2010年5月29日星期六

巴士大典(下)

(刊於2010年5月28日am730)

上回講到,香港運輸政策偏重鐵路,大部分老牌運輸企業唔夠地鐵爭,掛羊頭賣狗肉,全職兼職地產。

掉轉頭,大部分運輸公司大股東,都係地產商。由早年九倉(0004)投資天星,到新地(0016)入股九巴、新世界(0017)搞成巴新巴,斷估都係為咗曲線投資地產,掌握交通網絡,甚至未來城市規劃,為本身土儲增值,唔係因為運輸業賺錢多現金流強勁。

過去半個世紀,由始至終純情巴士股,只有一間,「黃」巴士,講緊冠忠(0306)

冠忠伯爺黃冠忠1948年創業,洗巴士,後來搞校巴,今日係全港最大非專利巴士公司,亦係主要中港跨境巴士公司之一,其他業務包括嶼巴,同埋大陸四個一二線城市巴士服務。

冠忠業績本來好穩定,盈利高峰期在97年前後,純利7千萬左右,99年引入新世界做股東,同年大舉擴張大陸業務,包括合資合營公司,車隊數目增加一倍至超過三千架。過去十年,收入基本上年年增長,但成盤生意仍然唔夠20億,所以油價車費變化、甚至一兩個非經常項目,都會令業績大幅波動,派息算慷慨,但唔穩定。

例如06年油價息口齊升急,當年純利跌到只有26萬。至09年3月年度,又因為接咗奧運馬術同殘奧項目,有項2400萬特殊收益,純利又去翻6千萬樓上,令往績市盈率,回落到8倍樓下。(冠中做奧馬殘奧巴士接送都賺2千萬,但冇做東亞運生意,可以想像,香港政府搞馬術呢單嘢,為求冇錯不惜成本,如果審計署夠膽查,一定有料到。)

盤生意唔穩定,冠忠管理層勝在夠穩陣,堅持本業之餘策略調整得夠快,例如港鐵整個昂平360,遊客坐吊車少咗坐巴士,冠忠就發展大佛到大澳路線;落馬洲支線搶走黃崗過境客,又拍住深航搞「經深飛」,幫深圳搶香港機場生意。

冠忠年報,年年提住要在大陸「體現其對巴士客運市場之憧憬」,要打開中國市場,其實唔需要駛到哈爾濱咁遠,大陸鐵路起得仲勁過香港,交通政策同城市規劃混亂,生意更惡做,舊年賣斷上海業務,非常正路。未來有港深廣高鐵,亦有港珠澳大橋,如果冠忠集中精神搞跨境巴士服務,可以係一個好有賣點嘅珠三角融合概念。

冠忠管理層第二代黃氏三兄弟,近花甲之年,董事局暫未見第三代人物,現市值唔夠5億,07年曾經出現公眾持股不足情況,除非有祖訓,否則黃巴士賣盤俾新世界,未必冇可能。

關連文章:
1. 巴士大典(上)(下)

2010年5月28日星期五

巴士大典(上)

(刊於2010年5月27日am730)

本面係小輪,其實係地產...
本面係火車,其實係地產...
本面係巴士,其實都係地產...

今個星期開巴士股。

粉嶺賣地,殺出個香港小輪(0050),提醒咗大家,香港大多數運輸公司,掛羊頭賣狗肉。

香港小輪舊年渡輪生意,只佔純利0.25%,今次出手,可以幫恒地(0012)堆農地托吓價,又完全乎合四叔養住一堆上市公司唔知做乜風格,唔好期望會好似會德豐地產(0049)咁,做個大項目,大股東順手提出私有化。

半世紀前,香港海陸運輸係大生意。電車、九巴、油麻地及天星小輪,都係恒指成份股,隨住交通網絡發展,走下坡。例如72年紅隧通車,同年天星被踢出藍籌之列,九巴最捱得,地下鐵全港開車後,93年亦失去成份股地位。

咪以為政府出錢修橋起路,巴士公司可以free ride,近年生意難做,其實多得政府唔少,油費易升,票價難加,仲要同一隻怪獸競爭,叫港鐵(0066)

香港運輸政策,已經打正牌偏重鐵路,加埋巨額地產收益補貼,令港鐵成為全港最霸道地產商,無需招標參與多個鐵路沿線項目,最大競爭地手,九鐵,被當年地鐵擇肥而噬,豬頭骨留翻俾納稅人,唔怪老牌運輸公司,冇啖好食,一係當公益事業咁做,一係索性轉行地產。

好似中巴(0026),靠食港島區舊車廠老本,市值27億,現金超過20億,唔多唔少,因為02年被「一仙收購」狙擊前,派息孤寒,近年積極多少,但失去巴士專營權超過十年,連間公司名都懶得改,唔踢唔郁,同太古合作搞港濤軒,已經係近年難得大動作,柴灣車廠項目,怕且可以留翻下個地產週期。

九巴,亦即係今日載通(0062),由企管到派息,都可以話係中巴鏡影「正面教材」。

載通都有兼職地產,一個曼哈頓山項目,賺錢頂得住幾年純利,除非荔枝角總部搬竇,好難再複製多次咁巨額特殊盈利,但係仲有14個車廠慢慢搣,有關資產,幾乎完全未在資產負債表反映,例如觀塘車廠,舊年底4.9億出售一半項目權益前,帳面值只有2元,即係話今年有近5億特殊收益已經落袋。

政策不利巴士,但唔係人人鐘意迫地鐵冇位坐,載勝在過咗海有壟斷地位,北區發展新市鎮,冇大增長最少唔會倒退。撇除地產收益產生特別股息,過去年兩年,基本股息,每股仍然有1.35元,用星期三收市價計,息率6厘,低息環境熱錢橫流,市場大起大落,買公用股收息,最穩陣坐九巴。

明天再續,睇睇一間堅持本業幾十年嘅香港巴士股。

關連文章:
1. 巴士大典(上)(下)