2011年2月18日星期五

三思思捷(下)

(刊於2011年2月18日am730)


上回講到,思捷(0330)係香港股市神話,07年高峰前,十年回報過百倍,但公司股價長升長有期間,董事高層急急腳套現減持兼跳船,奇奇怪怪。

任何一間上市公司,如果管理層出現好似思捷咁大變動,基本上可以當佢係一隻新股咁睇,即係冇往績記錄,亦即係最好唔掂。

思捷業務主加喺歐美,香港上市,分析員亦絕多數集中香港,有幾多個,試過山長水遠去德國,睇睇思捷新舗去唔去到貨?思捷俾人印象透明度高,識得湊分析員同芬佬,大家見佢年年交到數,人人有錢賺,管理層種種難以理解舉動,懶得深究。

唔好理佢男裝女裝衫褲鞋襪德國英國,公司牌面上話俾大家知,有兩大盤業務,一個係零售,一個係批發,所謂「批發」,唔係講緊粗製濫造一大埋底衫俾人散去女人街賣,而係講緊靠一啲分銷商去貨,銷售網絡,好似加盟店咁,唔係思捷自己經營。

唔少人會將思捷,同H&M相提並論,等如將西瓜同個桔比,H&M近年大舉進軍新興市場,全球銷售點, 2,200千幾間,絕大多數係自營店;思捷自己管理專門店,至舊年底,只有1,123間,批發業務網點有幾多?答案係:12,286個,仲每年千幾二千個咁增加。

呢個增長模式,熟口熟面,記唔記得財經茄哩啡,舊年寫過一篇「體育戰場」,講到內地運動服裝公司,賣時裝當7-Eleven咁做,分店開到通街都係,牌面增長超勁,但真正財務風險同埋存貨壓力,去晒分銷商同埋加盟店,思捷之前增長模式,幾乎同出一轍。

08年信貸危機之前,批發業務,一直係思捷盈利增長引擎,佔收入六成,一場所謂金融海嘯,好多怪事現形,思捷批發業務生意即刻大跌,至09年6月年度,佔比跌到52%,上個財政年度,再下降至46%,至12月半年,更加跌到4成多少少,思捷連續十幾年收入快速增長神話,就係因為批發業務出事斷纜。

俾你做管理層,你都識得會講,批發業務收縮,因為策略調整囉,因為想加強公司品牌管理囉,不過,如果將管理層集體跳船,跳船後公司業績又大走樣兩件事放埋一齊,就令人好冇信心囉。

歐洲業務,佔思捷收入近8成,思捷喺歐洲搵乜嘢分銷商,喺批發業務散貨,呢個最重要訊息,從來唔會提及,咁叫透明度高囉,金融海嘯有冇分銷商打柴,亦冇交待過,思捷盤數是否健康,花幾多時間分析都冇用,因為唔知有幾多奇奇怪怪數口,埋喺分銷商層面。

思捷而家由一班歐洲人管理,同你講進軍神州,早排仲翻兜同華創(0291)合資企業股權,華潤業務出名多元化,即係雜,連華潤都啃唔落一嚿豬頭骨,思捷有幾把炮,你話呢。股價殘,永遠唔係買入原因,買思捷撈底,三思三思。

關連文章:
1. 三思思捷(上)(下)
2. 體育戰場(上)(下)

伸延閱讀:
1. 蔡東豪: 「思捷神話」重要元素在於管理層管理投資者期望

2011年2月17日星期四

三思思捷(上)

(刊於2011年2月17日am730)


早日買老西,諗起畢業後第一套飲衫,幫襯思捷(0330),半年唔夠甩晒線,發誓以後唔幫襯。

唔好話三思,思捷係一間百思不得其解嘅公司。

呢隻嘢,絕對係香港股市經典神話之一,十年前,仲係個幾兩蚊,07年高峰,差唔多去到130元(港元,下同),邊位高人食足成個升浪,回報100倍。講緊好似阿仙奴數巴塞隆那4比0、利物浦後來居上贏英超冠軍呢類超冷或然率,先有過百倍賠率。

公司創辦人兼當年主席邢李㷧,亦應該係過去十年,喺香港股市撳咗最多現金一位富豪,最高持有超過4成思捷股權,期間大大話話減持八、九次,套現超過二百 億,舊年2月持股賣到唔夠半成,唔需要再公布買賣手影,斷估應該已經沽清。邢生大手減持,多數在十幾蚊至70元左右發生,一路賣股價一路升,如果喺高位一 炮過出貨,可以套現超過七百億,從呢個角度睇,你又可以話邢生係香港股壇中,最唔了解自己公司增長潛力嘅公司主席。

330.YING
思捷十年,越沽越有

08年信貸危機之前,錢多刁多,佐丹奴(0709)股權分散,日本Uniqlo都死心不息想全面收購,如果當年大大間思捷,咁高增長,又有一個咁想套現走人大股東,你做賓架,都會挾個買家敲邢生道門,做番單時裝併購大刁,但係思捷從來冇話傳過有賣盤消息,一係冇人買,一係冇人敢買,有啲搲頭。

對住一盤高增長生意,主席娶咗大美人後無心戀戰江山,都情有可原,但其他管理高層,個個排隊較腳,套現走人,早幾年思捷每逢公布業績禁售期之後,一定有董事減持,賣舊股套現,呢個例牌動作,唔單止冇影響投資者信心,仲有分析員夠膽死講,公司業績交到數,高層有秩序減持離場,反而係公司透明度高表現,又係搲晒頭。

當日請教過一位會計高手老友,假設性咁問佢,一間公司,如果大股東賣舊股套現之後,反手將錢喺枱底放番入公司,製造盈利及派息增長,推動公司股價上升,再減持套現,如此反覆運作,可唔可以製造一間千億市值公司出嚟,老友話,呢啲故事劇本只會喺電影出現,一間公司每年攞到幾十億出嚟派息,好難假得去邊,香港監管機構唔係個個廢柴,銀行又眉精眼企,唔會同你顛咁話。

虛又好實又好,思捷近年,已經冇乜業績後批舊股呢個例牌動作,但股價反而一沉不起,當年投資者,好相信一班邢生等一班香港人,打造全球時裝品牌能力,今日管理層面目全非,靠一班歐洲佬,進運內地市場又得唔得,下回再續。

關連文章:
1. 三思思捷(上)(下)
2. 體育戰場(上)(下)

伸延閱讀:
1. 蔡東豪: 「思捷神話」重要元素在於管理層管理投資者期望