2010年6月10日星期四

歷史的終結之後(下)

(刊於2010年6月11日am730)

上回講到,收入分配改革,成為大陸經濟規劃熱門話題。

收入分配改革,可以簡單睇成,劫富濟貧式財富轉移。例如最低工資,今年以來,最少27個省市地區,已經大幅調高最低工資,富士康十二連跳之後,工人權益肯定會進一步抬頭,廠佬有排頭痕。又例如房地產市場,陸續有新稅項推出,壓樓價之餘,亦要炒地炒樓班友,嘔番多少透過通脹所累積財富。

就「提低、擴中、調高」思路,放眼「十二.五」規劃,大家可以留意吓,如果增加低收入人士福利,作為中國第二道社會保障網,國企保險公司會唔會多咗生意;如果中小企及中產人士減稅,邊類消費品會特別受惠;如果推出遺產稅,大陸富豪又會將身家收埋邊度。

放大啲睇,除咗人際、勞資之間公平問題,收入分配改革,亦關乎拉近區域、城鄉之間差距,所以大陸成日講推進城鎮化,配合擴大內需、增加居民消費大方略,大家又可以留意吓,二三線城市樓價升幅,會唔會比起一線城市強勁。

再放大啲,收入分配改革,關乎扭轉大政府主義下國富民窮現象。大陸09年政府稅收6.3萬億人民幣(下同),佔GDP大約19%,唔算高,如果加埋國企22萬億收入,唔得了。除咗地產,國企幾乎壟斷所有重要行業,經過多年高速增長,好多已經變作成世界級巨企,係時候回饋社會,揹翻多少企業社會責任。

企業社會責任呢家嘢,近年先在國企年報出現,但唔講得笑。中石油(0857)07年純利超過千五億,全亞洲最賺錢咩?先整個暴利稅,舊年加個燃油消費稅,近年要佢開發大西北,最近新彊又整個資源稅,結果純利連續兩年倒退,09年賺得一千億多少少,因為交咗近千七億稅。賺錢能力越強,要揹更重社會責任,如果話將資源稅,引伸到煤炭企業,甚至係壟斷公眾頻譜電訊企業,一啲都唔出奇。十年前買是但一間大型國企,而家可能已經升值幾倍,今日買大國企坐十年,冇可能再有呢支歌仔唱。

中共建國六十年,七十年代未改革開放,啱啱將共和國歷史,切開兩半,兩次大型阿公分餅,前半,土地改革大鑊飯;後半,小部分人先富起來,白貓黑貓,各走極端。一甲子功過,放眼百年基業,建設小康社會,仲要河蟹嗰隻,就要分享經濟成果。

歷史,同經濟一樣,冇終結,只有循環。
#

2010年6月9日星期三

歷史的終結之後(上)

(刊於2010年6月10日am730)

福山最近都認錯了...
今個星期轉口味,開中國,由銀行講起。

工行(1398)舊年增長一成六,純利近千三億人民幣,全球最賺錢銀行。董事長姜建清帶領工行渡過全球信貸危機,回報竟然係減人工43%,年薪只有91萬元,其他三大上市國銀巨頭,一樣命運。

華爾街災後重建,最大教訓之一,巨額花紅誘使銀行大班過度追求短線增長,死梗、爆硬。大部分國企銀行,未引入股權激勵計劃,如果國企老總仲有動力仆心仆命、銀行唔炒炒貢仍可以穩健增長,中國銀行業發展及監管,可以教翻老外轉頭,唔怪得農行上市,叫班外資全部死開,唔好發夢做策略股東。

廿一年前,有條友叫福山,發表洪文《The End of History》,宣布資本主義技術擊倒社會主義,本來人人當佢係福頭,撞正「蘇東波」,柏林圍牆以東陣營瓦解,福山成為大紅人。一場所謂「金融海嘯」,中國救地球,成為國際金融巨企照妖鏡,亦引發思潮大反撲,質疑民主政府奉行自由市場,係咪終極治國模式。

近排新書,例如《The End of the Free Market》同《The Beijing Consensus》,齋睇書名,就知道搵福山翻舊帳:中國一黨專政,大市場大大大政府,財富換自由,好似更穩定;北京輸出經濟援助又唔似美國佬咁阿支阿左,在第三世界,又好似比「華盛頓共識」更受歡迎。

歷史的終結之後,社會主義搽上中國特色,唔單止好有翻屍力,仲好有創富力。

大國堀起,一天光晒?

當然唔係。狂人衝入幼稚園斬細路,一單接一單;員工在富士康工廠跳樓,又係一個跟一個。而家唔係講緊香港鋁窗跌落街,日日發生但傳媒報開先報,殺人自毁傾向,竟然出現人傳人現象,社會又點會冇問題,如果楊佳殺警、法院開槍做低法官等,以暴抗法都有傳染性,更大鑊。

連串血案,溫總又係嗰句,深層次矛盾,政府會做嘢協調,講白啲,即係貧富懸殊問題嚴重,市場解決唔到問題,國家出手,阿公分餅。

近年大陸有關經濟規劃官腔,有兩句八股經常出現,第一個叫「保持經濟平穩增長」,第二個叫「轉變經濟發展方式」,安渡金融危機、確保「十一.五」規劃唔會臨尾香之後,後者重要性開始凌駕前者,近排最熱炒話題,叫「收入分配改革」,極可能成為下一個五年計劃主軸。

經濟學家講財富再分配,可以瞓覺,中國共產黨講財富 再分配,要豎起耳仔,因為呢樣嘢,佢哋非常拿手,過去六十年,最少徹底做咗兩次。
如果未悶死,明天再續。

伸延閱讀:
1. 《The End of the Free Market: Who Wins the War Between States and Corporations?》
2. 《The Beijing Consensus: How China's Authoritarian Model Will Dominate the 21th Century》
#