2011年10月29日星期六

東亞老夫(下)

(刊於2011年10月28日am730)


上回講到,東亞(023)主席兼行政總裁李國寶,一心扶兩位公子政經雙線上位,但近年運勢大起大落,轉折位更殺出國浩(053),公開講過想退休享福的寶寶貝,被迫老夫繼續做。

國浩在08年信貸危機、東亞出現擠提期間,開始密密收集東亞股票,之後兩三年一直繼續增持,縱使東亞曾引入西班牙Caixa銀行等投資者入股,大幅溝淡國浩持股,國浩在東亞最新持股,仍然超過14%,亦即是話,國浩已經動用最少幾十億港元購入東亞股票,目的當然不是為咗股息。

根據當日入股協議,Caixa銀行唔可以一炮過將東亞股權出售予同一個投資者,不過,歐洲國債危機最新救急方案,要銀行硬食希臘一半爛帳同時,下年6月前核心資本要增加至9%,剃頭救急同時收緊資本要求,如果Caixa銀行要出售非核心資產撲水,將目前手上16%東亞股分出售套現,分階段撤退,並非冇可能。

寶寶貝出自香港最「Blood Blue」的李氏家族,五代皆昌,國浩就算彈藥充足,亦唔會隨便發動敵意收購,得罪寶寶貝及李氏家族,呢個在香港政商兩界仍有巨大能量的集團,不過國浩已立於不敗之地,可以等,如果東亞在管治上,又或者經營上出現大問題,引起小股東廣泛不滿,就會係國浩出手的時機。

由出售道亨,到回馬槍在東亞打釘,國浩顯示咗在處理銀行資產的高超手段,寶寶貝人工奇高,不時被小股東質疑,兩位公子亦在東亞身居要職,冇絕對控股權,又要世襲家族管理,就要交得出功課,再出現08年投資結構信貸產品損手爛腳的情況,就會面對極大替換管理層壓力。

黑豬在前,黃雀在後,寶寶貝近兩年打醒十二分精神,東亞每股盈利及派息,跟07年高峰仍有一段距離,但純利及資產總額,已經再創紀錄,牌面上,叫做交足功課。

東亞內地搶存款好勇(資料: 瑞信)

東亞幾條大數可以話已經重復「舊觀」,但本數簿其實已經面目全非,好簡單咁睇,07年12月至今年6月,東亞客戶貸款增加咗43%至3,125億港元(下同),增長基本上因為內地客戶貸款,增加咗一倍至1,260億,差唔多同香港平分春色。東亞呢類香港過江龍,喺內地存款唔會有太大競爭力,強勁增長原因只會有一個,就係在寶貝貝老夫當關下,東亞在內地其實係勇夫一名,資金成本應該高過其他行家唔少,斷估唔少嚟自貿易融資或者結構存款,相關風險,因為披露不足,大家所知有限,東亞係時候好似滙控(005)咁,將香港業務拆開另一盤數俾大家睇。

除咗繼續做靚盤數,東亞仍然有一著棋,可以大幅溝淡國浩持股,就係在內地國際板上市,如果東亞或者寶寶貝等唔切,亦有可能分拆中國業務出嚟,上市體系股權越複雜,被敵意收購難度亦會提高,斷估寶寶貝在未來3年,做埋呢件事先會放心榮休。

關連文章:
1. 東亞老夫(上)(下)
3. 東亞富貴門(上)(下)

伸延閱讀:
1. 主要股東增持東亞記綠
2. Takeaways from BEA China's reserve roadshow


同場加映:
請繼續...

2011年10月28日星期五

東亞老夫(上)

(刊於2011年10月27日am730)

(講緊膠港雙「英」啫...)

今期開東亞(023),梗係要由東亞主席兼行政總裁李國寶,呢位越老越可愛又越高人工的寶寶貝開始講起。

07年行政長官曾蔭權競選連任,坐定粒六,大艱慢板遲至當年2月初先話要「做好呢份工」,係咁意搭台假戲真唱,選舉經費都用咗8百幾萬港元(下同)。下屆特首跑馬仔,如果冇北京指揮,真係由得梁振英同唐英年雙「英」會戰的話,又要顧住搶閘又要除衫博拳,選舉經費肯定杰得多,呢條數,唐公子就算自己揹,應該都唔會覺得點「缺失」,振英哥就可能有啲肉痛。

李國寶自己話過,半個世紀前,喺英國玩慈籌款,著起唐衫幫鬼佬睇相,夠綽頭,籌得善款贏人幾條街。寶寶貝後來兩次幫曾蔭權助選,都負責揼大孖沙心口要錢,兩次都籌得超過2千萬,呢位熟手技工,同唐唐大家都咁「Blue Blood」,照計應該義不容辭,不過,如果押錯邊的話,唐唐落馬,寶寶貝幾十歲人冇乜所謂,佢老人家一心想扶上位的兩位李公子,難免要在政界做二打六做多五年。

如果真係識睇相的話,睇一間上市公司老闆運程,甚可能望到投資方向。例如比亞迪(1211)主席王傳福,舊年呢個時候,揹住「中國首富光環」,見完國家主席胡錦濤又帶住股神巴菲特全中國做花生騷,運勢衝得太勁,過去一年幾乎只有開倒車;又例如李國寶咁,05年幫曾蔭權坐正,同年10月做埋行政會議成員,跟住推東亞盈利上高峰。

風光唔會無限好,寶寶貝08年開始轉運,坐飛機衰大口,爆咗道瓊斯被全面收購單刁,結果破財6千幾萬,連行政會議都冇得撈,跟手撞上人類歷史最大鑊信貸危機,東亞搞到出現擠提都未算黑仔,呢個轉折位最大問題,係出現咗國浩(053),當年出售道亨銀行,套現現金百億計,掉轉頭,狠狠咁在東亞打口大釘,經過呢兩年密密收集,持股量已經超過14%,需要知道,東亞係香港少數仍然由家族管理的銀行,但亦係唯一一間,家族冇絕對控股權的銀行,有國浩呢隻大黃雀在後,寶寶貝擔心多年基業不保,應該遠甚於兩位公子在政壇上唔到位。

政經兩面,兩位公子都未成氣候,結果寶寶貝72歲高齡,講咗想「盡快」退休幾年,都係要老夫繼續做,領導東亞衝鋒陷陣,你估劑劑同小股東嗌晒交好好玩咩,寶寶貝做幾十年議員都係三點不露,絕對唔係以勤力出名,早排宣布再坐多3年至2015年,到時已經七十有五,可見目前老懷肯定唔係咁安樂。

下回再續,睇睇呢個格局,對東亞發展又有乜影響。

關連文章:
1. 東亞老夫(上)(下)
3. 東亞富貴門(上)(下)

伸延閱讀:
1. 兩公子變左右手 寶哥哥想交棒退休
2. 東亞: 李國寶再坐三年


同場加映:
Daddy...

2011年10月24日星期一

梁唐氏綜合症


香港,患了梁唐氏綜合症。

太子黨?共青團?點知...

一個奸?一個傻?或者...

屌,好彩,你老闆,冇得揀...