2012年8月17日星期五

摩笛追魂

又係大摩,個零月前叫人睇6毫,轉頭3毫8批股,有刁做,又可以忘記一切Suspend coverage了,同一劇本,舊年7月查實已經上演過一次,大摩支笛,服,勁過年年氹到靚模性交轉運的師公...

2012年6月29日

2012年8月16日



關連文章:
1. 蒙能所不能
2. 變型金礦(上)(下)

電商血拼(下)



上回講到,內地電器零售公司爆發割喉減價戰,京東商城及國美(0493)蘇寧管理層的微博變成最佳觀戰地點,人哋噴口水,九唔搭八的SOHO中國(0410)主席潘石屹趕住抽水,有網民索性叫呢位日日掛住在網上風花雪月的發展商,搞吓減價戰等大家可以買平樓。

電器同樓最大分別,在於前者可以係好多個割裂的市場,例如電視機劈價劈到血本無歸,iPhone可以完全唔受影響,假如國美買飯煲送iPad,作為生產供應商的美國蘋果都唔會睬你。

「樓價」基本上可以當成一間上市公司的「股價」咁睇,一個個住宅單位的成交價,直接左右「股價」上落,亦即係話,地產商好大程度上,坐埋同一條船,劈「樓價」等如劈自己有份的公司「股價」,所以地產商劈價多數唔係為咗隊冧對手,而係為咗自保;中國電商血拼又好唔同講法,國美蘇寧可以趁住京東商城未上市,以競爭消滅競爭,以本傷人,恃住自己本帳簿仲有咁上下斤兩,用短期內盈利的波動,換取競爭對手的消失。

呢場在虛擬世界進行的割喉大戰,同十幾年前壹傳媒(0282)老闆黎智英的蘋果速銷非常相似,當時百佳惠康兩大超級市場,亦曾出現過短暫的惡性減價戰,最後結果係蘋果速銷執粒收場,聽講肥佬黎因此出血十個億港銀。

當日蘋果速銷挑戰超市霸權失敗,有人話因為香港兩大超市背後的地產財團使橫手,威迫利誘供應商唔係供貨俾蘋果速銷,肥佬黎被迫從海外入貨,最後頂唔順物流成本而執粒,呢個香港「反壟斷」的典故,相信唔少人都聽過,可能程度有多高,可以睇睇家樂福在香港都生存唔到,掉轉頭百佳在上海亦要執粒,反而擁有大量內地貨源的華潤創業(0291),旗下超市及便利店在香港越開越多。

香港的經驗,或者可以用嚟評估吓中國呢場電商血拼的勝負結果,電器零售公司只係銷售代理,唔似得地產商,本身並冇生產能力,供應商惡啲定係零售商惡啲,邊個靠邊個,可以左右呢場電商血拼的結束時間及結果,早排TCL多媒體(1070)海爾電器(1169)先後撲出嚟想叫停惡性競爭,出發點唔係話驚影響盈利,而係怕零售商拖長周轉找數期。

網上罵戰鬥多口水,割喉減價就要鬥多血,國美及蘇寧本身已經坐住幾十億現金,可以打持久戰,蘇寧一個月前發新股俾大股東注資45億元人民幣之後,日前又宣布計劃發債集資最多80個億人仔,減價戰又點需要過百億,蘇寧擺明車馬就係全力進攻姿態,為網上業務及物流配套做足準備。

京東商城聽講先後經過三輪私募集資,早幾個月嚟香港見人,曾經傳過第三輪注資的估值,等如京東商城2007年第一輪的100倍,數目可能有出入,不過京東商場面對最大問題,係背後點樣說服唔同的基金股東拆掂條數。

國美暫時未有注資行動或消息,不過今個星期,幾份內地傳媒先後報道過,國美大股東黃光裕,有意大減價出售在北京的國美商都地產項目,套現大約50億人仔。

之前講過,身陷囹圄的黃光裕,又經歷早兩年的國美控制權爭奪戰,只係手持3成幾國美股權,應該冇乜安全感,如果唔想放棄盤生意,有一定誘因提高持股比例,而家國美股價仲低過當日貝恩資本的「白武士海嘯價」,公司又存在一定注資需要,如果黃光裕變私人持有的地產項目套現半百億消息屬實的話,可能係黃光裕大手增持股權的前奏。

關連文章:
1. 電商血拼(上)(下)
2. 國美家事(上)(下)

2012年8月16日星期四

電商血拼(上)

這也是在微博抄回來的...


1945年8月15日: 東京向美蘇投降


2012年8月15日: 京東向蘇美宣戰


今期睇睇中國電器零售公司一場打到七彩的血戰。

3個月前寫《國美家事》,雖然冇寫出嚟,唔怕坦白講,當時望住國美盤數,覺得國美電器(0493)算平,可以留意,雖然有留意到傳統電器零售公司,受到網上新晉對手挑戰的市場趨勢,不過冇諗過會演變成一場電子商貿大血拼,5月初國美市值仲超過200億銀(港元,下同),過去3個月曾經再插超過一半。

香港人講內地公司或者市場發展,始終隔山睇牛,到喉唔到肺,呢輪睇報紙,先知道國美及老對手蘇寧電器(深A2024),同網上對手京東商城打到飛起,幾間公司不但在網上銷售鬥劈價,幾間公司及管理層在各自微博的口水戰,更加激烈,加埋網民你一句佢一咀,學識唔少嘢,大家得閒開個微博戶口,關注吓內地上市公司管理層或者政府智囊的發言,對了解中國市場好有幫助,最少有用過大行報告。

國美7月底發出盈警,一間去年純利接近20億元人民幣的全國第二大電器零售公司,今年頭半年竟然見紅,原來在7月中,京東商城老闆劉東強,已經在自己的新浪微博放下戰書,要掀起「中國電商史上規模最大、最慘烈、最全面的價格戰」,國美及蘇寧的管理層亦各自在微博回應,國美自封「價格屠夫」,蘇寧聲言不惜割喉,「主要目標就是要幹掉京東」。

血拼在今個星期進一步惡化,劉東強宣布3年之內,「零毛利」賣電器,所有貨品保證比國美及蘇寧平足1成,所有員工違反呢個最高指令,即炒,並且即時全國招聘5,000個「美蘇價格情報員」,月薪不低於3,000人仔,工作就係駐守國美及蘇寧的分店做無間道,幫助消費者格價,亦即係擺明在競爭對手大本營搶客。

割喉減價,已經唔係講乜嘢銷售服務品質保證,而係鬥緊資產負債表實力,京東商城最大弱點,就係錯過咗上市的機會,雖然股東陣容包括老虎基金等水喉,不過未必個個肯陪你顛,劉東強亦有在微博透露,日前同各股東開過會,有「一個股東」話「除了錢什麼都沒有」,叫京東商城「往死裡打」,不過就冇透露其他股東的取態,更冇透露股東有乜打算進一步注資,支持放血式大減價。

管理層在網上高調透露公司的策略及取態,雖然有助增加透明度,不過太惹火的話,其他股東看在眼裡,始終唔係一件好事,如果有一間上市公司的話事人,成日在微博阿吱阿咗,又或者成日掛住大發謬論,一係呢間上市公司唔使睇,一係呢位話事人的言論唔使點睇。

當然唔排除有高人都係可以一心二用,好以SOHO中國(0410)主席潘石屹咁,可以話係一個全職博客,每時每刻都在網上風花雪月,呢位早排被人惡搞慘變「性功能障礙」代言人的上市公司主席,可能管理實務大權交晒俾賓架老婆,可以全心全意做生招牌扮Posh,網上熱點邊度多人圍觀,多數見到潘Sir蒲頭插一兩咀。

劉強東微博係口水大戰的前線,潘Sir竟然又嗱嗱聲去抽水,話佢好羡慕京都商城,因為有班好寬容的股東,公司唔賺錢都唔緊要,又乘機曲線晒吓命,話自己見親股東,股東都迫佢提高回報增加派息咁,最好笑係有網民見到潘Sir蒲頭,即時串佢兩咀,希望房地產公司,都可以好似電器零售公司咁,減價傾銷,鋤低樓價益街坊。

呢個唔純粹係笑位,大家可以諗吓,中國大型電器零售公司得幾間,房地產公司有幾萬間,電商大戰可以咁激烈,房地產公司雖然被阿公宏調調到水緊,但又唔係太多劈價搶客的情況。

下回再續。

多言「被代言」

關連文章:
1. 電商血拼(上)、(下)
2. 國美家事(上)(下)

伸延閱讀:
1. 京東商城劉強東微博

2012年8月15日星期三

金融義和團


呢篇嘢,唔係乜嘢分析,趁住日本二戰投降67周年紀念日,標吓童贈吓慶。

如果今日有人吹雞,成立「金融義和拳」,專門唱衰老美,順叔呢類憤怒中坑,必定成為團民,分分鐘渣打(2888)滙控(0005)都會派人加入添。

08年美國樓市爆煲引發全球信貸風暴之後,美國佬對金融機構做咗唔少嘢,渣打呢舖之前,已經最少6單,全部都係歐洲銀行。

曉你老美銀行最能乾淨 (資料: JP Morgan)

曉你老美啦,美國佬銀行最能乾淨了,挑。

中國有冇模式,唔能知,不過有一樣嘢可以肯定,老美模式更加乞人憎囉。

伸延閱讀:
1. 守財奴: 山姆無恥金融暗戰(「金融義和團」標題抄自呢篇嘢)
2. 左丁山: 打擊渣打

放眼中電(外篇)

包立賢 vs 羅拔迪尼路

2011年12月,中電(0002)的海外資產,第一次超過集團5成比重,可能因為要衝出海外,所以搵個袋鼠國賓架做老總,又可能貪條友靚仔,湊得米高嘉道理開心啩。不過呢,袋鼠國CEO帶住中電返自己鄉吓買嘢,成績認真麻麻,啱啱公布中期業績大跌,就係澳洲市場帶脅(印度亦唔係特別出色)。

相對電能國際(0006)的港燈,中電在香港仲有好大自然增長的空間,最近又多咗亞皆老街住宅項目,利率接近零,中電呢類收息股本來唔太差,不過資產負債表上,「衍生金融工具」嚿嘢越嚟越大件,去到今年6月,流動及非流動「衍生金融工具」資產,足足有62.6億(港銀,下同),未到期合約總額16.2億,聽中電自己講,呢抽嘢主要用嚟對沖澳洲的能源買賣電力價格。

中電間TRUenergy,經過多項收購及多次重組才砌出來,作為一間公用事業,財經茄哩啡睇咗咁多年,都唔知道TRUenergy的實際盈利能力,只係只道中電在澳洲做生意,要坐住一大抽對賭合約,盈利的能見度好低,英聯邦國家真係咁好搵?

中電港燈在香港做生意,夾埋每年賺百億,幾時聽到要做乜嘢對沖,要坐住咁大嚿「衍生金融工具」,近年唔少評論,例如最近的《金融時報》,話長和系在英聯邦國家複製乜事力場,因為鍾情民主及法治制度喎。

如果真係咁,97年之後,乜事力場應該在香港大力推動民主啦係咪?咪玩啦,如果可以的話,相信港燈希望香港現有政治制度千秋萬世不變。

關連文章:
1. 放眼中電(上)(下)

伸延閱讀:
1. FT: HK Tycoon Sees Land of Opportunity
2. FT: Assets test Li’s mettle

放眼中電(下)

(呢篇嘢急就章,遲啲會作出一些改動)

上回講到,中電控股(0002)壟斷九龍新界的電力市場,相對於局限港島的電能國際(0006),中電的本土市場仲有相當發展空間,例如西九南九兩大發展項目,仲有在新界可能出現的新市真,都可以帶嚟以萬計甚至十萬計的新增商住用戶,仲未計中港邊境的發展,例如河套區的發展,供電好可能都係幫襯中電。

中電本身已經有相當規模的內地業務,一直有賣電到內地,仲有25%的大亞灣核電站,中電大本營,地理環境上連接中國大陸,比起電能旗下的港燈有更大自然增長空間。不過有辣亦有唔辣,同大陸市場更貼近,唔需要過大海,駁條電纜過嚟都易一點,中電的壟斷性優勢,所以亦較容易因為監管環境的轉變,例如開放電網,受到內地國企的挑戰。

除咗潛在的市場機會或競爭,內地市場對香港電力市場的最大影響力,在於燃料供應,香港政府近年推動更清潔能源,為本地發電廠設定更嚴格的排放上限,能源結構向天然氣靠攏,可以話係近年電力市場監管的最重要變化。

從中電管理層早幾年的言論,同埋年報的表述,相信中電本來有興趣染指天然氣業務,包括在大鴉州發展液化天然氣接收站,中電曾經提及,如果成事,有助香港在國際市場入口價格更具競爭力的天然氣,再搞大啲,香港甚至可以在液化天然氣接收站市場,同新加坡爭吓飯食。

2008年港府同兩電簽署新的利潤管理協議,同年電力市場的能源供應亦出現咗一個突變因素,作為中央政府「挺港」措施之一,港府同中國國家能源局,簽署咗一項能源供應諒解備忘錄,簽咗呢個備忘錄之後,中電好快放棄咗大鴉州起接收站的計劃。

絕大部分「挺港」措施,其實一家便宜兩家著,例如呢份能源供應備忘錄,香港叫做未來20年有穩定的能源供應,包括核電及天然氣,大陸亦唔會蝕底,有關天然氣部分,中海油(0883)集團會繼續以市價向香港供應海上天然氣20年,中石油(0857)集團亦會透過西氣東輸二線向香港供應液化天然氣,不過接收站設於內地一邊。

中電目前天然氣供應,主要來自中海油母公司旗下的崖城氣田,合約20年前簽落時,油價20蚊美金一桶, 據中電星期二業績記者會時透露,中石油12個月內會向中電供氣,不過供氣價格相等於現時的三倍。

從中電角度睇,港府選擇內地作為長期天然氣來源,客觀效果上,避免咗興建接收站所需的巨額資本開支,降低咗加電費的誘因,不過同時令香港電力市場的燃料供應,掌握在大型國企手中,國企市價供氣,中電將燃料成本轉嫁予香港用戶時,港府又加入輿論鬧埋一份,中電主席米高嘉道理當然氣頂。

氣頂一件事,數仍然要講,今年底就要進行利潤管制計劃的中期檢討。中電同電能實業同撈同煲,食同一行飯又唔需要爭飯碗,多得長和系的強大政經力量,中電多年來應該慳返唔少游說政府的財力物力精力,已經可以坐享電力市場的政策便利。兩電過去咁多年,同政府拗手瓜都站在同一陣線,一齊加價一齊轉軚,連拒絕向立法會透露「機密商業資料」的理由都一模一樣,即係好好傾。

不過中電在香港的本業,燃料供應既扼在大型國企手中,更重要係仲有自然增長的空間,用戶增加可以溝淡燃料上升的成本,呢個形勢上的分別,有可能反映在兩電在未來監管架構上的取態,中電同港燈未必會站在同一陣線。

中電本來傾緊收購埃克森美孚手上的60%青山發電股權,3月時突然宣布南方電網在後期加入洽購,最少反映中電都有意思受埋南方電網一齊玩,最近中電重新委任行政會議成員羅范椒芬做董事,放眼中電近來的部署,或者可以見到未來電力市場發展的脈絡。

關連文章:
1. 放眼中電(上)(下)
2. 公用功用(上)(中)(下)

伸延閱讀:
1. 中港能源供應諒解備忘錄

2012年8月14日星期二

放眼中電(上)



今期開中電控股(0002)

五大國企發電公司,近月因為市場開始唱衰煤價前景,股價反彈唔少,不過用星期一的收市價計算,A股加埋H股,市值總值仍然唔夠4,500億元(港元,下同),中電加埋電能國際(0006),已經接近3,000個億,即係3份之2之比。

內地電力市場廠網分家,中電及電能旗下的港燈,一條龍垂直式壟斷市場,亦有大量海外業務,唔可以直接比較,但係彈丸之地700萬人的電力市場,所養大的兩間電力公司,竟然可以同全球第二大經濟13億人口大國的五大發電國企匹敵,可以想像過去兩電有幾好搵。

兩電的香港業務,去年純利大約100個億,是否暴利尚屬其次,最緊要係穩定,每年穩袋幾十個億,2008年之前幾十年,最多間唔中被立法會砌鬧兩句,或者有人去總部門口示吓威咁,既無需要擔心競爭對手出現,更無需要擔心客仔走路幫襯隔離。

香港市場仲有一樣好,地域細,電纜可以駁少啲駁短啲,又好少話乜嘢自然天災,十幾年先扯一次10號風球,電線電纜唔會吹斷一兩條,近年乜嘢力場好似減弱,颳風韋森特襲港,中電青山發電廠只係運煤帶其中一節鬆脫墮地,供電系統冇受影響,同樣係天災,中電澳洲電廠,6月時煤礦場被洪水浸咗,發電量被迫減少又要付出額外重建開支,可想而知,香港對於兩電,由監管架構到自然環境,都係福地。

市場會飽和,咩嘢力場會減弱,監管架構亦會改變,兩電在香港呢個老地盤,近年擺出嚟個姿態,好似越嚟越受委屈咁,例如政府唔利用08年重訂利潤管制協議的時機加大影響力,早排兩電在商業協議容許範圍內加價,政府竟然加入輿論壓力一部分迫兩電轉軚,在商言商又好難唔發火,近日所見,尤其係中電,同政府講數拗手瓜時候,越見刀光劍影。

「在少數天數天朗氣清的日子,當我從中環的辦公室遠眺維港,我會看到西九龍填海區和啟德機場舊址,這兩幅土地已經丟空和閒置多年。假如中電在管理和營運九龍和新界供電系統方面,其決策和執行速度與效率也處於這種水平的話,那今天我大概會是在一片漆黑中和大家見面。」

中電主席米高嘉道理(Michael Kadoorie),唔好話發火開拖,咁多年嚟公開講嘢都唔多句,以上呢幾句怒片香港政府的評語,出自今年5月的中電股東會,當日米高嘉道理喉嚨痛出唔到聲,唔係放底新聞稿算數,要副主席毛嘉達(William Mocatta)代為發炮,務求電子傳媒有聲有畫,可見呢位已經植根香港的猶太富豪有幾火滾。

兩塊大型地皮,用嚟種菜都可以供應吓有機本地農作,偏偏放喺度晒太陽多年,大家試吓想像,米高嘉道理遠眺維港彼岸,映入眼簾計較心頭的,又點會只係兩塊空地政府效率,在呢位中電主席眼中,查實好可能見到西九南九項目落成後,以萬計甚至十萬計的潛在商住用戶。

中電同港燈,一個香港島一個九龍新界,各據壟斷一方,香港「地少人多」可發展空間有限的既定概念,對港燈可能仲成立,對中電又唔係咁講法,例如西九南九發展起嚟,就會為中電帶嚟大量的新增商住用戶,又例如政府要發展新界新市鎮衛星城市,中電又有生意做。

中電及電能市盈率不相伯仲,但相對於版圖局限於港島的港燈,中電的香港業務,仍然存在好大的地域性擴展空間,呢個廣被忽略的因素,既然係中電未來的重要發展潛力,亦好可能成為,中電為未來電力市場監管框架,同政府拗數時的重要考慮因素。

下回再續。

關連文章:
1. 放眼中電(上)(下)
2. 公用功用(上)(中)(下)

2012年8月13日星期一

Polynoma de Amor


聽到「Polynoma」呢個字,千奇咪心邪,唔係潮洲粗口「補你阿嬤」,亦唔係「亂尻咁愛」(Polyamory)。

「Polynoma」呢個字,長江生命科投(0775)管理層掛在咀邊同埋年報,已經好多年,Polynoma LLC聽講做「針對治療皮膚癌之黑色素瘤疫苗研發」,已經得到美國FDA獲准,進行第三階段臨床試驗,預計在歐美招募超過1,000個病者,首名病者已經接受疫苗注射添,最幾個月,仲搵咗件活躍於醫藥風投的「Dr John Chiplin」做CEO。

咁突破性進展,長命當然要搞吓動作,啱啱出份通告,話Polynoma LLC已經準備在Nasdaq上市。任何一間科研創投,仙女散花買100件嘢返來,其中一件修成正果已經可以回本有凸,但係長命上市超過10年,蛋都唔見生一隻,其他創投風投基金,晨早已經冇命被抄魷。

而家長命終於有可能生仔,,市場當然可以當係好消息,不過,如果參照長命個哎吔「家姐」TOM仔(2383)的經驗,時而Online時而Offline,又分柝又私有化的成長歷程睇嚟,長命分拆Polynoma LLC,即係代表私有化的機會大大降低。

長命當日市值一度高達200個億港元,Polynoma又值幾多個億?

Polyamory is wrong. 係咩?

作為最綜合的綜合企業,長和系小股東,當然希望管理層乜都識乜都愛,地產de Amor,電訊 de Amor, 港口 de Amor, 零售 de Amor, 石油 de Amor, 互聯網 de Amor...

Polynoma de Amor,囉。

關連文章:
1. 冇你咁長命

Romance de Amor

2012年8月12日星期日

利豐繼續吹

(部分內容刊於2012年8月13日am370)

財經茄哩啡當日在哈爾濱佛教大學讀書,學識一樣嘢,要發達要上位,最重要的能力,查實係吹水,拎條菜,行上台,吹15分鐘,明明講咗等如冇講,人人又拍爛手掌,前途無可限量。

「講咗等如冇講」的最高境界,下面有一個「哈佛大學」案例,仲有一個「哈爾濱佛教大學」案例,再放一次俾大家睇睇:

吹水最高境界: 講咗等如冇講


哈佛案例


哈爾濱佛教案例

每次見到利豐(0494)管理層,好認真咁講佢自己條嘢,即係「供應鍊」,順叔都好想笑,見到分析員及芬佬好認真咁聽,更加忍唔能住,條嘢使唔使咁能學術。

曉,之唔係仲係做「買辦」?全地球無數「Merchandisers」做緊呢類擔擔抬抬的粗重功夫啦屌你。

利豐屬於一間好識得管理「市場預期」的公司,例如三年又三年的業務目標,又例如好鍾意將公司營運狀況的所謂「Management Guidance」,派俾分析員,一間咁識得管理「市場預期」的公司,點解業績可以差過「市場預期」咁多?

MS
JP
CITI
CS

一間咁「透明」,機構投資者又咁「明白」的上市公司,上中期成績表,同「市場預期」相比,竟然嚴重甩轆,一隻市值過千億的藍籌公司,一日股價可以插兩成,成交唔係沽空而係真金白銀掟貨居多,可以想像市場反應有幾大。利豐中期業績可以令全世界大跌眼鏡,除咗一句「差過市場預期」,仲可以咁理解,市場的極幅波動,通常源於恐懼,恐懼又通常源於無知,從上星期利豐公布業績後的市場反應,可以好合理咁推斷,唔少機構投資者對利豐其實只是一知半解。

假如用地球話解釋利豐呢間公司,查實可以好簡單,2010年前,不過做緊馮氏兄弟伯爺100年前做緊的老本行,即係「買辦」,大家問吓有做過「採購」、「跟單」的朋友,就知道利豐唔係做緊乜嘢高技術生意,而只是擔擔抬抬的粗重功夫,呢度唔係睇少山大斬埋有柴的辛苦錢,而係利豐盤生意,搞到又出書又做哈佛工商管理研究案例,就跨張咗少少囉。

利豐年報話你知,公司在2010年,完成咗「歷史上最複雜的改組」,主業一變三,由「一條」供應鏈,變咗「三個」網絡,包括「貿易」、「物流」及「本土業務」,如果又用地球話解釋,即係同樣幫人做採購的大型競爭對手,已經被收購得七七八八,利豐的收購對象,已經轉移到最下遊的零售業務,即時收買營業額,買埋買埋一大抽雜嘜品牌,在自己條供應鏈做生意,盤生意越大越雜,開始要撈埋物流同埋零售。

當利豐條嘢,講緊做採購跟單的供應鏈,又識轉彎又識飛,而家做埋物流同零售,仲要講緊管理一大堆雜嘜零售品牌,今日利豐的管理層,要三頭六臂先搞得掂。做物流的UPS,做零售的Walmart,夠大未,市盈率都係15倍樓下,如果利豐做物流及零售都咁出色,20倍市盈率當然值,不過難度唔細,利豐舊年同Walmart達成採購協議,聽講第一年採購額已經有20億美元,不過一單咁重要的生意,又唔利豐特別講多兩句,奇奇怪怪。

利豐3年又3年的業務計劃,擴張軌跡好簡單,就係集資、收購、交數,再集資、收購、交數,三三不盡六六無窮,建基於市場認為利豐的帳目好透明、盤生意好易明,不過近年打開利豐的業績資料的Power Points,越嚟越複雜,有越睇越難明的趨勢,唔知分析員同埋芬佬,係咪個個繼續睇得明。

如果唔想搞到咁複雜,可以睇睇一組最簡單的數字,利豐最新的三年計劃,目標在2014年純利達到15億美元,假設利豐講得出交到數,市盈率20倍,市值超過2,300億港元,如果估值重返市盈率30倍的歷史高位,市值更加超過3,500億港元。

假設利豐講得出做得到,3年又3年,一間市值二千幾億的公司,下一個3年計劃又係點,下一步要收購乜嘢,唔通要收買UPS同埋Walmart咩。

根據劇情發展,利豐個股價舞完一輪之後,可能又係時候搵人入吓股、集吓資咁,為咗達到3年目標,跟手可能又一輪收購,包括大股東的私人業務...

幾許豐語,繼續吹囉。

關連文章:
1. 利豐雙刁(上)(中)(下)
2. 捻明利豐(上)(下)
3. 私有化學(上)

幾許「豐」語