2011年4月8日星期五

鴻海迷航(下)

(刊於2011年4月8日am730)

上回講到,富士康(2038)舊年蝕過2億美金(下同),上市以嚟第一次見紅,恒指成份股當中可能最唔賺錢,不過公司作為最唔透明藍籌,外人好難理解公司盤生意出咗乜問題。

單靠帳面數字,只可以推敲到,富士康成本結構其中幾樣重要變化。

例如舊年富士康內地廠房宿舍,多名員工自殺,所謂「十連跳」事件後,老闆郭台銘,大幅增加員工薪酬,加幅有謂超過六成甚至一倍(全國廠佬對住佢笑)。據聞鴻海及富士康成個集團,內地員工超過一百萬,係內地最大僱主,至12月底,富士康僱員總數126,687人,按年增加約7%,員工成本5.65億,增幅超過16%。

作為一間勞動力密集企業,富士康節流工作,其實已經做得唔錯,舊年銷售成本壓縮咗6.5%,只有6.34億,因為搬咗去人工冇咁貴地區開廠,折舊減值增加超過一倍至超過8千萬,相關數字有望未來逐步降低。

成本上升搵到解釋,富士康點解營業額連續三年倒退,唔係咁易有答案。根據市場研究公司Gartner統計,舊年全球有16億部手機出廠,按年增加32%,咁好景,富士康盤生意反而越做越細,最簡單解釋,就係輸咗俾競爭對手。

如果將富士康盤數,同死敵比亞迪電子(285)拍埋一齊睇,幅圖畫即時立體好多。比亞迪電子舊年營業額做多近5成,純利升36%至10億人民幣,兩間公司都係一條龍代工幫人做手機,手機製造商有得幾個大戶,唔使問阿季,富士康有大客,轉咗去幫襯比亞迪電子。

兩間公司,都話面對客戶減價壓力,但比亞迪電子認為「市場環境向好」,帶嚟「多元化的發展機遇」;富士康就話「面臨嚴峻的挑戰」,「市場舉步為艱」。前景表述分別咁大,講到尾,源於對智能手機普及化是否準備充足,比亞迪電子晨早殺入內地3G市場,期內TD-SCDMA業務表現「尤為突出」;富士康剛剛起步,於「智能手機設計工程資源的投資」,舊年「開始取得良好進展」。

講到尾,代工生意,被大客戶箍住條頸,有冇生意做,要鬥包山包海鬥爛平爛賤,不過就算揍得班客仔舒舒服服,關係幾密切都好,仲要求神拜佛客仔啲產品有市場賣得好,換句話講,富士康又好比亞迪電子又好,代工呢盤生意,非常唔穩定,公司資料披露有限,外人更加冇得估。

增長唔係必然,睇晶門科技(2878)就知,幾年前同MOTOROLA冇得撈啦,業績幾乎連續5年倒退,到今日都未翻身。

伸延閱讀:
#

2011年4月7日星期四

鴻海迷航(上)

(刊於2011年4月7日am730)
今期開富士康(2038)。

由富士康到鴻海,香港投資者應該聽慣聽熟,老闆郭台銘,早兩年突然頻頻出現娛樂版,大家更加唔會陌生,但係成個集團系統點分工,資產如何分布,相信冇乜邊個搞得清楚。

08年大股災,掃平貨,諗過富士康,望咗幾眼,唔對路,因為完全唔知間公司做乜,舊年講過利豐(494)可能係最唔透明藍籌之一,不過講到資料披露,富士康敢認倒數第二,冇人有資格包尾。

唔記得管理層有邊次公開蒲頭,見吓人解釋吓公司業績未來發展,據聞公司見分析員見芬佬,亦唔係特別積極,公司幫人代工做手機,主業非常貼近群眾,理論上好易理解公司做緊乜,不過由招股書到每年年報,從來冇講過做緊邊類手機,最大客戶係邊個,相都冇張睇吓,買富士康,等如鴻海迷航。

恒指成分股當中,富士康唔止最唔透明,仲可能係最唔賺錢,至舊年12月底全年,蝕2.2億美金(下同),業績自07年創新高賺7.2億之後,已經連續3年倒退。富士康股東06年創新高,去到近28元,亦係當年股王,今日股價蒸發超過8成,藍籌地位隨時不保。

講緊全球流動通訊市場近年大旺,連香港電訊公司都咸魚翻生,做手機,做要做到全球最大嗰,富士康竟然冇啖好食,令人搲頭,管理層同你講:「手機生態體系因新競爭對手的進入、引進新軟件及應用程序以及新興業務模式而出現重大變動」,其實講咗等如冇講。

早幾年,唔少人唱緊富士康及鴻海,同美國蘋果公司關係密切,有望攞到做iPhone大單,因而唱好富士康,因為咁衝去買富士康就認真捉蟲,台灣上市間鴻海,09年業績已經彈番上接近07年高位,剩係睇呢樣,已經知道富士康喺鴻海系統內,唔係最優質資產,好嘢例如iPhone,由鴻海做,甚至屬於非上市資產,公司唔同你講點分工,外人永遠搞唔清楚。

公司披露有限,大家唯有估估吓,包括各大行分析員,斷估唔會知得多過你同我,都係跟住公司盤數吹水,例如高盛喺07年7月,仲講緊iPhone掘起,只會迫傳統手機商加速外判,富士康會成為主要受惠者,當時股價22.1元,高盛叫人「強烈買入」,睇34.7元,點知道富士康盤生意,從此江河日下。

下回再續。

伸延閱讀:
#