2011年10月14日星期五

當奴作首(下)

(刊於2011年10月14日am730)


富豪山下...

上回講到,行政長官曾蔭權,05年上場,當奴變特首,7年來行行雲流水乜都冇做,坐到夠鐘拜拜,又忽覺今是昨非,房策地政大轉向。

當行不行,當止未止,曾蔭權任內兩最政績,第一,撓起雙手令土地及住宅供應失去靈活性,成功爭取香港樓價重越97(難度其實高過爭取北極有企鵝);第二,放任樓市種種流弊通病,成功爭取「地產霸權」成為通俗政治議題。

樓價可升可跌,唔計呢樣,小市民最深痛惡絕兩大樓市流弊,其實來來去去圍繞住發水樓同縮水樓,兩大問題二者為一,政府呢頭容許發展商樓盤發水,掠奪納稅人利益及公共空間,嗰頭又放任發展商賣縮水住宅單位,損害消費者及投資者權益,呢個雙重屈機騙局,財經茄哩啡舊年7月初,上中下三期《發水秘笈》,已經講過呢個現象,大家睇返就知道問題有幾嚴重。

公道啲講句,曾蔭權任內,就呢個問題唔係冇做嘢,只不過係「扮做咗嘢」。地產大孖沙作為「老闆」之一,發展商呢本「發達秘笈」唔郁得,例如發水樓,最新一份施政報告,提都冇提,無意立法規管,亦從來無意增加城市規劃及建築物圖則審批透明度,香港傳媒亦從來唔重視呢方面資訊,好簡單咁舉個例,一塊住宅地皮拎出嚟拍賣,會成為新聞,兩三年後變成樓盤開售,亦會變成新聞,但係冇人會問吓,呢塊地最初,同樓盤最後「可銷售面積」總額,相差幾多發水幾多,如果規定所有樓盤開售時,都要公布埋地皮最初「可建樓面面積」同樓盤最後「可銷售面積」,消費者比較吓,就知道個盤發水比例幾多,做決定時候都會小心啲,公眾對建築物圖則審批呢個專業範疇,亦會多咗了解。

曾蔭權地政房策,包括發水樓及縮水樓,分別由林鄭月娥及鄭汝華處理,兩位鄭小姐都出名「打得」,上任後種種言行舉止,亦好容易令人感受到,真心想為香港市民做啲嘢,大家睇睇林鄭月娥支持度幾高就知道。不過,近來睇報紙及在公開場合,留心小小的話,不難發現兩位女將處處顯露出強烈無力感,斷估相當冇癮,市場傳聞,其中一位鄭小姐,近排同一班老朋友講開工作所面對難度,仲委屈到喊咗出嚟,如果呢對地政TWINS,未來心灰意冷離開官場,不難想像,幫曾蔭權處理地政房策,份工唔易打,好多嘢,老闆明知都唔肯做,幾好打幾有心又可以點。

官商勾結呢樣嘢,順叔一直唔係好相信可以喺香港發生。以曾蔭權能力及經驗,任內處理香港樓市種種手法,實在難以明白,06年曾蔭權啱啱冧莊,未來5年可以放手大幹,當年份施政報告「強政勵治」,得103段;夠鐘起身臨別抽水,今個星期一份「繼往開來」,足足厚咗一倍長達210段,望住兩份施政報告,5年謎團終於解開,順叔恍然大悟:我曉!咁簡單易明,好難唔曉。

關連文章:
1. 當奴作首(上)(下)
2. 財政失算(上)(下)

伸延閱讀:
1. 林鄭月娥暗示離開官場
2. 鄭汝樺做完今屆亦講再見
3. 發水秘笈(上)(中)(下)

2011年10月13日星期四

當奴作首(上)

(刊於2011年10月13日am730)

「止於所當行」

今期開香港房策地政。

先重溫一句舊話:「特首更加不在我的工作生涯規劃之內,只是工作交到了我手,就要拿出勇氣來承擔,憑我所有的能力和經驗,盡力而為。『行於所當行,止於所不可不止。』」

呢幾句嘢,係行政長官曾蔭權,在06年10月讀完施政報告之後,忽然蘇東坡上身「爆肚」之作。05年董建華腳痛,孤獨的推銷員執個大煎堆,未熱身已經要準備競選連任,刻意將施政視野侷限於未來8個月,強調「看得到做得到」,一來可以借董伯伯的高大空,突顯自己「務實」,二來可以擺明車馬乜都唔做住,等冧莊再坐5年先算。

當日受任期所限,施政被迫「行雲流水,初無定質」,仲講得講去,不過如果將曾蔭權過去7份施政報告,放晒一齊睇,咁就好易發現,咁多年嚟都仍然「行雲流水」,從冇見過乜嘢長遠規劃,「永無定質」,咩叫「六大優勢產業」?咩係「進步發展觀」?

好簡單咁舉個例,復建居屋,香港房策轉向最具象徵意義分水嶺,近年幾乎由地產大孖沙到80後年青人,七百萬人幾乎個個支持,就係曾蔭權一個反對,去到舊年仲係講緊「優化」居屋政策、咩嘢「置安心」,研究呢樣研究嗰樣,整色整水拖得就拖。

終於醒覺...

今日決定搵地復建居屋,供應都要2016年出現,曾蔭權05年已經講緊土地供應緊張,真係有承擔有遠見的話,就算唔即時決定復建居屋,亦應該晨早開始平整土地,為房策地政保持調整靈活性,曾蔭權舊年提出建立「政府土地儲備」概念,今年話新界元朗加工業用地,最少有260公頃土地,可見曾蔭權唔係唔知道點做,不過就係唔想做。

當奴作特首,7年來始終未脫「過客」心態,又難怪京官都睇唔過眼,插咀話香港解決社會矛盾不如澳門,只懂執行唔識點做波屎。

好好醜醜唔經唔覺,坐足7年,夠鐘起身講拜拜,曾蔭權驀然回首,竟然又覺得今是昨非,承認房策失策,星期三任內最後一份施政報告,忽然發憤圖強要「繼往開來」,五年乜都唔做,臨別秋波先嚟「繼往開來」,大佬,全世界有邊個政治體制,會容許話事人臨走之前先強政勵治、留一大堆政策包袱畀下一任埋單呢?唔係冇,中國共產黨就係,黨代表大會5年一次,同五年計劃開局之年相差一年,好似「十二五規劃」今年扑鎚,由下年十八大選出新領導班子執行,香港係咪要連大陸呢套都學埋呢?

當行不敢行,當止亦未止,下回再續,睇睇香港房地產市場,有啲乜嘢晨早要叫停,但係仍然繼續遺害的大問題。

關連文章:
1. 當奴作首(上)(下)
2. 財政失算(上)(下)

伸延閱讀:
1. 歷年施政報告
2. 太陽報2006年10月12日社評: 四十年官宦生涯七百日特首天地