2011年1月28日星期五

以和為貴(下)

(刊於2011年1月28日am730)


投資澳博最大風險?

上回講到,賭王爭產,為成香港最好睇賀歲劇,日日高潮,單嘢有排玩。

12月中,老賭王將7.7巴仙股權,轉讓俾四太之後,德銀分析員仲喺電郵同客仔講,可以減少澳博股權繼承問題不明朗因素,今個星期初,澳博停牌宣布二三房瓜分老賭王名下澳娛股份,又跳出嚟唱好,話一天光晒,調高目標價近兩成到14.7元,錯到離罩。

不愔豪門恩怨,亦唔識國策方向,濠賭股分析員,可以話係全港澳最水皮一班。過去兩年,基本上間間大行都唱好濠賭股,但係基本上個個都睇錯市。德銀當日湊澳博上市,理論上,應該好了解澳門賭業生態,但係舊年今日,德銀話澳博12個月,目標價只係睇5.7元。高盛08年11月,俾銀河娛樂(027)12個月目標價,你估幾多,八毫子,之後兩年,將目標價調高19次,幾乎月月一劑,認真兒嬉。

濠賭公司同香港零售公司股價,呢兩年升幅驚人,越升越有,原因得兩個,第一係自由行政策鬆咗,多咗大陸同胞嚟港澳洗錢;第二個原因,就係呢班人有錢咗,加埋人民幣升值,由消費力到消費意欲,大大增強,國人出入旅遊,短期政策或有變動,大趨勢必定越嚟越自由。

長賭必輸,澳門舊年賭金收入1880億(澳門元,下同),按年升近六成,再創新高,其實話你知,你睇,你班傻仔又輸咗千幾二千億。幾間濠賭股,唔計近日大插嘅澳博,市盈率全部50倍以上,基本上假設咗賭金收入,每年要有三四成升幅。

共產黨員唔準賭錢,巨型國賺過千億,多數即時有更重國家責任,澳門賭場每年賺千幾二千億,近一半被美國佬袋走,仲話每年增加三四成,如果唔好好利用,一定唔啱阿公胃口,大陸未來五年玩收入再分配,澳門賭業發展最大問題,正正係賭金巨額收益,從來冇一套完整再分配思路。

澳門財政儲備,超過1100億,人口55萬,人均20萬元,如果咁都搞到差佬喺示威人士面前向天開槍,個政府認真唔掂,澳門政府水浸,但住公屋人口比例,佔人口唔夠兩成,即係話唔係冇錢起公屋,而係冇土地,變晒賭場酒店。

澳門未來發展,可以想像,會先學新加坡,搞到幾乎人人有公屋安居,大增社會福利,人人開心之後,再向賭場開刀,加博彩稅或引入新稅種,將賭金收益,支持珠海發展。

虎年最後一章,借老賭王一句,祝中港台澳以和為貴,和氣生財,開開心心迎接新年。

伸延閱讀:
(1) 阿拉斯加永久基金對澳門管理財政儲備的啟示
(2) 澳門經濟學會: 橫琴建居屋

2011年1月27日星期四

以和為貴(上)

(刊於2011年1月27日am730


今期開賭場。

賭王何家大宅,向來娛樂性豐富,今年歲晚特别熱鬧,為香港財經兼娛樂新聞版,填上有史以嚟最精彩一章。

老賭王舊年出院之後,名下幾間上市公司,出現一連串股權變動,突然咁多動作,即係大統承傳未有長遠計劃,又可能各房人馬,知道就算喺「正大光明」匾後面寫好晒密喻,最後都可能爆多五至九房出嚟打幾場官司,冇嘢穩陣得過,趁老賭王仲生生猛猛,將股權寫上自己個名。
到十二月底,四太做埋澳博(880)董事總經理,順叔仲同朋友講,點解三房好似冇乜著數,又冇乜聲氣,朋友話,可能取決於幾個女人性格,事實證明,原來豪門深深,個個都係一種性格,女人多,超嚟超去,件事更加金枝慾孽。

根據二房超鳳家書,稱呼二太,當然叫「MOM」,稱呼三太叫「INA」,稱呼四太,叫「ANGELA LEONG」,咁客氣,邊幾個女人同氣連枝,其實已經呼之欲出,而家決定性因素,可能係邊房可以挾住老賭王喺自己間屋過夜,二三房人馬,可以大大聲話,四太照顧老賭王不周,喺泰國插親肛門,喺四太香閏更跌到癱咗,放心唔落,都係留在三房,大紅燈籠高高掛。老賭王一世風流,最後歲月,斷估分分鐘行唔出二三房監視範圍,團年飯生日酒,咁多房一炮過夠熱鬧,唔駛分開幾次搞咁麻煩。

老賭王喺三太香閏聲明之中,其中一句好有意思:「如果明天有人持我簽名的字條再提修改或用任何理由提出改變股權分配的話,這些簽名的文字內容一定不是真實。」即係預咗未來可能仲有變數, 真係恭喜晒香港律師大律師,邊個做到呢單大生意,又有人可以買山頂大屋。

中國人傳統智慧,以和為貴,唔係冇道理嘅,一班股東爭嚟爭去,對公司冇影響就假,開賭場係偏門生意,老賭王鎮得住場,一班女人勾心鬥角,可唔可以鎮得住班馬交叔父,好成疑問。澳娛股東個個唔係善男順女,股權結構,分分鐘複雜過老賭王家族圖譜,爭產風波就算塵埃落定,分分鐘有黃雀在後,族外力量介入,打破原有勢力平衡,澳門街就算唔爆發內戰,都好難有穩定日子。

下回再續,睇睇其他濠賭股。
伸延閱讀:
(1) 十姑娘回憶錄: 澳娛真正話事人
(2) 澳娛股東名單 - 澳博招股文件資料(P.86)