2011年10月7日星期五

價值缺失(下)

(刊於2011年10月7日am730)

有冇見過咁低B的數簿?

上回講到,港股跌到阿媽都唔認得,唔少股票,已經跌低過公司現金值,價值似有還無。

如果嫌中遠國際(0517)個資產負債表唔夠乾淨,仲有半個行家中外運航運(0368),呢隻嘢07年11月差唔多股市高峰期上市,集資超過100億元(港元,下同),到今年6月底,銀行存款加現金,總值69億元,每股現金值1.735元,10月初中外運股價低位見過1.53元。

中外運冇任何長期負債,短期負債都冇,只有億幾應付帳,非常乾淨,隻嘢做航運,又從來冇話買賣衍生工具對沖運費或燃油成本,資產淨值167億,市帳率0.37倍,歷史市盈率6倍。

當然啦,中外運07年現金過百億,呢幾年買吓船咁揻咗30億左右,但盈利能力冇任何突破,停留喺幾年前水平,即係話呢間船公司營運動力相當有限,如果話全球經濟增長放緩甚至衰退,做航運亦唔會好賺得去邊,不過,現價買入的話,就算條船隊賺錢能力高唔高都好,最少係免費贈送。

中外運市值低過現金值,冇負債,如果仍然嫌佢主業前景唔明朗,又驚班國企管理層,收收埋埋唔知乜嘢爛數或者突然發顛衝去買太空基地,仲有一間恒基發展(0097),除咗現金,唔單止冇負債,幾乎連資產同經營主業都冇,得隻殼,死未。

恒發成個資產負債表,得8個項目,可以用嚟做會計入門教材,小學生都睇得明,真係有意思者,就係14.8億元現金,同埋浙錢杭州錢江三橋6成權益,以無形經營權入帳,價值4.7億,至星期二收市,市值14億多少少,即係同公司現金值差唔多。

一隻咁乾淨的主板殼,殼價都值5億,私有化一來一回,只係收得幾億返嚟,唔化算,亦唔會有可能,養殼千日,公司「主業」又係中國基建,最正路做法,就係將早年私有化咗的恒基中國內地房地產資產,擇個良辰吉日重新上市,不過,恒地(0012)系出咗名鍾意養住一大揪上市公司唔知想點,咩市盈率市帳率,講嚟亦都浪費時間,恒發條橋冇乜特別,勝在收入夠穩定,每年每股大約賺5港仙,過去兩年,派返4仙出嚟做股息,超過8厘息的話,又不妨坐坐。

呢期篤咗呢幾隻嘢出嚟,唔係話超抵買零風險,3年前呢個時候,中遠國際最低跌到9毫9,中外運航運得0.96元,恒發見過0.29元,冇投資是零風險的,經濟起跌盈利高低管理優劣,唔係咁易估,會計手法加埋結構投資工具亦令市場透明度越嚟越低,不過,呢幾張最簡單易的的資產負債表,可以提醒一吓大家,市場「價值觀」或會改變,總有些「價值」,是不會改變的。

關連文章:
1. 價值缺失(上)(下)

2011年10月6日星期四

價值缺失(上)

(刊於2011年10月6日am730)


究竟「缺失」啲乜?

今期講吓,一啲被沽到阿媽都唔認得,價值應有還無的股票。

首先睇睇「缺失」呢兩個字。「過去在個人感情上有過缺失」,呢句嘢唔知出自邊個天才文膽,幾廿歲人,有幾多個咁幸福成世都簡簡單單快快樂樂?「缺失」,講緊應該做但係冇做,而唔係唔應該做不過做咗(「應該」可以用「想」代替),如果話處理感情問題犯過錯一塌糊塗,一句「completely rubbish」可能仲合適一啲。

而家全世界啲茄哩啡,好似順叔咁,就認真缺失喇,明明係個橙,點知變咗個桔。倫敦可以爆發街頭騷亂,紐約又有「佔領華爾街」示威抗議金融腐敗,都係社會基層對貧富懸殊的反彈,年青一代對政商精英的不滿,咁搞落去,分分鐘輪到香港,以前遊行終點,下亞厘畢道都可以吓鎖鏈爬吓樹,新政府總部將示威區劃到藍球場鎖匙圈咁大,陌生環境好易擦鎗走火,咪話唔使擔心。

唔好話班後生仔,面對今日全球金融環境,唔少專業人士都若有缺失,唔知點解釋個市做乜咁跌法,越嚟越多人,傾向相信有國際大鱷派「空軍」狙擊香港,日前香港7大證券經紀組織,齊齊操上政府要求禁止沽空,呢種場面,08年都冇出現。

以前用嚟衡量價值的方法,今時今日全部缺失,如果你問黃金應該值幾多美金一安士,恒指市盈率又值唔值8倍,財經茄哩啡都唔識答你,不過可以好肯定咁講一句,香港千幾隻股票,唔會全部爆煲,冇做孖展冇買可以輸突的衍生工具的話,睬你都有味。

大型國企銀行,7倍市盈率已經夠低,而家跌到5倍樓下你睇,你可以解釋,資產負債表裡裡外外,可能收埋唔少核突嘢,爆起上嚟低處未算低,但係有唔少上市公司,資產負債表簡簡單單乾乾淨淨,又坐住大嚿現金,如果市值跌到低過公司現金值的話,就肯定係跌過籠。

中遠國際
舉個例,中遠國際(0517)早兩年賣咗遠洋地產(3377)股權,叫做高位套現,至今年6月,坐住57億現金,至今個星期二,市值得39億,幾乎1蚊股票買個半現金,資產淨值71億,折讓幾多自己計,公司主業做乜自己睇。

中遠國際資仲揹住3億幾短期借貨,又有廿幾億應收款,如果仲係嫌唔夠乾淨,下回再續,睇睇另外兩間,零負債之餘,資產負債表又簡單到無倫的上市公司,又係咪已經價值缺失。

關連文章:
1. 價值缺失(上)(下)