2012年9月20日星期四

太陽浮雲(下)

明明已經係2012年,到2015年止的「十二五」規劃,仲一個二個爆出嚟,出咗街有時又唔知去邊度搵,咪話唔煩,不過呢啲大部頭文件,對了解中國各行各業的發展,其實好有幫助,好似個《太陽能發電發展十二五規劃》咁,如果對香港的幾隻大陽能股有興趣,搵嚟望望冇乜蝕底。

求其搵樣簡單啲數字去講,根據呢個最新「五年計劃」,由於要將光伏應用出口變內需,就要加大太陽能發電的建設,之前五年狂炒水電風電,未來幾年應該會炒多啲太陽,發電量建設規模,會由2010年的86萬千瓦,提高到2015年的2,100萬千瓦,當中差唔多一半係太陽能電站,一半係「分布式光電發電系統」,前者講緊大項目大電廠,賣俾電網點計數十劃未有一撇,可以暫時唔理,後者講緊在工業園區、經濟開發區、大型公共設施等的建築物屋頂,放幾塊光伏電池,搞吓小型光伏發電系統咁。

而家已係2012年,「五年計劃」在2015年結為止,即係有1,000萬千瓦的小型光伏發電系統,會在未來3年落地開花,去到2020年,建設規模會提高到2,700萬千瓦,佔全國光伏發電54%。2020年太長遠,不過可以見到最新的政策思路,已經由之前的「大大大大」項目,變成分散式的小型蚊型項目,更加實際,亦更配合世界潮流,其實係好事。

香港掛住「太陽」兩個字的股票,隨口都數到三四隻,順叔唔熟,唔講咁多,反而有隻保利協鑫(3800),可以拎出嚟講吓。
呢隻嘢在2007年11月香港上市,當時大市仍旺,一隻集資十零個億(港元,下同)的新股,冇乜人留意,到今時今日,香港散戶可能都唔知道佢老闆朱共山係邊個,因為條友幾乎從冇接受傳媒專訪,招股時亦冇話好似其他上市公司咁招搖過市,就好似間公司唔關佢事咁。

不過保利協鑫既然掛住「保利」個招牌,肯定都唔係善男信女,5年前掛牌之時,堂堂保利集團董事長、鄧伯爺個女婿賀平,亦親現身到賀,保利協金個董事局,當時已經星光熠熠,坐住唔少保利集團的高層,其中一位執行董事,叫姬軍,已故港澳辦主任姬鵬飛之子,連非執董都咁猛,有位羅志祥(Ryan Law),大摩Principal Investments (直接投資)的高層,幾乎成個董事局,都係在2006年上市前一年先加入保利協鑫,臨時拉夫食大茶飯。

保利協鑫上市的時候,由招股文件到香港傳媒,冇人提過一隻「硅」字,當時呢隻嘢的定位,叫做「中國最大的外資獨立熱電廠營運商之一」,「外資」即係民企,五大國企電廠已經霸咗4成以上發電總量,計埋其他地方政府控制的電力公司,民企其實冇乜搵食空間,當時的電廠,更因為煤油價格高企冇啖好食,保利協鑫竟然可以殺出一條血路。

當時保利協鑫亦冇講過乜嘢太陽能光伏業務,香港投資者更加好少人留意,朱共山自己個袋,收埋咗一個聲稱亞洲最大的多晶硅項目,江蘇中能光伏,如果冇估錯,當年朱共山及埋保利集團,本來想將多晶硅業務拎去美國上市,保利協鑫只係第二手準備,美國證監會亦未必對有中國軍方背景的企業咁鬆手,結果在2009年上演大茶飯,以一隻廿幾億市值的上市公司,蛇吞歌斯拉式作價263億元收購朱共山的多晶硅項目,由一間民企電廠,變身中國光伏業龍頭,其後更加巴閉,引入中投,成為得到中國主權基金祝福的極少數港股。

今期太忙,閒話家常講咗幾咀保利協鑫,唔係話佢抵買,而係想講香港上市的內地企業,背後有好多普通散戶睇唔到的關係及故事,掌握唔到管理層或主要股東的動機,最好唔好掂,遲啲有機會再講。


太陽浮雲(上)

呢期事忙,搵個唔太熟悉的行業做吓功課,開太陽能。

一個行業好景的時候,好多嘢可以收收埋埋睇唔到,到淡市間間公司爆到一褲都係,反而好多嘢會現形,反而係了解一個行業最好的時候,中國光伏企業就係好例子。

2006年福布斯中國富豪榜,突然殺咗個施正榮出嚟,間公司尚德太陽能在美國上市,香港人冇乜人識,俗語有云,富豪浮雲,真係有錢有米,自己都唔知有幾多錢,呢類幫有錢袋數銀紙的乜乜物物浮雲榜,應用在中國,最大價值查實係預測吓邊個會爆煲,或者係公司股價由盛轉衰的轉捩點,那些年的周正毅黃光裕,2005年中信泰富(0267)的榮智健、2007年碧桂園(2007)的楊惠妍、2009年比亞迪(1211)的王傳福,都擺脫唔到呢個軌跡,當然仲包括施正榮。

以前的「中國首富」,多數因為被人捧上神枱之後,樹大招風,富豪榜變殺豬榜,近年的浮雲榜,大致上反映到行業周期的起跌,「中國首富」多數出現於當旺行業,而當旺行業又最容易吸引大量競爭對手進入,結果唔係自己被衝昏頭腦,就係個市做得太爛大家一鑊熟,2006「中國首富」施正榮身處的中國光伏業就係最佳例子。

好簡單咁講,成條光伏產業鏈,由唔使錢的太陽開始,最上游講緊香港人開始熟悉的多晶硅,中間有太陽能電池片及電池組件,下遊就有光伏電站或者家居太陽能發電等應用系統,聽講中間仲有好多高技術環節,由美國德國日本等發達國家掌握,中國光伏企業最集中在下遊,即係太陽能電池片,到2010年,產量已經佔全球50%以上,不過冇乜聽過有幾多間可以一條龍做到成粒太陽能電池出嚟,全國企業掌握唔到一半的光伏電池生產設備,唔使問阿桂,好似iPhone咁,揹起部嘢500蚊生產成本的4嚿水低端部份,再掟俾人做最後一程然後賣5,000蚊。

在中國國家能源局網頁炒回來的資料,中國在全球光伏電池的佔比,2004年只有4%,唔夠10年,而家半匡天下,有5間太陽能電池生產商產量排全地球頭10位,有咁爆炸性增長,當然因為需求大,但同時又可以肯定,呢個行業在大陸得到好大力的國家政策支持,歐洲美國針對中國光伏產品出口的貿易保護措施,應該好易捉到痛腳。當然啦,陰謀咁睇,亦唔排除歐洲及美國碌完中國廉價出口張咭,為自己的太陽能發電市場打好市場基礎之後,過橋抽板,再將中國一軍。

大家返到大陸,甚至上網求其睇吓內地民居的相片,有幾何見到屋頂會有幾塊太陽能電池,即係話中國雖然係光伏電池生產強國,查實同時只係太陽能應用小國,有9成光伏產品向外出口,當中美國佔10%,歐洲銷量70%,歐盟發起向中國發起反傾銷調查,封殺中國光伏產品出口,好似尚德太陽能呢類公司,轉身唔夠快分分鐘執粒,聽講而家幾間最大的電池生產商,已經由競爭對手變咗親密戰友,鎗口對外要向歐盟齊齊抗辯,同時又聯署向阿公求救,避免中國光伏業出現「滅頂之災」。

喺呢個時候,上星期阿公由國家能源局出手,整咗份《太陽能發電發展十二五規劃》,講緊之前「能源發展」已經有個「十二五」,「可再生能源發展」又有個「十二五」,而家終於明白阿公點解咁多乜乜物物「十二五」規劃,可以見步行步,夠量彈性。

中國在光伏業的最大優勢,查實係全國有廣大面積被太陽照住,唔搞太陽能發電有啲浪費,不過長年以來,個個掛住搞大項目,大大個發電場起好楝喺度,上網電價又同電網公司講唔掂數,結果得個講字,最新《太陽能發電發展十二五規劃》,聽講就係要扭轉呢個局面,在歐洲美國市場大風大雨的時候,出口轉內需,下回再續。

關連文章:
1. 太陽浮雲(上)、(下)

2012年9月19日星期三

飆凸你的夢(下)

上回臨尾整咗一抽數字,講緊比亞迪(1211)近年燒錢速度驚人,物業廠房的固定資產,比東風汽車(0489)仲要多100億,(人民幣,下同),講緊東風舊年賣咗217萬架車,係比亞迪的5倍。

比亞迪搞落咁大嚿固定資產,主要原因係大食,成個新能源產業,由太陽開始的太陽能電池,到最後的電動車,成條鏈都想食,呢個垂直模式,去到自己間車廠一樣咁直,除咗車轆及玻璃,其他乜都自己做,呢種生產模式,生意好可以量產時,更有成本優勢,賣唔去就蝕得更深,而且對於一間只係得十年八載經驗的車廠嚟講,容易出現品質問題,比亞迪早兩年因為股神帶脅知名度太高,出現問題時好自然初人唱得更加大聲。

好似比亞迪頂住股神個朵,美國幾乎冇人唔識,美國分公司開遲咗一年,投資規模及員工人數比想像中大幅縮水,當然俾當地傳媒鬧到狗升淋頭。聽講早排公布半年業績,開個投資者推介會議,公司管理層更當面被人噴到一臉屁,內地傳媒更加唔使講,類似「比亞迪大敗局」、「兵敗山倒」的大篇幅報道,幾乎一個月見幾次,黑仔成咁,實在好難想像到,兩年前的今個月,王傳福仲在胡錦濤面前講「Build Your Dream」,仲同巴菲特攬頭攬頸。

早排寫咸魚股時講過,最有用的財經資訊,唔係人哋衰到貼地時踩多兩腳,而係睇睇一間公司的管理層,在逆境時做緊乜做咗乜,有關比亞迪的新聞,香港唔係咁多,不過內地傳媒仍然有一大蘿,有興趣可以留意吓,肯定有用過大行報告。

今年4月,比亞迪在北京搞咗個「汽車技術品質發佈會」,提出公司所有車型,「四年十萬公里」的保養保證,聽講有啲南韓車10年保養都有,比亞迪呢個唔算最長的品質保證,不過由於成架車幾乎都係比亞迪自己砌出嚟,99.9%以上的汽車零件都在呢個超長保養保證之內,等得4年蚊都瞓,都係嗰句,大陸車主雜誌成行成市,一個車款賣唔賣得,呃唔到人,近兩年國產車市場份額下跌,唔夠老外車廠鬥,比亞迪呢類年輕車廠,鬥平仲有得鬥,鬥品質就應該冇咁快,嚴控品質同時要面對成本上升的問題,口碑更要時間累積,即係傳統汽車業務進入長期戰鬥,短期內唔容易有破。

比亞迪近兩個月,先後有兩單新聞,在天津及雲南投資廠房,生產電動的士及巴士,兩個項目投資都係十零廿億計,唔係細數,繼續燒錢。中國有50萬架大巴,仲有120萬架的士,加埋佔全國車輛數目唔夠2%,不過燒油量超過20%,排污量就應該更高,即係話如果中國大力搞電動汽車,由地方政府推動的公交市場肯定係第一步,講到明地方政府,有地方主義,唔係話去就去,比亞迪似乎焗住「基地換訂單」,起埋廠房換取電動公交車的市場。

比亞迪電動車在公交市場,仲有少少進展,經常聽到山旯旭的外國城市,都會幫襯吓佢買幾架電動車,好似香港都會搵一兩架比亞迪的K9同電動的士嚟試玩,呢個市場好多公司都搞緊,聽講早排日產(NISSAN)個老外總裁就嚟咗香港搵特首梁振英,傾咗日產的電動的士有冇得諗,不過近排中日關係搞成咁,日本車在中國呢兩年應該都冇得點發圍,比亞迪的電動車在香港試行時,就有機會近距離睇吓佢有幾多斤兩。

運會轉,勢會變,如果2010年的9月係王傳福的運勢高峰,兩年後的今日,怕且都已經跌到係低谷,由一個極端掉去另一個極端,如果80蚊樓上的比亞迪,被市場及傳媒過份追捧,今日15蚊左右的比亞迪,又一定可能被市場及傳媒過份睇淡,當然啦,講到運勢呢家嘢,似技術分析多過基本分析,更似係賭仔分析。

關連文章:
1. 飆凸你的夢(上)(中)(下)
2. Build Your Dream(上)(下)
3. 忽然暴跌(下)
4. 股神造車

2012年9月18日星期二

飆凸你的夢(中)

之前都講過,比亞迪(1211)有三大嚿業務,最初做手機電池等部件,後來買咗間車廠搞呠呠車,跟住就係新能源,即係比亞迪老闆王傳福成日講住的「矽鐵戰略」,點鐵點矽就唔知,不過呢嚿嘢聽講係當年氹到股神落搭的叉燒,再拆細嚟睇,有太陽能電池、儲能電站,同埋電動車等再生能源應用。

有堆太陽能電池發電,跟手就用儲能電站收埋電能,要叉電時放出嚟幫架電動車叉電,成個大計,聽來的確幾動人,不過同時間做,就要七手八腳先掂,俾你係Jack Welch加愛迪生的混合體,可能都要細胞分裂多幾件出嚟先掂。

比亞迪市值約400億港元,只係東風汽車(0489)的一半,不過去到舊年底,比亞迪僱用員工超過17萬人,偏布全球,得一個執行董事,叫做王傳福;東風汽車只係有10萬員工多少少, 大部分在中國,有5個執行董事,仲未計國控母公司的支援,剩係睇呢兩組數字對比,就知道比亞迪在管理上出咗乜事。

比亞迪的手機電池及傳統汽車,早幾年本來好賺錢,賺咗就補貼新能源業務,不過前者近年大客仔Nokia自己水浸眼眉,後者在車市退燒後唔夠老外車廠鬥,新能源業務又繼續大力投資燒錢,環環相扣的結果,是但一辨甩轆都全部企喺度,好似比亞迪咁齊齊起火,就火燒連環船。

比亞迪成個「矽鐵戰略」產業鏈的最上游,王傳福冇顛到做埋多晶硅同保利協鑫(3800)爭飯食,但投資搞太陽能電池絕對冇手軟,上去陝西省政府及省發改委的網站,會見到一個《陝南循環經濟產業發展規劃(2009-2020年)》,當中有個「十大工程」,比亞迪赫然上榜,講緊在2009至2015年,比亞迪會投資225個億元(人民幣,下同),發展一個產能5,000兆瓦(MW)的超級生產基地,講緊早幾年的「中國首富」施正榮間尚德大陽能,去到舊年底總產能都唔夠3,000兆瓦,225億人仔呢個投資額,可能都係地方政府吹得就吹,不過大概亦可以見到,王傳福有幾大胃口。

早兩年曾經有傳過,比亞迪在陝西的廠房土地使用權有啲問題,唔知道5,000兆瓦太陽能電池生產基地搞成點,比亞迪亦冇資料披露,拖慢嚟搞反而係好事,因為在阿公大力支持下,由多晶硅到太陽能電池都供應過剩,由舊年開始,美國開始向中國光伏產品進行反傾銷及反補貼調查,歐洲呢個最重要市場今個月亦到開始嚟料,搞到光伏企業叫晒救命,據傳媒報道,剩係太陽能電池業務呢一辨,比亞迪今年上半年已經蝕咗6個億。

傳統業務叫救命,新能源業務市場需求又未出現,至今年6月半年,比亞迪純利大幅縮水94%,做214個億生意,賺得1,600萬,比亞迪舊年上半年亦係冇乜錢賺,下半年賺返十幾個億,不過以目前火燒連環船的趨勢睇嚟,2012年全年業績都涷過水。

不過平時木木獨獨的王傳福,好似係一個唔識驚的人,比亞迪「Burn Your Money」的速度繼續驚人, 2010年財政年度經營現金淨流入31億元,資本開支116個億;2011年經營現金淨流入58億元,資本開支再燒105個億,講緊至舊年底,總借貸包括銀行貸款約184億元,當中113個億今年內要償還,現金唔夠50個億,繼續有集資或發債的需要,當然啦,都唔排除銀行會鬆手俾比亞迪碌條數過多一兩年。

比亞迪以一年百億資本開支的速度不斷踩油,以呢間咁High Tech的公司嚟講,應該花唔少銀兩在科研,不過過去5年,比亞迪花在研究開發的費用,大約十零億左右,反而物業廠房的資產,不斷膨脹,2007年底大約100億左右,去到舊年底,已經超過300個億,又用東風汽車比較,汽車產能大過比亞迪成條街,「物業、廠房及設備」一項非流動資產,只係216個億。

下回再續。

關連文章:
1. 飆凸你的夢(上)(中)(下)
2. Build Your Dream(上)(下)
3. 忽然暴跌(下)
4. 股神造車

2012年9月17日星期一

飆凸你的夢(上)

今期開比亞迪公司(1211)。

太極陰陽,衰極必盛,盛極必衰,對於一個中國商家佬嚟講,最盛最威水,莫過於做到變成「中國首富」(唔含港台澳),前腳同全世界最有權力的政客排排坐,後腳同地球最有錢的富豪攬頭攬頸,兩年前的今日,比亞迪主席王傳福正正處於呢個人生及事業巔峰。

2010年9月初,深圳慶祝特區成立30周年生日,中國國家主席胡錦濤帶隊南下搞大龍鳳,親自參觀咗比亞迪的產品展覽,在慶祝大典上,只有四位企業代表夠巴閉發言,包括啱啱同胡總揸完手的長實(0001)主席李嘉誠,招商局國際(0144)的老總傅育寧,在深圳搞山寨版ICQ起家的騰訊(0700)主席馬化騰,仲有一個就係王傳福。

胡總在2010年當選美國時代雜誌的風雲人物,話佢係地球最有權力的人,斷估冇人會反對,被胡總高格調表揚之後,王傳福更加唔得閒,因為要接待訪華的巴郡主席巴菲特同埋微軟主席蓋茨,全球最有米的兩位商界巨擘,風塵僕僕去到中國頓變市場推廣的扯線孖公仔,由深圳到北京遊花園到長沙,又簽約儀式又新車落地典禮又抽獎,當時內地各大小傳媒,甚至外國傳媒,幾乎日日都係巴菲特,對「比亞迪」招牌知名度的增值作用應該極大。

王傳福運勢猛成咁,當時順叔寫過篇《股神造車》,話最好留意吓內地車主的留家口碑,如果之後忍手唔寫,財經茄哩啡今日就可以撲出嚟認屎認屁,不過後來多手寫多兩咀,包括舊年初篇《Build Your Dream》,話有股神持股墊底,比亞迪「發惡夢機會唔係太大」,剩係呢句,已經錯到開巷。

2010年9月底股神訪華的時候,比亞迪已經由高位回落唔少,不過市值仍然超過1,600億(港元,下同),每股60蚊樓上,最近已經跌到16蚊左右,由舊年初40蚊的水平計,到而家都冇咗60%,「Build Your Dream」變咗「Burn Your Dollars」,雖然未爆煲,不過夢想未「Built」,美夢已經飆凸。

兩年前的今日,比亞迪行運一條龍,盛極轉衰,之後兩年又真係冇乜好嘢,黑仔到暈,首先係阿公改變以政府補貼刺激車市兼內需的政策,北京上海等一線城市,更因為大塞實而引入限購限牌的措施,車市在2009年之後的爆炸性增長突然死火。

當日幫股郡穿針引線入股比亞迪、一度被視為股神接班人大熱的中美能源(MidAmerican Energy,巴郡入股比亞迪的上市子公司)主席David Sokol,更因為涉嫌內幕交易,做刁濕手,舊年3月被迫辭職,之後中美能源再冇派人入比亞迪的董事局,外界難免懷疑股神同王傳福的關係,甚至有人會聯想到,股神及拍檔Charlie Munger之所以入股比亞迪,可能被人跣咗一鑊,間接大大打擊外國投資者對比亞迪的信心。

比亞迪的電子車,在公共交通仲有少少市場,仲有少少希望,尤其係在深圳老巢,不過好衰唔衰,早幾年個月,連架電動的士都炒車,仲要炒到漂移幾條行車線再著火,雖則話所有汽車極速碰撞都可能爆炸著火,不過炒車更可以死人,比亞迪電動的士著少單新聞一出,股價急跌,市值一日唔見百幾二百個億,人稱「史上最昂貴車禍」。

近年唔少中國民企消費產品信破產,越高調的民企,越容易樹大招風,比亞迪個朵咁響,又做緊一啲冇乜人明的High Tech生意,好意揩嘢,早兩個月,曾經有人傳過DaimlerChrysler個中國電動車聯營公司可能掟煲,又傳過深圳電動的士可能篤數,市值接近400個億但係幾乎冇錢賺的比亞迪,隨時可以成為快閃空軍的狙擊目標。

呢度只係講緊,幾樣比亞迪自己控制唔到的外在黑仔因素,比亞迪的三大主業,包括電動車、光伏業務及手機電池,過去兩年齊齊開倒車,有咁黑得咁黑,下回再續。

關連文章:
1. 飆凸你的夢(上)(中)(下)
2. Build Your Dream(上)(下)
3. 忽然暴跌(下)
4. 股神造車