2011年11月5日星期六

一個都不能爆(下)

(刊於2011年11月4日am730)

上回講到,近兩個月,中央政府四圍撲火,由地方政府融資平台到鐵道部到溫州影子銀行,幾乎邊度缺水就射水,一個都不能爆,就係要在G20開會商討拯救地球前,做好「負責任大國」本份先去見街坊。

地方政府債券、鐵道部再融資、中小企貸款,阿公個個債仔都攬,樣樣都要新錢,邊度搵,當然又係難為國企銀行呢位家嫂,拆完呢三大債務炸彈,新增信貸風險,仍然集中銀行體系,要溝淡,就要資本。

但係過去兩年,幾乎所有大大小小國控銀行,都已經進行咗補充資本計劃,供股批股大大話話,集資已經數千億元(人民幣,下同) ,今年「四大家嫂」發行次級債,又係幾千億元,連保險公司等金融構構,買銀行債都食到飽飽滯滯,除非向外開放債市,又或者大舉嚟香港吸水讓離岸人民幣回流,否則唔會有太多新錢填氹。

當然,國控銀行在人民銀行,仲雪住一袋巨型冰水,存款準備金率,自2008年12月已經冇下調過,放鬆解涷的話,就算冇溝淡風險濃度,最少有錢應付阿公壓落嚟的社會責任,所以近排不周不時就會有謠言,話人行可能減存款準備金,因為越嚟越多人睇到,一個都不能爆的話,貨幣政策必需轉向。

阿公係咪個個都攬,就要睇目前唯一一個,慘被賴低的細路仔:地產商。

部分高負債地產公司,好似早月綠城中國(3900)咁,被人唱到好似就快爆煲,但暫時睇,中央對於房地產市場調控,把口仲係講得好硬,上星期國務院常務會議之後聲明,都係惡形惡相要地方政府「負責任」落實調控政策。即將離任的銀監會主席劉明康,上個月在CEO峰會論壇做主題演講,幾乎劈頭第一句,就話外國評級機構及分析員,日日「唱衰」中國銀行體系同埋經濟,只看到問題,但低估咗中國監管機構能力,仲講明經過壓力測試之後,銀行體系可以承受4成樓價跌幅云云。

內地地產市場同香港最大分別,在於存在真正競爭,最有效壓抑樓價措施,唔係限購限價,而係制水,迫地產商劈價去貨,幾萬家地產市,上市最少幾百間,咁耐以來,「有史以來最嚴厲調控」調咗成年,大家有冇聽過邊間地產商爆煲?如果呢樣嘢未出現,人民銀行已經開閘放水,咁就係真真正正的一個都不能爆,同時向全世界宣布,所謂「調控樓市」,只是走不出中南海的一句空話,地產在中國經濟,仍然係最大道德風險。

點都好,國家主席胡錦濤,同埋一眾財金高官,而家喺歐洲,最少仲可以大大聲咁話,中國仍然緊縮貨幣政策之餘,仍然好努力咁解決本身債務危機,最少唔使攤大手板問街坊借錢賖數,仲大把外匯儲備可以幫地球救火。

中國領導人,過去一年在外交場合,有關處理經濟危機的最重要講話,應該出現在今年8月,國家副主席習近平,同到訪美國副總統拜登見面嗰幾句。

當時習總表示,「中美作為全球最大兩個經濟體系,有責任加強宏觀經濟協調,共同提振市場信心,並通過二十國集團等機制改善全球經濟治理...共同發揮負責任、建設性大國作用」,之後會見美國商界,更拍心口保證,「中國經濟決不會出現所謂的『硬著陸」』」。

下年係地球選舉年,美國歐洲好多領導人,下年都唔知有冇得做,中國十八大雖然未塵埃落定,但係習總繼承大統幾乎走唔甩,當日拜登訪華,啱啱在標普調低美國評級「貸評之亂」之後,習總同拜登所講呢幾句,訓斥味道濃厚的說話,可以話係下一屆中國領導人,在外交場合最重的宣言。

呢次亦係北京領導人,第一次在外交場合,唔用「發展中國家」形容自己,以「負責任的大國」自居,甚至隱含人民幣匯率已經唔單止係「內政問題」的喻意。

講得咁口響,歐債問題,突然殺出個希臘公投,如果歐盟搞得掂呢個古惑仔,中國在歐洲扮演救世主呢個劇本,幾乎走唔甩,只不過係時間問題,中間股市有幾多輪過山車,當然又作別論。

關連文章:
1. 一個都不能爆(上)(下)

伸延閱讀:
1. 習近平: 中國經濟決不會硬著陸
2. 習近平與拜登正式會談時講話全文



同場加映:
賴低邊個細路仔?


2011年11月3日星期四

一個都不能爆(上)

(刊於2011年11月3日am730)


過去一年,債市唔見太大波動,但股市投資者,幾乎日日生活喺喺爆煲陰影當中,由希臘到美債,由國家政府到金融機構,好似九個煲十個會爆。

講到十個煲九個蓋的話,形用國務院總理溫家寶就最貼切,管理一個全球第二大經濟體系,已經夠辛苦,更大鑊者,呢個亦係計劃經濟,增長越快,計劃並管理難度越大,溫總近幾個月頻頻撲撲,溫州一個小小城市,三個月唔埋都要南巡兩次,難怪7月處理動車意外時,連國家機密都泄露埋,公開話自己身體唔好入咗廠。

國務院近月最頭痕地方,莫過於處理一眾唔生性的債仔,為連串可能潛在信貸事件(Credit event)掃雷拆彈。人哋講「道德風險」(Moral hazard),都只係話「大得不能倒」(Too big to fail),涉及系統性風險金融機構,唔救一鑊熟所以唔救唔得,中國領導人更加唔得閒,因為唔單止「大得不能倒」,直頭係「一個都不能爆」。

外國評級機構及分析員,近年成日唱衰中國最大理由之一,就係地方政府負債太多,呢方面中央政府上個月已經正式出手,為地方政府發債開綠燈,雖然只有四個地方政府可以直接發債籌旗,融資規模亦預計唔會超過1千億元(人民幣,下同),但係已經足夠令大行分析員暫時收聲,唔可以借地方債危機阿支阿咗。

呢個亦係中國公共財政以至債市重要改革,中央要地方納糧,因為要阿公分餅,富裕地方稅收支持落後地區發展,財經茄哩啡順手彈條橋俾香港政府,港澳特區,唔需要上繳稅收,積埋唔少財政儲備,投資收益又得雞碎咁多,香港可以主動要求動用財政儲備買內地地方債,一來可以扮吓嘢支持其他內地兄弟,二來收息肯定高過美債,三來又可以為人民幣流動打開更大缺口,一舉三得,斷估上海唔會爆啩?

鐵道部債券忽然升呢

中國政府最大債仔,其實就係過去幾年,控制最多政府投資的鐵道部,負債超過2萬億,國務院對呢個獨立王國都算唔話得,上個月財政部首先出手,話投資者買鐵道部債券,利息收入可以減稅,跟住到發改委,失驚無神出份全國緊急通告,話國務院已經確認,中國鐵路建設債券為「政府支援債券」,個聲明雖然唔清唔楚,但阿水都知,等如拍心口保證鐵道部唔會爆煲,一個負債累累醜聞多多的公司債發行人,一夜之間變身,載上咗中國主權評級的信用光環。

唔單止係咁,官方新華社日前又引述消息報道,鐵道部將獲得超過2千億元「融資支持」,確保資金周轉及重點項目進行,中央呢幾劑輸血大補藥,未必代表鐵路建設會重新加速,但最少可以繼續,亦係中央已經摸清鐵路道個底,有信心進行政企改革、引入市場資金大手術的訊號。中國鐵路體系今年可謂多事之秋,「鐵老大」劉志軍涉貪落馬,溫州動車意外又刹停高鐵建設,基建公司衝出外國搵食,就算唔係好似在利比亞咁血本無歸,都好似中鐵建(1186)喺沙特咁超支爛數,年初一黑仔到年三十晚,鐵路公司都應該係時候轉吓運。

地方政府同鐵道部,跟阿公搵食,中央攬上身都唔算出奇,溫州班大帝,唔知道因為爛炒爛賭,定係中小企生意難做,今年出現大批老闆走佬潮,中央一樣攬上身,仲講要銀行負起更大「社會責任」,加大對中小企信貸支援,民間借貸影子銀行「陽光化」,即係暫時放埋一邊,隻眼開隻眼閉。

地方政府債券,鐵道部再融資,中小企貸款,三樣嘢都好似引唔起市場太大興趣,放埋一齊,其實就係一個重要訊號,話你知中央要喺G20開會商討拯救地球前,做好「負責任大國」的本份,處理好本身問題先去見街坊。

一個都不能爆,但係中國仲面對兩個「大得不能倒」的特大炸彈,一個在國內,一個喺歐洲,下回續,睇睇點拆法。

關連文章:
1. 一個都不能爆(上)(下)

伸延閱讀:
1. 財政部: 地方政府自行發債試點辦法
2. 發改委: 鐵道部的債阿公會攬
3. 銀監會: 銀行要撐中小企



同場加映


公私領匯

(刊於2011年11月2日am730)

公營私有後蜜月期

今期開領匯(823)

香港政府近年有個優良紀錄,每次拎嘢出街賣,次次都益街坊,由以前地鐵今日港鐵(066)、五隧一橋以至近月iBond,暫時冇一次要投資者蝕錢,唔少仲賺到笑。

領匯更加明顯,05年上市冇耐,即被TCI「孩童基金」相中,一個大鐵鎚,打爛香港政府「大市場小政府」招牌,當年甚至有人懷疑「大鐵球」Chris Hohn有本地大鱷仙人指路。領匯呢一役TCI賺唔少,但近年又好似絕跡香港,唔知係咪又輸返晒俾香港大孖沙。

唔好話「大鐵球」,領匯當年上市,散戶差唔多派到一人三手,當年每股10.3元(港元,下同)掛牌,星期二收市27.5元,計埋咁多年大約4.5元分派,坐到而家的話,回報率都超過200%,可以有咁高回報率,原因好簡單,有兩個,第一,政府賣大包,唔敢將個價要得太盡,05年上市時候,香港磚頭價值亦未大幅上漲;第二,唔知道、又或者冇發揮到資產潛力,在寸金呎土的地方,坐住全香港最巨型收租物業,一直唔識得運用。

領匯旗下物業,仍屬於政府資產期間,真正話事人係房委會同埋房屋署,房屋署當年,梁展文喪搭鍾麗幗,兩個人有幾叻,當年房策地政有幾亂,大家有眼睇,房委會做包租公又點會做得好。不過公道啲講句,房委會好好醜醜都包括民意代表,政府做嘢,相對於私營公司,一可以太狼明搶,二唔可以做陰濕嘢,連華富華安樓街市一個舖位月租5千2 都要公諸於世,生意又唔係咁易做。

透明度咁高,好難做生意

02年底政府停建居屋,房委會乾溏,需要出售資產應急,當年政府房屋政策思維大方向,要撤出私人思場,所以晨早決定咗將領匯賣到一股不留,領匯已經變成一間好似滙控(005)咁,冇控股股東,由董事會及管理層主導的私營上市公司,接手後種種經營手法,包括翻新商場然後加租,迫走小租戶迎來大客仔,小市民當然睇唔過眼,亦有唔少小股東唔知幾開心,要鬧的話,只可以鬧政府當年政策。

超過110萬平方米零售舖位,已經佔香港1成零售市場份額,仲有8萬個停車位,由一個放軟手腳多年的包租公,平價賣俾一個眉精眼企的新老闆,開頭幾年,物業組合潛力好容易得到釋放,股價自然長升長有。

領匯物業出自公營房屋體系,「升呢」程度有限,今年6月第一次出擊,11.7億元向南豐收購坑口商場,就係公司有需要改變策略保持增長的最大訊號,領匯最大競爭優勢,就係夠大之餘夠大眾,同大型物業管理公司兼大型零售公司講數,成本及賣價都容易傾到好價錢, 一啲對一二線地產司嚟講,只係非核心資產的「大眾化」商場,領匯4厘Yield買返嚟,可以好容易捽到變4厘半,如無意外,領匯價繼續在本身大型商場附近,繼續併購有整合價值的獵物。

不過領匯在大眾化市場,亦唔係全無競爭對手,最新出敵人,就係自己親生阿媽。

近年公屋繼續起,至2010年3月底,房委會零售及商舖物業已經增至加168,000平方米,停車場26,400個,仲有20萬平方米工廠大廈同過2百萬平方米社區教育及福利設施,未來幾年復建居屋,公營房屋體系再度膨脹,房委會好快會變成一個重要商業包租公,政府明顯己經放棄咗,將房委會資產陸續賣俾領匯的政策路線,亦即係話,大眾化零售物業市場,即將上演一場「手掌係肉左手又係肉」之爭。

領匯條食物鏈最底部,始終係公營房屋體系居民,上市六年做嘢完全冇手軟,但亦唔可以做得太過份,企業社會責任感,會比其他包租公強好多,物業組合潛力,過去五六年應該已經搾得七七八八,未來競爭大咗,政治壓力又高咗,唯有靠收購保持增長。

領匯最新股價,相對資產淨值,仲有12%溢價,全港最大地產公司新地(016),反而仲有12%折讓,市場似乎過於樂觀地認為,領匯未來可以保持公營私有化後蜜月期的強勁增長。

老董當年腳痛,多得蘭姑,
同埋煲呔針囉...

伸延閱讀:
1. 茶杯: 大鐵球「小」政府
2. Link REIT's latest corporate financial presentation
3. 領匯監察
4. 舊片: 盧少蘭與領匯

2011年11月2日星期三

財爺音樂椅


夠叻又夠好彩

好叻但唔好彩

好彩但好夠蠢

又唔好彩又蠢

今期講吓香港財政政策。

先容許順叔呢個「超齡小學雞」,節錄幾句高登巴打的發言呃稿費:
在小巴上的唐英年,同基法小學校長梁淑儀,大談教育政策。
唐英年:「你哋間學校入大學嘅比率有幾高?」
梁淑儀:「其實………我哋呢間係小學嚟嘅。」
突然全車靜晒,司機減速駕駛。
呢個暗串香港「車毀人亡」的典故,場景當然虛構,對白亦可能有出入,不過雖不中亦不遠,唔少本地報章,都有報道這段疑似太子黨特首參選人,日前出席教育評議會疑似選舉論壇時呢開場白,疑似共青團首參選人梁振英都有到場,據報「雙英」對作育英才都唔熟書,不過好彩前後腳,冇得辯,各自「啤啤便便」依依哦哦一輪後散場。

香港因為家計會順叔(講緊陳泉)當年個「兩個就夠晒數」宣傳片太成功,近年人口老化,派15年免費教育,如果唔包大學,影響應該唔會好大,不過,「雙英」相爭太白熱化,免費午餐支票難免越開越多。

需要知道,下年特首選舉,話就話係千二人小圈子圍威喂,到2017年,好好醜醜都叫一人一票,想冧莊的話,就要捋起衫袖面對群眾,亦即係話,各位疑似參選人今日所開支票,好可能要下一屆財政司司長揹數,你開三萬五我大你五萬三,難免令人諗起當年陳佐洱指住鄺其志嗰句「車毀人亡」。

由於有梁錦松同埋唐英年兩個特例,一個特别叻但特別唔好彩,一個特別好彩不過特別特別戇尻尻,唔可以用「越嚟越廢」來形容近年幾任財爺,不過如果用來形容「財政司司長」呢個位,就應該相當公道,唔好話咩嘢「公共理財哲學」,直頭乜原則都冇,以前幾時會預算案公布幾個月,突然會開倉派糖一派百幾二百億?幾時預算案又會好似白紙草案咁,俾人鬧幾句就轉軚派錢?

中國高層財金官員,啱啱公布新一輪執位,雖然音樂椅式兜兜轉轉,但睇得出依重技術官僚的升遷脈絡,在巨型金融國企跑得最出嗰班,就升上去做市場監管,可見就算係權鬥出晒名的北京官場,都盡量避免金融體系及市場監管太受政治干擾,唔會話突然空降個太子黨分管經濟或者做央行行長。

香港財政司司長呢個位,近年好明顯已經變成政治跳板,梁錦松之後已經冇出現一個強勢財爺,同時又太受私家車呀電燈膽呀,呢類雞毛蒜皮的政治干擾影響,過去十年,先後已經出現四位財爺,公共理財連貫性有幾重要,可以回顧白高敦未做首相年代的英國,反面教材望吓而家日本。

香港個個財爺上場,都識得話「大市場,小政府」,點大點小先?財政政策左搖右擺,最簡單最具體問題,就係政府私有化資產,變晒怪胎。

好似港鐵(0066)咁,政府要增加房屋供應,港鐵近年已經開始乾溏的土地儲備,有機會再度膨脹,可以繼續載住3條A信貸評級光理又唔舉債,但收取香港地產補貼又衝入中國起鐵路,同時繼續加價。

又好似領匯 (0823)咁,呢隻嘢係香港政府最莫財期間,房委會分柝出嚟救急的產物,當年計劃,要逐步收購公共房屋體系商業物業資產,套取資金起公屋,未來大起公屋,居屋又多咗的話,房委會所控制商場物業組合又會再度膨脹,房策再度左轉,領匯角色會變得越來尷尬,旗下商場「升呢」程度有限,同時又要面對來自房委會新物業的競爭,呢啲正是「左手又係肉,手掌又係肉」。

未來無論邊個搶閘宣布參選,邊個同邊個爭,最敏感而大家亦最應該關心議題,唔係有冇「缺失」或者有冇打老婆,更加唔係邊「個」人做,而係邊「班」人造,包括「雙英」各自會搵邊個做財爺,搵乜人支持自己施政理念,如果特首選舉,由一個「選人」的遊戲,變成一個「選班底」的競賽,香港政治死局先可能有突破。




同場加映:
高登50,財爺黑馬?

2011年11月1日星期二

順叔自道

(刊於2011年10月31日am730)

「順叔」客串《龍虎豹》

香港人最熟悉的「順叔」,應該出現在1975年家計會「兩個就夠晒數」的宣傳短片,出自黃霑的曲詞人人記得,不過應該唔會有咁多人講得出,片中滿頭大汗撐住一家大細的男人,點解會叫做「順叔」。

呢位「順叔」,真名「陳泉」,當年經營車隊做電視台外景車生意,影視圈中人脈,造就陳泉經常客串一些茄哩啡角色。這位「廣播道交通業巨子」,為何入屋變成「順叔」,就要由「順嫂」講起。

30年前首播的《香港81》處境喜劇,9位小角色,創造了香港電視史上最長壽劇集的奇蹟,由梁醒波女兒梁葆貞飾演的「順嫂」,亦變成香港草根師奶的代名詞。由《香港81》到《香港86》,除了交待過主要場景「銀禧小食店」,地址在「禮頓道1號」外,從來沒提及故事發生的地點,根據順嫂親自出馬,不知道之前還是之後,香港人將「順嫂」及香港草根地區牛頭角連在一起,「順嫂」才開始出現「地域性」。

「順嫂」及銀禧小食店老闆「懋叔」份屬親戚,不少人現在仍然將黃新飾演的「懋叔」錯當成「順叔」,更有觀眾認為「順嫂」跟「懋叔」有路,有一次,陳泉向當時的監制曾勵珍提議,讓「正牌順叔」出場,雙方一拍即,「順叔」逐「行船歸來」,客串這個間歇出現的茄哩啡角色,卻成為陳泉代表作,甚至成為自己在一代香港人心目中的代名詞。

「兩個就夠晒數」撐艇仔,是陳泉茄哩啡生涯中,唯一一次領銜飾演男主角,卻成為香港人集體回憶,更可以說是有史以來最成功的政府宣傳片之一,今天連特首都呼籲「三個先夠數」,香港數十年人口結構的變化,竟然抺不去「順叔」這茄哩啡的一筆。

小人物,茄哩啡,也可以是很精彩的故事,最重要明白自己的角色位置。

戲台搭在現實金融世界,個個想搵Bank Cheque,人人要做演員,講穿咗,有邊個唔係演員?不過講緊台戲做俾乜人睇,股評家又好講股佬又好,吹水唔抺咀,最多令牛頭角順嫂輸幾餐茶錢;有本事令人以為有料到財星到,結果累成村人一鋪清袋甚至全人類身家大轉移嗰班,先至係真正「財經演員」。

上市公司又好投資銀行又好,「財經演員」場場大龍鳳舖舖大茶飯,因為劑劑都有散戶做墊屍底的茄哩啡。如果將所有投資者放埋一齊,必定會形成一個「常態分佈」(Normal Distribution),最右邊總會有一兩個巴菲特賺到盤滿砵滿,最左邊又必定有人輸突輸身家,而呢個分佈又必定有大量面積位於負數,因為永遠輸錢人多,賺到錢只是非常少數,明白呢個道理,就算做唔到巴菲特,最少唔會輸身家。聽聞陳泉後來在加拿大發咗達,不過當然唔係因為做茄哩啡,而是繼續做老本行搞停車場致富。

財經茄哩啡鐘意「鬥噏」,當然繼續做老本行,繼續八八掛掛指手劃腳吹水唔抺咀,樣樣都講行行皆論的話,唔使問阿桂,唔會篇篇皆精,街坊智慧,只可以幫助刺激思維,千祈唔好當係投資建議。呢台戲2009年11月第一個星期開始上演,咁就兩年,當然要多謝一啲長期支持的朋友,仲有多謝老篇容忍,期期包底執咗唔少錯漏,以及除咗審查咗順叔中文原名之外,從來冇阿支阿咗唔準呢樣唔好嗰樣,自由度呢家嘢,在今時今日真係非常難得,賣花讚花香,有品,唔係一句宣傳空號。

由今日開始,財經茄哩啡每天上演,之前其實係一個星期一個題目,一拆為二,而家多咗篇幅,亦要搲頭諗多啲題目,好難再日日上上下下左左右右咁,集中討論一間公司或者一個議題,可能會多咗東拉西拼風花雪月,各位多多包涵。

戲多戲少唔緊要,最緊要「有戲」,人人想做主角,未必個個做得好,選好適合自己的角色,可能只是小配角,反而可以做一場好戲,財經茄哩啡這台戲,希望大家喜歡收看。



關連文章:
1. 財演與財茄