2012年5月24日星期四

銀幕大戰(下)

上回講到,中國大國堀起,由地綠政治到金融暗戰,已經玩到比拼軟實力,全方位同西方國家拗手瓜,包括輸出中國文化同埋文化產業,國家隊都未出場,殺咗隊大連萬達出嚟,連債31億美元收購全球第二大電影院線、美國公司AMC。

大連萬達做商業地產起家,不過呢個冇上市的包租公,業務模式非常特別,本身是全國最大電影院線經營商之一,聽講控制7百幾個電影銀幕,仲有高級酒店、連鎖百貨、卡啦OK,全國幾十個萬達城萬達廣場,行街買嘢食飯睇戲唱一條龍服務,巴閉。

題外話一句,今日大陸住宅住場投資降溫,但係收租地產仲係好旺市,香港大大小小上市地產公司都話在國內搞商場寫字樓,大型城市最高商廈的地標記錄,三兩年就被改寫一次,幾乎度度都有IFC同時代廣場,就算商業樓面冇過度供應,大家見到大連萬達個業務模式,就知道在大陸搞收租地產遊戲規則同香港非常唔同,如果香港經驗咁容易在大陸複制,大陸百佳就唔會執粒啦。

AMC冇上市,資料有限,不過賣到30個億美金,原本股東又包括幾間大型私幕基金,肯定唔係乜嘢筍貨,呢單既係中國民企最巨型海外併購,事實之後,大連萬達挾住「全球最大電影院線」個招牌,未來搞上市可以殺個更高價錢,爭取國內第三張入回電影牌照,亦更理直氣壯。

電影院線老闆,在中國新興的電影市場,屬於其中最有影響力一班人,一套戲有冇得排片,放幾多次,時時上畫,同乜嘢對手對撼,直接影響票房表現,後面當然仲有阿公睇場,例如遇到咩嘢開國大典建黨偉業呢類大大大大片,全國幾十條院線幾千塊銀幕,可能都係放緊同一套戲,早兩年《阿凡達》在大陸市場大殺四方,票房仲去得好勁之時,聽講為咗讓路俾周潤發套《孔子》,全國過千個銀幕,硬兜兜抽咗《阿凡達》,引起內地影迷廣泛投訴,仲成為國際新聞。

《孔子》呢類國產片,在大陸叫做大片,行出門口變屎片,在美國唔知有冇上過畫,大連萬達買咗AMC之後,老闆王健林講明,唔會刻意在美國播國產片,排片大權交晒俾AMC管理層,講就咁講啫,到中國電影真係可以同荷李活拗吓手瓜,國際上唔再係票房毒葯,AMC唔播多幾套國產片就有鬼。

中國電影票房,2006全國票房第一次過一億元人民幣,電影院綫兩隻手可以數晒,舊年超過130個億人仔,增幅驚人,不過院綫老闆亦多咗,全國聽講已經有接近40條電影院綫,競爭頭崩額裂。

香港上市公司有間叫橙天嘉禾(1132),專做大陸電影院線,2011年做十幾億生意,純利唔夠1億(港元,下同),市盈率7倍多少少,不過電影業人事品流太複雜,由出品人到發行商到影院經理,甚至包括商場包租公,條數唔知點拆法,能見度太低,暫時未見到香港上市資產當中,有乜可以放心投資的中國電影業概念。

銀幕大戰競爭激烈,不過大陸電影業仍然處於供不應求的階段,講緊好片難求,其中一個原因,入口外國大片有嚴格配額限制,近年美國年年向WTO投訴,話中國拒絕增加每年入口大片數量,不過近排中美電影業行得好埋,呢邊大連萬達買AMC,嗰邊類似新聞集團、夢工場等美國公司,近排都入股咗中國電影制作公司,聽講下一集《Iron Man》仲會有強大中國元素添,如果中國放寬入口西片限制,對橙天嘉禾呢類公司的收入,應該會成為即時炒作借口。

講到尾,審查太多,創作力必然受到限制,搶幾百個銀幕放國產片,對中國打緊呢場意識形態大戰冇乜幫助,唔好講其他,由重慶共產黨高幹到失明維權人事,出咗事都選擇行入美國領事館,邊面自由啲邊面強啲,一眼睇晒。

關連文章:
1. 銀幕大戰(上)(下)

5 則留言:

  1. 美國本土院線年年無多少錢賺,賣比大陸其實主要價值就系多一個控制關卡可以自我審查。等到某日WTO要求大陸不再規定入口片數量時,就要靠收購翻黎的院線去做手腳了。我唔知大陸重有機多個外國牌子的院線,但系如果都被地產商買斷的話,敏感片就不需要審查都無可能上畫。只要老板OK就可以好似香港以經無媒體講六四(肥佬黎除外)。

    回覆刪除
  2. 順叔, 有冇研究Graff 格拉夫? 會否寫一篇"周街是f..l"

    回覆刪除
  3. http://www.youtube.com/watch?v=hsq72pFaSjA

    幾同意呢位師兄對中國經濟既睇法...

    回覆刪除
  4. 順叔, 請update吓個blog,又係我長頸鹿

    回覆刪除
    回覆
    1. 唔介意的話睇住先...
      http://www.am730.com.hk/article.php?article=106328&d=1765

      刪除