2011年8月19日星期五

小強大禮(下)

(刊於2011年8月19日am730)

上回講到,國家副總理李克強訪港,一場中港經濟合作論壇大龍鳳,資訊發放搞到一鑊粥,唔知發生咗乜事。

星期四朝早行過報紙檔,見到兩大收費大眾報章,一張頭版絲襪男偷拍國泰空姐,另外一張係iPhone河邊做Sit-up跌穿頭,擺明當李克強透明,呢個現象,令順叔忽有所悟。

李克強呢劑擺明車馬要送「大禮」要「親民」,三日兩夜行程,特區政府冇樣嘢肉緊,反而保安安排就空前嚴密,封路閉館遠遠超越當年江澤民,令副總理路過之處,生人勿近兼神憎鬼厭,特首曾蔭權被港澳辦頂頭老闆王光亞公開落面,數佢唔識做波屎,退休後政治花樽都冇得做,可能係咁,唯有繼續扮演「疑似泛民終極無間道」,唔知有心定無意間,今次成功將李克強「小強」化。

咁即係話,中央及港府關係,其實已經跌到歷史低位,甚至去到無偈傾程度,李克強拎住份所謂「大禮」,曾蔭權唔可以攞彩話自己「成功爭取」乜乜物物,於是放軟手腳,成個《國家“ 十二五”規劃與兩地經貿金融合作發展論壇》,由得班央官吹水冇乜點配合。

講到尾,咩「挺港」咩「大禮」,都係近年北京刻意營造、兼香港傳媒慣性接受嘅自我婑化工程,人民幣要國際化,要試水,唔嚟香港唔通去新加坡?

經過上星期全球金融市場「貸評之亂」一役,李克強今次訪港,最大觀眾其實係國際市場,喺中美貨幣政策大角力下,闡述人民幣國際化下一步路線圖,所謂6招36式,真係有料到,其實都係圍繞境內境外人民幣點樣流出流入,香港又可以點幫手,為呢個封閉貨幣循環打通任督二脈。

放人仔出境,今次只得一項措施,就係跨境貿易人民幣結算認點範圍,由目前20個省市擴大到全國,講緊一個8成變10成量變,但越嚟越多人選擇收取人仔,人仔喺貿易帳亦會出多入少,呢個離岸人民幣水池,肯定越谷越大。

放番人仔入境,回流機制改革今次多咗嘢睇,包括嚟香港發多啲債及放寬準許人民幣直接投資,當然仲有容許境外人民幣,透過合資格境外機構投資者,買賣內地股票,呢個小QFII,起步點只有200億人仔,唔算多,流出流入幾項新措施,亦可以話冇乜大驚喜,不過鏡頭一轉,中信證券嚟香港上市,時機上唔會死錯人,港交所(388)又話同滬深交易所成立合營企業,呢個局,表面艱慢板,暗底開快車。

伸延閱讀:
#

2011年8月18日星期四

小強大禮(上)

(刊於2011年8月18日am730)


今期開阿強,唔係香港傻強,講緊副總理李克強。經過上星期國際金融市場大龍鳳,呢位疑似候任總理,喺中美貨幣大拗手瓜緊張時期,挾住人民幣國際化路總圖,包裝成挺港六招三十六式,當係大禮送畀香港人,睇睇其實係乜。

今日首先要鬧人,鬧邊個?林瑞麟。

李克強訪港,重頭戲《國家“ 十二五”規劃與兩地經貿金融合作發展論壇》,呢場大龍鳳,除咗李克強主題演講,人民銀行行長周小川、發改委主任張平、商務部部長陳德銘等,全部蒲晒頭,個個有料爆,其他節目仲有200億國債發行、CEPA唔知第幾期,唔少香港上市企業簽署呢樣嗰樣合作協議等,出席者幾乎包括中港所有財金要員,商界學者加埋成千人,可以話係香港回歸以嚟,最大型中港經濟合作論壇。

一個咁重要場口,事前宣傳等如零,連邊個主辦、香港定中央邊個主動提出去搞,亦冇人講過,突然「呯」一聲「阿強嚟喇」,就起壇作法,斷估唔少政商人物,如果收唔到邀請或者臨時臨急安排唔到時間出席,一定會好勞嘈。

如果話北京領導人行程份屬國家機密,事前唔可以咁高調,算;如果政府新聞署話同內地機構合作搞嘢,唔係香港可以話晒事,又算;咁事後香港政府係咪好應該,搭番個網上平台,統一發放有關今次論壇資訊,畀有興趣了解多啲中港金融融合嘅投資者或市民呢?

作為政制及內地事務局局長,林瑞麟成日叫香港政客及市民,多啲了解祖國,大佬,呢壇嘢你都唔幫香港市民了解多啲,唔通要打電話去國務院?政制及內地事務局網頁所謂「專題資料」,連「性別認同及性傾向小組」都有一堆,偏偏今次中港高格調論壇,鬼影都冇。

呢單嘢資訊發放做得咁差,反映中港事務一個最重要問題,就係涉及山頭太多的話,就好似冇人識做冇人肯揹鑊上身,咁用D8價錢請個局長,「統籌及促進與內地更密切的聯繫和合作」咪即係擲錢落海?

如果大家睇開財經茄哩啡,都應該知道順叔一路好關注中港金融融合發展,今次咁勞嘈,正正係作為一個有心人,想搵多少少資料出嚟,同大家分享吓都冇辦法,見微知著,香港政府管治團隊,今時今日「精神面貌」唔方「良好」得去邊,唔使望可以「切實有所作為」。

李克強六招三十六式「大禮」,連繼續糧肉果蔬供應都當一飛,可以想像包括唔少官話客套話兼廢話,但手上資料有限,睇多一日新聞先可以整理到一個似樣少少全局觀,下回再續。
伸延閱讀:
#