2011年9月9日星期五

中外銀緣(下)

(刊於2011年9月9日am730)

話說2005年3月,建行(939)當時一哥張恩照涉貪落馬,轟動中外金融界;3個月後更激動,美國銀行宣布25億美金入股建行9%,當時呢單刁,除咗係外資入股中國企業最大手筆交易,亦係四大國企銀行第一次引入外資。

美銀目前在建行H股股權,降至大約得5%,但撤退得算幾有秩序,雙方表面上仍好嚟好去,早兩日先公布,續訂「戰略協議」,延長至2016年,但係內容就修改咗唔少,當中最明顯分別,就係美銀向建行所提供「戰略協助」範疇,冇咗「風險管理」同「公司治理及管理」,好明顯,建行今時今日大支嘢咗,唔覺得太多嘢可以向美國銀行偷師。

美銀入股之後兩年,同建行關係屬於蜜月期,將香港業務友情價賣畀建行,建行當年年報有關業務發展表述,吓吓提住點樣在美銀協助下,改善管治及服務水平,去到舊年,係咁意提吓就算,2010年全年,建行只係派咗51名中層管理人員,去美國參加「跟崗培訓」,相對之下,滙控(005)同交通銀行(3328)合作關係就緊湊得多,雙方每年舉行2次「最高層會議」,兩個執行主席定期開例會,總結合作上出現問題,提出未來合作重點,交銀派高中層人員去滙豐銀行交流、「跟班實習」及培訓,舊年就超過3,000人次。

滙控入股交銀,係國企銀行第一段中外銀緣,咁耐以嚟從冇減持,理論上最有潛力發揮中外策略聯盟有錢齊齊搵效應,滙控加交銀呢個組合,在中國銀行市場,將會係一個不能忽視嘅長跑好手。中信銀行(998)同西班牙BBVA銀行亦合作無間,不過歐美銀行好莫財,美銀都要四圍撲水,歐債問題繼續惡化的話,唔知會唔會影響到雙方關係。

揀外國拍檔,最冇眼光,又或者手氣最差,都算係中國銀行(3988),09年皇家蘇格蘭銀行撲水應急,沽突中行策略持股,中行發言人評論皇蘇減持動時,竟然公開講咗一句:「不會忘記釜底抽薪的行為」,講到咁,仲邊會有計傾。

國企銀行同外資策略股東關係轉捩點,來自08年一場所謂金融海嘯,中國銀行家從此自我感覺良好,在北京眼中,中國銀行業發展,甚至會被視為「有中國特色社會主義」,同西方資本主義意識形態主要鬥獸場。歐美金融市場,最聰明又最賤格人才,絕大部分掛住搵人笨搵真銀,唔會選擇在監管機構發展,中國模式啱啱掉轉,最大牙力最有資力金融人才,先至會被提拔到去監管機構。

目前中國財金官員最高層,好似人行周小川、銀監劉明康,基本上十六大之後上場,見證中國金融黃金十年,十八大多數要退休大換血,爭櫈仔遊戲未塵埃落定之前,可能金融改革唔會有太大動作。05年美銀6月入股建行,開閘大放外資進場,7月人民幣匯改,至今國企銀行資產膨脹超過一倍,認真跨張,望返轉頭,原來如果政治保持穩定,中國金融改革開放,開快車速度可以好得人驚。

伸延閱讀:
#

2011年9月8日星期四

中外銀緣(上)

(刊於2011年9月8日am730)

國企銀行05年開始排隊上市,上市前指定動作,例必引入外國策略投資者,一嚟補充資本,二嚟增加市場信心,戰略合作拍晒拖有錢齊齊搵,今期睇睇,咁多年嚟,一段段中外銀緣,係咪全部鏡花水月。

美銀莫財,上星期進一步減持建設銀行(939)股份,套現83億美金,呢單今年第二市場最巨型交易,年初已經唱到街知巷聞,近百億美金貨,當然唔可以隨街亂掟,接貨者,第一要夠疊水,第二要同北京關係好,兩者加埋,就唔係咁多選擇,運用少少想像力的話,其實唔難推敲到呢單大刁背後多少脈絡。

美銀要出貨,第一時間,梗係要通知策略夥伴建行,建行如果唔想本身股份,被人掟嚟掟去掟到股價散晒,就要搵自己友接貨,今次美銀手貨,中資金融機構肯定接咗唔少貨,下次中人壽(2628)再公布業績,可以留意吓有冇增持建行股權。

美銀近年沽建行股份,沽極都仲有,其中一個最合作無間交易拍檔,就係新加坡淡馬錫。美銀09年第一次減持建行,淡馬錫已經幫手接貨,舊年建行供股,又接咗美銀供股權兼供埋股,上星期美銀第二次減持建行,又係淡馬錫幫拖,近30億美金接咗三分一貨,淡馬錫咁幫得手,可以想像,美銀出貨之前,甚有可能已經同淡馬錫打咗招呼,甚至係刻意讓路,等淡馬錫先套現再增持,令一個咁巨型股權變動,好有秩序咁完成。

淡馬錫大約每股6.26港元,減持建行套現12億美金,轉頭每股4.94元,又收返近30億美金貨,短時間內一賣一買,帳面賺到笑,橫睇掂睇,都唔似係主權基金長線投資風格,不過,經此一役,淡馬錫在國企銀行投資金額,應該已經增加到歷史新高,近兩年又咁積極支持國企銀行供股,北京都唔可以話新加坡政府唔支持中國銀行業,作為建行策略股東之一,淡馬錫同中方關係應該唔會受到影響。

美銀再減持建行之前,已經搵咗巴郡巴菲特入股撲水(唔知有冇搵股神幫手接建行手貨),仍然咁抵得諗明益淡馬錫,可以想像在新資本監管要求下,美銀認真莫財,美銀補充咗資金,其他歐美行家好似冇乜聲氣,大家應該留意吓,歐美大型銀行有集資需要,會唔會成為下一浪做淡借最佳籍口。

下回再續,睇睇除咗白銀真金,國企銀行同外資股東有冇感情好講。
伸延閱讀:
#