大話東北遊(上)(中)(下)
2. 新界阿凡達(上)(中)(下)
3. 當奴作首(上)(下)
4. 財政失算(上)(下)

2012年9月3日星期一

大話東北遊(上)

今期開恒基地產(0012),借呢間在舊樓重建及新界農地兩大土地供應來源的大地主,大話南西東北,就香港房屋規劃政策最近的熱門話題,提供一啲非主流的思考角度。

一個政權通常去到黃昏未日,先會變成跛腳鴨,做乜都被人鬧餐慒,特首梁振英掉,上位過程得罪太多人,得幾百票冇認受性,唔好話蜜月期,直頭一分鐘試用期都冇,未開波已經大把人想收佢皮,局長級人馬有人糧都未出就要辭職,管治班子做又好唔做又好、向左走向右走一舉一動最後結果都係萬箭心,最新宣布的「梁十招」,唔使問阿桂,又廣被批評冇料到整色整水。

房屋供應涉及長線規劃,大家試吓走上財政司司長曾俊華的個人網誌望望,呢位兩朝財爺,由2007年當奴年代開始,大時大節每年每季都會發出「樓泡警告」,講你知政府有幾關注樓市供求,又話會「採取必要措施」,不過只停留在寫網誌階段,之前五年的曾蔭權政府做咗乜嘢,有眼睇,講到要掘地窿鑿岩洞,臨尾先話復建居屋、檢討土地供應,未有新供應出現,已經拍拍屁股走人,當奴「打好呢份工」的「老闆」,究竟係邊個,劃公仔唔使劃出腸。

政府7月中宣布白表免補地價購買二手居屋的試行計劃,仲有增加青年旅舍的計劃, 8月又宣布「梁十招」,推出多項當奴拒絕採納的中短期措施,不難理解,梁振英家陣四面楚歌,唯一可以攞吓彩,仲有幾分「民意」支持的,剩低房屋政策,得就得唔得食忽得,唯有更加肉緊。

房屋政策得閒講兩咀,講得好聽啲,就係「政策成熟一項推出一項」,不過同時予人杯水車薪的感覺,缺乏長遠政策視野,暫時睇,梁振英可能吸收咗當年董伯伯的教訓,1997年7月1日就掟出八萬五政策,就職當日已經露晒底,結果被人追住打足咁多年,梁振英新班子一開波已經進入跛腳鴨時代,選擇開牌晒泠的時機要更加小心,例如「港人港地」的政策。

「港人港地」呢個政策口號,聽落好順耳,亦配合部份香港人近來拒絕融合的心態,不過亦可能係梁振英最捉蟲的選舉期票。所謂「港人港地」,望文生義咁去了解,講緊在賣地條款裡面,加上限制「非港人」購買力的條款,香港的地契,而家一批通常50年,政治上的五十年不變,都只係此一時彼一時的權宜之計,半個世紀,經濟週期都唔知幾多個週天,在地契上將物業買賣限制訂得太死,萬一樓市大幅回落,想賣又搵唔到「港人」接貨,可能更加捉蟲。

如果將「港人港地」呢個政策,當成限制外國資金投資或炒賣香港物業,壓抑投機性的需求,又唔同講法,甚至唔需要在賣地條款搞咁多嘢,只需要透過行政措施或者稅務條例改變遊戲規則,好多國家都有類似的資本控制(Capital Controls),中國樓市調控的「限購令」就係例子之一,香港將地產剔除於投資移民投資計劃亦係例子之一,當然啦,如果梁振英推出類似的措施限制非本地資金進出香港樓市,不難想像,可能又會被唱通街,破壞香港自由經濟的光環。

香港另一個熱門的房屋話題,叫做「劏房」,呢個辭彙出現之前,私人住宅市場的「赤貧」象徵,包括「板間房」,仲有「籠屋」,幾年前梁振英在探訪深水圳居民時,講過籠屋及板間房的存在,是香港房屋政策的「污點」。劏房講緊將一個住宅單位,合法或非法地劏成幾個具獨立廚廁的細單位,即係話劏房的存在,查實為咗滿足對私隱有更高要求的社會階層,如果籠屋及板間房代表香港房屋政策照顧唔到最草根階層的需要,劏房的出現,即是話今時今日的香港樓市,連中產都開始「赤貧化」,咁就更加係污點中的污點。

梁振英提出增加青年旅舍,以及「梁十招」有關「活化」工廈的建議,其實就係針對呢個現象,下回再續。

關連文章:
1. 大話東北遊(上)(中)(下)
2. 新界阿凡達(上)(中)(下)
3. 當奴作首(上)(下)
4. 財政失算(上)(下)

2012年9月2日星期日

兩條沉船


梁振英,可能係中台澳港九新界地方官當中最大一嚿政治負資產。

魏家福,可能係國企央企老總當中最有機會破產的一個。

中國遠洋(1919)公布上星期中期業績,又蝕幾十億,可能連續兩年高踞最蝕錢的國企榜首,鐘意人哋叫佢做「Captain Wei」的福哥,除咗同股東道歉,聽講親筆寫咗幾封信俾國務院求救,Captain Wei's SOS,怕且離唔開「國貨國運」呢幾味。

一個屈尾十,8月30日,Captain Wei竟然嚟咗香港,上面呢張相,可以在中遠集團網頁搵到,梁魏喜相逢,唔難想像,梁振英要大搞當年董伯伯壯志未酬腳先痛的乜乜航運中心,同Captain Wei呢個曾經何時「全球最大船隊」的「船長」,摸吓酒杯底咁。

兩條沉船撞埋一齊,唔知有乜火花,邊個同邊個SOS,不過呢,中遠樓下有隻中遠國際(0517),最新股價HK$2.85左右,現金值HK$3.64,即係話,投資者認為,中遠國際盤船務生意及資產,免費奉送再加每股8毫先肯要。

遲啲再講...

伸延閱讀:
1. 中遠集團: 魏家福董事长拜會香港特首梁振英