2012年5月25日星期五

快閃空軍

2008年地球信貸危機之後,全世界投資者見得太多搵笨財經大戲,由投資銀行到評級機構,由銀行帳目到國家負債,乜都可以假,正牌財經演員見得太多,條街任何人講任何嘢,說服力都大打折扣,乜人都信唔過。

投資者獨立思考能力高咗,唔再人芸亦芸,當然係好事。大行報告唔賣得,不過近排有樣嘢好好賣,斷估一樣咁好搵,叫做踢爆報告。

今時今日,任何一位星級分析員,嘔心瀝血整份報告,真心唱好一隻股票,又或者任何一間正正經經又有增長潛力的公司,花十日十夜全球做路演,怕且都冇可能令到股價一日飆升25%,做上艱難炒落容易,搵個二打六或者半內幕人士,整份黑材料,扮唔覺意,跌咗喺中環,隨時可以做低一間公司市值四份一,最新教材叫做上海醫藥(2607)

大家仲記唔記得唱衰永暉焦煤(1733)的Jonestown Research?又仲記唔記得踢爆過人和商業(1387)中渝置地(1224)的Ripley Capital?兩間嘢招牌都帶住邪氣,前者涉及死得人多的邪教教徒集體自殺慘案,後者借用「信不信由你」博物館個大名,發出狙擊報告後,一擊即閃,明顯不為揚名,但求一舖大茶飯。

唔係話以上被狙擊的公司冇問題,身冇屎乾乾淨淨,其他人想踢爆抺黑都冇位入,不過快閃空軍成為新勢力,又咁有市場咁易搵錢,肯定會吸引更加多人加入,例如鬼打鬼的公司高層,甚至同公司有牙齒印的會計專業,傳媒見到黑材料又往往即時當係寶,未審先判,假定有罪,即打八十大板,破壞力極容易被倍大,在目前市場氣氛之下,小問題都好容易被無限放大到世界未日。

做藥賣藥呢味嘢太複雜,財經茄哩啡一間都冇睇過,包括上海醫藥,根據傳媒報道,內地及香港及財經報章,先後收到「匿名信」,針對上實醫藥舊年幾項收購,存在「造假行為」,「粉飾帳目」,公司正接受中港監管機構調查呢項消息,更加觸動市場神經,上藥變瀉藥。

跟據傳媒披露的「黑材料」,有關收購只係涉及十幾個億的項目,指控包括在冇實際交下透過收取銷售代理費等手段確認收入等。會計絕對唔係客觀的數字科學,而係管理層對公司財務狀況的主觀描寫,老實講,類似的會計手法,間間公司或多或少都有做,一間中港上市市值幾百個億的公司,「粉飾」幾千萬收入,好溫柔喇。

有冇接受中港監管機構調查,理論上係一個非黑即白的是非題,不過證監會間唔中會搵公司傾吓偈,亦從來唔會公開評論個別個案,上海醫藥雖然澄清咗冇受調查,但係已經水洗唔清,有啲屈機囉。

在體制上,上海醫藥屬於地方國企,算係上實控股(0363)姐妹公司,同屬上海國資委樓下的上實集團,上海幫近年冇運行,上實控股股價都係行行企企,近幾年更加接收過中芯國際(0983)同埋上海城市開發(0563,前稱中新地產),呢兩嚿最神秘的上市資產,相對於上一代的紅籌窗口公司例如北控(0392),上實系統管理只屬於二三流,上海醫藥近年管理層打晒交,已經唔係乜嘢新聞。

好好醜醜,上海醫藥都叫做全國第二大藥品銷售公司,僅次於屬於中央企業的國藥(1099),前身「上海四藥」93年已經上市,公司資產包括第一代香港創業板上市公司的上海醫藥科技,上市前後不斷透過收購擴張,包括上實系的醫藥業資產,收購多,難免有人中間揩吓油水,不過叫得做上海國資委做老闆,最低限度,唔會只得一個雞棚。

講到呢度,唔係話想同上海醫藥申冤,叫人撈底博反彈,只係想提醒吓大家快閃空軍的威力及趨勢,狙擊對象已經由民企燒到國企,國企唔係質素保證,財經茄哩啡開個冷門盤口,香港上市的大型金礦股當中,有啲奪命金股,好容易成為快閃空軍的目標。

2012年5月24日星期四

銀幕大戰(下)

上回講到,中國大國堀起,由地綠政治到金融暗戰,已經玩到比拼軟實力,全方位同西方國家拗手瓜,包括輸出中國文化同埋文化產業,國家隊都未出場,殺咗隊大連萬達出嚟,連債31億美元收購全球第二大電影院線、美國公司AMC。

大連萬達做商業地產起家,不過呢個冇上市的包租公,業務模式非常特別,本身是全國最大電影院線經營商之一,聽講控制7百幾個電影銀幕,仲有高級酒店、連鎖百貨、卡啦OK,全國幾十個萬達城萬達廣場,行街買嘢食飯睇戲唱一條龍服務,巴閉。

題外話一句,今日大陸住宅住場投資降溫,但係收租地產仲係好旺市,香港大大小小上市地產公司都話在國內搞商場寫字樓,大型城市最高商廈的地標記錄,三兩年就被改寫一次,幾乎度度都有IFC同時代廣場,就算商業樓面冇過度供應,大家見到大連萬達個業務模式,就知道在大陸搞收租地產遊戲規則同香港非常唔同,如果香港經驗咁容易在大陸複制,大陸百佳就唔會執粒啦。

AMC冇上市,資料有限,不過賣到30個億美金,原本股東又包括幾間大型私幕基金,肯定唔係乜嘢筍貨,呢單既係中國民企最巨型海外併購,事實之後,大連萬達挾住「全球最大電影院線」個招牌,未來搞上市可以殺個更高價錢,爭取國內第三張入回電影牌照,亦更理直氣壯。

電影院線老闆,在中國新興的電影市場,屬於其中最有影響力一班人,一套戲有冇得排片,放幾多次,時時上畫,同乜嘢對手對撼,直接影響票房表現,後面當然仲有阿公睇場,例如遇到咩嘢開國大典建黨偉業呢類大大大大片,全國幾十條院線幾千塊銀幕,可能都係放緊同一套戲,早兩年《阿凡達》在大陸市場大殺四方,票房仲去得好勁之時,聽講為咗讓路俾周潤發套《孔子》,全國過千個銀幕,硬兜兜抽咗《阿凡達》,引起內地影迷廣泛投訴,仲成為國際新聞。

《孔子》呢類國產片,在大陸叫做大片,行出門口變屎片,在美國唔知有冇上過畫,大連萬達買咗AMC之後,老闆王健林講明,唔會刻意在美國播國產片,排片大權交晒俾AMC管理層,講就咁講啫,到中國電影真係可以同荷李活拗吓手瓜,國際上唔再係票房毒葯,AMC唔播多幾套國產片就有鬼。

中國電影票房,2006全國票房第一次過一億元人民幣,電影院綫兩隻手可以數晒,舊年超過130個億人仔,增幅驚人,不過院綫老闆亦多咗,全國聽講已經有接近40條電影院綫,競爭頭崩額裂。

香港上市公司有間叫橙天嘉禾(1132),專做大陸電影院線,2011年做十幾億生意,純利唔夠1億(港元,下同),市盈率7倍多少少,不過電影業人事品流太複雜,由出品人到發行商到影院經理,甚至包括商場包租公,條數唔知點拆法,能見度太低,暫時未見到香港上市資產當中,有乜可以放心投資的中國電影業概念。

銀幕大戰競爭激烈,不過大陸電影業仍然處於供不應求的階段,講緊好片難求,其中一個原因,入口外國大片有嚴格配額限制,近年美國年年向WTO投訴,話中國拒絕增加每年入口大片數量,不過近排中美電影業行得好埋,呢邊大連萬達買AMC,嗰邊類似新聞集團、夢工場等美國公司,近排都入股咗中國電影制作公司,聽講下一集《Iron Man》仲會有強大中國元素添,如果中國放寬入口西片限制,對橙天嘉禾呢類公司的收入,應該會成為即時炒作借口。

講到尾,審查太多,創作力必然受到限制,搶幾百個銀幕放國產片,對中國打緊呢場意識形態大戰冇乜幫助,唔好講其他,由重慶共產黨高幹到失明維權人事,出咗事都選擇行入美國領事館,邊面自由啲邊面強啲,一眼睇晒。

關連文章:
1. 銀幕大戰(上)(下)

2012年5月23日星期三

銀幕大戰(上)

今期開財經茄哩啡老本行:電影。

睇財經大戲之前,先睇睇香港利園好戲,北角新光戲院復活,見到「薄出綿力」的候任特首梁振英,同名伶紅綫女同場演出,感動咗,梁振英成功爭取粵劇界在新光的月球租約,雖則新約加價3成,但係功勞肯定大過成功爭取北極有企鵝,最好有熱心人仕,日日掃光戲飛,再喺西環免費派通街,咁就功德無量。

支持傳統文化藝術的發展創新,就好似支持熊貓唔絕種一樣,地球上唔會有乜嘢反對聲音,不過,粵劇界人士,在香港絕對唔係弱勢社群,阿姐又點會係茄哩啡,西九樁腳未有一碌,聽講已經留定位俾粵劇館,連順叔呢類老鹹蟲的集體回憶、一張票睇到笑的油麻地戲院,遲啲都會變戲曲場地,政府冇支持香港粵劇界發展?咪玩啦。

講到政府資助阿公分餅,唔會有任何一瓣表演藝術,或者任何一種體育運動,認為政府做得足,財經茄哩啡只係想問一句,點解粵劇戲棚只可以搭在新光唔入得紅館,後生仔又點解仲係只識得唱帝女花。

新江戲棚呢個位,梁振英攝得夠晒出色,變成宣傳自己重視文化發展的最佳舞台,政府決策局重組,由「三司十二局」發水到「五司十四局」,還原唔少前朝董建華的架構,「房屋規劃」及「資訊科技」等決策局借屍還魂,仲多咗個「文化局」,成為最凸核之一點。

有三種人,順叔由細到大都唔白佢哋諗乜:女人、經濟學家、香港「文化人」,以後者最搲頭。究竟乜嘢先叫做「文化」,「文化界」查實又點分界,可能連香港「文化人」,都要先諮詢「文化界」三個月再用三日時間先解釋得清楚,可以想像,邊個做文化局局長,都難逃被插的命運。

在一個咁不著邊際的界域,上面放個「文化局」,成為獨立政府決策局之一,最大效果就係在不知不覺間,將大量意識形態控制的工作及開支,納入香港政府行政及公共財政體系,呢樣嘢唔會陰謀論得去邊,中國要提升軟實力,同西方社會全方位拗手瓜,年幾前國家主席胡錦濤訪問美國,都特登拍咗套宣傳片在美國時代廣場及電視黃金時段大播特播,在半個自己地頭的香港,國宣黨宣又點會唔大唱特唱。

呢場意識形態大戰,講得好聽啲,叫做「振興文化產業」,同埋鼓勵文化企業衝出海外,最新一個關連大動作,見到大連萬達集團,連債斥資31億美元,收購美國AMC影院公司,中國電影在地球的叫座力影響力,有排都唔夠荷李活砌,就打住全球第二大電影銀幕控制公司主意。

中國的民營企業,政治上越係風頭火勢,企業動作多數越政治正確、越配合國家政策,因為商業上越高調,風險絕緣能力越高,早排寫過篇《中超魔球》,約略講過大連萬達呢間公司,呢間在大連搞地產足球省招牌起身的公司,早排傳過捲入前重慶市委書記薄熙來案件,轉頭就大手筆收購AMC,感覺上,同當年碧桂園(2007)負面謠言滿天飛的時候,主席楊國強有意收購香港TVB(0511)一事,異曲同工咁妙,不過更大連萬達單刁加轟動,因為直踩華爾街及荷李活兩大美國戰略重鎮。

大連萬達規模唔講得笑,剩係地產嗰嚿,全中國有八十幾個「萬達城」,可能仲大過香港恒隆地產(0101),即係全國最大商業包租公之一,有人擔心大連萬達唔知去邊度搵200個億人仔收購AMC,不過人哋財來自有方,投資收租物業資金回籠冇發展住宅咁快,大連萬達搞到今日咁大規模,一直唔需要上市,能人所不能。

下回再續,睇睇呢單轟動中外的文化產業大刁,有乜睇頭。

關連文章:
1. 銀幕大戰(上)(下)

2012年5月22日星期二

騰籠百鳥

今期再開騰訊(0700),中國最大互聯網公司,近年密密四出收購,大小通吃,一個籠本來裝一隻企鵝,而家迫埋成百隻雀,究竟搞乜QQ。

幫襯開財經茄哩啡的話,應該知道順叔一直唔係好相信呢隻嘢的潛力,2010年底寫過篇《逃之QQ》,唔睇好騰訊可以無限增長,當時每股180港元左右,點知跟手半年屢創新高,見過230蚊;舊年呢個時候再寫篇《科網再熱》,繼續唔QQ信。

舊年5月,社交網站公司在私募市場炒到興烚烚,微軟85億美金400倍市盈率食咗Skype,Facebook上市前最後一輪引資擴股交易後,估值吹到760億美金,忍手咁多年唔上市,未上市已經吹到咁大,上市更激動,市值千億美金,市盈率1000倍。

講緊Facebook作為一間互聯網公司,都唔算太「後生」,過去幾年幾輪上市前集資,發展資金應該唔係乜嘢大問題,有搵錢絕橋,應該已經晨早用咗。Google在05年上市時,記憶中好似市值5百幾億美金,市盈率百幾倍已經好跨張,一千倍市盈率,呢個數太大,超越財經茄哩啡理解範圍。

可能太多想像空間, 香港上市的科網股都炒起埋,騰訊過去一個月,曾經炒到上近250蚊的歷史高位,近排回返唔少,但2011年市盈率仍然超過30倍。

超過30倍市盈率的估值,對於騰訊嚟講,只係一個慣性狀態,因為QQ往往以5成甚至更高水平增長,貴得有道理,不過,最近公布至3月底首季業績,增長只有2.7%,更出奇地,條街竟然冇乜人唱佢「增長放緩」,投資大行繼續睇好,甚至將QQ股價再炒上歷史新高。

一年四季,騰訊的季度業績,在2010年,按年增長幅度高達45%至60%,2011年第一季都仲有60%,但係之後3季,放緩至13%至22%,今年頭3個月,竟然只係個位數字,仲衰過被睇死為公用股的中移動(0941),望住呢堆數字,唔需要點睇細數分析,都可以得出騰訊增長今非昔比的簡單結論,大佬,人都會老的,後生變中坑,上網溝女不如留喺屋企湊女,唔會日日打機,條街成日講住QQ用戶人數,但係好似從來冇講過QQ用戶群的年齡組合變化。

人會老,公司亦會老,騰訊管理層仲算後生,但係幾年迅速增長,員工數目由二千年變到二萬人,開始要面對其他所有大企業的管理問題及挑戰。騰訊在上個星期,宣布成立所謂「六大事業群」,究竟「網絡媒體事業群」同「社交網絡事業群」點分界,唔知,不過據管理層勾劃出的發展目標,基本上一句可以講晒,就係乜QQ都做,由網上搜索到電子商務,由中國到地球,唔放過任何發展空間。

乜都有,好多時等如乜都冇,太多變太少,例如微軟的Windows同埋Office軟件,發展到而家咁多功能,可能8成以上的功能冇人識用,騰訊可能面對差唔多的問題,網上太多嘢可以玩,自己茄殊又多,QQ平台本身唔需要點再大量投資,未諗清楚點做就四圍通殺。

騰訊講過,近乎創投的「產業基金」,未來會加碼到100億元人民幣,過去十幾個月,大大話話已經做咗四十幾單大小併購,投資對象包括網絡遊戲、視頻軟件、物流、電子商務,電影公司,乜QQ都有,當騰訊話你知佢準備連電影都拍埋,可以好大膽咁講一句,呢間公司開始有啲失去方向。

一間好的公司,會有好明顯的企業策略,配合企業的使命,例如講明要組織好全球資訊(Organize the world’s information)的Google,一樣發展到百足咁多爪,但係各種應用,都指向同一個方向,就係幫用戶更方便咁取得更有用的資訊,騰訊暫時未能夠勾劃出同一樣的企業願景,安身立命之本,暫時仲係QQ嚟QQ去,遊戲人間,唔似係一間冇咗佢地球唔會轉的公司。

2012年5月21日星期一

費力把事拖

今期開拉布,英名聽講叫做「Filibuster」﹐香港係咁,歐洲又係咁,全地球都在「費力把事拖」,太過悶局,財經茄哩啡唯有加入拉布,呃一日稿費。

議會係一個少數服從多數的地方,邊個多票邊個大聲啲,所謂拉布,其實係少數派打茅波,利用議會程序,或者個人口水,拖延時間達至政治目的,所以全世界的立法機關,除咗中國人大,幾乎都發生過經典的拉布戰,有乜出奇。

本來拉布唔係一件特別有意義的事,最多係吸引吓大眾眼球,令少數派聲意得到最大的擴意效果,為拉布而拉布,發起人都會覺得自己無聊,不過,當「時間」成為戰略資源,成件事就唔同講法,所以香港立法會在行政立法換屆前最後會期玩拉布,走得最前鬧得最心急嗰個,就係候任行政長官梁振英,驚住五司十四局重組方案撥款,上任前都未埋單,7月1日宣誓就職時,只係一個無兵司令就無癮。

拉布戰由人民力量,就立法會議員出缺補選的法例改動,提出千三條修訂發起,立法會主席曾鈺成最初扮中立放生過千條修訂,泛民冒住選前民意波動風險曲線支持拉布,現任政府更加企硬冇為立法工作變陣,成單嘢,好似成班人挾埋要玩梁振英一舖。

候任特首要埋班組閣,理論上係建制派頭等大事,今次拉布可以成事,拖住梁振英後腳的兩大主角,一個叫曾鈺成,一個叫黃毓民,前者係香港左派大老,後者被部份泛民人士視為疑似無間道,由佢哋兩位老人家出手整蠱梁振英,唔使問阿桂,呢位候任特首雖然成功上位,但係種種手段結下太多襯家,得罪唔少人,包括在明在暗的建制力量。

曾鈺成要剪布的話,最好時機就係大複否決修訂的數目,要在九十幾條議事規則裡面,搵一兩個權力來源,否決千三條修訂,斷估冇乜難度,今日玩大咗,忽然未經過大會表決就一言堂式結束立法會辯論,認真低章兼核突囉。

拉布本身係打茅波,利用大量內容重複的修訂拉布,更加係茅波中的茅波,外國議會「費力把事拖」的最長記錄,多數靠口水而唔係程序漏洞,一條友癈噏十幾粒鐘,今次泛民被人踩到上心口,查實可以發起更大規模、更光明正大的拉布戰,就7月前的立法程序,人人用盡發言時間,齊齊費力把事拖,甚至發起全民參與,搞一個開放網上平台,等網民可以自發提供發言內容及論點,講極都有料到,言之有物兼唔離題的話,就算由球證到旁證到足總主席都買通晒,都唔會有搬龍門剪布的空間。

呢件事並非無聊惡搞,而係一場好有效的通識教育運動,香港立法會四年一任,特首五年一任,立法及行政機構同年換屆,20年先出現一次,冇理由捉住曾鈺成,一個不信任動議就算數,拉住布、拖住梁振英後腳講數先係波。

講到重重覆覆兜兜轉轉,97年後的香港立法會,何嘗唔係一場長達15年的無聊拉布,為咗保持行政主導,立法會的權力被閹割九九八八,代議士要提出私人草案,唔可以涉及「公共開支」及「政府政策」,即係冇可能提出,萬一可以提出,亦要透過分組點票先可以通過,15票可以擋住45票,少數派冇任何發揮空間。

自然生熊都講平衝,香港政治設計,如果繼續趕絕立法機構及民主派聲意的發揮空間,一樣唔係可持續發展之計,立法會冇發揮空間,做議員又擺明冇人工加,從政的機會成本太高,又點會吸引到叻人從政,冇政治人才,行政機構膨脹到50司140局都冇Q用。

臨尾插多句,所謂歐債危機,都費力把事拖幾年,年年劇情類同,大行無端端出現巨額交易虧損,某歐洲國家政局出現變數,評級機構調低評級或展望,股市大跌,橋段重複過無記連續劇,呢場拉布更加冇完結之期,頂唔順,可唔可以搵人剪咗佢。