2012年4月5日星期四

恒隆66


恒隆(0101)最近又有新搞作,有兩件「恒隆66」品牌代表,講吓恒隆有乜威女嘢,例如未來十年,每年有等同美國帝國大廈樓面面積的大陸商業物業落成、未來資金需要500億,但係公司用CASH都足夠支付咁,有興趣又唔係飲緊水的話,可以跟住呢條「恒隆知多點」的連結去望下。

特首跑馬仔陳啟宗啱啱大注押中,而家擺明有戲唱,如果唔係都唔會TELETUBBIES上身,跟住應該多啲留意呢隻嘢有乜搞作。

油企鬥虧


今期開油,比較吓中石油(0857)同埋中石化(0386)兩條大數,將兩桶巨油拍埋一齊,睇睇有乜火花。

先講吓近期一個潮語,叫做「民企風暴」,幾間民企出現帳目問題,股價大插兼累街坊,最搞笑係有啲明明唔係民企,都要插埋一份,認真無辜。由舊年混水摸魚爆出嚟開始,仲有穆迪份紅旗報告,唔少老外透過沽空民企賺到笑,部分民企盤數認真恐怖,不過如果「民企」同「信唔過」可以劃上等號,就唔會有咁多外國創投私募基金湧入中國,搶到私募市場個價,分分鐘仲高過公開市場。

講到尾,問題不在民企是否可信,而係一間公司的管理層信唔信得過,香港投資者雖然隔山打牛,將公司管理層及主要股東的名字,逐個進行「人肉搜索」,多數會睇到好多蛛絲馬跡。網絡搜索係一種技術,尤其係今日中國互聯網財經資訊大爆炸,掌握到網絡搜索的技巧同埋內地網上文化,等如擁有相對性的「內幕消息」,好過睇埋晒啲識少少扮代表的咩嘢大行報告,最低限度,識中文的香港散戶買中國民企,穩陣過俄文唔識一隻就去買俄鋁(0486)咁囉。

大家可以回想一吓,十年前市場對國企的印象,效率奇低,國企老總又容易穿櫃統底,當年種種偏見,同今日市場刮起的所謂「民企風暴」,竟然似曾相識,唔好忘記,過去十年,亦係投資中國大型國企的黃金十年。

民企予人「容易爆煲」的感覺,其實係相對於大型國企的穩陣,爆咗最少阿公會埋單,不過咪以為「做數」只係民企專利,民企最常用一招係變大盈利引人落搭,國企可能出現種種政策或政治原因,將盈利收收埋埋。大到好似中石油中石化咁,盤數一樣有唔少「水份」,亦有透過會計帳目整色整水之嫌,嗱嗱嗱,財經茄哩啡只係執《人民日報》等官方傳媒口水尾,冇話中石油中石化「做數」。

中石油同埋中石化,兩間公司其實做緊同樣幾辨生意,採油煉油賣油,上游做到下游一條龍,最大分別係中石油產油多煉油少,中石化業務比重掉轉,理論上,中石化煉油業務應該蝕到喊,不過呢,舊年中石化煉油業務,虧損只有358億元(人民幣,下同),中石油煉油虧損竟然高達618億元。

兩間巨型油企,煉油業務都包括原油加工,同埋生產汽、柴、煤油,以一噸原油等如7.33桶的單位換算,中石油原油加工量在2011年唔夠10億桶,汽、柴、煤油產量8,715萬噸;中石化原油加工高達16億桶,汽、柴、煤油產量1.3億噸,點計中石化的煉油虧損,都應該遠超中石油。

唔簡止係咁,中石油產油多,原油加工業務, 9成自己幫襯自己,中石化有8成加工原油來自進口,要硬食國際油價,兩者成品油價格,又係由中央政府決定,一來一回,中石油同埋中石化煉油業務虧損的巨大落差,更加顯得唔合理。

中石油同埋中石化,兩間公司體積太大,業務及財務數據又係天文數字,大到超乎地球人大腦可以即時理解的地步,分開睇,唔覺得有問題,拍埋一齊,竟然大有文章。

煉一桶蝕一桶的國家任務,唔會錯得去邊,不過俗語都有云,人有人阿媽,妖有妖阿媽,大型國企都有更大的阿媽,兩間公司同非上市母公司中間的業務往來,唔同業務板塊會計點入數,都可以營造到自己想俾大家見到的財務效果,中石化舊年純利732億元,雖然冇乜增長,但仍然再創歷史新高,中石油純利1,329億元,仲同你講倒退半成。

如果唔係苛稅猛於虎,中石油係一間一年等閒賺你二、三千億銀的油公司,斷估收收埋埋多多少少暴利,費事向中央爭取更有利政策空間時處於不利位置,嗱嗱嗱,講多次,唔係順叔吹得就吹,官方喉舌咁講咋,中石油股東有機會就自己問吓管理層啦。

伸延閱讀:
1. 人民日報海外版: 兩桶油煉油巨虧水分大 不該群眾買單

2012年4月3日星期二

上堂開示

塵勞迥脫事非常 緊把繩頭做一場
不經一番寒澈骨 焉得梅花撲鼻香



報道完畢。

博鰲亂彈(下)

上回講到,行政長官曾蔭權,自2005年上位以來,差唔多年年都係海南博鰲亞洲論壇常客,同領導人打吓招呼在國際舞台露露面,不過今年忽然休假,由林瑞麟以政務司司長身分帶隊,唔知係咪當奴認為自己冇打好呢份工,政協副主席無望,費事攝拉。

博鰲論壇講明係「亞洲版達沃斯」,在中國主場,留意北京領導人同乜人見面,想在國際舞台帶出乜嘢訊息,有一定啟示作用,例如舊年博鰲論壇,順手在隔離三亞搞個金磚五國峰會,將「BRIC」變咗「BRICS」,溝埋南非,又例如今年副總理李克強,同台灣候任副總統吳敦義坐埋粒幾鐘,仲講到連台灣要擴大國際參與空間都有得傾。

去到企業家層面,大型國企時至今日,個個仲以擠身全球乜乜100強物物500強為榮,去經濟論壇吹水又係公家數,博鰲可能係全國每年「三公」開支最高的盛會,中國企業在博鰲講乜,多數過眼雲煙,反而會留意一啲市值有咁上吓份量,但係又從來唔出席呢類吹水唔抺咀論壇的民企,可能係管理層實事實幹的表現。

好似瑞士達沃斯一樣,博鰲論壇近年越搞越大,出席嘉賓及會員人數屢破記錄,話題亦越講越雜,於是需要搵多啲名人嘉賓做賣點,所以今年達沃斯會見到扮到好似昂山素姬的楊紫瓊,博鰲亦會年年見到姚明。

有時諗吓,做姚明都幾慘,天賦異禀7呎6吋,冇錯令佢變成中國體育界罕有巨富,但同時亦被迫成為全中國最唔可以去滾的男人,唔使衛星追蹤,去到邊做過乜都可能有人在網上直播,例如早排上海人大政協會議,網上就廣傳一張「姚明為何不睡」的趣怪相片。博鰲大會可能太體貼巨人一柱擎天的辛酸,舊年特登斥資打造一個「姚明專用尿兜」,頂到上普通人心口,成為網上熱話兼「大會景點」,聽講仲有FANS專門捕在尿兜隔離,等巨人小解同姚明合照,但係由於打造巨人尿兜所費不菲,亦為大會惹來唔少非議。

「姚明專用尿兜」的出現,既反映中國經濟的「硬實力」有所提升,亦係中國面向國際「軟實力」有待改進的最佳例子,見微之著,待客貼心有餘,但突兀過籠,旅客行步路都覺得唔自然,呢個其實係海南省發展旅遊的最大問題。

配合海南作為「國際旅遊島」的規劃主題,航天控股(0031)在海南島有塊2500平方米地皮,諗住同母公司航天科技集團,搞個地球獨一無二的「大空主題遊樂場」的「旅遊地產」項目,住宅隔離有火箭發射已經夠騎呢,聽講中國射乜上太空,為咗保密,發射前後會疏散附近居民人員,咁又即係話,海南島的「火箭發射場」,及航天控股的「旅遊地產」,最少是但有一個,同「論壇經濟」一樣,其實掛羊頭賣狗肉。

如果旅遊勝地,講緊一啲一世人要去一次先安樂的景點,渡假勝地就一年有幾日得閒你會想去住幾日的地方,除咗四季如春風景怡人的天然優勢,仲要俾到遊客悠然自得的感覺,海南島冇乜「不到長城非好漢」的中華史跡,雖然位近赤度,不過水唔夠清沙唔夠幼,中央政府將海南定位做國際旅遊島,真係要搞,頭等大事其實係搞靚啲水,保育自然風景景色,但近年所見,個個掛住圈地,唔夠分仲要開山劈石焚林斬木,海岸線被霸晒,全國最大島嶼竟然仲要填海起人工島,起人工島又要起個間全球最高酒店,其實本未倒置。

海南省定位國際旅遊島,攞住國家支持出現固定投資熱潮,起到成個島都係「錦綉中華」就死得,最怕搞唔成旅遊或渡假勝地,變咗地產炒家朝聖之地,掛羊頭賣狗肉,一島銅臭就兩頭唔到岸,最多成為「國人旅遊島」刺激內需,國際旅遊島似乎係越行越遠。

關連文章:
1. 博鰲亂彈(上)(下)

2012年4月2日星期一

鬼佬看香港

聽講新地(0016)今朝早,舉行分析員會議,為幾名董事涉及老廉大案解畫。

投資銀行同埋信貸評級機構,以前會在香港放唔少人,近年中國嘭嘭聲,研究香港的人手越嚟越少,唔少大行仲會養住一班地產分析員,一來因為地產夠大,二來可以兼職撈埋香港經濟分析,抵食夾大件。

換句話講,外國芬佬等唔識中文的投資者,近年唔係咁容易直接感受到香港的政經脈搏,主要靠英文傳媒,英文傳媒睇香港有幾叻,你話呢?

例如新地呢單嘢,所有鬼佬傳媒,舖天蓋地咁報,《經濟學人》夠巴閉未?日前在「Analects」(「論語」喎...)網上專欄,寫咗一篇「Flying too close to the Sun?」的大文,唔好睇乜,一句「政務司司長」係「公務員之首」,已經露底,對香港了解,停留喺陳四萬年代,只係「有限公司」。

英文傳媒知少少,但係個個又長篇大論咁報,鬼佬投資者唔知頭唔知路,必定驚青,可能呢啲先係「最不明朗因素」。新地租金收入,一早已經超越九倉(0004),但又唔好似九倉咁,揹咗一大嚿中國房產風險,一來負債奇低,二來更睇唔到融資需要,當標普同穆迪,齊齊出嚟將新地放在乜撚嘢負面觀察名單,幾乎可以肯定,市場對新地呢單嘢,反應已經過大。

你可以話香港玩地產,未來遊戲規則可能會出現大變化,又可以話影響香港樓價的政府政策及息口,都已經接近臨界點,但當你話呢單嘢影響新地短期的融資能力借貸成本,就好硬膠囉。

去到呢個時候,有關新地的報道,信英文傳媒,不如信大公文匯;信評級機構,不如信中資投行,中信證券上星期,仲出咗一份報告,標題叫做: 「Crisis presents buying opportunity」...

唔少鬼佬,識句「你姣媽」就扮中國通,不過點都好,經過呢幾個月大龍鳳,外國傳媒可以好大聲咁再次宣布「香港已死」,斷估梁振英好快要湊吓班外老傳媒,為外國傳媒眼中的香港,修補一吓近幾個月嚴重撕裂的形象。

新地上個月,第一次將業績後分析員會議視頻,放咗上公司網頁「投資者關係」一欄,如果今朝真係出咗嚟解畫,公司就算唔夠薑開記者會,亦應該將投資者會議內容放埋上網,可以展露「自信」的一面。

關連文章:
1. 換鼻窿出氣
2. 次輪好戲(下)
3. 新地之料(上)(中)(下)

伸延閱讀:
1. 經濟學人: Flying too close to the Sun
2. 華爾街日報: Chillwind for Hong Kong Tycoons
3. FT Lex Column: Sun Hung Kai's arresting developments
4. Bloomberg: Sun Hung Kai Arrests Reveal Hong Kong Builders Succession Risks
5. S&P: SHKP 'A+' rating on creditwatch negative
6. 大公報: 兄弟鬩牆恩義絕 淚斬馬謖豈無因
7. 中信證券:

博鰲亂彈(上)

(部分內容,刊於2012年4月2日am730)


一年一度的博鰲亞洲論壇,新鮮熱辣在海南開幕,「經濟論壇」偉大宏觀議題,留俾政經猛人,財經茄哩啡今期,掉轉頭同家睇睇,「論壇經濟」有乜笑位。

所謂「經濟論壇」或者「金融論壇」,可以話係全地球供應最氾濫的一種經濟活動,就算喺香港,幾乎每個星期,喺會展呀金鐘五星級酒店呢啲地方,都會見到大大小小乜乜物物論壇,近年更加成為各大小財經傳媒搲撈搵錢的噱頭,搵幾件知名人物,打住個霹靂無敵不著邊際的議題,例如「金融海嘯與四川熊貓生殖能力的展望」咁,租個場賣飛,位位幾嚿水,好賺過演唱會,呢啲叫做「論壇經濟」或者「論壇金融」,雖唔算得本未倒置,但相信唔少不為神功只為弟子。

集思廣益,當然係好事,但係一大班友就一大抽議題你一句佢一句,就會變咗人多口雜。一個好簡單例子,就係引入所謂「部長制」後的香港行政會議,人數突然膨脹一倍,每人發言60秒已經半粒鐘,作為權力核心兼特首「內閣」,唔係坐埋同一條船共同進退,返而各懷大計, 諗住他日有望上位者只係睇吓標點符號,又點會傾到乜嘢出嚟。

將經濟論壇搬到去國際舞台,仲要大型嗰隻,千幾二千人困獸鬥幾日幾夜,仲要加埋外語翻譯,講完HELLO就GOODBYE,最大作用,只係俾出席人事拉吓關係握吓手咁,無論討論議題係乜,開會效率其實相當有限。

經濟論壇代表,當然要數一年一度在瑞士達沃斯的大龍鳯,如果「世界經濟論壇」真係咁有串連作用,政商猛人可以衷心交流共襄盛舉,地球唔會又有金融海嘯又有歐債危機,講穿咗,達沃斯的所謂「世界經濟論壇」,其實好似場時裝騷咁,邊間大型公司冇代表冇聲音,可能顯得好冇臉。

近年中國開始以「大國」身分出現世界舞台,中國領導人及大型國企高層,對於出席呢類國際經濟論壇,可能存有一定虛榮感。不過去到今年,會期同農曆新年撞期,聽講北京曾經接觸達沃斯主辦當局,但世界經濟論壇唔肯將就,結果一拍兩散,結果出現北京領導人缺席達沃斯的場口,香港特首曾蔭權,成為中國代表團最高級代表之一,仲代表北京,用自己98年入市打大鱷經驗,教誨式咁狂串歐美政府官員處理金融危機唔夠決斷添。

中國達沃斯個經濟論壇搞得咁開心,十幾年前,開始搞個「亞洲版達沃斯」,發起人包括前菲律賓總統拉莫斯等親華前亞洲區政要,2002年起,每年呢個時候在海南舉行博鰲亞洲論壇年會,俾亞洲討論亞洲事務。

牌面講到好偉大,不過同達沃斯一樣,又係俾錢賣廣告買關係的場口,「論壇經濟」味道一樣咁濃厚,例如,要出席博鰲亞洲論壇,除咗大會邀的嘉賓,其他人要出席,就要先入會,公司代表,最高級別的「鑽石會員」,入會費盛惠25萬美金(含16年),「權利」包括在年會期間,「優先」出席各國政府部長舉行的早餐會咁,多啲機會同政要打吓關係露吓面咁,在會議期間亦有「優先」發言權,有幾「優先」唔使問阿桂,除咗入會費之外,企業越巨型越有發言權,其他要出博出位公司,當然係贊助越多越有發言權。

舉個例,博鰲論壇其中一個常客,就係SOHO中國(0410)董事長潘石屹,除咗話海南係佢發跡之地,年年喺博鰲出出入入,吹水唔抺咀,點都有助提高知名度,當係幫公司抺招牌都好。

近年博鰲論壇,仲有一個常客,叫做曾蔭權,幾乎年年必到,逄到必早。早兩個月在達沃斯,當奴仲講到地球冇咗佢唔得,今年呢,上個星期寧願休假,都冇出席博鰲年會,可能近排香港多事,連向來關心祖國的當奴,都要行開吓散散心,當奴政協副主席個位,應該凍過水了。

下回再續。

當奴在博鰲留低的腳毛

以署理行政長官身份帶隊出席,獲政協主席賈慶林接見(相關新聞
第一次以行政長官身分帶隊,獲國家副主席曾慶紅接見(相關新聞
2007年
冧庄做特首,去北京接受委任狀,唔使去海南親近領導人(相關新聞)
啱啱北京述職完畢,冇特別議題,同胡錦濤大合照會面(相關新聞
同澳門特首一樣,分別獲總理溫家寶接見(相關新聞
獲國家副總理習近平接見,不過都係大合照(相關新聞
同港澳官商代表團一齊,齊齊見胡錦濤兼大合照(相關新聞
休假,罕有缺席博鰲年會,由林公公司政務司司長身分出席(相關新聞

關連文章:
1. 博鰲亂彈(上)(下)