2010年8月20日星期五

私有化學(下)

(刊於2010年8月20日am730

今回輪到工銀亞洲(349)私有化,又有乜嘢學。

工行(1398)H股06年上市以嚟,私有化工銀亞洲消息,耐唔耐就傳吓,變咗狼來了預言故事。

工行每股3.07元(港元,下同)上市,以招股價持有,坐到而家,過去四年每股總共派息0.53元,至星期三收市,回報102%;愛仔唔愛毑,當日工銀亞洲收市13.76元,今日每股作價29.45元私有化,計埋期內股息2.83元,回報135%。
所以,如果發現必然趨勢,投資者就要有耐性。

例如,當馬後炮咁講,國企銀行改革上市,香港上市分支完成歷史任務,精簡架構統一品牌,取消上市地位係遲早問題,好似早兩年中信集團,為外資股東增持中信銀行(998),讓出持股空間,已經私有化中信國金,中銀香港(2388)係發鈔銀行,資產夠大,可以獨立發展,被中國銀行(3988)私有化機會細少少,但唔係冇。

中港金融市場融合,大陸銀行同香港分支,資金聯動越見頻繁,工銀亞洲規模太細,正常業務往來變成需要披露關連交易,幾乎個個月搵監管機構過堂,阻手阻腳,工行持股已經72.8%,再注資,好容易保持唔到25%流通量,所以工行講明,工銀亞洲有「增資壓力」,私有化取消上市地位,更加靈活。

換句話講,呢單刁最大意義,其實係工行作為最巨型國企銀行,準備在香港發大嚟搞,又即係話,港銀發展人民幣業務、大陸匯率改革,正在快馬加鞭,港股直通車,係一個必然趨勢。

大陸金融機構,由銀行到證券行甚至保險公司,對香港金融資產咁有興趣,唔會死錯人,擔心金融中心地位不保,多餘。
四大國有銀行,三大已經在香港插咗旗,農行(1288)上埋市,多隻香爐少隻鬼,香港中小型銀行,賣一間少一間,家族控股越高,賣祖業熱誠越大。創興(1111)廖氏持股接近五成,講明對賣盤「持開放態度」兼「積極考慮」,東亞(023)李氏家族,持股一成多少少,主席李國寶,反而同你講,「繼續維持為一間本地獨立銀行」。

寶寶貝霸住金融界立法會個位三點不露,可能冇人吹得佢脹,但冇控制性持股量,又要世襲東亞管理,就要捽靚業績提高認受性。國浩(053)收集東亞,其實同舊樓打釘冇分別,如果東亞再出現類似炒燶毒債、擠提等問題,被大陸銀行全面收購,又係另一個必然趨勢。

如果東亞業績重返07年高位,最好嗱嗱聲沽清佢的股票,掉轉頭,業績衰到貼地,反而係入貨時機。

#

2010年8月19日星期四

私有化學(上)

(刊於2010年8月19日am730)

今期開私有化。

香港私有化,要過五關斬六將,出名難度高,大股東偏向虎山行,好多時因為間公司冇乜人吼,成交疏落,股價長期低水,就算最後博大霧失敗,都平過做路演,提醒吓市場,自己間公司有幾值錢。

上星期兩單私有化,同股價、成交冇乜關係,大股東有其他動機,有故講,今日先睇利和經銷(2387)。

嚴格嚟講,呢單嘢唔算私有化,而係利豐(494)作為姊妹公司,全面收購同樣係大股東馮氏家族控制嘅利和。利豐咁多年嚟,為大股東私人控制企業,做咗唔少生意,今日做埋套現工具,好使好用。

利和04年底上市,招股價3.5元(港元,下同),馮氏家族持有45%股權,消息曝光之前,利和股價15.42元09年市盈率21倍,市值50億。利豐掟出兩個方案,一係收現金,每股21蚊,一係收股票,一手1000股利和換585股利豐。個個要現金,成單嘢要70億,幾乎燒光利豐10億美金收購彈藥庫,所以大股東講明收股票,順手增持多少利豐。



如果利豐股價堅挺,可以引誘更多股東收股票。高盛舊年幫利豐,引入淡馬錫做策略股東兼資金,老友底,單刁一出,大聲唱好,重列利豐在所謂「確信買入名單」,睇47.5元,至星期三收市,利豐股價38.3元,帶動埋利和收22.3元,仲高過現金收購價。

財經茄哩啡在今年4月,曾經開利豐,講過呢間公司,明明好似好透明,其實睇極唔明,呢度唔再炒冷飯(有興趣可以去順叔個爛鬼博客睇翻)。利豐令投資者有「透明度高」呢個幻覺,關鍵係制定一個個三年增長計劃,三年又三年,次次交到功課,交數關鍵,不斷收購。

利豐至今年底最新一個三年計劃,目標將收入谷大到200億美金,核心溢利10億美金,要達標,2010年收入及核心溢利,要分別按年增長近一半及一倍,所以09年份成績表一出,投資者覺得唔對路,利豐股價第二日插一成,就係咁解。

由早年收購競爭對手,到近年收購客仔喺自己條供應鍊做生意,為咗達標,利豐今時今日,要收購姊妹公司利和。集團合併後收入,2009年已經達到152億美金,一兩成自然增長,一兩單收購,又交到數。

問題係,跟住三年又點,唔好唔記得,利豐市盈率超過40倍。

物體質量越大,加速越難,利豐在現規模繼續膨脹落去,投資者所押注者,已經唔係馮氏兄弟管理供應鍊技術,而係整合收購能力。到明年,如果利豐又掟出一個非常進取三年增長大計,可以諗諗,利邦(891)、利亞(8052)及玩具反斗城等姊妹公司,會唔會變成收購對象。