2011年4月22日星期五

股神之子

巴菲特個仔都上個唔少中國電視台接受訪問,包括CCTV的「對話」講「富爸爸」,仲有「楊欄訪談」...



Presented by...

2011年4月21日星期四

開晒十二五

(刊於2011年4月21日am730)

「十二五」主要政策目標

今個星期一,特區政府搞咗個《國家十二五規劃綱要》論壇,同日高院裁定港珠澳大橋香港段環評肥佬,判政府敗訴,起壇大噴「十二五」口水當日,中港融合最具象徵意義基建項目被扑低,大吉利是。

香港政府多得一班阿婆唔少,領匯(823)上市有個盧愛蘭,港珠澳大橋又有個朱綺華攔路,兩單嘢,講白咗,都係利用司法做政治工具,衝擊特首管治威信,肯定唔少人話呢班阿婆及背後發功人士,罔顧大局阻住地球轉,任何制度都有辣有唔辣,如果香港冇咗冇呢種制度特色,肯定唔會咁多大陸人嚟香港生仔買奶粉。

當年領匯上市撻Q,唔夠半年董建華就腳痛,今日曾蔭權形勢冇咁牙煙,不過「十二五」論壇請齊上環猛人,又發改委又廣東副省長,《十二五規劃》叫你「完善珠江三角洲地區與港澳的交通運輸體系」,珠澳段起到呯呯聲,香港郁都未郁,你係曾蔭權都滴晒汗。

曾蔭權喺論壇開幕演辭,九情上臉,講到《十二五規劃》幾咁偉大,涉及港澳部分獨立成章,更加感激流涕,呼籲大家除咗有關港澳專章,要「把《十二五規劃》細讀一遍」。上去特區政府網頁搵嚟搵去,幾經辛苦,先喺政制及內地事務局網頁一個唔起眼地方,搵到一個所謂「香港特區配合國家十二五規劃」專題資料庫,裡面有條新華社網頁《十二五規劃》超連結,其他有用資料欠奉,除咗一堆內容大同小異高官演辭,連《十二五規劃》全文下載都冇。

《十二五規劃》只係一個八股網領,除咗「主要指標」內一打「約束性」指標,例如全國人口2015年唔可以超過13.9億,其他內容任你借題發揮,絕大部分地方政府及相關部委,都會自己整個五年規劃,政制及內地事務局專題資料庫,連深圳十二五規劃都懶得搵,又點幫香港人了解內地未來五年發展,唔怪得立法會有議員要林瑞麟停薪一年。

《十二五規劃》有關香港著墨,新意等如零,最有意思一筆,係繼早前前海發展綱領之後,再一次喺大部頭規劃文件,要香港喺粵港融合「先試先行」。唔好講到咁高咁遠,《十二五規劃》話支持香港所謂六大優勢產業,其中一項就係醫療服務,香港講到要鑿洞求地,內地人又咁鍾意香港醫療服務,正路講,應該喺廣東,最好係深圳,整多幾間港資醫院,唐英年講到有關問題,仲講緊「平衡公、私營服務」、「平衡本地人士和外來人士所佔用資源」,唔知詐傻定真懵。

香港搞十二五論壇,深圳黨政高官,唔見有乜人出席,港深官場應該有本難念的經,未來五年點搓點融合,十五二十開晒收晒,呢場枚,而家要開始猜。

伸延閱讀:
1. 十二五規劃全文
#