2012年1月13日星期五

一把手三把火

舊年內地股市跑輸全球,上證指數更在12月跌穿2001年高位,股民苦口苦面,其中一個最熱門話題,就係A股市場十年一夢,原地踏步,有人計過數,仲話散戶的股票交易費用,多過十年嚟上市公司派息分紅。

年底歐美股市有少少起色,但A股越跌越殘,越殘越跌,呢一浪在最後兩個月出現的調整,啱啱發生在,10月底金融監管機構高層變動之後,銀監證監保監齊齊換人,尤其係中國證監會主席郭樹清,走馬上任後,一把手三把火,埋位一個月,上證指數已經跌超過半成。

港股受A股影響越嚟越大,但香港股民隔岸觀火,唔係太能夠感受到呢場A股監管風暴,呢度綜合及整理一堆內地傳媒近月報道,睇睇郭樹清做咗證監一把手後,新官三把火有幾勁。

  • 11月29日,撤銷平保證券兩名保薦人代表資格,成為第一市場中介代表歷來最嚴厲處分
  • 12月1日,證監會併購重組審核委員會成員吳建敏,違規持有參與審核的股票,破天荒被炒魷魚,同日,郭樹清公開強調,對內幕交易及操控股市等行為「零容忍」,發現一單打一單,「絕不手軟」
  • 12月9日,揭發號稱「歷來最大造市案」,涉及552隻股票、571億元(人民幣、下同)交易額、非法獲利4.26億元
  • 12月24日,通報西南證券原高管季敏波,操控老鼠倉交易獲利,已被移送公安機構
  • 12月28日,聯同公安部及監察部,總結通報近年內幕交易大案,包括銀河證券前黨委書記肖時慶,已被判死緩

郭樹清之前係建行(0939)董事長,17大先做到中央委員會候補委員,共產黨內論資排輩,及唔上前任證監會主席、中央委員尚福林。尚福林已經調任銀監會主席,如果郭樹清一埋位就狂打大案,即係話俾全國股民知,尚福林任內冇做嘢,中國股市污糟過屎坑,好唔俾面。

老實講,如果「歷來最大造市案」,都係獲利幾億銀,澳門賭場貴賓廰唔會咁好生意, 13億中國人及幾億股民應該飲得杯落,真係在股市全面打黑反貪的話,怕且10個秦城監獄都坐唔晒,要全國再公開招募大批幹部,過去幾個月,中國證每星期公布幾單「大案」,話你知邊幾位人兄中招,或者「提醒」各位邊個有乜收場,講穿咗,郭樹清都係要敲山震虎,係咪咁有牙力,有待觀察。

五年開一次的全國經濟工作會議,早幾日幕閉,總理溫家寶發言時,臨尾又俾多一項任務,2012年要「提振股市信心」,於是幾間大國企母公司增持、鞍鋼(0347)管理層自己出錢買股票,被視為中央救市訊號,不過對於一早講明,「不存在救市這個概念」的郭樹清,「提振股市信心」,可能係在資訊極唔對稱、內幕交易及造市行為猖獗的A股市場,挽回散戶及長線投資者的信心,郭樹清上任後即時大攪新股上市定價機制、創業板除牌制度、同埋上市公司分紅機制等改革,就係要恢復股民信心,如果市場唔夠公平透明,講乜嘢引入全國養老基金等長線資金。

作為中國證監會一把手,郭樹清未來幾年最大任務,仍然促使中國證券市場健康發展,呢樣嘢,反而唔似得打黑反貪咁難展開手腳,因為中國證券市場規模仍然好「細」,發達經濟債市規模通常係股市兩倍,中國相反,債市僅及股市一半,單係債市已經好大發展空間。

至舊年11月,全國金融資產大約有100萬億元,9成由銀行坐住,證券公司只係2%,唔及一間高盛的三分一,有排都唔會出現一間投資銀行「大得不能倒」的系統風險,從呢個角度睇,未來5年,國企證券公司的資產以至市值,仲有好大膨脹空間,最少會跑贏國企銀行,監管風暴令 A股成交量突然大跌,只係短暫現象。

2012年1月12日星期四

海鮮政經

今期開海鮮。

香港股市有個「一月效應」,叫做「一號文件」,即係每年以國務院名義,向各省市部委兼真屬機構發出的第一份「國發」文件,由於多數講農業農村政策,所以「農業股」當炒云云,每次聽到呢個「一月效應」,都引唔住會笑咗。

可能中華民族自古以農立國,今日中國都仲有8億農民,所以中央特別緊張,唔好話年初「一號文件」,其實年復一年,年頭講到年尾,有乜重要經濟會議,農村政策多數走唔甩,不過,中央政府關心農民,又真係好少,見到有乜領導人或者高官,會講吓漁民。

長期受忽視下,中國漁政及海洋政策,其實一鑊粥,越嚟越多小事、唔關事,加埋一齊,好令人擔心,唔使睇好遠,求其掀吓今日報紙,相信已經見到唔少。

舉個例,廣東西江江門段,出現綿延3公里的死魚,據傳媒引述當地漁民講,咁大規模死魚,生活廿幾年都未見過,當局初步確認原因係「中毒」,點解會有成千斤淡水魚集體中毒,多數都係嗰兩飛,一係企業排污導致突發污染,一係長期污染導致水質生態突變。

小事?又睇睇呢幾日同政治經濟有關的海鮮問題。

中海油(0883),星期二晚發出公告,話母公司中國海油收到天津海事法院的通知,29名在渤海的海產養殖戶,就舊年「蓬萊19-3」油田漏,起訴中國海油及拍檔康菲石油,要求賠償2.34億元人仔。海產養殖戶,應該係相對少數、但更有法律經濟權益意識的漁業人士,渤海漁民亦有可能齊齊將中海油兩母子告上法庭,加埋減產、增加安全措施成本,呢單嘢肯定有排煩。

可能出錯的事均會出錯,呢個預測阿媽係女人的「梅菲定律」,其實一早有個女人未必係阿媽的講法:「Anything that can go wrong at sea generally does go wrong sooner or later」,海上意外多,深海更加難測,在墨西哥灣賠咗幾十億美金的英國石油應該好清楚,中海油海上鑽油原鑽越深,聽講仲整咗個全世界最長的鑽機,向深海進發。唔好話深海鑽探,陸地採油都唔係咁容易,中石油(0857)最近建議,同母公司全資50億元人仔,設立「自保公司」,因為普通商業保險不能夠覆蓋公司所有「高風險和海外項目風險管理需求」,奇奇怪怪,斷估因為政府收緊安全生產標準,開礦鑽油等的資源行業,保險成本同時大增,中石油索性自己做埋財險,自己保自己。

中海油蓬萊油田所在的渤海,被山東、河北、遼寧三省環抱,係中國唯一內海,本來係最大漁場,但由於水體交換緩慢,黃河遼河海河三大水系40幾條河流,食足幾十年的經濟增長的污染物,就算中海油冇漏油,已經變成一個垃圾桶,當然啦,海洋最大污染,嚟自不能還原的填海,山東海南等沿海省市,近年向海發展求地,

南韓總統李明博,呢幾日訪問北京,除咗北韓金正日將軍拉柴,仲要處理兩國漁業糾紛,月前一名中國漁民,涉嫌越界捕魚,隊冧一名南韓警察,令南韓反華情緒極速升溫。

以前又點會聽到咁多漁業糾紛,對漁民嚟講,就算油唔使錢,離岸越遠亦越兇險,中國海域漁穫豐富的話,又邊會有人咁得閒走去可能擦槍走火的地方,好簡單,好似渤海咁,海鮮被毒死晒,唯有去更遠水域,可以想像,中國漁民搵食越嚟越艱難。

近年香港街市,見到的所謂「海鮮」,嚟嚟去去得嗰幾種,就算剛過休漁期嗰一兩個星期,魚檔都唔係特別精采,好多所謂「海魚」,就算即劏即蒸,「鮮」味亦不知所謂,內地政府未有保議海洋的意識,港區人大代表,人民代表呀喂,順叔只係想食海鮮,搵人講兩句得唔得?

2012年1月11日星期三

文化再革命

(刊於2012年1月11日am730)

今期開悶嘢,講吓人民日報樓下張人民網。

大家都知道,人民日報社係中國共產黨中央機關,聽講仲要係正部級單位,社長甚至會列席中央政治局或書記處,幾十年嚟御前行走近距離觀察中南海動態,今時今日可能冇咁巴閉,但順叔每日都仲會上去人民網,掀吓人民日報電子版,約略聞吓有乜風水草動。

舊年11月中,個電子掀頁版,只係開放頭4版,跟住就要收錢,不過最近又突然開放返,免費酬賓,原來人民網即將上市,招股文件初稿,仲在星期一上載喺中國證監會網頁。

人民日報本來就「代表人民」,「反映人民群眾的意見和建議」,哈哈,今時今日,中國股民竟然仲可以買一兩手官方傳聲筒,當年唔少在政治漩渦中左右失據的老報人,例如鄧拓,如果仍然在生,見到一個中共管制最嚴的官方喉舌,成為第一個擁抱資本市場的官方喉舌,怕且還是哭笑皆非。

據人民網招股文件資料,人民日報社都唔係冇錢賺的,至2010年底,淨資產有3.2億元(人民幣,下同),純利都有3.6億元,下面邊個單位最賺錢就唔知,不過在同期,人民網純利都有8,165萬元,按年增加2.6倍,勁,唔怪得人民網A股上市,發行25%股份,集資5.2億元, 2010年往績市盈率26倍,拍得住騰訊(700)。

A股市場,股民炒新股的瘋狂病態,仲嚴重過香港散戶,中國證監會主席郭樹清,上任後多次提出要改革一手市場發行制度,潛台辭之一,似乎係唔俾新股以超現實估值定價,人民網作為最官方的國企新股代表,廿零三十倍市盈率,唔知算唔算係正常喇。

人民網上市,只係國家隊代表第一個出場選手,排緊隊第一批上市官媒,聽講有10間,包括中國網絡電視台,即係CCTV個啤,全部都係互聯網業務,將相對最唔敏感的意識形態工具,推出資本市場試水。

官媒排隊上市,唔係話市場改革,商業營運自負盈虧咁簡單,近來內地官場,開口埋口就一大堆文化乜乜物物,中央電視台《經濟半小時節目》,今年第一個星期,一至五集都係同一主題,教人「掘金文化產業」,舊年10月的六中全會,主題又係「文化興國」,撥開一堆官樣八股之後,簡單嚟講,面對資訊世界新形勢,北京要利用官方「主流文化」,發揮傳統「中國文化」,抗衡包括「網絡文化」的「西方文化」。

社交網站動員力及破壞力有幾大,中東有朵茉莉花,香港都有單D&G,唔講得笑,不過,上到人民網,得一堆官樣文章票房毒藥,「共產黨新聞網」,又點夠QQ呀MM呀咁過癮;俾你係觀眾,閣下會睇《建黨大業》定係《阿凡達》?

唔講幾千年中華文化同西方拗手瓜的軟實力,中國官方傳媒,其實不乏資訊價值,問題係點玩法,好簡單,假如人民網,做到一個統一發放中央政策的政策公布平台,唔係東一忽西一忽,已經好多外國投資者會有興趣。

當然,人民網最寶貴資產,其實已經掛喺招牌上「人民」兩個字,人民網有個強國論壇,周不時會有啲重要官員上去接受吓網民提問,總理溫家寶都上過去,又有個地方領導留言版,不過個頭擺得太大,要省委書記及省長級人物直接答覆網民,不切實際,例如天津市委書記張高麗,已經收到5,675條留言,但係只有幾條有答覆,如果將人民網呢個功能,拆細到市縣層面,變成一個地方官員問政或監察平台,會有多啲網民幫襯囉。

要扭轉中國文化產業「泛、淺、濫、抄、乏」五個字,根本在於創意空間,拍戲唔準有鬼、無間道華叔又一定唔可以有好收場,諸多限制,一班大導咪只可以拍得出《英雄》《無極》呢類超級大爛片,中共要搞「文化再革命」,其實只需要做一樣嘢,就係「放」。

2012年1月10日星期二

脫鈎港獨

(部分內容刊於2012年1月12日am730)


香港有兩個超敏感話題,幾乎提都唔提得,政治上叫「港獨」,經濟上叫「脫鈎」。

廣東道越嚟越少廣東人,星期日,上千香港人,到Dolce & Gabbana香港旗艦店門口,示威影相挑機,抗議擁抱大陸同胞的意大利名店,保安人員禁止香港人在店外拍攝,反「霸道」反歧視,社交網站成功組織快閃社運,推上報更做埋國際新聞,以動員速度及效果嚟講,本來無懈可擊,不過有一敗筆,門口留低唔少垃圾,99年法輪功萬幾二萬友包圍中南海,散場後自發帶走所有垃圾,過千公安的警備位置反而留低大量煙頭痰跡,唔好睇少呢個水平反差,如果挑機之後廣東道乾乾淨淨,成件事會更有說服力。

保安唔準影相呢家嘢,由尖沙咀名店到長江中心門口,相信唔少香港人都領教過,件事如果幾年前發生,冇可能炒得大,今次咁大鑊,可以咁講,香港人近年度氣谷谷埋埋,樓價被內地資金炒貴晒,生仔床位緊張奶粉都話短缺,難免會有情緒反彈,究竟係乜嘢情緒,相信唔會有太多人講得出口,又或者可以講到滴水不漏又政治正確。行政長官參選人梁振英,政綱包括「港人港地」,限制內地人在香港部分地段買樓投資,又建議公立醫院停收「雙非」孕婦,無非要將自己同香港人呢種「講唔出口」的情緒,拉近距離,抽吓水咁。

中聯辦宣傳文體部(有冇人可以話順叔知其實係做乜)部長郝鐵川,月前失驚無神急召記者會,狂插港大民意訮究調查計劃的「民調」,將「香港人」及「中國人」對立。俗語有云,死還死,七孔流血還七孔流血,兩回事嚟嘅,同樣道理,進行「民意調查」,唔等如「學術研究」,之但係吹佢唔脹,「學術自由」呢個光環,唔可以垃亂沾污,一個「民調風波」,12年前就搞到港大正副校長齊齊辭職,今次中聯辦咁公開插鍾庭耀,除咗以為「善忘」的香港人已經習慣京官指手劃腳,當然,亦因為呢個話題太敏感,任何潛在煽動香港人分離主義情緒的物事,未成形之前都要格殺勿論,廣東道昨日有自治運動人士揮舞龍獅香港旗,下次開「港獨」就大件事,所以,星期日廣東道呢場「反霸道」示威,在西環必定引起極大震動,甚至可能成為政策調整的觸發點。

2007年1月,人民幣兌港元,自1994年以來,第一次突破「一算」,港人去深圳消費可以用港紙的風光歲月,從此一去不返,去到今日,100蚊人仔兌123港元,5年之間,內地遊客多咗,而且有錢咗,掃貨血拼仲要有七五折優惠,床位海味奶粉樓價又點會唔貴,你話香港通脹唔關聯繫匯率事,打死都唔信囉。

港元同美元脫鈎呢個話題,幾年前仲係香港官場禁忌,行政長官曾蔭權,仲係做財政司司長時,曾經用「處女膜」嚟形容聯繫匯率,一穿就冇,舊年11月,曾蔭權接受香港傳媒專訪時,仍然大大聲話聯繫匯率效果優良,「那個同事提出脫鈎,我都兜巴星」咁話。

一個月唔夠,特首參選人唐英年,又係接受本地報章訪問,講到呢個朝中禁忌,竟然爆響口,話自己做財爺的時候,已經就脫鈎制定「一系列預案」,佢同當時的金管局總裁任志剛,「不時拿出來更新」,內容「由最保守到最大膽都有」,或者呢個係港府最高機密,曾蔭權連自己隻豬被人鎖入夾萬都唔知,否則應該已經「星」咗唐唐十幾廿巴,不過,港府應該已經為取消聯繫匯率︳做好幾手準備。

起呢條題,其實嚇吓人啫,講到尾,經濟實體捆綁埋一齊,想分離都冇可能,港獨天方夜譚,脫鈎卻是時間問題,唔好當香港人係傻嘅,財經茄哩啡只係想問吓,香港人的強積金,幾時可以「自由行」,買返多少人民幣資產對沖吓咁呢。

2012年1月9日星期一

TVB十大膠劇

唔能鐘意TVB的話,介紹「620」的「N分鐘劇毒」...



Presented by...

股神在中國

(部分內容刊於2012年1月9日am730)


今期開巴菲特,尋找股神在中國的足跡。

中央電視台的《春節聯歡晚會》,應該係全世界收視最高的綜藝節目,因為全國13億人,在大除夕晚開始,要焗睇幾粒鐘,唔少人千方百計甚至走後門要在節目亮相。嚟緊龍年「春晚」,聽講會出現一位80開外的鬼佬嘉賓,叫做巴菲特,錄製結他自彈自唱節目,在「春晚」播出,在中國官方喉舌獻出第一次。

巴菲特在內地電視台,算得上係常客,過去兩三年,股神接受專訪最多的一個電視台,應該就係中央電視台。2007年10月,巴郡沽清光中石油(0857)股票之後,巴菲特隨即飛咗去大連,出席一間啱啱買咗、叫「Iscar」的以色列企業在大連分公司的開幕儀式。95年,巴菲特曾經在中國短暫停留,其後冇再到訪中國,一別12年山長水遠再訪中國,唔使問阿桂,點會為咗旗下公司分區辦事處剪綵咁簡單。

巴菲特大連之行,第一次接受咗中央電視台專訪,在09年開始,每年5月舉行的巴郡股東會,都會隆重接待CCTV派出的記者及攝制隊,年年接受專訪,仲熱情過對CNN; 2010年去中國,又拉埋老拍檔芒格及老友蓋茨,齊齊上《對話》;連自己個仔「彼德巴菲特」,都上過幾次內地電視台,大講「富爸爸」之道。

當然,有可能純粹因為個女記者「付豫」搞得佢掂

「股神」個招牌,在中國根本唔使點介紹,巴菲特的慈善飯局拍賣,近幾年都被中國投資者天價投得,唔少大陸芬佬為咗偷師,會專登買一股巴郡股票,目的就係出席巴郡股東會嘉年華,斷估更有唔少中國企業家,走去奧哈馬敲巴菲特道門,睇睇佢有冇興趣收買自己間公司,所以巴菲特要接觸中國投資者及企業家的話,應有唔少渠道,對住中國官方電視台仲咁熱情,唯一解釋,就係要全方位了解中國,一有機會,就塑造親善形象,甚至拓濶更多人脈,為未來可能出現的大刁機會做準備。

巴菲特對上一次投資在中國,入股比亞迪(1211),舊年股價跌到僅及雙位數字,比亞迪亦明顯出現資金壓力,但巴郡並冇增持;舊年美銀等錢使,大舉減持建行(0939),巴郡寧願直接投資美銀股債,都冇沾手國企銀行。兩個機會,巴郡均未為所動,可能股神覺得自己仲未夠了解中國,或者在佢老人家眼中,大舉投資中國的機會及條件,仍未出現。

內地股民近日最熱門話題,講緊「十年一夢」,「原地踏步」,上證綜指,跌穿2001年創下的2,245點「相對高位」,有位「中國股神」叫「林園」,06年接受央視訪問,是但搵個股票倉印張單,兩個月倉位由四千幾萬人仔,暴升到近億元,早兩日再接受訪問,已經輸到木口木面。

過去十年,中國經濟及股市市值,增長以倍計,如果話咁叫「原地踏步」,真係唔知乜嘢叫「進步」。財經茄哩啡唔熟指數編製的運作邏輯,但夠膽推斷, A股所謂的「十年原地踏步」,其實反映指數編製出現問題,冇一個各方認可的基準指標,各種指數狗粥咁亂,未追貼過去十年、A股經過各種市場改革的結構性變化,亦反映唔到中國經濟現實。

2002年,中石油都未有A股,當時每股H股,講緊一蚊幾毫港幣,正正呢個時候,巴菲特開始靜雞雞密密吸納,到2003年4月,巴郡持有7%中石油H股的倉位曝光,望返轉頭,港股在03年4月跌至8,400點的十年低位,股神投資中石油呢單刁,亦成為外國投資者,全面肯定巨型國企投資價值的分水嶺。

巴菲特近年咁熱情「擁抱」內地官方傳媒,唔會死錯人,股神再在中國做一兩單大買賣,斷估只係時間問題。當然,今日「中國」的投資價值,已經無需再由股神去肯定,股神又能否成功捕捉、甚至觸發另一個股市由熊轉牛的轉角位,已經係另一回事。

伸延閱讀:
1. GOW財茄台: 股神系列

2012年1月8日星期日

股神系列

聽講,龍年大年初一,股神巴菲特,將會破天荒出現在中央電視台的《春晚》節目(新聞連結)!

巴菲特一言一行,往往成為香港傳媒大炒特炒的話題,其實條友近年經常在CCTV出現,2007年10月,沽清中石油(0857)股票之後,去咗大連,出席ISCAR分公司開幕典禮,12年嚟再次去中國,並第一次接受CCTV訪問,2009年5月開始,每一年股東會,都會邀請CCTV拍攝隊採訪,每次都會接受專訪,仲熱情過接待CNN。

巴菲特除咗自己,仲成日搵埋老拍檔芒格、老朋友蓋茨,上CCTV接受訪問,連個仔彼德巴菲特,都周不時接受中國傳媒訪問,唔會死錯人的,巴菲特對中國官方喉舌咁熱情,相信佢老人家正努力了解中國。

順叔倉底,儲埋幾個CCTV有關巴菲特的特輯,剪埋做一個Playlist,上載緊咗上Youtube,想聽吓股神講乜,又冇心機睇巴郡年報的話,得閒就CLICK入去望吓...