2010年4月23日星期五

財經影評(上)

(刊於2010年4月22日am730)


Timeless 財經演員

ArtWalker 賣肉導演

(標題為後期改動)

中國經濟堀起,要做真正超級大國,下一步全面提升軟實力,乜乜三網融合,物物文化振興,就係配合呢個國家戰略,起網絡輔渠,搞內容駁水,中國資訊高速公路,隨時爆發另一個投資熱潮。

十年一夢,類似劇本,二千年上演過一次,唔想信錯人買錯飛,先要學識「睇戲」。財經茄哩啡,今個星期,用兩部電影背後人和事,寫吓「財經影評」。

話說近年香港影壇,有位新晉導演,叫雲翔,好出位,最新一部《安非他命》,入圍柏林影展,做埋香港電影節閉幕電影,但公映前因為剪唔剪雞姦鏡頭,同電檢炒大鑊,鬧上特首辦,免費宣傳。

雲翔做導演,太浪費,因為佢係一個極出色演員。

十幾年前,佢叫鄭雲翔,係香港創業板第一間上市公司,天時軟件(8028)靈魂人物,有人估係主席鄭健群「個」仔,係唔係冇人知,不過上市時兩人持股量差唔多,又共同持有廣州寫字樓,租翻俾公司唔知點解一年又收差唔多一百萬租,關係唔簡單。

講到呢度,有翻十年以上年資嘅投資者,應該都會「哦」一聲,就係佢。

創業板99年底開鑼,作為天時COO,雲翔飾演年青IT才晉,當時撞正大紀元科網狂潮,天時「砌底微軟」、「盈利可以過億」等台詞,吸引唔少投資者,包括台灣昆仲基金,成功集資近五億港銀上市。當大家對土炮科技公司無限憧憬,天時上市唔夠半年,近兩億同誠哥買咗中環中心頂樓寫字樓,其後投資多個唔知係乜嘅科技項目,集資所得、公司資產,慢慢消失,成為香港創業板經典墓碑。

嗱,各位觀眾,記唔記得財經茄哩啡舊年開張第一炮,「財演與財茄」一文講過,乜人先係真正食大茶飯嘅財經演員?

雲翔01年初功成身退,近五千萬股幾時套現,已經搵唔到記錄,當佢五毫子沽貨,最少淨袋二千萬。過咗海就係神仙,股東做蟹被綁,雲翔就財務自由,可以做翻自己。除咗《安非他命》,仲自資拍過唔叫座亦唔多叫好嘅《永久居留》、《無野之城》等同志片,由「列限級」到「列根級」,仲為藝術犧牲,剝光豬拍宣傳寫真,出錢出力,睇得出幾有誠意,不過當日天時股東,見到雲翔今日「雄風」,可能百般滋味。

世事冇絕對只有相對,有正就有反,有假亦有真,在二千年科網熱輸到嘔泡投資者,如果正眼唔望一吓中國市場嘅科網公司,而家可能後悔莫及,明天睇睇,《雪花秘扇》呢套電影,背後又有乜嘢故仔。

關連文章:
1. 財經影評(上)(下)

伸延閱讀:
1. 公開大學2000年8月通訊: 電腦奇才鄭云翔的成功之道
2. 湯才文庫: 借創業板過橋 科技小子掠四千萬
3. 董敏莉低V出海 男友40水頭足

財經影評(下)

(刊於2010年4月23日am730)


龍陽有癖

磨鏡無情

(標題為後期改動)

《安非他命》賣斷袖之事,《雪花秘扇》講磨鏡之情,電影背後人物,同樣係資訊高速上財技能手,但風格各走極端。

《雪花秘扇》係香港上市公司華億傳媒(0419),回歸電影製作第二炮,合資夥伴包括上海文廣同IDG資本,預計今年內上畫。

華億主席田溯寧,前網通CEO,海歸派代表人物之一,可能係非黨員之中做到最高級嘅國企老總, 不過當年佢老闆叫張春江,網通唔見特別出色,壯志未酬,06年劈炮,同年創立中國寬帶產業基金(CBC),投資大陸通訊及媒體公司,07年入主華億。

娛樂事業太聲色犬馬,揀公司,順叔會首先揀唔鐘意出風頭嘅管理層,田溯寧低調得離譜,娛樂版唔見人,財經版都唔多見影,唔睇年報,唔知華億有份投資《十月圍城》。

CBC入主華億,冇開拓新業務,但帶嚟星級股東及資金,包括IDG。IDG創始合夥人熊曉鴿,科技創投教父級人物,做埋華億副主席。華億五年內轉手兩次,引入新股東,可能因為隻殼太爛身爛世要修補下,未必有太大意思,不過由田溯寧到熊曉鴿,以自己基金名義入股,就算唔係全副心機放在華億,金漆招牌亦唔可以隨便刮花,最低限度,小股東被搵大笨機會好低。

華億廣告業務,冇乜特別,投資電影,幾值得期待,《十月圍城》投資大約1.5億人仔(下同),大陸票房收近3 億,香港金像獎橫掃八獎,想知道財資高手,做電影係咪同樣出色,就要留意吓《雪花秘扇》,係咪一樣可以叫好叫座。

蕃薯梁入股意馬(0585)後解釋,「極其看好文化產業振興規劃」、又話「三網合一亦蘊藏無窮商機」,唔係門面台詞,中國電影,舊年票房總收益62億,唔及《阿凡達》三個星期收入,相對荷李活,中國市場仲有好大空間。近月所見,熊曉鴿做電影出品人、蕃薯梁做意馬白武士、星爺間帝通(8220)投資網絡遊戲、內地科網公司投資電影,齊齊CROSS-OVER,好多戲棚搭好晒,十年前科網潮,會唔會在中國資訊高速公路重演,大家可以等睇戲,亦可以順勢滑吓浪。

不過記住,文化產業,同英超球會一樣,保證最賺錢者,只有明星,就算產品成功,亦唔可以年年月月複製,呢類公司,絕大多數唔應該長線投資,如果有,通知聲。

(同場加映: 幾個頒獎禮,意馬嘅票房兼股價毒藥《阿童木》,食白果,有啲唔公平,當年賣咗聖誕樹轉行電影動畫,如果整隻好似喜羊羊嘅公仔出嚟,一定會被班股東片到出血,世事難料,喜羊羊咁賣得,《阿童木》咁慘淡收場,意馬管理層,最少做咗啲可以同荷李活有得揮嘅產品,堅持幾年先爆煲,財經茄喱啡財經影評,決定頒個「最可惜電影」俾佢…)

關連文章:
1. 財經影評(上)(下)

伸延閱讀:
1. 公開大學2000年8月通訊: 電腦奇才鄭云翔的成功之道
2. 湯才文庫: 借創業板過橋 科技小子掠四千萬
3. 董敏莉低V出海 男友40水頭足