我的好友李嘉誠

(部份內容刊於《本土論述2012：官商勾結》)

誠伯都要變相冊遷走佬，財經茄哩啡趁熱鬧，摷篇舊文應節。呢篇嘢，2012年年底寫的，而家再寫一次的話，題目會改做「香港最後一個買辦」...

回帶:


「歷」過的「史」vs「Hi」的「Story」

歷史有好多種，重構的、建構的、解構的、虛構的，乜構都有。

名人回憶錄或富豪傳記，好多時都係尋找歷史軌跡的重要資料，不過大腦的記憶是信唔過的，記憶本身更加有選擇性，所以透過知情人士筆錄口爆的歷史，只是幫助了解歷史真相的工具，本身未必係無妄事實。

香港首席大孖沙李嘉誠，從未搵人幫自己著書立傳，不過乜差差超人發達秘笈及成功之道，在是但一間書局都可以放滿半個書櫃。咁多《李嘉誠XYZ》或者《XYZ李嘉誠》，最精采的一本，當數春田花花幼稚園的麥嘜同學的巨著，書名叫做《我的好友李嘉誠》，內容只有以下幾句：「我和李嘉誠是朋友。我們，很熟。有一天，我親眼看見他，發達！」¹

珠玉在前，這篇A貨版的《我的好友李嘉誠》，冇乜可能超越麥嘜同學的水平，只是將多本名人回憶錄及富豪傳記，炒埋一碟，嘗試襯托出誠伯能人所不能的發達秘訣。

文中引述的資料，主要集中在1978年至1982年期間、絕大部分人對香港前途問題仲係懵盛盛的時候，已經發生在香港的政商互動瓜葛，未能掌握的空白地帶，只能以今日的目光思維，穿越時空無限想像，甚或偏向陰謀論的分析，既「論」且「述」，談不上什麼學術研究。

大時代的大茶飯，造就了「李氏力場」的無遠弗屆，唔少香港人「親眼看見他，發達」，希望這篇《我的好友李嘉誠》，可以為這段大家親身「歷」過的「史」，提供一些更「Hi」²的「Story」。

長實 vs 置地

1978年是很多歷史轉折的起點。

用1978年做分水嶺，大致上將中共成為中國坐館後的一甲子功過切開兩半，兩次大型阿公分餅，前30年鬥地主大鑊飯；後半截改革開放一部分人先富起來，白貓黑貓各走極端。

政治變天，隨之而來必定是經濟利益的再分配，百廢待興的神州大地如是，面對「九七大限」的香港更加如是。1978年發生唔少事，對決定1997年後邊個做主宰香港經濟的辦事人，不過當時大部分地球人對廿年後香港主權問題仲係懵盛盛，冇為意香港巨額商業利益的再分配、搶食大茶飯的大時代，已經揭開序幕。

1978年10月，當期的《信報月刊》，有兩篇訪問同期出現，一篇叫「李嘉誠先生現身說法」，基本上俾位誠伯講解自己的發達秘笈；另一篇叫「香港物業發展的前鋒」，訪問咗置地的執行董事兼總經理鮑富達（Trevor Bedford）。

今日將兩篇訪問放埋一齊睇，非常有意思。首先，當日的長實，地位已隱然可以同一線香港英資相提並論，其次，從記者的提問當中，亦可見當時在普通人眼中，並未感覺得「九七大限」的威脅，香港前途問題尚未進入大眾傳媒、甚至專業財經報章的視線範圍。

當日誠伯講到，點解對香港地產咁有信心的時候，只係講咗啲人口及出口等阿媽係女人的經濟觀點，對「九七大限」呢個女人未必係阿媽的政治風險，隻字冇提，反而鮑富達講到香港前景時，講咗呢段說話：

「我認為最重要的一點，就是中國政府本身已加強他們在本港的投資，這明顯地反映出中國政府樂意見到香港以現在的方式繼續存在下去，而只要本港繼續為中國提供經濟上的利益，在這種情況下中國看來是不會作收回香港的打算。」³

置地是當年香港第一號英資怡和的「不動產」旗艦，亦是中環的商業物業大地主，1978年中，啱啱成立的地鐵（港英政府為全資大股東），將中環及金鐘站上蓋物業招標，置地竟然爆大冷輸咗俾長實，講緊76年置地特登買落隔離的鐵行大廈（今日的歐陸貿易中心），以便同中環站項目一定發展，點知中環鐵桶王國被長實攻破，焗住將鐵行大廈俾長實及馮景禧（新地創辦人之一）的財團，成為置地出讓中區地皮的首例，不過當日鮑富達仍向《信報月刊》的記者強調，賣鐵行大廈只是極個別例子，「要保持置地作為一家地產投資公司，而不是一家地產買賣公司」⁴。

長實拒做包租公

地產公司可以分成兩種，收租或者賣樓，前者講求建立一個不敗的商業物業組合，坐住「不動產」做包租公；後者老土啲講句，最緊要「貨如輪轉」，掌握物業市道的起伏脈絡，賣咗樓俾用家，套現之後過咗海就係神仙，所以做包租公，往往需要對業務根據地更大的信心及更長遠的眼光。

長實就算得到中環站上蓋的地皮，建成今日的環球大廈之後，不脫當年華資地產商搵快錢的作風，嗱嗱臨分拆出售，創造破記錄的銷售利潤，但亦放棄咗在中環建立皇牌收租物業的機會。（今日的環球大廈，位置黃金地段中心地帶，但係充滿「東南亞風情」，同隔離的置地廣場格格不入，就係咁解。）

從呢個角度睇，在1978年的置地，堅持公司收入結構以租金為主，對香港的長遠信心，唔會低得過長實，策略眼光，甚至比長實等華資地產商更長遠。

當時的置地，理論上可以從港英政府身上，索到唔少政治風向，甚至同中資已經開始有合作，今日荃灣的綠楊新邨，就係置地在1978年同僑光置業（「紅色基地」僑冠大廈的發展商）合作發展，從鮑富達一句中國「不會作收回香港的打算」，可以合理推斷，當年的怡和及置地，縱使政治上不乏人脈，但嚴重錯判咗中國收回香港主權的決心。

同一期的《信報月刊》，李嘉誠被問及點解長實好少保留物業作收租，當時誠伯表示，「增加經常性收入的計劃，我在現時尚不能加以透露」⁵，講緊1978年3月的時候，長實曾經購入近10%九倉股權，最後全部賣俾船王包玉剛，坐擁現金近10億計，仍然將環球大廈急急腳拆售套取更多現金，已經俾晒貼士下一個目標係乜（1979年開估，叫做和黃），純粹以現在的眼光分析，在1978年的大時代食大茶飯的起跑線上，香港英資大班，可能慣咗不可一世，低估咗華資挑戰英資的野心及實力。

最重要的內幕消息

今時今日望返轉頭，將香港地產大孖沙一字排開，最容易得出的一個結論，就係過去幾十年，邊個對香港最有信心，在地產市場人退我進，邊個等如最有目光，今日今日就最發。

將中英兩國當係兩間大型企業，當香港係一項重要資產嚟睇，當年中國要「併購」香港，邊個可以睇準大勢，等如掌握咗香港金融史上最重要的「內幕消息」，對香港的前途，亦可以有更大的「信心」，更準確的「目光」。

七十年初中後期，香港地產業發展蓬勃，但住宅按揭通常要做15年，1997減15，等如1982，如果到1982年，香港前途問題仍然未明朗，尤其係在新界發展的項目（界限街以北「租借期」在1997年屆滿），銀行同地產商都唔知點做生意，所以銀行大班及地產大孖沙，必定係最早關注「九七大限」的商界人物。

如果話1982年9月英國首相戴卓爾夫人，訪問北京並在人民大會堂仆在前階，為香港前途問題在公眾目光拉開序幕，1979年3月港督麥理浩訪問北京之行，就係在社會視線以外的最重要前奏曲，亦係商界人物為「九七大限」收風索料的最重要場口。

當日麥理浩訪京，其實應1978年12月訪問香港的中國外貿部部長李強的邀請⁶，鄧小平見到麥理浩之後，劈頭第一句，就開門見山咁表示，知道有人開始擔心香港將來的前途和地位問題，老鄧講明，「香港是中國的一部份，這個問題本身不能討論」，不過老鄧亦表示，中國會「尊重香港的特殊地位」，「請投資的人放心」⁷；麥理浩當日見鄧小平前，外交部部長黃華已經講明，以麥理浩身份，向中國國家領導人提出「土地契約」的具體問題，外交上於禮不合，但麥理浩在見老鄧時仍堅持當面提出，建議將土地契約上有效期限的「1997年」去掉，改為只要新界仍在英國管治下依然有效⁸，結果老鄧再講明「沒有回旋餘地」，唔好幻想中國會改變立場，會晤結束前，麥理浩問老鄧返香港點同香港人交待，老鄧用同一句作總結：「請香港的投資者放心」。

麥理浩吞落肚的重要訊息

麥理浩訪問既是受北京邀請，老鄧又係主動提出香港前途問題，可以推斷，當時老鄧想搵麥理浩做「信差」，將「中國鐵定收回香港主權」，同埋「請投資者放心」兩個重要信息，帶俾英國政府及香港人，有關會晤內容，對當時的香港，可以話係最重要的「內幕消息」，麥理浩返到香港，只係講咗「請投資者放心」一句話，中國鐵定收回香港主權的訊息，吞咗落肚，

據香港政壇教父鍾士元的回憶，當時佢貴為親英華人政治精英、立法局首席議員，都只係後來政圈商界的傳聞，大約知道麥理浩同埋鄧小平的會晤內容，要到1983年在倫敦同已經退休的麥理浩單獨食飯，先證實到傳聞的真偽⁹。

據鍾士元所講，1980年1月，由財政司夏鼎基夏領導的一個高層次諮詢委員會，包括鍾士元、滙豐大班沈弼、華人精英利國偉等成員，一致認為麥理浩傳達的訊息唔足以令「投資者放心」，聯署一封秘密函件俾港督，提出中英兩國係時候就香港前途展開談判，即係將「九七大限」問題擺上枱公開化，不過麥理浩的回覆不足三句：「多謝1月18日的來信，內容得悉。」¹⁰

可以見到，七八年初尾至八十年代初，英國對中國收回香港主權的立場，已經好有心理準備，不過對解決問題的形式可能仲有「幻想」，更加唔想問題太早公開化，所以有關香港前途問題的最高機密，封鎖在最高層次，連親英高級華人政客被拒於知情範圍。1979年3月陪跟麥理浩訪京的行政會局首席非官守議員、東亞銀行創辦家族之一的簡悅強，返香港後提早半年退休辭職¹¹，後來連東亞股權都賣晒，可以反映當時親英華人政客的無奈。

當時香港的英國財團，點都叫做同聲同氣，收風索料能力應該更強，但唔擔保英國政府本身冇誤判形勢，1978年時英國執政工黨在自己屋企搞到一頭煙，次年大選輸咗俾戴卓爾夫人的保守黨，據當時的英國外相歐文（工黨）的回憶錄，佢發現在1979年2月8日發表的中葡建交聯合公報中，隻字冇提及澳門問題，好似承認咗澳門作為葡萄牙「托管」一樣，以為英國人在香港亦可以好似澳門咁，以「續約」方式繼續維持管治¹²，結果忽略咗鄧小平在78年底至79年初幾個月內，密集式地多次發表解決台灣問題的講話，主題離不開兩大原則：國家統一及尊重台灣現實，由「武力或和平解放」，轉向「一國兩制」新思維的初型已經隱約可見¹³。

相對未能掌握中國最新政治脈搏的香港英資，如果邊個本身眉精眼企大資本家，被中共納入統戰雷達，可以掌握第一手的「內幕消息」，在之後的政商互動，自然可以展現出更大的「信心」、更準確的「眼光」。

四叔巨資「義助」培僑

香港唔少地產項目，都留低咗中國共產黨統戰香港大資本家的腳毛，不過大家唔係咁為意咁解。

跑馬地山腰的比華利山豪宅，就係一個最強力的證據。

比華利山的在樂活道的舊址，原來係一間古老別墅，業主係簡氏家族（搵唔到邊個「簡」），亦係培僑中學的舊校址，1978年的時候，恒基地產買咗簡氏別墅地皮重新發展，同時向政府投得天后廟道地皮，幫培僑中學重建新校，地價連建築費，恒地拍心口負責70%，等如捐咗二千幾萬港元¹⁴，1978年的時候，講緊長實一年純利都係1.3個億，可以想像，當時重建簡氏別墅就算有巨利可圖，恒地「義助」培僑中學拆遷，有幾大手筆慷慨疏財。

培僑中學的校長，叫做吳康民，2012年香港特首選舉之前，總理溫家寶突然親自召見康民叔，之後康民叔就發表咗特區政府新班子的「鐵三角論」，可見康民叔在中共的地位。

據康民叔自己所講，在1978年的時候，佢親自多次同恒地主席李兆基講數，更加多次進言，大陸在中共十一大三中全會（確立老鄧地位及改革開放路線的重要會議）之後，「內地與香港均有美好前景，投資地產肯定有前途」，成功打動四叔。不過，當時的新華社香港分社統戰部部長何銘思，亦即係後來霍英東身邊的紅人，對康民叔大發雷霆，話佢成日纏住四叔，「破壞他們所做的統戰工作」¹⁵。

從這個比華利山的小故事，可以見到，早在1978年，中共已經向香港華資地產商全面展開統戰工作，而且你有你統，我有我統，好唔得閒，不過重點就係，類似四叔的精明資本家，一眼就可以睇出，未來香港及中國大陸即將出現的「大好形勢」。

假如香港地產商一眼睇出，中國改革開放，以至推動香港回歸的春秋大業，都要借助香港資本家的經濟力量，有著數，自然唔會介意被「統」，並肩作「戰」，而且更應該將本身的利益，同中國的利益，仲有香港的前途，綑綁埋一嚿，撳住港英政府或英資財團搵著數，天水圍的發展，肯定係最有代表性的經典案例。

天水圍的中與港

今日香港人睇住悲情城市的夜與霧，斷估無法想像，35年前天水圍呢塊5,200萬平方呎的魚塘，本來可以係北區的重點衛星城市，更一度成為保證香港前途信心的代名詞。

78年的時候，華資地產商要大展雄圖，優質地皮的供應唔會太多，除咗可一不可再的地鐵項目，只有兩個地方可以打主意，一個係英資財團的資產負債表，例如長實透過收購永高（美資）取得希爾頓酒店（現在長江中心）的地皮，另一個就係界限街以北的新界。

不過英國「租用」新界的期限，就算在不平等條約內亦白紙黑字寫明，只係去到1997年，所以發展新界土地，其實係搵命博，沙田第一城呢個巨型項目，勞動到四大華資地產商，恒地長實新世界加新地破天荒合作，先有足夠信心去馬。

香港人口爆炸，港英政府查實亦冇乜得選擇，一定要發展新界，香港土地供應委員會早在77年已經建議，將天水圍發展成為新市鎮。¹⁶

天水圍最獨特之處，在於呢塊近約5,000萬平方呎的新界農地，屬於當時全香港最大的單一業主地段之一，由趙姓族人（聽講係宋太祖趙匡胤的後人）透過「聯德信託」聯合擁有¹⁷，至1978年時，「聯德信託」的股東人數已經開枝散葉到百幾人，一塊咁大型的地皮，由單一公司控制，不過股權又分散，好容易地，會成為「渴地餓地」的華資地產商的目標。

「聯德信託」最初的股權轉讓，順叔掌握唔到太多一手資料，有心人可以翻查吓1978年8月時，趙氏族人趙不弱，向高院申請禁制長實附屬公司Rostock（應該係同會德豐的聯營公司）收購「聯德信託」51%股權的案件，當時的副案察司楊鐵樑，在78年10月，裁定Rostock收購有效，另外一個比較可靠的一手資料，係長實1978年的年報，披露咗當年以每平方呎1.5元的價錢，購入天水圍約2,500萬平方呎的土地，跟51%「聯德信託」股權可以控制的天水圍面積吻合。

長實成功在天水圍打釘之後，身邊出現過好多不同的投資拍檔或股東，包括當時仍然未落入包玉剛手中的英資會德豐、加拿大海外發展有限公司的黃振輝、仲有合和胡應湘家族胡應濱的大寶地產等，其後相繼退股或減持，種種原因，或是對香港唔夠「信心」，或是經營不善財力不足，無需深究，最重一點，是長實一直緊緊咬住天水圍呢個特大型項目唔放。

天水圍項目咁巨型，按當年規劃，可以容納50萬人，相對之下，太古城黃埔花園呢啲大型項目，都只係小兒科。長實在78年的純利首次突破1億港元，賺1.3個億，一炮過掟近4,000萬落唔知幾時完成、幾時回本、兼要承擔九七風險的天水圍，需要超乎常人的「信心」及「眼光」，不過事件好快有突破性發展，長實在天水圍的項目，引入咗一個重量級的拍檔：華潤。

中共在奪取中國政權之前，成立咗唔少公司或隱蔽機構，至今碩果僅存的，只有華潤，可以話最係「紅」的中資公司，「紅」在唔單止係「國企」，而且係「黨企」，在國共內戰等非常時期，華潤以貿易為掩護，為中共進行軍事、統戰及經貿工作。

天水圍算係呢間「最紅中資」的第一個地產項目，1979年開始插手，到1980年，已經成為天水圍項目的牽頭股東，持有51%股權，以目前眼光嚟睇，唔會覺得出奇，但回想三十幾年前，其實係一件充滿象徵意義的超級大新聞。

根據華潤的內部會議紀錄，1980年11月一次經理人會議，有一位副總，講咗以吓呢句說話：

「天水圍靠近深圳，所以有人說，華潤有錢投資天水圍，為什麼不投資深圳，是不是唱對台戲？」¹⁸

大佬，鬥地主出身的中國共產黨，啱啱先玩完文化大革命，轉頭竟然搞地產項目，仲有乜嘢唔搞得，當日華潤點解落搭，同長實及李嘉誠拍住上殺入天水圍，華潤自己有以下答案：

「投資深圳，這是中央的號召；投資天水圍，這關係到香港的穩定。一個普通的地產投資，却涉及兩個政治性很強的問題，這不能不說是華潤的地位使然。」¹⁹

香港規劃史最難解的一頁

當日華潤為咗「香港的穩定」投資天水圍，係來自北京的更高指示，定係華潤自己膽粗粗摸佔石頭過河，無從稽考；被動地被長實拉落水做政治安全套，定係主動地按中國政府授意拍住上，亦搵唔到任何資料佐證，不過可以咁講，如果當時有一個以中資為首的財團，在新界西北投資一個必定跨越97的計劃，講緊總投資額幾百個億，又有人有意無意間，在講到天水圍計劃時，同香港前途拉埋一齊，港英政府就算覺得唔對路，都唔可以公開反對。

結果在1982年7月底，港英政府宣布，用22億港元向華潤及長實的財團回購所有天水圍的農地（可以話係今日新界東北的發展模式的先例），再以8億元代價，向發展商批出當中40公頃的土地，即係話港英政府要掹起長實在78年以不足4,000萬元打落的一口「釘」，要付出14億港元，同時免費附送在規劃上最中心、可容納13萬人口的地段，當時已經引起社會嘩然，做乜港英政府咁傻仔，更神奇的是，根據十幾廿年後的傳媒踢爆，加上立法會議員的質詢，揭露1982年政府買回天水圍土地時，同時簽定一項諒解備忘錄，當中有一條：

「協議除了對該169公頃發展區作出土地用途規範外(即38.8公頃由天水圍公司發展作住宅及商業用途，而餘下130.2公頃土地由政府發展公屋、資助房屋、公共設施和一些作鄰里商鋪的商業用途)， 亦就鄰里商鋪的商業設施作出限制，訂明這些鄰里商鋪的供應不得導致天水圍公司在其38.8公頃土地上提供的商業設施在商業上不可行。」²⁰

今日天水圍搵個街市都難，天水圍居民望住區內高於元朗一截的菜價肉價，有冇可能想像到，悲情城市在35年前奇貨可居的「策略價值」？今日講緊地產黨大戰共產黨，天水圍又突然可以整個臨時墟市，又會咁啱？

1982年7月28日，林行止在《信報》的「政經短評」講到政府買回天水圍呢單交易，有如此評論：

「政府在買賣天水圍上虧了大本，等如將納稅人的錢津貼地產商，當局明白吃虧，必有難言之隱，非三言兩語可交代．．．我們認為，政府買回天水圍，絕非一項商業行為，而是受內外政治因素影響，此外，政府或許還存有為錯誤決策付出代價的動機。有關與中國協商租約的政治性因素，明眼人一眼看出，這裡不必要重複．．．」²¹

究竟政府購回天水圍，有乜「難言之隱」，可能永遠都係一個謎，不過，唔夠兩個月之後，戴卓爾夫人就訪問北京，中央雙方正式展開香港前途的談判，仲親口同中國領導人講：「天水圍的問題解決了。」²²

海外關係是個好東西

大家試吓想像，在七十年代尾，李嘉誠在跟華潤集團高層，傾談天水圍點發展時，會講乜嘢。

斷估大家唔會天真到，以為佢哋會講吓個樓盤叫「嘉湖」定「漿糊」，又或者第二時樓價大跌買家撻訂會唔會追佢哋樓價差額呢啲細微細眼的芝麻綠豆。大人物必定只會著眼大方向，就算係順叔呢類財經茄哩啡，都可以好合理咁推斷，當日誠伯同埋華潤高層坐埋，講得最多的，就係中國對收回香港的立場及策略。

當然啦，以誠伯的級數，如果只係靠華潤就死得，華潤拍住長實開放天水圍，只係一個最有力的引子，證明在鄧小平推動改革開放之初，誠伯已經積極向中國靠攏，更正確咁講，係中國及香港的大資本家開始行埋，互送秋波，將相互利益綑綁埋一齊，推動香港主權回歸中國呢個春秋大業。

順叔搵唔到任何一手資料，幫助推論中國共產黨幾時開始將誠伯納入統戰的雷達，中共中央在1978年8月決定成立「中央港澳工作領辦小組」²³，作為政府機構，則在同年10月以港澳辦形式在國務院樓下掛單，可以好肯定咁推斷，中共務實派對海外華僑的統戰工作，就算唔係因為處理香港問題，早在港澳辦成立之前已經開始。

最簡單一個證據，出現在1977年10月2日，老鄧在接見希慎老闆利銘澤時所講一段說話：

「說什麼“海外關係”複雜不能信任，這種說法是反動的，我們現在不是關係（海外關係）太多而是太少，這是個好東西，可以打開各方面的關係。」²⁴

共產黨的老朋友

在前新華社社長、中共在香港的「黨委書記」許家屯的回憶錄當中，稱呼利銘澤為「共產黨的老朋友」、「老統戰對象」²⁵。眾所久之，在中共語言當中，「老朋友」呢個字，唔可以亂用的， 其他被許家屯稱為中共在香港商界的著名「老朋友」，包括霍英東及安子介級數的人物。據利銘澤女兒所寫的家族史，利銘澤是全香港最先知道「一國兩制」及「五十年不變」具體政策內容的人，在八十年代初到北京時，「被召進一個房間，獲告知一些特別消息」²⁶，就算利銘澤唔係第一個知道消息的香港人，亦肯定在中共眼中擁有超乎尋常的地位。

利銘澤是共濟會的中堅人物，加埋「共產黨的老朋友」的身份，對普通香港人嚟講，可以話充滿神秘色彩，可以推斷，利銘澤屬於可以遊走於中英之間的重要「中間人」，每年春節在利園舉行春茗，邀請「願意與中國接觸、希望認識中方代表的工商界領袖和政府要員」²⁷，1977年10利銘澤見完鄧小平之後，當年首席華人大孖沙包玉剛（聲望地位應該高過李嘉誠），嗱嗱聲約利銘澤食飯收料，利銘澤詳細講述咗鄧小平的講話內容，據包玉剛大女包陪慶所講，食完飯之後，包玉剛就罕有地興奮、重覆咁講：「我們終於可以回家了。」²⁸（順叔懷疑，包玉剛之後「棄舟登陸」的決定，同當日見到中港政經形勢急變，有機會打通北京人脈，好有關係；當時另一位船王董浩雲，唔知係咪同台灣關係太深，以至轉身速度較慢。）

老鄧接見利銘澤夫婦，兼掟出「海外關係是個好東西」名句的場合，其實係一年一度的國慶，幾乎每年呢個時候（文革時期唔知），都會有個「港澳同胞國慶代表團」訪京（應該同時有唔同組織的代表團，例如「香港出版界參觀團」），唔使問阿桂，呢個係中共統戰海外僑胞的最佳場合，掉轉頭，亦係各種「代表團」觀眾中國政治風向、搭建人脈的最佳場口。

在1978年國慶的香港觀禮團，第一次出現咗李嘉誠的身影，聽講呢次亦係誠伯有生以來第一次踏足北京，帶隊的，就係香港特區第一屆大紫荊等主、香港南洋銀行創辦人、誠伯的汕頭老鄉莊世平²⁹，當日亦有份隨團的，包括合和主席胡應湘，據胡應湘日後接受內地傳媒訪問時透露，北京觀禮後，一行人坐飛機坐船坐火車，由西安、成都、重慶、武漢到廣州，花咗20多人參觀，「沿路看到各地對打倒四人幫很興奮」。³⁰

中國共產黨向香港資本家伸手，攬頭攬頸全國向左走向右走，去到呢啲場面，就係各個大孖沙各自修行，展示自己人際及政治手腕的時候，聽講當日著住中山裝的誠伯，同自己講呢次訪京，有八字真言，「少出風頭，不談政治」，大家可以想像，另外一邊的胡應湘，份人太豪邁太放，把口唔收，會唔會容易得罪人。

胡飛俠 vs 李超人

時也命也性格也，胡應湘後來都有在香港搞地產，例如在灣仔起楝全港最高的合和中心，對香港充滿信心，不過更有興趣就係佢自己的興趣，學以致用咁衝入大陸搞公路，誠伯呢，改革開放初期，在大陸只係捐錢，冇乜投資，在香港狂咬地皮同埋英資資產，牌面上，胡應湘對中國改革開放後的經濟發展，應該更大貢獻，點解到2012年，連大紫荊水蓋都未撈到一個？

當年的長實及合和，查實有得揮，都係「華資地產五虎將」，胡應湘後生幾年，老豆胡忠本身已係大富，有錢送佢去美國讀大學，見識更廣，胡應湘更加係最早在中國大量投資的香港大孖沙，更加「愛國」，許家屯就曾經預言，胡應湘可能係1997後香港最有錢的人（搵唔到一手資料佐證），將李嘉誠及胡應湘拍埋一齊睇，大家可以比較容易理解，點解最後跑出的，係李超人，而唔係胡飛俠。

胡應湘在自己的回憶錄當中，提到80年代初，在中國大搞基建的時候，當時的總理（後來的中共總書記）趙紫陽，提供咗極大的幫助，「胡趙二人一拍即合，他倆在隨後十年建立了緊密的關係」³¹，即係話，當年胡飛俠發展中國的政治大碼頭，好可能係趙紫陽條水。

睇回憶錄，除咗話留意寫吓啲乜，最重要的，其實係留意應該出現，但冇出現的資料。

在許家屯的回憶錄當中，提到胡應湘，只係蜻蜓點水式的若略帶過，以趙紫陽同許家屯的關係嚟講，有關胡應湘的篇幅，唔係好合理，即係可能知道好多嘢，但冇爆出嚟。

許家屯提到有關胡應湘的，包括在1986年，胡應湘同李嘉誠一齊提出，比港英政府更龐大的大嶼山開放計劃³²，仲有就係1989年「六四事件」之後，為咗爭取胡應湘恢復廣深高速的工程，恢復香港人信心，許家屯說服胡應湘，去北京公開見李鵬，改善關係，但李鵬拒絕接見³³。

做生意最叻的大孖沙，尤其係在中港之間的舞台，最緊要就係政治上直通天庭，胡應湘好可能在政治上押錯注，買咗落趙紫陽條水，1989年政治變天，想洗底都嚟唔切。

當然啦，亦好有可能冇咁複雜，只不過係胡飛俠快人快語，在內地官場得罪人多都唔知，例如八十年代初合和起羅湖中港邊境過關大樓，中方負責同胡應湘談判的，叫做江澤民³⁴，大家都係工程師出身，本來應該好好傾，當年火氣好猛的胡飛俠，可能得罪咗老江都唔知，如果八十年代已經湊得老江舒舒服服，合和九十年代就唔需要衝去東南亞大搞基建，1997年撞正亞洲金融風暴，此乃後話。

從李超人及胡飛俠其後的發展，可以睇得出，就算起跑線一樣，同時都係中共中央重點統戰的「好東西」，胡飛俠投資中國甚至更加熱情，但政治手腕的高低，對日後的發展可以好大分別，例如李嘉誠幾次獲鄧小平單獨接見，胡應湘最多同其他人一齊排排企同老鄧握吓手，政治手段，高下立見，分別大成點，如果只係用錢計的話，大約係身家幾千億計，同埋幾百億的分別咁。

誠伯同內地高官點樣打交道，外人最多睇到成果，好少睇到過程，最八掛的一條線索，亦係來自當年許家屯的回憶錄：

「八四年，有人願以九十萬港幣將一輛九成新的勞斯萊司車，指名讓給我，這樣的價格是非常便宜的。他是通過一位副社長向我提出的，指這樣的車“才合社長身分”。我謝謝他的好意，不能接受。李嘉誠更是一年內兩次當面向我建議：“以你的身分往來香港、北京，應有一架小型飛機，這樣便利得多。”這個建議較稱作勞斯萊司更不可能。我推托：“沒有小型號的噴射機吧？”李嘉誠認真地說：“有，性能和大型的一樣平穩。”我理解他的好意，以暫時沒有迫切性，謝謝他的關心。」³⁵

誠伯的中資人脈

順叔近年越老，除咗越嚟越唔信自己未考證過的歷史，亦越嚟越明白自己的記憶信唔過，所以老人家的回憶錄，多數唔會信到十足，不過大家可以明白，點解王立軍走入美國領事館，會咁大鑊，你試吓今日中聯辦主任彭清華，走去美國學人寫回憶錄，睇怕香港好多人有得震冇得瞓。

唔好扯咁遠，另一個顯示到胡飛俠同李超人最大分別的，就係生意上的中資拍檔，合和咁多年嚟，冇乜話同中資機構有乜合作，李超人就唔同，中國有翻咁上吓的國企，或多或少同誠伯都曾經有過一手。

眾所久知，老鄧在1978年打開國門，只係打開條隙，好多嘢仲係未擺平，搞到1992年仲要南巡吹雞，改革開放初期有兩個最大「窗口」，一個叫中信，一個叫光大，各發一道免死金牌，一道俾榮毅仁，一道俾王光英，叫佢地勇於創新多作貢獻，唔理黑貓白貓搞搞震。

許家屯去聽徐小鳳演唱會已經叫做勇，王光英更勇，勇到去大富豪剪綵，在夜總會門口親身示範「馬照跑舞照跳」，84年1月，香港地產因為97問題陷入低潮，長實旗下國際城市的樓盤北京城市花園，賣唔出，光大出手接盤，以9.3億元購入1,100個城市花園單位，不過後來光大撻訂，原來在買賣協議中訂明，雙方可在半年內無條件取消協議，國際城市並向光大退還近5,000萬元本息，令市場嘩然，後來誠伯更因為呢單嘢，被內幕交易審裁處公開譴責，成為誠伯最冇臉的一單瘀事。³⁶

誠伯同光大合作唔係咁啱咀形，同中信就絲絲入扣。

誠伯除咗自己公司，絕少話做其他公司董事，以順叔有限記憶，其中絕無僅有的一次，就係做中信董事，時間仲要早到1979年10月，「中國國際投資公司」開張大吉之日，誠伯已經係董事之一，其他海外的「好東西」代表，仲有馬萬祺及霍英東³⁷。其後誠伯幫榮毅仁囝囝榮智健在香港打天下，做成一單又一單的英資染紅大刁（幫榮智健打天下的軍師袁天凡，後來再做太子太傅，幫李澤楷吞併香港電訊），更加不在話下。

誠伯同中資多合作，未必樣樣有求於人，更大可能，係中資公司想借誠伯過橋，不過好簡單咁講，誠伯早在七十年代尾，已經泊住華潤在天水圍做世界，又係中信集團呢間最個金融重鎮的董事，本身又可以直通天庭，同鄧小平搭通天地線，就算冇人同佢講，97年後中國必定收回香港呢個最重要的「內幕消息」，以誠伯的眼光，冇可能判斷唔到中國對香港問題的政策方向。

Sir Y.K vs K.S.

無論誠伯幾早睇清楚香港前途問題的必須發展，無論佢在中方建立咗幾深厚的人脈，用嚟解釋誠伯發達秘笈或者李氏力場的科學成因，只係半桶水，所有人「親眼看見他，發達」，但唔係好多人留意、或者仲記得，令誠伯大發特發的最重要關係，唔係來自中國，而係英國。

1979年9月25日，英國政府宣布，港督麥理浩留任多兩年，不過呢單咁重要的新聞，在第二日的報章頭版，幾乎放唔落，因為被另一單更轟動的新聞完全蓋過，長實宣布作價6.4億元，在香港上海滙豐銀行手上，收購22%的和黃股權。

講到呢個高潮位，順叔忍唔住要原文引述，當日《信報》頭版頭條頭一段，大家睇睇行文用字，不難見到，當時全港唯一的華文專業財經報章，可能太夜趕稿，收到消息又太興奮，以今日的角度嚟睇，查實唔係太專業中立，甚至有啲「KAI」：

昨晚十一時四十五分，長江實業董事長李嘉誠先生在華人行辦公室接見記者，宣布了一件震撼香港商界（由於和黃的業務範圍甚廣，因此震撼將很快傳遍海外）的股票交易 ── 長江實業以每股七點一角的低價購取滙豐手上持有的百分之二十二和黃股票共九千萬普通股，昨天深宵，整個中區已一片死寂，但華人行廿一樓的長實總部，燈火通明，五分之三的董事局成員仍在忙碌地工作，各董事的機要秘書、速記員和輔助性職員亦忙成一團；經過整整一天十多小時的工作，今年五十一歲的李嘉誠竟然絲毫不露疲態，他興奮地對記者說：「在不影響長江實業原有業務的基礎上，本公司已有了更大的突破！」³⁸

長實在1978年密密收集怡和旗下的九倉股權，後來包王剛棄舟登陸，亦想加入收購九倉控股權，由滙豐大班沈弼出面，「勸退」李嘉誠，將九倉股份讓俾包王剛，後來再將和黃股權，拱手賣俾李嘉誠，呢個經典故事，相信好多香港人聽過唔少次，呢度唔花口水再講。

今日睇返呢兩場經典商戰，作為財經茄哩啡，順叔印象最深刻的，是李嘉誠同包玉剛的關係，仲有滙豐本身「造王者」的關鍵角色。

誠伯細過船王10歲，但以當年兩個人的社會地位，尤其係上流社會政商精英眼中，「Sir Y.K.」的地位，仲高過「K.S.」幾班，政治能量上，船王亦猛過誠伯，例如同鄧小平的關係，誠伯雖然曾經獲得老鄧單對單接見，不過包玉剛更激，玩到可以兩家人出齊三代擺家宴³⁹，「Sir Y.K.」當日在國際政壇的人脈之深之廣，尤甚係英國政府最高層，更加冇得比，包玉剛在1978年保守黨上台之前，已經獲英女皇封做爵士，更加經常同戴卓爾（戴卓爾夫人的老公）打高爾夫球⁴⁰，可以想像，船王當年係中英兩國之間最重要的中間人之一。

當日誠伯晨中吼中九倉，1978年中已經買入10%九倉股權，挑戰英資的眼光及準備功夫，明顯好過船王，理論上，誠伯可以成為第一個入主英資財團的「華人大班」，正式超越船王成為「華人之光」，不過誠伯反而將九倉股權賣俾船王，賣咗個大人情俾包玉剛，後來更做中間人兼墊付定金，幫船王收購埋會德豐，從此誠伯及船王二人，「關係更密切，大家一起去打高爾夫球」⁴¹，據包玉剛長女的記述，包玉剛臨過世之前，「最後和家外面人講話的，就是李嘉誠先生」。⁴²船王當日同誠伯講乜，誠伯自己唔講，怕且永遠唔會有人知道。

一時瑜亮，誠伯最厲害的地方，可能係令本來處於競爭關係的包玉剛，都完全信任自己，可以想像，「Sir Y.K.」後來有冇幫誠伯打通在英國政府最高層的任督二脈，將自己的英國波友，變成誠伯的波友？

誠伯處理同英國佬的關係，同處理北京的關係，應該一樣咁面面俱圓，連滙豐大班沈弼都搞得掂。

The bank is the bank

據聞當年港督麥理浩講過，真正管治香港者，其實係馬會、滙豐、怡和，排名不分先後（搵唔到正式出處）。呢句帶自嘲的名句，查實同現實都有出入，滙豐在香港越做越大，食埋華資的恒生之後，更加惡晒，既係發鈔銀行亦係中央銀行，最著數係做埋結算銀行，等如掌握晒香港競爭對手盤路及資產狀況，咁又有邊個夠滙豐爭。

政治上，滙豐大班同時係行政及立法兩局議員，香港英資更加開始走下坡，真正惡晒的、最有影響力，其實係滙豐，當時講英文的人，唔會叫滙豐做「Hongkong Bank」，而係叫「The Bank」。

七十年代初唔少英資大舉進軍海外失利（可能係面對97問題分散風險的長遠部署），怡和本身已經完氣大傷，和黃前身的和記國際，更衰到要滙豐出手注資，結果埋下滙豐持有最大嚿股份的伏線，滙豐已經講明會在適當的時候，出售和黃股權，避開「銀行兼營企業」的指責及矛盾。

滙豐在1979年將手上22%和黃股權賣俾長實，被人批評最多的，係「賤價」，有關指責，其實並不成立。79年9月24日長實宣布交易前的取後一個交易日，和黃股價雖然經過不尋常的升幅，收市只係每股5.85元，滙豐的出售價，每股7.1元，仍有超過20%溢價，和黃大班韋理在9月27日向股東發表聲明，聲稱和黃每股股價應該值14.4元⁴³，唔知韋理點計出嚟，不過可以想像，大概講緊和黃的資產淨值，換句話講，在長實有意併購和黃的消息曝光之前一日，和黃股價（5.85元），相對資產淨值（14.4元），有接近60%的折讓。

如果股市價格係一個可以有效反映各種資訊的地方，當日和黃股價的大幅折讓，正正係一項最有力的證據，證明就算在1979年的9月，全香港對中國收回香港主權的立場，仍然懵盛盛。

其時已在麥理浩訪問北京之後半年，英國政府已經大約知道97年中國鐵定收回香港的立場，不過從當時和黃的股價及折讓睇嚟，絕大部分香港人，包括絕大部分的港股投資者，仍然唔相信、或者未知道呢個咁重要的「內幕消息」，否則類似和黃的英資資產，必定被視為吞拼對象，就算唔出現拼購溢價，亦唔會出現咁大的折讓。

當然，以上推論係利用今日的眼光車馬後炮，有可能在1979年的香港，英國人仍然唔相信中國收回香港的立場會咁強硬。

當日滙豐賣和黃股權俾長實的交易，真正明益李嘉誠的，其實係付款安排，連貸款都無謂做，長實只需要俾總代價6.4億元的20%，其餘八成分兩年還，長實當年應該冇咁多現金，因為近2億元的首期，其實係誠伯自己私人低息供俾長實的股東貸款，換句話講，滙豐出售和黃股權的交易，應該係閃電進行，冇在市場上向其他有意思的買家兜售問價。

呢單交易，當日《信報》形容為「長江實業股東的福氣」⁴⁴，對交易三方都有利，不過在英國人角度，就唔係咁睇，例如當日港英政府及英資高層經常用嚟放風的《南華早報》，在79年9月28日的財經版，有一份署名「JW」的評論文章，作者好可能係南華早報的記者「Jim Walker」，好唔客氣咁批評滙豐，提到滙豐時，兩度用到「well, the bank is the bank」，暗串滙豐玩晒惡晒，出賣英國自己友的利益，將幾年前仲係穿緊膠化著緊短褲的李嘉誠捧上神枱，可見英國人（和黃高層）對滙豐明益華資誠伯的決定，幾唔順超：

「Cheung Kong has scored the bloodless coup to match all coups. And if one is to use some of the suggestions of Mr Bill Wylie, it has done so at the expense not just of HWL but also the Hongkong and Shanghai Banking Corporation. Consider the saga for a moment. Mr Li Ka-shing, not many years ago a modest plastics maker, with ambition. The Hongkong Bank… well the bank is the bank and was when Mr Li was in shorts.」⁴⁵

用2個億的價錢，打一口最大的釘落去香港最重要的英資資產，其餘款項分兩年還，如果滙豐用呢個條件放在市場公開招標，當年斷估大把人排隊入標，包括太古等經營相對穩健的英資，肯定亦會好有興趣，甚至肯出更高的價錢，滙豐偏偏快刀斬亂麻，揀咗長實，呢個正正係當時外界最唔明白的地方，不過經此一役，「超人」的名頭亦不徑而走，而滙豐就係名乎其實的「造王者」。

滙豐的抉擇

滙豐支持包玉剛吞九倉，又明益李嘉誠食和黃，同香港華資越行越密，似乎唔記得咗自己由英資洋行發起的根本，講得好聽啲，可以好似袁天凡咁講，滙豐「已經脫離英國，與香港一起發展」⁴⁶，用古惑仔心態去分析，就係滙豐自己都要搵食，在香港咁大盤生意，唔係好似國泰啲飛機咁，一飛就可以搬走，審時度世，知道英資在香港已經係明日黃花，培養一班新一代的「政治買辦」睇場，就算有乜事，同中國都好啲溝通，當然啦，新一代的「政治買辦」。

怡和背後有個凱瑟克家族，太古有施懷雅，中電有嘉道理，滙豐銀行跟這批傳統香港英資最大分別，就係冇一個主導公司發展及人脈的家族，許家屯曾經透露，中共一直想了解滙豐董事局的委任大權由邊個決定，但一直摸唔到底，連做過滙豐董事局副主席的包玉剛都唔清楚⁴⁷，斷估中共當日都係諗多咗，滙豐只係一間好簡單純追求盈利及持續發展的上市公司，冇咗家族控制，更容易跳出維護英國利益的框框。

許家屯的回憶錄，提及滙豐時亦曾講到，在1983年底，美國國務卿基辛格訪京，為戴卓爾夫人向中國領導人帶咗一個口訊，話滙豐準備同英國萊斯銀行合拼，擴張歐洲業務並將總部設在倫敦，戴卓爾夫人想北京明白，呢個唔係英國政府的陰謀，而是滙豐商業上的決定，當時的港澳工委即時舉行會議，認為滙豐以合拼為名，行撤離之實，表明反對滙豐同萊斯銀行合拼的計劃，並托基辛格將北京反對意見轉告英國，之後滙豐放棄計劃，只係收購小部分萊斯銀行股權。⁴⁸

滙豐當日放棄同萊斯銀行合拼，未必完全出於北京的反對，不過從以上的典故，可以清楚睇到，大型金融機構的一舉一動，好多時要睇政府的面色，七八十年代的滙豐，挾在中國及英國之間在香港搵食，未冊遷正式「淨身」做「英資銀行」，非禽非獸，面對的政治壓力更大，亦有更大誘因，同當時得令的香港華資行得更埋。

滙豐大班沈弼，1977年嚟香港，出任滙豐主席的十年，亦係中國改革開放，香港風雲變色的十年，聽講誠伯因為同沈弼好熟，有人話因為多得誠伯老婆莊月明，英文夠好，可以幫當年英文唔係咁得的誠伯同沈弼溝通，順叔對呢個講法好有懷疑。最初可能有幫助，但講到尾，誠伯對沈弼的吸引力，多數係中國的人脈，對北京政治和經濟動向的感應能力，滙豐在七八十年代向華資傾斜的策略轉變，對中國收回香港「內幕」消息的掌握，究竟幾多係沈弼的眼光及判斷，幾多因為誠伯及包玉剛的天地線？

香港地產大孖沙同銀行大班的關係，正正解釋咗，點解所謂乜嘢「地產霸權」之下，地產商乜嘢主要行業都壟斷晒，唯獨銀行，從冇地產商染指，因為大孖沙發大達，好大程度，有賴於同銀行的互惠互利關係，如果財經茄哩啡在2009年1月已經明白呢個道理，當時滙控供股時，就會大手掃入供股權，兩岸猿聲啼不住，笨象已過萬重山。

1979年9月，右派報章《華僑日報》，講到滙豐及長實的和黃交易，有一段好有意思的評論：

「最近幾年來種種事實已證明，本港逐漸趨於「一銀行化」；這是否意味也在逐漸趨於「一地產商化」或「少數豪富集團化」？請問本港未來一切大生意是否可能都在「滙流」，而由那些天皇巨星予以「君臨」或「擁有」？而在這種演變的過程中，本港工商業與小市民又將付出多少更惡劣的通貨膨脹的代價？」⁴⁹

以上觀點，放在今日的香港，有冇似曾相識、歷久常新的感覺？

英國在香港的長遠利益

在那些年的香港，中國當然要在香港穩住華資，搵幾件辦事人，保持香港繁榮安定；作為管治香港最有影響力的造王者的滙豐，政治上商業上都有實際需要，向香港大孖沙傾斜。

查實就算係英國，假假地都係「大不列顛」，香港英資個個雞飛狗走，香港搞到一鑊粥，亦有損國威，所以有一批華資財團冒起，繼續在香港投資，亦乎合英國的利益，香港傳統英資的考慮，反屬其次，舉個例，如果滙豐在1983年爆煲，你估出手相救的，會係中國定英國？

所以作為人類歷史上絕無僅有的主權和平移交的案例，香港主權作為一項「資產」，在中英兩國的「交易」當中，注定有幾件中間人，可以大發特發，不過睇吓係邊個咁解。誠伯既有中國的人脈關係，又有滙豐的祝福，自然可以在呢個時空變身超人。

講到香港主權移交呢單世紀大刁，唔少人會輕率的假設，英國政府只會以香港英資的利益為最終依歸，查實英國人在香港的管治，仲有同當地英資財團的關係，同其他殖民地好唔同，香港英商未必忠於英國的利益，英國政府亦唔係吓吓照住香港英資，管治上，更寧願以華人精英作為政治拍檔。⁵⁰

在香港前途問題的中英角力當中，講到李嘉誠，大部分人著眼於誠伯係中方的紅人，佢老人家和英方的關係，好少被擺上枱，以誠伯政治上面面俱圓的功力，冇可能在經營英國政府關係上交白卷。

英國人的政治比較制度化，唔似得北京咁講關係，誠伯好多嘢唔需要自己出面，下面大把能人異士做代言人。舉個簡單例子，彭定康1992年嚟，好多親中人物即時被踢出權力核心，當時，歷史的注意力放在肥彭的政改方案，冇乜留意作為政改方案的個重要環節，就係成立一個叫做「總督商務委員會」，唔會同公眾交待會議內容，連議程都唔會講⁵¹，一聽就知道，查實係肥彭用嚟向香港工商界收風放風的場口，而呢個神秘組織的成員，有條友叫李業廣。

1979年9月長實入主和黃之後，誠伯即時派咗兩個人入和黃董事局，一個係佢老人家自己，另一個就係李業廣，日後港交所主席呢個金融重鎮，先後由李業廣及夏佳理擔任，夏佳理亦係胡關李羅的核心人物，就係咁簡單。（夏佳理當日做立法會議員，所代表的功能組別，正正就係地產商）

上面提到，1978年10 月《信報月刋》有兩篇訪問，除咗有置地大班講中國冇可能收會香港之外，仲有誠伯的訪問，誠伯講到當年佢仲係痴膠花時，砌低咗一間規模比長江大好多的競爭對手，嗰位廠家唔服氣，搵人偷拍長江廠房實景，相向客戶證明，誠伯唔夠班接超級膠花大單。⁵²

由天水圍到和黃控股權，港英政府同英資大班，跟誠伯拗手瓜的過程當中，都輸甩底褲，有冇好似當日誠伯問膠花廠的對手咁，輸咗唔服氣出陰招，唔知，之不過，在英國人的管治下的香港，容許李嘉誠這樣一位首席華資大孖沙出現，斷估在誠伯發達過程中，對英國人的制度，一定留下十分深刻的印象。

英國在香港有個文化協會，以前每年都會送幾十個「志奮領」獎學金，俾香港大學畢業生到英國深造，真係咁有心教育咩，講到尾，就係為咗英國長遠的利益，每年揀班有翻咁上下水準、又可能對英國文化好受落的精英去英國，第二時上咗位，仍然對英國保留良好印象，已經值回票價。

滙豐在1978年開始的香港大時代，睇得通形勢，知道養肥幾個好似李嘉誠、包玉剛等華資大孖沙，有助本身長遠的發展，甚至唔理英資財團的利益，當年滙豐都睇得通的形勢，英國政府玩政治咁多年，又點會睇唔通，1997年之後，來自香港而又在英國投資最多的，正正係李嘉誠，唔係傳統香港英資。

近幾年長和系幾單百億級的大交易，都係在歐洲及英國投資，都係唔死得人風險有限的公用監管事業，套用誠伯政治唔係咁正確的講法，投資最緊要揀「法律政治穩定」的地方，去到今日，長和系在香港及中國的資產，佔成個集團已經唔夠20%。

長和系做大刁的能力

長和系的高峰，在2000年賣「橙」一役，一炮賺過千億港銀，當時中國啱啱入世，開始進入黃金十年，全太陽系都知道中國錢途無限，試吓想像，如果當日長和系的資產配置策略，將一千個億掟去中國是但掃貨，今日回報分分鐘十倍計，試吓想像，如果純粹講商業眼光，以誠伯級數，又點會睇唔到呢個全世界都知道的趨勢，一個最受中共器重的資本家，點解反而留在英國及歐洲搞3G，賣完橙得個桔，十幾年嚟燒咗超過和黃市值的投資？

一個好合理的推斷就係，和黃在英國在歐洲的投資，唔單止係商業決定，亦有好大政治考慮，講到尾，而家唔係話好似七十年代香港地產公司鬥搵快錢，而係講緊一個可以幾代承傳的全球商業王國。

在2000年11月，《遠東經濟評論》報道，中國政府認為誠伯在內地碼頭的影響力太大，處理近四份一的全國貨量，交通部已經要求地方政府，限制和黃碼業務的發展⁵³，誠伯在京中斷線的傳說，開始傳起。

美國傳媒報道中國及香港的政治新聞，順叔多數先打個5折，不過，從長江基建的業務發展睇嚟，《遠東經濟評論》十幾年前的報道又未必完全捕風捉影，長建以投資中國為核心業務，96年年報，仲自稱「為少數可同時提供發展中國基建項目所需的資金、信譽、經驗與專業知識之機構」；去到99年，長建發展方針，忽然變咗「放眼遼濶世界，投入當地社群」⁵⁴，從此長建所有大刁，幾乎全部都在外國，投資中國絕無僅有，又難怪外人會捕風捉影，將胡錦濤溫家寶第四代領導人訪港唔住長和系的酒店，同誠伯在京人脈相提並論。

舊年順叔在自己網誌，寫過上下兩篇《買褲送褲袋》⁵⁵，除咗回應「賣樓贈窗台」的上聯，仲提到長實的收租物業，至2011年底，只係佔集團資產淨值8%，相比之下，新地的比例高達68%，當時的結論係，長實唔識得做商場，冇打造新地標的能力，缺乏類似九倉的海港城時代廣場、新地的國金國貿等王牌物業。

經過近排的再思考，順叔決定將呢個推論收返，因為睇得長實發展歷史越多，越覺得長實唔做收租物業，可能係一項超長遠的策略，好有政治味道的選擇，誠伯當年睇住搬唔走「不動產」的英資，好似中環大地主置地咁，在政治變天的時候，被華資大孖沙撳住嚟砌，當年的深刻經歷兼最大得益者，自然唔想風水輪流轉，自己成為被人撳住嚟砌的目標，再講白啲，長和系近年的發展，已經同「撤資」分別唔大，潛台辭可能就係，唔係咁信得過共產黨。

長實和黃都係綜合企業，而且係好綜合嗰隻，試問世上有邊個能人異士，電訊地產能源碼頭酒店零售生命科技，辨辨皆精。長和系並冇好似微軟視窗、蘋果iPhone呢類「殺手產品」，一件嘢無限複製升呢，就風行全球稱霸多年，亦唔似得好似中國國企咁，擁有近乎壟斷的市場地位及政策保護，長和系的策略精髓，離唔開誠伯成日掛在咀邊的「發展不忘穩健，穩健不忘發展」，乜都唔做的話，會好穩健，要發展，就好講管理層做大刁的能力。

長和系今日的根基，在於當年狂掃香港物業，仲有吞併和黃港燈，都係在香港面對前途問題時所做的重要策略選擇，當年中國有需要在香港經濟上搵代言人中間人，英國撤出香港前亦有需要搵代言人中間人，呢個食大茶飯、巨額財富再分配的神秘三角時空，好難再出現，換句話講，長和系好難複制當年做大刁的條件。

經過二次世界大戰、國共內戰，當時生存落嚟已經唔係一件容易的事，當年的香港，臥虎藏龍，擁有無比商業眼光及毅力鬥心的資本家，比比皆事，最後跑出的一線大孖沙，最重要的，其實係政治手腕。

政治上有更大利用價值，商業上影響力梗係越大越好，好似台灣的商家佬咁，個個在大陸好似特別長袖善舞，康師傅的公仔麵、旺旺的米餅、富士康的電子代工、冠捷的電腦屏幕，間間都話做到全地球最大，同統戰台灣商家佬統一中國大業冇關，你又信唔信？今日在內地的台商，同主權過渡期間的香港大孖沙，一樣咁好搵，一樣道理。

當年長實收購和黃，包玉剛擊退怡和控制九倉，之所以取得英資大行的控股權，其中一個冇乜人留意的因素，就係民族主義情緒，英國人就算出更高價錢，華人小股東，都寧願將股份賣俾李嘉誠或包玉剛。

今日香港個個呃住地產霸權，如果出現中資併購港資、僑資併購港資的大買賣，市場上恐怕再冇當年同仇敵愾的情緒了。

參考資料:
1 《麥嘜春田花花》，1994年，嘻嘻，呢本書冇印頁數的^↩
2 《香港網絡大典》，「HI」，http://evchk.wikia.com/wiki/Hi^↩
3 《信報月刊》，1978年10月，總第19期第73頁^↩
4 《信報月刊》，1978年10月，總第19期第71頁^↩
5 《信報月刊》，1978年10月，總第19期第62頁^↩
6 《黨史研究與教學》，2007年第3 期，總196期第8頁^↩
7 《鄧小平年譜(1975-1997)》(上)，中央文獻研究室，2004年版，第500-501頁^↩
8 《香港的終結: 英國撤退的秘密談判》，Robert Cottrell，1993年，第78頁^↩
9 《香港回歸歷程: 鍾士元回憶錄》，2001年，第20-21頁^↩
10 《香港回歸歷程: 鍾士元回憶錄》，2001年，第21-22頁^↩
11 《香港回歸歷程: 鍾士元回憶錄》，2001年，第22頁^↩
12 《Time to Declare》，David Owen，1991, 第407頁^↩
13 《黨史研究與教學》，2007年第3 期，總196期第7頁^↩
14 《李兆基博士傳記》，2008年，第47-48頁^↩
15 《吳康民口述歷史》，2011年，第100-101頁^↩
16 《九評地產黨》^↩
17 《香港地方》，「新 市 鎮 ( 四 ) 天 水 圍」，http://www.hk-place.com/view.php?id=164^↩
18 《華潤雜誌》，2012年5月號，第14頁^↩
19 《紅色華潤》，吳學先著，2010年，第430頁^↩
20 《立法會會議記錄》 ，2011年11月16日，http://www.legco.gov.hk/yr11-12/chinese/counmtg/floor/cm1116-confirm-ec.pdf，第15頁^↩
21 《信報》，「錯誤決策的代價」，1982年7月28日，第2頁^↩
22 《紅色華潤》，吳學先著，2010年，第438頁^↩
23 《中國共產黨大事記(1919.5 – 1987.12》，1989年版，第340頁^↩
24 《鄧小平論僑務》，廣東省僑辦編，2000年版，第6頁^↩
25 《許家屯香港回憶錄（上）》，1993年，第43頁^↩
26 《香港利氏家族史》，2011年，第203頁^↩
27 《香港利氏家族史》，2011年，第203頁^↩
28 《包玉剛 – 我的爸爸》，2008年，第167頁^↩
29 《鳳凰衛視》，「1978年李嘉誠曾到北京參加國慶典禮」，2008年2月22日，http://big5.ifeng.com/gate/big5/v.ifeng.com/his/200802/34f4c525-3c16-4c91-ad13-ba151b234df4.shtml^↩
30 《21世紀經濟報道》，「北上先鋒的目光和腳步」，2008年12月30日，第41頁^↩
31 《點燈又點火 – 從香港出發的胡應湘》，2007年，第59頁^↩
32 《許家屯香港回憶錄（上）》，1993年，第239頁^↩
33 《許家屯香港回憶錄（下）》，1993年，第426頁^↩
34 《點燈又點火 – 從香港出發的胡應湘》，2007年，第81頁^↩
35 《許家屯香港回憶錄（上）》，1993年，第35頁^↩
36 《壹周刊》，2010年6月24日，A56頁^↩
37 《大公報》，「中國國際投資公司開張了」，1979年10月5日，第1頁^↩
38 《信報》，1979年9月26日，第1頁^↩
39 《包玉剛 – 我的爸爸》，2008年，第221頁^↩
40 《包玉剛 – 我的爸爸》，2008年，第125頁^↩
41 《包玉剛 – 我的爸爸》，2008年，第239頁^↩
42 《包玉剛 – 我的爸爸》，2008年，第242頁^↩
43 《South China Morning Post》，1979年9月28日，P.1^↩
44 《信報》，1979年9月26日，第1頁^↩
45 《South China Morning Post》，「Cheung Kong coup leave Li in front」，1979年9月28日，Business News P.1^↩
46 《香港股市(1841-1997)》，鄭宏泰、黃紹倫，2007年版，第373頁^↩
47 《許家屯香港回憶錄（上）》，1993年，第231頁^↩
48 《許家屯香港回憶錄（上）》，1993年，第232頁^↩
49 《華僑日報》，「兩岸猿聲啼不住，輕舟己過萬重山」，1979年9月28日，第2頁^↩
50 《官商同謀》，顧汝德著，2011年版，第270頁^↩
51 《立法會會議記錄》 ，1994年12月7日，http://www.legco.gov.hk/yr94-95/chinese/lc_sitg/hansard/h941207.pdf，第984頁^↩
52 《信報月刊》，1978年10月，總第19期第60頁^↩
53 《遠東經濟評論》，「China -- Deep Water: Beijing moves to curb Li Ka-shing's influence over China's ports in favour of other players」，2000年11月2日^↩
54 《財經茄哩啡》，「仇富首富(下)」，順叔，2010年8月13日，http://caijingcarefree.blogspot.hk/2010/08/blog-post_12.html^↩
55 《財經茄哩啡》，「買褲送褲袋(下)」，順叔，2012年8月7日，http://caijingcarefree.blogspot.hk/2012/08/blog-post_7.html^↩

關連文章:
1. 變態超人（上）｜（中）｜（下）
2. 買褲送褲袋（上）｜（下）

同場加映：

同場再加映:

傑出華人李嘉誠營商之道in 5 seconds

財經吳剛

原圖：吳剛師傅淋滾油

今期唱花敬佛，開傳媒，凸透一位牙斬斬要派報紙的哎吔傳媒人，順便回顧一位報壇老行尊堅持立場幾十年不變的辛酸。

唔少人講過，想邊條友冚家富貴，最好聳恿佢搞報紙，印印吓好快印出血。呢個傳統智慧，啱一半錯一半，「傳媒老闆」社會地位，奇貨可居，邊份報紙執粒，好快出現大富豪接貨，後面政治價值，唔會死錯人者。

瘟雞未死一雞又叫，七月底講開「財經林峯」，主場新聞離奇收皮，爛口未完，「財經吳剛」趕住出場，踩火坑搞財經報紙，勇氣猶勝吳剛師傅吞炭淋滾油，呢位正義朋友，就係以「資深對沖基金經理」之名行走江湖、人稱「錢老牧師傅」的，錢志健叔叔（Edward Chin）。

財經林峯

Tony Chok

今期湊熱閙，開精電國際(0710)，講吓呢隻明星工業股的投資價值。

有一種上市公司，大股東係股壇老雀，炒殼炒股炒風炒電，鑊鑊飛沙走石，路過之地吋草不生，道上風景，卻是唔少底褲都冇著的師奶股東亞婆散戶，個個木口木面。呢類公司，財經茄哩啡永遠唔敢掂，因為坐庄者太犀利，自問冇本事在對家手指罅揾食。

物以類聚，一個財技超凡的公司主席，炒炒貢十幾年，忽然喪搭個形象包裝一流的行政總裁，Chok住Chok住同你講乜嘢工業革命，順叔戒心會更加大，股壇大龍鳯，來來去去，都係作個故仔揾班財經演員埋位，財演越有型，食水越深，咁大件靚仔扮蛤毑周街仆嚟仆去，咪玩啦。

精電行政總裁蔡東豪哥哥，無需多介紹，簡直係財經茄哩啡的偶像，如果呢個世界有「財經演員」，咁叫Tony Tsoi哥哥做「財經林峯」可謂當之無愧，周身刀張張利，踎屎塔都出哲學，戴上邊張臉具都咁靚仔，雖然有時略嫌有少少形象潔癖，一大堆乜能嘢「最後一代知識份子」、「以為自己係文化人的企管人」、「温布頓精神」，唔係個個明，冇所謂，最緊要型，重點係冇人會講得膠覺得佢Chok，星級財演與財茄之分，此之謂也。

順叔觀察到幾有趣一點，蔡東豪哥哥（下稱「Tony Chok」或「Chok生」）作為上市公司管理層的一面，似乎唔係咁多人了解（好多當「Chok生」係偶像的，唔少係從不炒股的正義師奶，或者世界觀未染銅臭的少男少女），對「Chok生」的老闆高振順，認識更少。

Gathering

Gathering啫，大家唔好諗太多。

伸延閱讀:
1. 巴士的報：黎智英與美前副防長 遊艇密會5句鐘
2. 巴士的報：黎智英密會美鷹派猛人 與CIA關係密
2. CY LAI日報：密會」美前CIA要員？ 黎智英：好友敘舊

呃你孖孖

當「文化商人」遇上「以為自己是文化人的企管人」

今期開文化中國 (1060)。

公元2014年3月12日，天方夜談，文化中國溝阿里巴巴，諗住變變變，芝麻開門，一嘢變咗呃你媽媽，幾毫子炒上幾蚊，文化中國市值一度炒到超過700億（港銀，下同），跟手一路派貨，越派越有，全日55億成交，撲入散戶非死即重傷，全城坐艇，媽媽有聲。

搭個棚、作個故仔、再剥師奶條底褲的股壇大龍鳳，每日上演，講緊做得有幾過份，食到有幾盡咁解。文化中國一場大茶飯，聽講有大戶賺咗十個億計，不過盲衝衝高位接貨，家陣蟹綁在文化中國的游資，大大話話亦有十幾廿億，殺孽咁重，搞到唔少細價股炒股都冇啖好食，累街坊。聽講唔少中環古惑仔，㷫過火屎，四出刮料，好想知道文化中國呢舖大茶飯背後，是何方神仙過路，竟爾寸草不生。

文化嘅嘢，財經茄哩啡識條春咩，不過，有一位財技高手，乃「文化人」加 投資銀行家再喪搭事事評論員的混合體，深諳文化中國管理層的思路套路，講到品評呢場文化大龍鳳的資格，掉佢其誰，呢位財技高手就係... 就係...

登登登登！各－－位－－觀－－眾：精電(0710)行政總裁，蔡東豪哥哥！

Yeah。

是咁的，文化中國主席，叫董平，阿董生好威，堅威。如果將大陸電影分為國營同民營兩邊，國家隊的大佬叫韓三平 （啱啱被退休），另一邊的教父式人物，就係董平，冇在董平的電影出現過，都唔好叫自己做大導或者一線，董生的杰作包括《臥虎藏龍》、《讓子彈飛》，仲有同周星馳爺爺合作的《西遊》咁。有人叫董平做「中國民營電影教父」，不過董生好謙，只係將自己定位做「文化商人」。

大陸電影商業化，唔夠廿年，文化喪溝股票，經驗更青澀，十年前唔係咁多人識玩。將文化工業同資本市場結合，打破意識形態禁忌，董平乃第一代推手，帶呢位「文化商人」登陸香港股市，授以搭棚秘術、財資技法的，正正就係蔡東豪哥哥。

話說2004年底，阿蔡生去咗友利(0419)呢隻經典殼股做董事總經理，月薪一皮，打破香港上市公司最低工資記錄，才子賤價下海，全城跌碎眼鏡。原來東豪BB忍辱負重，重要任務幫董平間華億，借殻上市。於是「友利」變身「華億新媒體」，蔡東豪哥哥作為財技高手的金身罕有閃現，領銜演出財經大戲，單嘢幾個月搞掂，2005初東豪BB收返埋個金身，閃咗去佢老闆的另一隻殼精電做行政總裁，犒賞人工暴跳到10球一年。呢場十年前蔡東豪哥哥一手策劃的文化大龍鳯，仲有董平同保利文化(3636)的瓜葛，早排「文化大拍賣（下）」已經寫過，唔重覆。

阿蔡生去咗精電搞工業革命，佢在「華億新媒體」董事會，一直保留非執行董事的職務，直至2008年初，「華億新媒體」隻殼搞完一輪後，再賣俾另一個文化界財資高手，前網通CEO兼中國寬帶產業基金創辦人田溯寜，「華億新媒體」再變身「華億傳媒」，蔡東豪哥哥同董平一齊撤出華億董事會。

一個人有兩塊臉，唔出奇，蔡東豪哥哥做財經評論員，都警訓過小投資者，上市公司股價經常失驚無神大起大落，而董事會又次次同你講「不明股價升跌原因」，多數有古怪，唔知點解，蔡東豪及董平，在「華億新媒體」董事會，共渡近兩年零八個月歲月，期間在港交所發出的「不明股價及成交波動原因」通告，又足足發咗20次；同樣，眾所久知，阿蔡生好痛恨大陸大鱷混水漠魚，破壞香港「核心價值」，不過又可以同董平合作無間，教曉「文化商人」股市的藝術，社會主義中國的文化藝術界，從此染滿資本主義香港的銅臭，呢啲咪叫一國兩制囉。歷史上的財經「Hi」story會記住，當「文化商人」遇上「以為自己是文化人的企管人」時拼發的火花。

學滿師的董平，玩完「華億新媒體」後，好快揾到另一隻殼，叫做「上聯水泥」，亦即係今日的文化中國，幾年來股價彈吓插吓，同樣搞完一輪再揾科網猛人（今次係馬雲）落搭，金蟬脫殼，套路似足十年前華億場戲。文化中國在2013年7月，透過高盛射咗批貨出街，價值約2.7個億，每股成本唔使5毛，當高盛收半個佣，做呢單刁都係賺得百零萬，一球佣竟然請得郁高盛，當有仙人指路，大雞唔啄細米，原來大大大茶飯在後頭，不過高章到冇人識睇咁解。

如果在蔡東豪哥哥檔主場新聞，用「阿里巴巴」做關鍵字搜索，新聞加評論冇一千條都有幾百，今次阿里巴巴收購文化中國搞到全城炒仔坐艇，David Webb都叫證監去查，平時好配合股壇長毛發功的蔡東豪哥哥，竟然又一粒字都冇提過，咁大個位都唔入，留手咗啲囉，阿蔡生將佢十年前同董平合作的經驗，拎返出嚟同投資者分享吓就好喇。

好多人都問緊，文化中國大龍鳳，究竟係咪騰訊（0700）及阿里巴巴的孖孖「馬馬」呃你媽媽？呢個問題，全香港最有資格評論的，只有蔡東豪哥哥了，聽講阿蔡生及董平，兩位文化人的辦公室，都在香港金融中心的一座土豪色寫字樓，蔡生撞到故人的時候，唔知會唔會順便幫香港散戶八掛吓呢？又唔知蔡東豪哥哥會唔會繼續監察大陸大鱷的風格，出嚟主持正義，帶蟹民出苦海呢？

好緊張，好緊張，好緊張呀！

關連文章:
1. 財經林峯
2. 文化大拍賣（下）

伸延閱讀:
1. 信報：中國電影幕後推手
2. 財富人生：文化商人的資本遊戲
3. MediaInfo: Meet the boss！Johnson Ko

同場加映：

同一屋簷下

縱壞的阿伯

香港「干燶你」全球第一

小孩不壞，阿伯最變態。

早排變態超人阿誠伯，又接受大陸《財新》傳媒訪問，講到香港好似個「縱壞的小孩」，「1997年時香港的GDP跟新加坡一樣，但今天新加坡高於香港最少三分之一。香港一定要提高競爭力。香港若真的走上民粹主義之路，就會像野馬易放難收」云云。誠伯係財經茄哩啡的嘔像，睇完訪問之後，一路喺度諗，究竟香港點解會搞成咁，最新一期《經濟學人》，又講「Crony Capitalism」，令順叔茅廁個塞頓開。

經濟學人整咗個「Crony-capitalism Index」，即係反映大孖沙「Rent Seeking」有幾嚴重的「圍威喂指數」，排名越高，大孖沙越容易㩒住政府搶錢，干燶你班小市民，結果香港勇冠地球，執返個世界第一，仲拋離第二位的俄羅斯幾條街，威。李氏力場地產霸權天下無敵，名不虛傳耶，此之謂「營商環境」也。

香港經濟之所以可以咁「干燶你」，皆因壟斷行業（香港主要係地產）的大孖沙身家，同GDP的比例，高達接近60% ，相對之下，新加坡唔夠10%，嗱嗱嗱，呢啲就係香港同新加坡「競爭力」最大的分別喇，近十幾年新加坡經濟發展，遠遠超越香港，而家大家明白乜嘢係真正的原因啦，究竟香港係個「縱壞了的小孩」，定係衰在有個（班）「縱壞了的阿伯」呢？


關連文章:
1. 變態超人（上）｜（中）｜（下）
2. 買褲送褲袋（上）｜（下）

伸延閱讀:
1. 財新：李嘉誠伯伯談香港
2. 經濟學人: Planet Plutocrat: Our crony-capitalism index

同場加映：

誠伯: 有朋友做軍火生意

文化大拍賣（下）

上回講到，用藝術品優雅地賄賂政府官員，同埋洗錢活動，成為中國藝術品拍賣市場快高長大的動要推動力，甚至好似股票圈貨打庄搭棚咁，炒起某藝術家或藝術概念，一邊「造神」一邊「造市」。

一個市場只要夠旺場，自然多人幫襯，最緊要有錢賺，理得佢黑黑白白啦，所以個大陸個藝墟亦有唔少來自企業及金融機構的投資活動。

最醒目的投資者，晨早已經聞到中國藝術大牛市陣味，2004年華人置業(0127)有單刁，幾億銀向管理層出售香港物業，交易包括一批藝術品資產，即係原本用作裝飾公司的中國陶瓷、家具及國畫，作價近1個億港銀（相關港交所通告），單刁出街之後，香港傳媒仲掘過一輪，邊間上市公司收埋收埋古玩古董。

呢家嘢今日在大陸上市公司應該已經非常流行，邊條土豪邊間公司想在鬼佬面前出吓風頭，莫如在富貴拍賣會買返一兩件嘢，例如有「中國首富」之稱的王健林間萬達，舊年底在紐約拍賣會豪掟1.72億銀（人仔，下同），買咗阿畢卡索的名畫《兩條細路》，據大陸藝術機構評估，企業的藝術品收藏，有成450億銀咁話，分分鐘唔少上市公司的資產負債表，原來收埋收埋唔少價值連城的國寶古玩。不過都係嗰句，邊個大聲啲，邊個可以決定藝術幾錢斤，例如有「新疆首富」之稱的孫廣信，舊年初以70幅字畫作價35億，注入自己間公司廣匯集團作為註冊資本。 藝術品的價值可以咁飄忽，香港民主黨都會中伏，揾幅假嘢嚟籌旗，諗落都情有可原。

個別散戶玩唔起億億聲的藝術品，又可以夾錢齊齊炒，所以投資藝術的理財產品、信托公司基金，通街都係，保利文化(3636)亦撈埋一份，為「投資型」及「融資型」的藝術信托產品，提供顧問服務。簡單嚟講，前者屬於真金白銀炒賣藝術品的基金，後者即是司空見慣的影子銀行活動，公司A以藝術品作為抵押，透過信托公司向投資者借錢，從事其他商業活動（例如地產），冇事冇幹到期就還錢俾利息，出咗事債權人都有批藝術品揸手。保利文化做顧問的信托基金規模，2010年只有1.88億銀，去到2013年10月已經滾到7.5億元，呢組數字，話你知藝術投資基金的增長幅度，同時亦可能係大量藝術品，由大戶轉入散戶手中的先兆。

四大壞帳收買佬之一的東方資產，舊年8月出咗份「2013：中國金融不良資產市場調查報告」，提到藝術品、煤炭同埋房地產，屬於信托業最易爆煲的三大地雷區，近排唔少又煤又炭的金融產品出現違約風險，如果燒埋一個半個藝術品信托就大吉利是，呢個傳火棒遊戲可唔可以玩落去，其中一個指標，可能係最疊水的銀行會唔會玩埋一份（南方日報：藝術品抵押融資在探路），當中民生銀行(1988)做得比較高調，可以留意吓呢間嘢在大陸藝墟的動向（民生银行艺术之路）。

在中國，唔會有好多種生意，增長快得嚟冇過度擴張的風險，同時又唔涉及偏門灰色地帶，吓吓用黑白是非對錯嚟睇某公司某行業，好可能會變成良心投資道德花崗岩基金。好似保利文化盤拍賣行生意咁，假如阿公真係針對「雅賄」現象狂打，大官小官排隊掟晒所有藝術古玩出街，拍賣行成交金額，分分鐘創新高。

在國資委樓下116間央企當中，保利文化個老母，即係保利集團（下稱保利 ），唔算最大，2012年底資產約4,000個億，排25，不過呢，可能係最能巴閉的其中一間。保利前身叫做「保利科技公司」，1984年鄧小平親自拍板成立，由解放軍總參謀部裝備部同埋中信集團出錢成立，即係解放軍做軍火進出口生意的窗口公司，到今日都仲做緊軍火生意，舊年初佢老美國務院聲稱，為咗防止武器流入伊朗北韓等國家，將十幾廿間外國公司放入制裁名單，保利就榜上有名，為咗上市，保利於是將保利文化32﹪股權左手交右手，無償轉去保利南方，亦即係保利香港 (0119)及保利地產(600048)等大路生意的控股公司。

1992年老鄧南巡之後，所有黨政軍機關攞正牌做生意，乜七乜九都做，全盛時期，保利生咗3百幾個囝囝囡囡公司，由地產、衛星、通信，到做鞋、養豬、訓練大象，應有盡有，唔應該有都有埋。經過97年亞洲金融風暴，仲有朱鎔基年代的國企改革，大型國企開始出現多少分工，按本身優勢整合主業，保利在總經理賀平（老鄧女婿）推動下，開始集中發展5大主業，包括地產喪搭文化。（英才雜誌：保利潛行）

眾所久知，文化藝術交流，亦係間諜特務最易隱身其中的領域。軍方背景的保利，最初只係搞吓俄羅斯珠寶展、倫敦歌劇院演出咁，1999年開始籌建博物館，2000年正式成立保利文化。上文已經講過，在老外拍賣場掃返一兩件貴貨，又或者整返一件半件國寶返大陸，好易在大陸藝墟省靚招牌，保利文化響朵之作，都係行呢條路。

話說在2000年，保利本來想在香港的拍賣會，執返一兩張名畫嚟投資，「撞啱」佳士得（Christie’s）刮到140年前英法聯軍在園明園老笠的兩個銅獸頭，牛首虎首，突然之間，民族情仇百年屈辱炒埋一碟，國家文物局發表聲明要求停止拍賣賊贓，哈，又咁啱，「撞啱」佳士得對家蘇富比（Sotheby’s），又括到另一隻圓明院虎頭，結果賀平親自拍板，保利文化用3,000萬價錢，掃咗三個獸頭回國。

保利做咗民族英雄， 帶晒埋賣樓生意，買家見保利大拿拿幾千萬買幾隻獸頭，視之為財力保證，樓盤唔會爛尾，保利在樓盤展銷處做埋國寶展覧，一次吸引萬幾壽頭參觀，帶來幾多錢廣告都複制唔到的宣傳效果，帶旺埋地產業務。保利驚覺做文化咁有得諗，保利文化亦開始越做越大﹐除咗出版，幾乎乜都撈過，都2005年左右，確立咗目前拍賣、演出及劇院管理、影院投資三大業務。

文化呢家嘢，「以為自己是文化人的財經茄哩啡」，只係識條春，文藝表演溝電影，更加係連條春都唔識，只係知道，好多大型地產公司，例如萬達同埋華潤，近年都打包撈埋電影院，萬達同埋保利，更加拍埋電影，萬達院線講緊排緊隊上市，呢場文化大龍鳳似乎有排玩。

電影圈同藝術拍賣場一樣，望落去表面上耀眼輝煌，背後唔少撈家揾飯食，圍繞大陸影視產業的股壇大龍鳳，近年上演唔少，可歌可泣，絕大部分過眼燒煙，冚家富貴如浮雲，但有幾幕涉及香港正牌財經演員忘我演出的，令人印象深刻，不妨拎出嚟重温一吓，等大家可以了解吓呢個大千世界多少少。

話說在2003年，中國最紅（亦號稱最大）的影視製作公司，叫做北大華億，公司總裁叫董平（香港散戶而家應該好熟悉呢位大哥），因為有份投資拍《臥虎藏龍》，出晒名。本來保利已經搞咗檔保利博納，玩吓電影發行，忍唔住手豪掟4億人仔，入股北大華億5成股權，公司改名做「保利華億」，據內地傳媒報道，保利當時仲諗住將保利華億變做保利文化的上市主打平台，呢單刁，乃影業國企民企互溝第一案例，當時被稱為「中國文化產業最大併購案」，非常振撼，餘震震到嚟香港，唔少上市公司都興奮到尻震震，想拍住保利華億，坐順風車變身「文化概念股」。

叫得做中國影視文化第一紅人，等閒古惑仔又點會埋到身，有一間香港上市公司，當時叫做「友利」（0419），成功拍住保利華億，食咗餐大茶飯。

呢個故仔要從十年前，香港商業電台一個風電飄搖的晚上開始講起，當時發生疑似香港名咀封咪慘劇，時任商台營運總裁的蔡東豪，黯然離開五台山，功力深厚的演員唔會冇人揾佢拍戲，2004年10月，友利宣佈委任蔡東豪做執行總裁兼董事總經理，但係，人工只有月薪1萬港元，重覆，冇寫錯，係1萬港元，應該創下咗香港上市公司執董級打工仔的最低工資記錄。當然啦，一雞嘢又點會引到守身如玉的蔡生搲爛塊臉拋個金身出嚟，友利好快有大龍鳳上演，2005年2月，宣布印公仔紙作價5億幾港銀入股保利華億旗下一抽垃雜資產5成股權，交易涉及的資產，包括海南電視台合營的旅遊衛星頻道，當時內地傳媒21世紀經濟報道，曾經質疑友利及保利華億的交易疑點甚多，不過單刁透過友利主席高振順向董平進行收購，即係唔需要友利小股東通過，賣方可以先套取現金，當時阿蔡生亦有同香港傳媒講，內地媒體發展機會好大，係理想時機進軍內地傳媒云云。

都話天地有正氣，只要夠正義，曉，大賊可以叫做羅賓漢。阿蔡生當時已經係港交所上市委員會成員，多年嚟強調企業管治小股東權益形象深入民心，人綠好形象佳，單刁無驚無險衝過終點，友利股價仲一度爆升一倍，信者得救，益埋小股東。阿蔡生亦好快將個金身收返埋，2005年3月辭任友利董事總經理職務，同時加入佢老闆高生另一隻啱啱收返來隻殼，精電（0710），做吓行政總裁搞吓工業革命咁，後來金身再度閃現，精電失驚無神秘撈副業，炒燶唔知「I Kill You Later」定「乜Link衍生工具」，此乃後話，不表。

有錢佬大孖沙，好多時會養埋一堆特異功能人士，平時可能飲茶食飯，有需要的時候幫老闆做一兩單大嘢，或者解決一兩個問題，已經值回票價。友利做咗保利華億單大茶飯，阿蔡生功成身退，人工從友利年代的1萬銀1個月，跳到精電的10球1年。十年人事，友利變身「華億新媒體」再變身「華億傳媒」再變身到而家的「中國9號」，股本一拆再拆，幾經溝淡的最新股價，唔值5毛，2005年初衝咗入去買保利華億文化概念的散戶，要等股價反彈百幾二百倍先可以返家鄉。另一邊廂的保利華億，亦唔好得去邊，保利後來拆咗隻保利博納去美國上市，藝術品拍賣越做越大，今日做埋上市集資主打資產，據保利文化中文招股書第203頁資料顯示，保利文化同華億系統，仲有官司未擺平。

最近有謠言話，董平捲入大陸大老虎大案，相關上市公司已經發通告否認咗，真真假假，或多或少顯示，在大陸投資電影，搞文化，絕對唔係零風險生意。十年前，作為友利董事總經理的蔡東豪，都算係保利文化半個交易對手，可以話係香港最有資格抽秤保利文化的事事評論員，作為一個文化人，阿蔡生近年對中國模式亦好有意見，瓣瓣都開到正，如果唔寫吓保利文化盤文化大龍鳳，指點吓香港散戶就有少少可惜喇。

大陸官場家陣整風掃貪，三亞掃地下賭場，陸豐掃冰毒村，東莞掃雞竇，黄賭毒齊齊掃，打老虎打烏蠅打到班古惑仔冇啖好食，有乜風草吹動，多數會扯上周永康乜乜物物，或者姓周嗰個阿濱咁。保利文化董事長陳洪生，本來亦係保利集團的黨委書記，即係大大佬，1月中被揻柴，缷任保利黨團所有高層職務，開邊辦就唔知，不過今次保利文化在香港上市，俾人感覺都幾滾水淥腳，冇揾到基石投資者圍飛，由中信證券 （ 6030）及CLSA自己友圍威喂，另一個比較正面的解讀，可能係所謂文化概念股，好多排住隊上市，例如萬達花咗唔少銀兩堆砌的萬達院線，所以保利文化喳喳臨搶食頭啖湯。

保利文化今次只係拎幾億港銀貨仔出街賣，假設上限定價，行使埋超額配股權，市值都係81億港元，相對保利的規模，仲有乜都可以文化一餐的創作炒作條件，好似大笨象踢足球，想踢幾遠都得（不過，一個唔小心亦好易踩爆）。

唔計非控股權益，保利文化 2012年賺得2億幾銀人仔，咪玩啦，講緊咁大盤拍賣行生意，又咁多人鐘意炒中國藝術品，係咪意濕吓手，炒一兩幅字畫書法，已經唔止呢個數。保利文化的資產，有一項「存貨」，即係古董珍玩油畫雕塑咁，最新入數估值大約8個億，轉個頭，發現原來有條楊貴妃的肚兜，又同你講估值幾多幾多，一樣得。是但啦，保利文化往績市盈率，大約34倍，如果真係要同蘇富比呢間上市老牌老外拍賣行比較，可以叫做貴，不過唔好唔記得，蘇富比股價2013年都升咗60%，當中好大情度，亦係反映咗中國土豪對所謂藝術品的購買力。

有啲西人評論，講到保利做軍火出身，藝術識條春，人哋蘇富比的管理層，唔係收藏家就係名牌大學讀Art屎，邊有得比云云。

曉。

藝術冇國界，你估西人個藝墟，蘇富比佳士得的拍賣場，又高尚過保利文化幾多？只要閣下唔選擇性失明，中國藝墟的種種問題， 在西人地方一樣普遍，一樣咁污糟邋遢。

西人拍賣行唔會賣假嘢？查實好多西人經手的藝術品，一樣充滿爭議，有關貨色真假的官司經常出現，舊年底中國藏家劉益謙在紐約蘇富比拍賣會上，近900萬美金買咗所謂蘇軾的《功甫帖》，就被質疑為偽本。就算係圓明園的獸頭， 有人話當年鑄造精銅器，通常會一式兩份，成龍當日拍《十二生肖》，都整咗套高度仿真的12獸首，又有邊個可以百分百擔保，所謂國寶唔係流嘢？

同中國一樣，拍品真偽衍生出的最大問題，就係買家唔找數，情況在西人拍賣場一樣咁普通，老千唔會少得過股市 （WSJ: A Bull Market in Sketchy Art），一樣大把藝術撈家揾水魚著數（New Yorker: Why are so many people paying so much money for art?），博物館變成文化大拍賣的混帳之地（The Mona Lisa Curse），至於你話洗黑錢，呢個就更加係公開的秘密（NYT: Valuable as Art, but Priceless as a Tool to Launder Money）。

如果同你講，西人的藝墟特別正義，從來冇人圈貨搭棚，將某藝術家或藝術概念炒高，造神造市，你又信唔信？通常一個畫家死Q咗，作品先會值錢，好簡單，死無對證，真假難分，好似股市做庄咁，貨源歸邊特別易炒，圈貨搭棚更加方便，例如Andy窩河的所謂「Pop Art」，順叔橫睇直睇，是但揾個改圖組高手都Photoshop到出嚟的效果，真係唔明白點可以賣到億億聲

一條女索唔索， 望兩眼就可以決定吊唔吊得過，唔使人教，如果有條女話你知佢好靚，不過要閣下讀幾年書，訓練吓自己的藝術細胞先識欣賞，俾你做法官大人，你都唔屌。

同樣道理，一首流行曲好唔好聽、一套電影好唔好睇，鐘意就鐘意，唔鐘意就唔鐘意，之所以係「Pop Culture」，乃普通大眾無需訓練就可以簡單感受享受的物事，藝術最膠的地方，係乜能嘢「現代藝術」、「Pop Art」，竟然又要久經特訓先懂得「欣賞」。明明係個尿兜，打橫放喺度就話係「Modern Art」，求能其畫幾條線加個圓圈，又話係「抽象派」，你話佢唔係藝術，佢就同你講你唔能識欣賞。順叔親眼見識過，幾張白紙揾個框釘起， 吊高佢，咁就係藝術，呢啲咪係傳說中的 「唔撚係掛」囉。

蘇富比呢類拍賣行，最初只係賣吓過世名人或貴族的私人藏書，但古董唔會無限量供應，要做生意，就要製造綽頭，歷史名畫供不應求，咪炒起一啲新興「藝術」概念，扮晒識貨咁，話你知呢啲先係靚， 乜嘢Andy窩河、畢卡索呢啲天價畫家，分分鐘都係 「造神造市」過程中的產品，只不過冇細路仔跳出嚟踼爆國王的新衣而已。

不過地球上最有能量「造神造市」的藝術庄家，唔係蘇富比佳士得，而係有「美國文化部」美譽的美國中情局（ CIA）。呢個講法，已經唔係陰謀論，有證有據有政府文件記錄，好多人研究過呢個命題，當中比較出位的，有條英國女記者，叫做Frances Stonor Saunders，條友研究藝術及歷史多年，1995年已經在英國拍記錄片，披露在冷戰期間，美國中情局點樣透過財政資助，同埋美國二戰後的影響力，生安白做咗「Abstract Expressionism」呢個新概念出嚟，仲捧紅咗幾個藝術家，令一堆冇乜人識欣賞的「藝術品」，變得有價有市，1999年條女仲出咗本書，叫做《Who Paid the Piper?: CIA and the Cultural Cold War》（在美國出版時叫《The Cultural Cold War: The CIA and the World of Arts and Letters》），踢爆佢老美「文化局」點樣在世界藝墟造神造市。(New Yorker: Unpopular Front: American art and the Cold War)

順叔一直喺度諗，假如有權有銀，有心有力，可以憑空砌幾件劃時代藝術家出嚟，咁文藝復興又會唔會，只係人類歷史上最生安白做的一場造神大龍鳳？查實只要好簡單咁諗吓，當年達聞西呢類「文藝復興人」，又係畫家又係雕刻家又係醫學家又係科學家，周身刀，而且張張都咁利，是但一件作品，講緊一個天才都要窮畢生精力先可以達到的景界，有條友竟然瓣瓣都得，有冇可能？

簡單咁講，就算所謂「歷史」，「History」，都只不過係好「Hi」的「Story」，唔可以照單全收，大千世界，乜人都有，表面上係垃圾，其實係藝術，表面上係文化人，甚實係財經演員，表面上係賊，其實係羅賓漢，一件二件國王的新衣﹐最緊要，唔好人哋話你知乜嘢係「靚」、乜嘢係「正義」，你就信到十足十﹐收工。

關連文章:
1. 文化大拍賣（上）｜（下）

同場加映：

傳說中的《唔撚係掛》

文化大拍賣（上）

原圖： (1) 小雞啄米圖 (2) 藝術中國

今期附庸風雅，趁住保利文化(3636)上市，開文化，學人扮個「以為自己是文化人的財經茄哩啡」，不過唔係講新股抽唔抽，而係睇睇藝術幾錢斤，更正確咁講，係邊個話你知藝術幾錢斤。

講到文化藝術呢家嘢，首先要介紹出場的，就係有「中國十大收藏家」之稱的趙泰來。雖則唔知另外「九大收藏家」係邊幾位，不過大家如果有興趣，在網上摷兩嘢就會揾到唔少關於呢位阿叔的資料。

話說生於1954年的泰來哥，乃清末民初外交家、香港首位華人立法會議員伍延芳的外曾孫，1969年嚟香港投靠大姨媽（即係伍延芳個孫女），呢位大姨媽好索，不過唔知點解，成世疏起唔嫁，1979年去世之前，終於將一個大秘密爆咗口俾趙泰來知，原來生於大時代、成世人冇日時得閒的伍延芳，唔知點解，收收埋埋好叉多文物古玩，仲放在英國。礙於外嫁女唔可以繼承寶物（曾外孫又得？），終身不嫁的大姨媽，臨死前先將藏寶圖交俾趙泰來，跟住就係離奇過奪寶奇兵的情節，泰來哥去到倫敦某古老大屋，揾到個足球場咁大的地下室，裡面裝滿文物古董。

天降無價寶，仲要一次過十幾萬件，泰來哥不喜反驚，仲驚連累老婆被人標心，於是瞞住太座10年，獨自在英國清理記錄所有寶物（相信唔少男人都想請教，用咩藉口可以氹掂老婆俾佢放洋倫敦十年），門牙撞甩幾隻，包膠都花咗近百萬英鎊之後，趙泰來先整理好近十萬件一級國寶，過程當中，自己亦成為咗文明鑑賞專家。

今日中國藝術文物炒賣咁熾熱，泰來哥唔做中國首富都應該富甲十大，不過佢冇獨吞，賣咗幾楝阿姨留落嚟的別墅，自資將近文物運返中國，更加將其中6萬件捐贈俾大陸各大博物館，澳門賭王將件圓明園狗頭買返祖國，已經成為國寶回國的大英雄，泰來哥一炮過捐幾萬件國寶，仲得了，當堂成為大大大文化英雄，中央電視台專輯都上咗幾次，兩次成為「世界傑出華人」。（國寶檔案：香港文物收藏家趙泰來(上)、(下)）

一個人紅咗，自然有話語權，話你知邊件文物係堅料，乜嘢畫作係老作，好似泰來哥咁，出咗唔少書，包括文物古玩字畫的圖錄及專輯，頂住慈善家、收藏家、畫家、文物鑑賞專家等一大抽光環，在越嚟越瘋狂的中國藝術市場投資市場行走。

2005年，「以為自己是文化人的財經茄哩啡」第一次聽泰來哥的故事，一度感動咗一嘢，不過當同一故事，在中港不同傳媒重重覆覆、聽過無數次，而同一故事在細節又有多少出入的時候，開始有啲新體會。

有冇人留意，舊年2月左右，在鑽石山荷里活廣場，有一個畫展，展出咗趙泰來私人收藏的十五幅傅抱石畫作，冇幾耐，傅抱石的外孫女傅蕾蕾在微博爆響口，話十五幅所謂傅抱石真跡，全部係流嘢，轟動一時，趙泰來後來發表聲明，強調藏品全屬真品，並已經採取法律行動以保自己清譽。

又有冇人留意，舊年7月，大陸博客寫咗篇「少年Ma的奇幻歷史漂流之旅」，踢爆國家3A級景點、河北冀寶齋博物館裡面，近4萬件所謂文物，可能絕大部份係不知所謂的贋品，部份展品甚至印有現代卡通人物，單嘢揚咗之後，廣州日報好快跟進，踢爆在番禺寶墨園的趙泰來藝術宮文物館（收藏咗幾千件趙泰來捐贈回國的文物），好似唔好得冀寶齋好多（廣州日報：番禺也有冀寶齋？），商周戰國到元明清的各朝國寶都有，金縷玉衣都有兩大副，奇就奇喇，只係唔知有幾珍。（更奇者，冀寶齋被踢爆之後，冇耐個館長就瓜埋……）

即係咁講，如果有條老千，有大批孖精平酒想出手，可以佈個局，首先真金白銀買幾箱靚酒，甚至在拍賣會高價拍幾枝天價酒返來，開個大派對，請晒啲酒迷酒痴，當水咁飲，到條老千出咗名，人人都信佢係專家，就有機會將啲孖精當上品咁賣。講到尾，如果有條友話你知，有批拿破崙私人珍藏的紅酒，橫掂今日地球冇乜人飲過，專家話好飲就好飲喇。呢條橋，可能唔少人仲用緊，有興趣可以查吓一條叫「Rudy Kurniawan」的友仔，睇睇條友點樣由出晒名的名酒收藏家，變成被人告到甩褲的奇幻過程。

講咗咁多，查實想話，要了解保利文化呢盤生意，首先要了解藝術文化呢個咁高雅的投資市場，究竟有幾唔清唔楚污糟邋遢，同埋藝術品作為一項投資工具的性質。

舉個例，黄金，最純正穩定的元素，幾乎人人都見過摸過，有幾重，咩色澤，普通人拎上手大概有個底，作為流通全球的商品，普通老千，好難話囤積奇貨式咁將個價炒上炒落。藝術品呢好唔同，一件嘢值幾錢斤，基本上有兩大決定因素：第一，所謂「權威」話你知值唔值錢；第二，類似貨色之前的成交價，一間好似保利文化的大型拍賣行，基本上掌握咗兩大定價的話事權。

又舉個例，阿叻如果想將《唐伯虎點秋香》 電影中的《小雞啄米圖》，拎出嚟拍賣，首先就要揾間拍賣行，鑑證咗係阿叻真跡，好喇，拎到去春拍秋拍，有條友出一百萬買咗幅《小雞啄米圖》，就會肯定咗阿叻作為一位畫家的身價，之後無論佢再畫《小學雞啄米圖》定係《金雞啄米圖》，好可能就以一百萬做底價。如果阿叻已經死Q咗，事情可能更加好辦，求其揾幾個「專家」、「權威」，將一堆「雞圖」鑑定為阿叻真跡，扲去拍賣，又可以賣到雞飛狗走。

絕對唔係講笑，大陸有位幾出位的畫家，叫葉永青，出名畫「鳥」，呢位人兄的「鳥畫」，聽講分分鐘賣到幾十萬一幅，坦白講，順叔對藝術真係識個鳥，有幾幅畫得幾靚又真係似隻雀的，順叔唔介意掛在自己屋企，不過幾十萬一幅值唔值（葉永青：逞匹夫之勇），真係唔知，放幾幅《鳥》喺呢度，等各位品評吓：

大鳥

獨行

保利文化作為拍賣行，食飯靠抽佣，有人願打有人願捱，有成交就有生意。保利文化招股書數字顯示，中國（含香港）的藝術品成拍賣成交總額，2003年只係得 24億（人仔，下同），2011年超過850億，超越美國成為全地球第一。仲有，全地球拍賣場賣得最高身價的畫家，去到2008年，中國畫家影都冇，齊白石的作品在2009年第一次擠身十大（排第三，僅次於畢卡索及Warhol），去到2011年，地球十大當中，有6個係中國畫家。

一個人有銀咗，自然會追求一啲物質以外的享受，最簡單就係買幾件藝術品裝飾吓屋企，扮吓上等人文化人咁，理論上，中國最識欣賞中國藝術品，唔買中國畫家，唔通走去幫襯日本藝術咩，齊白石張大千等作品炒得起，一啲都唔出奇。中國幾千年文化，係全地球唯一未終斷過的古老文明，真係地大物博，藝術文化品一大抽，市場供應自然夠深夠闊，加上股市唔爭氣，炒藝術可能更保值，所以拍賣市場成長好快，亦一啲都唔出奇。

查實最驚人的，係中國藝術品成交轉手的速度。通常一啲所謂名家名畫，唔會成日有貨出售變賣，好多更加係私人成交，冇需要俾拍賣行賺佣，中國市場好唔同，聽過剩係齊白石的大作，過去20年，已經在拍賣場成交超過27,000次。咁驚人的轉手速度，當然有古怪，例如當中好多成交係假貨，甚至係假成交，即係出天價買咗，造高咗個價之後，唔找數，拍賣行亦冇佣收，呢個風險因素，保利招股書都有提及。

有關中國藝術市場的種種怪現象，紐約時報舊年底整咗三篇好詳細的報道，老外睇中國，戴住有色眼鏡唔會走雞，不過幾篇嘢的確做咗唔少資料搜集，當中包括保利文化盤拍賣行生意，值得花時間睇睇。(NYT: 1. Forging an Art Market； 2. An Art Power's Rises；3. The New Collectors) 幾篇嘢出嘢街之後，保利即刻彈出嚟反擊，有興趣亦可以睇吓。（紐約時報為什麼抹黑北京保利）

中國藝術品市場可以發展得咁快，成交轉手速度咁高，一個好重要的原因，亦係保利文化招股書唔會話你知的原因，就係唔好政府官員都好呢味嘢，講白啲，套用內地的術語，叫做「雅賄」，當中涉及的行賄金額，內地傳媒話已經超越送樓送房。

舊年底，王岐山檔中紀委，唔嚴格嚟講即係共產黨的黨鞭，樓下份中國紀檢觀察報，特別為「雅賄」呢個現象，整咗篇詳細報道，主角係已經落馬的前安徽省副省長倪發科，好詳細咁披露咗阿倪生點樣癖迷玉石，當地地產商又點樣投其所好，行賄以玉，篇嘢仲有倪發科的第一身感受，講到玉石字畫物小價高，「披上愛好的外衣」，易增值易保管，即使被人發現，「玉石無價，無法認定」，「懂的人知道係有這愛好，不懂的人也不知道什麼價錢」。（紀檢觀察報：玉之過？慾之禍！）

呢種優雅式貪污唔係新鮮事物，近年大陸傳媒報道過N次，包括最高檢察院樓下的方圓雜誌，早兩年已經講過幾個好詳盡的案例，令人大開眼界，包括已經著草的前福建工商局局長周金伙，據報近30年福州出土的壽山石名品，三份一落咗周生個袋，聽講條友臨著草之前，仲留低咗張字條：「不用費勁找我」。（方圓：雅賄江湖）

大陸藝術市場出名多流嘢，咁送咗A貨俾人咪好大鑊？問題係，真真假假，其實唔係咁重要，最緊要買買賣賣，有人肯接貨，呢度又講到，另一個推動藝術品成交的重要因素：洗（黑）錢。

利用藝術品嚟洗錢，方法層出不窮，假又得真又得，例如商人A揾自己個女畫幅小雞啄米圖，送咗俾官員B，官員B將幅嘢拎去拍賣，商人A揾人用一百萬買起，咁就將一百萬漂白送落官員B個袋。遊戲掉轉玩亦可以，某相熟「權威」做梅，將珍品鑑定為A貨，賤價賣俾要賄賂的官員。

當然仲有更高級同埋複雜的手法，例如好似股票做庄咁，揾人Corner起畫家C的作品，一班友在拍賣場左手交右手，畫家C死咗，可以滲入大量假貨，畫家C如果仲在生，亦可以好似股票揾打手唱好咁，揾相熟「權威」寫評論，一輪搭棚之後，打造當紅藝術家甚至概念，如果庄家自己做埋拍賣行生意，咁就更加容易「造神」同埋「造市」。（21世紀：揭秘中國貪官文化產業洗錢6大手法）

下回再續。

關連文章:
1. 文化大拍賣（上）｜（下）

同場加映：

《神鳥圖》制作過程

黑盤紅盤

新春開市，行過報紙檔，見到某報頭版頭條，火都嚟埋，究竟乜能嘢叫「黑盤」呢?　忍唔能住，摷返順叔舊年新年在REALFORUM龍鳳大茶樓寫過的一段嘢，冷飯翻炒多一次，開年。

......

先講「紅盤」，呢個典故，唔係順叔考證返來，而係一位老前輩講的掌故，加上順叔小小的想像推敲。

股市「紅盤」之說，查實來自戰前的南北行，即係在文咸街一帶、香港最早期的華資轉口貿易商，當年習慣係在農曆年尾，用紅紙封好貨物過年，正月復市，就將紅紙開封，叫做「紅盤」，只係新年開市咁解，冇話升定跌（呢個好易查，去開咸魚欄搵個阿伯問吓，應該講到少少）。

南北行公所亦係香港開埠的第一個華人商會，可以想像當年在以轉口貿易為經濟命脈的香港，文咸街（又叫南北行街）有唔少有銀士，所以亦有「香港華爾街」之稱，於是亦唔難想像，呢班做轉口貿易起家的華商，後來轉去炒金炒股，好自然咁，就將「紅盤」概念，帶入金市股市，例如在四會未合併之前、以華資經紀居多的遠東會。

中國人過年講意頭，新年「紅盤」，華資大戶更樂於托市，唔會有人特登搞搞震，所以新年第一個交易日，多數升市，「紅盤高開」幾成慣例，就算跌，都係「紅盤低收」，可能「紅」同「升」概念上太易引發聯想，久而久之，「紅盤」變咗「升市」，傳媒跟住講「紅盤低收」，容易引起誤會，於是有人發明咗「黑盤」，用吓用吓，竟然變成近年股市術語之一。

耶穌二千年前出世，其後有冇溝女，如果考證得到，DAN BROWN本DA VINCI CODE就唔會咁好賣；中國幾千年歷史，傳統習俗正音正字，更加好難邊個啱邊個錯（如果有人查到邊個第一個用廣東話爆句「屌你老母」，博士都有得做），有時約定俗成，大家順口順氣咪算囉，好似家吓個個生日，都大大聲話食「壽包」（聽講以前死人先食），都已經唔算大吉利是，不過新年流流，既然講意頭，無端端搞個「黑盤」出嚟，呢個「約定俗成」的「潮流」、「新風」，就無厘頭咗少少咁囉，最少順叔呢類老屎忽，認真聽唔入耳咁囉。

仲未講完，「紅盤」呢類新年習俗，講到明係屈機的，升跌都係紅盤，攞個意頭，查實就係尊重傳統的表現，好似年初二去車公求籤， 都係「紅盤」啲FRIEND，攞個意頭，亦係當年英國佬在香港入鄉隨俗的表現。

差唔多三十年前，有條友，叫做曾蔭權，當年只係沙田政務專員（副手應該係鬍鬚曾，識於微時），有年年初二作為港英政府代表去車公求籤，條仆街都係擢咗支下簽出嚟，聽講班鄉下佬即刻執生，話佢唔撚誠心，再求過，最後下籤升呢，唔知中籤定上籤咁。

回歸前後，負責求籤的港府代表，叫做呂孝端，好似話曾經創吓連續五、六年上籤的奇蹟，吊，真係童子手咩，一係做馬，一係條友變咗熟手技工，知道點先唔會擢支下籤出嚟，03年搞乜能嘢部長制，搵咗條肥西何志平，搞咗支「諸事不吉」下籤，近年先換咗劉皇帝親自上陣。

好喇，點解以前當奴求咗下籤，可以再嚟過，今時今日，又唔可以出呢招呢，查實都好易理解，應該因為好多傳媒出現，而且係好能惡的傳媒（以前年初二邊有咁多記者返工），彈弓籤的話，被人屌尻你做馬就無謂，結果今年大吉利是，又係下籤。

其實車公顯靈踢爆，邊個係「內有家鬼」之「鬼」，「小人」之「人」，心中有數啦，作為一個老屎忽，過年最緊要講意頭，禾吊，劉皇帝年初二去求籤，求自己家宅算喇，千奇咪話代表香港代表禾。

講多句，由「紅盤」到「下籤」，原來傳媒威力咁強，可以改變習俗傳統，不過，香港傳媒表現出嚟的紅黑之分，同車公廟的上籤下籤，都唔能知邉個可信一啲，禾只係知道，每日打開報紙或者上網，都覺得嘈亂巴閉好能煩。

講完，祝各位蛇年有蛇腰，日日紅盤高開！

祝各位馬年行大運，日日笑口常開！

關連市章：
1. 歐債百家樂

同場加映：

內有家鬼

Cinda-rella

今期開Cinda，中國信達資產（1359）。

「連信達做什麼生意也不知道」就落注的，大有人在，不過「連信達做什麼生意也不知道」就跟白頂紅唱黑的正義屎士，亦都唔少。本來財經茄哩啡已經改正歸邪，冇寫「IPO-1000 Focus」好耐，近排睇咗唔少西人西語，忍唔住手痕寫幾句，指教吓。

先睇睇幾份西洋大報的標題。南華早報，8月已經開始唱衰大行動，大字標題「資不抵債的有毒廢料收集站」（China’s insolvent toxic-waste dump）；Economist，將中國四大資產管理公司（AMC）稱為「搽在豬咀的唇膏」（Lipstick on a pig）；Forbes，質疑信達係中國有史以來最揾笨的新股（Is this China’s Worst IPO ever ?）

從西本位出發唱淡信達的主流（主觀）論據，來來去去嗰幾飛，其一係中國AMC為阿公掃垃圾，冇納稅人埋單，信達已經爆煲十次；其二係跳掣式的條件反射反應，中國金融系統、國有銀行既然係垃圾，講多無謂，作為垃圾筒的信達，肯定更加垃圾。

查實西洋鏡背後，只是一般的洋相故事：好耐好耐以前，有個小姑娘，叫做Cinda-rella，佢有兩個好尻肉酸的家姐，一個叫RTC（Resolution Trust Corporation），一個叫TARP（Troubled Asset Relief Program）…

冇錯，「銀行 – 壞銀行 = 好銀行」呢條神奇公式，亦即係成立國控AMC為金融體系啜毒呢條橋，中國只係向佢老美偷師。80年代美國近千間吸存款放樓貸的機構（savings and loan associations），爆到一褲都係，RTC就係為咗處理系統風險而生的「壞銀行」，從1989年到1995年，RTC最少重組咗747間儲貸機構，納稅人直接間接埋單的金額，一樣以幾千億美元計。2008年金融核爆之後成立的TARP，故技重施，不過阿TARP呢隻肥西，比RTC豬扒千倍而已。（題外話，佢老美日唱夜唱中國地方債風險，帶頭爆煲唔能還錢的，曉，之唔係底特律？！）

呢度唔係話中國金融系統冇問題，之不過一百步笑五十步，會笑大個口的。Bad debts tell good stories，順叔早月寫《變態超人》，講到長實（0001）阿誠伯90年代初準備殺入美國，第一單刁，就係收購RTC掟出街的其中一個垃圾債券30億美元組合，據當時和黃（0013）大班馬世民所講，買呢堆垃圾債券的最重要考慮，就係為咗「a periscope into corporate America」，可以即時掌握到近300間美國公司的信用資料。同樣道理，信達上市的最大價值，查實係提供咗一個了解中國金融體系的新功具，唔買都應該埋嚟睇吓，跳掣式唱衰，同瞇埋眼炒新股，差無幾。

先睇歷史大背景，中國AMC誔於1999年，當時中國準備入WTO，由計劃經濟向市場經濟急劇轉型，大量國企仲未學識食自己，簡單掃一掃《朱鎔基講話實錄》在1999年前後的政治經濟問題，就知道十煲粥七隻蓋有幾杰，深層次矛盾集中反映在金融領域，只係在金融系統掃場，幾年間已經查處咗超過4萬友，好死唔死，撞正亞洲金融風暴，銀行體系累積大量壞帳，1999年訪問北京的格林斯潘，都話中國學美國，成立「壞銀行」為「好銀行」買時間，係「非常有益」的方法。

即係AMC生出嚟就係為咗幫阿公做嘢，肩負「政策性」任務，四間AMC各自為四大國企銀行啜毒，信達可以話揹咗最厭惡性工作，因為對口單位係建行（0939） 喪搭國家開發銀行，1999年4月財政部注資100億（人民幣，下同）做註冊資本成立信達，幾個月後間嘢已經技術性破產，因為哽咗建行2,500億不良貸款，仲有國開行的1,000億筍嘢（合共3,500億）。

更大鑊者，在呢個信達稱為「政策性業務階段」（1999年至2003年）所收購的「政策性不良資產」，四大AMC要按銀行帳面值原價收購，冇任何折扣，硬食，融資方法主要透過向人民銀行借錢，仲有發行債券，而債券竟然又係由四大銀行買返！例如信達在1999年硬食建行2,500億壞帳，只係出咗30億現金，另外2,470億發行10年期、2.25厘的債券（下稱「歷史債券」）俾建行。

到咗2005年，建行已經夠靚仔上市，但係Cinda-rella仍然爛口爛臉，為咗消除投資者對建行所持「歷史債券」的疑慮，財政部拍心口支持有關欠款的信用；到咗2010年，本金加利息2千幾3千億「歷史債券」更由信達帳簿剔除，成為（資產負債）「表外資產」，信達同老母財政部成立「共管基金」，延期10年，信達用所得稅還本金，財政部用一般預算還利息，並且繼續提供信用保證。

換句話講，Cinda-rella挨義氣啜毒，只不過將大量不良資產，在阿公的資產負債表搬嚟搬去，並冇完全消化排出體外，呢個亦係一般老外睇淡信達處理不良資產能力的主要理由。至2010年底，信達累計硬食咗3,963億「政策性不良資產」，望落好似好大，不過扣除3,500億在1999年從建行及國開行購買的最大抽壞帳後，過去十幾年，Cinda-rella為阿公硬食的垃圾其實唔多，而且據信達招股書所講，呢批最垃圾的資產，已經唔再表列於帳簿（冇披露原因及細節，有可能只係冇再分開表列）。

去到2012年底，信達累計收購咗11,061億元不良資產（原值，信達冇透露用咗幾多錢買返來），累計回收現金2,769億，以Cash recovery rate計，一蚊雞爛數回收現金25仙，不過呢條數，未包括處置過程中獲得的實物資產及股權，包括一大嚿所謂「債轉股」（Debt-to-equity swap）資產。

Cinda-rella幫銀行買壞帳，變身多間國企的債主，收爛數的時候，銀債股償，呢嚿「債轉股」資產，有幾百間上市及非上市公司的股權，最大上市資產包括5.9%中國鋁業（2600）、7.3%青海鹽湖；未上市類包括42%神華准格爾、30%大同煤礦等。呢嚿嘢在信達的帳簿帳面值只有276億元，根據獨立估值報告（非IFRS），總值623億。

信達「債轉股」組合的公平值有冇被低估，睇下閣下點睇，驟眼望落去，超過60%資產，來自近一年最仆街的國企行業：煤碳，另外25%來自同類仆街的化工及金屬行業。換個角度睇，現價買入信達，變相撈底押注煤碳股，2007年的時候，呢抽嘢好值錢，問題係信達唔可以隨便將大量國企的主要股權亂掟，信達可能係最熟悉煤碳國企財務狀況的公司，做「債轉股」公司的大耳窿本身已經係一盤大生意，萬一未來煤碳化工行業真係出現過剩產能的整合，又或放寬民企外資入股相關國企的限制，信達可以係重組併購的重要玩家。

唔少西人評論，話信達披露不足，公司冇解釋具體業務，投資者落注只係靠個「信」字云云。查實就算唔計招股書資料披露水平，信達咁多年嚟，提供咗唔少資料，問題係論者有冇做功課，或者選擇性失明。

Cinda-rella幫阿公掃銀行垃圾多年，手上掌握超過50萬間公司的信貸記錄，本身就係一個極有價值的資料庫，好多人冇留意，信達本身亦幫阿公做智庫，研究壞帳成因及銀行體系風險，旗下有個「信達金融風險研究中心」，近幾年就有關議題做咗唔少公開報告，輯錄信達本身的案例，都已經出咗5本書，當然好多內容其實隱短揚長，不過或多或少可以了解信達的實戰攻防，例如當年三九集團（三九胃泰老母）的重組，仲有新疆天然氣開發公司以股抵債的案例，都提供唔少新聞傳媒以外的金融史料。

亦有部分相對深入的評論，例如Financial Times （Cinda:Making riches from rags）及Wall Street Journal（Pricey play on China’s bad debts），指住信達手上的「不良資產」，有62%來自房地產，話呢個係信達最高險所在，呢個論據基本上成立，但引用資料錯到離罩。信達作為一間「壞銀行」，同一間現代銀行一樣，問題在於資產同負債好難簡單歸類劃分。所謂6成「不良資產」來自房地產市場，講緊信達近年增長最快的業務，亦可能係最大的風險因素。

信達在2010年完成股改，同年進入所謂「全面商業化業務階段」，呢一年最重要的突破，係攞正牌收買非金融類不良資產，亦係目前四大AMC唯一一間。在信達合併損益表的Top line，有項收入叫做「應收款項類不良債權資產收入」，2010年收入係「零」，2013年頭半年增加到42億，佔總收入22%；在合併帳簿，產生呢個爆炸性增長收入的資產，叫「應收款項類投資」，總額亦由2010年的「零」，狂升到2013年6月的804億，呢個增長新引擎的資產，有62%來自主要係地產市場的「非金融機構購入應收帳款」（並唔係FT及WSJ所講，信達超過6成「不良資產」來自地產市場）。

簡單嚟講，如果地產公司A揾咗建築公司B起樓，有筆1億銀尾數，6個月要找，地產公司A周轉有問題，信達會向建築公司B買咗呢筆應收帳，通常會有少少折讓，例如9,800萬咁（2%），跟住同地產公司A講數，將還錢期限延長，例如18個月，期間收地產公司A貴利。假設信達向銀行借一年錢拉均融資成本6%，又假設地產公司A要俾信達13%利息（中型地產商在香港發點心債，息口閒閒地雙位數字），調整2%收購折讓、3%壞帳率及其他使費，信達呢盤「應收款項類投資」投資，隨時有5至6厘回報，咁又解釋咗，點解信達帳簿上「借款」一項，會由2010年的78億，狂升至2013年6月的1,041億。

世界上又點會有低風險高回報的金融生意，呢盤高風險生意，銀行一直在大做特做，不過收收埋埋，出咗事就撥去做「表外資產」，信達上市前董事長侯建杭（見上圖）接受香港傳媒訪問，爆咗句陰毒，叫投資者睇睇銀行的「出表率」（將不良資產撥出資產負債表）的變化，就知道信達未來的增長空間。北京近年矢言打破銀行壟斷，銀監人行等監管機構，近排開始日日講住「去槓杆化」，民營銀行亦已經提上議程，在在顯示監管機構已經開始為銀行體系放氣，中國超過9成金融資產放在銀行體系，比例在未來數年好可能會大幅降低，將更多資產轉移到AMC及證券公司等金融機構。

講到呢度，唔難睇到，對風險胃納較高的投資者嚟講， Cinda-rella係「壞銀行」及「影子銀行」的混合體（可參考黃元山有關信達影子銀行角色的的短評），Cinda-rella上市，亦係投資者第一次可以透過大型上市國企，押注中國的影子銀行。

呢個「灰姑娘」屌唔屌得過，又可以咁睇，Cinda-rella除咗引咗策略投資者UBS及渣打（2888）上釣，仲有一抽基礎投資者，當中包括想揾Cinda-rella做盲公竹入大陸的垃圾債券專家（仲有準備在深圳前海大搞的神秘基金融通資本），聽講另一間AMC華融，已經開始傾緊外國策略投資者。入咗股，唔代表呢班友絕對睇好信達（半年Lockup過咗之後會有一定分曉），不過最少可以反映老外投資者對中國金融垃圾市場的濃厚興趣。

外國投資者（包括H股）持有的內地銀行股票市值，超過1萬億，飽飽滯滯，帳面1倍多少少都冇乜人吼，作為爛帳收買佬，信達屬於中國金融的「逆周期」奇貨，銀行越大鑊，信達越快樂，某程度上，睇好「壞銀行」即係睇淡內銀，呢個論點順叔基本上同意，不過增長放緩甚至倒退一件事，會唔會爆發系統性危機又係另一件事，如果話信達同內銀管理係「自相矛盾的故事」，就流於西人西語的硬膠理論，曉，歐美唔少垃圾債券基金非常成功，咁唔通又話西方金融市場係垃圾咩屌你。

呀，BTW，Happy New Year！

伸延閱讀:

同場加映：

Rella

老美二五仔（下）

上回講到，美國二五仔大兵曼寧，將佢老美駐全球各領事館的超卨25萬份情報電文，泄咗俾維基解密，爆到全球都係，結果曼寧被判坐監35碌，如果真心支持資訊自由平等人權，對曼寧表達支持的最好方法，就係唔好浪費佢一番心血，閒時重温吓佢爆俾維基解密的內容，包括大約950份由香港老美領事館發出的情報電文。

香港政商高人當中，最經常出出入入花園道老美領事館、兼且最大口的，大家又估吓係邊個？苦瓜李柱銘？錯。多銀教主陳日君？錯錯。民主阿婆陳四萬？又錯。大話精CY （Lai）？都錯。

冇錯，頂頭張相查實已開估，答案係任志剛呢條「香港第一拎」。下文引述咗部分維基解密有關任一蕉同美國使館人員的會晤內容，各Reference ID後的Hyperlinks，就係任一蕉在花園道的一條條腳毛。

普通人去老美領事館，通常都會媽媽聲，又打手指模又排隊，任一蕉當日作為香港金管局行政總裁，全球人工最高的所謂「中央銀行家」，工作只有一樣，就係含住聯繫匯率條拎（Link），佢摸上老美領事館，好似普通人返阿媽屋企食飯咁平常如入冇人之境，例如有次去開搞護照，都會特登走去同老美領事打吓招呼嗲幾句。（Ref ID: 08HONGKONG1746）

眾所久知，任一蕉仲話得事的時候，堅持唔肯改革香港聯匯，不過對住美國佬講起大陸的匯率，條友又會雙重標準，兼且好鐘意阿吱阿咗，例如在2006年3月，有幾件老美參議員，訪華兼順便訪港，作為常客，任一蕉例牌衝去花園道打招呼，同人哋講人仔匯率改革步伐「不幸地緩慢」（Unfortunately slow），當年人仔匯率係中美關係熱點，任一蕉作為香港金融要員，鼓勵美國參議員，繼續向中國施加政治壓力（the U.S. should by all means continue to put political pressure on China），唔知算唔算手指拗出唔拗入？（Ref ID: 06HONGKONG1285）

咁都未算，同一場合，任一蕉更加在老美參議員面前，大口點評北京領導人，明示暗示，在人仔匯率改革問題，當時的總理溫家寶太保守阻頭阻勢，人行行長周小川面對太多官僚掣肘，如果周小川話得事，人仔改革晨早掂咁話。（If it was just Zhou, you'd be there）當年的副總理鐵娘子吳儀，在老美圈內評價甚過，任一蕉仲提醒美國朋友，由金融改革的職責到認識，吳儀其實只係一知半解。（her responsibilities and knowledge with regard to reform of the financial system are limited）

查實2005年7月匯改之後，人仔一直在上升軌跡，2006年3月的時候，兌美元已經開始衝「八算」，換句話講，港元咬住「7.8」，人仔兌港元好快見「一算」壓力（2007年1月人仔兌港元突破Parity一兌一），阿水都見到，內地同胞嚟香港買樓掃名牌，折扣越嚟越大，任一蕉堅持聯匯對香港冇構成通脹壓力，唔知呃邊個。佢老味，呢班友仔對住美國佬又係另一套講法。2006年4月一份外交電文顯示（Ref ID: 06HONGKONG1383），有條坐喺香港政府某委員會的二五，同美國駐港領事館爆料，話有關聯繫匯率廢存問題的內部討論，查實已經展開！（One financial contact told us that the conversation about the future of the peg has already begun within a Hong Kong Government advisory committee that he sits on）夠資格為匯率向港府提供意見的委員會，唔會有好多個，最大嫌疑，就係嚟自金管局樓下的外匯基金諮詢委員會，呢條二五仔係邊個，呼之欲出啦。

當然，唔排除有人提供流料跣尻佢老美的，不過如果閣下在未來五至十年退休，強積金、保險等以美元計價，閣下又相信假如脫鈎之後港元兌陰司紙可能升值的話，就要諗諗自己份防老儲備會唔會唔見一截。（順叔近年買的保單，已經全部轉買港元，因為預咗在香港退休）

公道講句，港元既然拎咗陰司紙，作為金管局阿頭，任一蕉同佢老美保持緊密聯繫，了解美國金融政策變化，可以話係職責一部份，不過，任一蕉同佢老美係未行得太埋，唔同人可以有唔同判斷。例如在2009年3月，任一蕉上京之前，預先拜會花園道，爆響口話中國即將容許幾百間公司作為人仔貿易結算的試點。（REF ID: 09HONGKONG559）

又例如在2009年10 月，任一蕉同美國金融情報官Stuart Levey工作午宴，條美國佬提出北韓利用香港銀行進行核計劃相關的財務交易，點晒名（姓名、公司同埋銀行都有）要任一蕉幫手，任一蕉就拍心口話金管局在香港擁有「高度自主」（high degree of autonomy），不過有關北韓資金的問題，佢會透過「私底下、非正式的對話」（private, non-official conversations with local banks on UNSCR-related issues）向香港銀行提出溫馨提示咁話。（REF ID: 09HONGKONG1266）

可以試吓想像，如果任一蕉同老美咁熟，同當年捧佢上神枱的英國阿蛇，關係又點會疏遠，去得花園道出出入入，又點會唔順便行過正義道探吓英國駐港領事館？事實上，任一蕉向英國前老闆提供的情報，細緻到包括北京領導人的飲食習慣！ 根據2009年6月在北京美國領事館發出的電文，引述咗英國駐北京使館官員Tamsin Rees所透露、有關中英經貿對話的細節，條女提到，任一蕉聲稱同中國副總理王岐山好老友，經常一齊飲酒 （the former head of the Hong Kong Monetary Authority had said he used to go drinking together with Wang），點知跌尻咗英國阿蛇一鑊金，話說2009年王岐山訪問英國，英國人於是根據任一蕉提供的情報，準備咗盛大的「Whisky dinner」，點知王岐山話自己「酒精敏感」，滴酒不沾，搞到成件事變咗「bloody disaster」。（REF ID: 09BEIJING1582）

北京自己都養埋一大堆大陸密探零零柒，應該已經建立自己人事檔案，邊個係花園道正義道常客，應該心裡有數，老美電文亦唔涉及乜嘢高級別的機密，對來自大陸的「有心」讀者嚟講，涉及香港人和事的老美電文，最有睇頭的，反而係香港目標人物在美國佬面前、非公開場合的意態：邊位人兄講咗乜嘢、人前人後表現有冇唔同。當25萬份電文，透過維基解密爆到通街都係之後，在2009年5月底，就爆出任一蕉唔會再冧莊金管局總裁的消息，唔知通佢老美電文的內容，有冇影響到任一蕉的仕途呢？既然任一招係千年難得一見的能吏，值千九幾萬港銀一年，點解退休之後，在大陸金融體系乜嘢顧問角色都冇？唔通北京覺得呢條友養唔熟？

眾所久知，英國契媽的殖民年代，香港在國際財經事務上，屁都唔會放一個，毫無角色，在後過渡期，出現180度大轉變，「香港」開始出席（出現）世界貿易組織、APEC、世界航空、航海協議、設立駐華盛頓及倫敦「專員」等。好簡單，如果香港呢隻當年會生金蛋的鴨，唔可以再為契媽服務，97回歸之後，對英國最有利的發展，就係香港在國際財經事務上，保持高度獨立自主，根據前港英政治部Agent羅亞所講，呢招叫做「己所不欲盡施於中國」。（見《香港絕密檔密》第121-123頁）

在「高度自主」的香港，最「高度自主」的財金系統，唔使問阿桂，莫過於金管局，而任一蕉在位咁多年，有眼睇，力保金管局「獨立王國」地位不遺餘力，舉個例，又係維基解密，在2008年10月，任一蕉向老美使館講，希望香港在討論國際金融危機的Financial Stability Forum，擁有獨立一席位，（REF ID: 08HONGKONG1984）暗示唔想只係作為G20成員中國代表團的成員之一，任一蕉甚至講到出面，呢個問題佢唔好意思開聲，最好由佢老美代勞（Yam replied that it would be difficult unless someone outside of Hong Kong raised it with Beijing），到咗2009年3月，Financial Stability Forum議決取消香港席位，任一蕉又即刻跑上花園道喊苦喊忽，話呢個係忽視香港重要金融中心地位的嚴重錯誤云云。（REF ID: 09HONGKONG530）

有人話國際城市的獨特地位，係保持競爭力的重要元素，呢個講法，唔會有太多人反對，不過呢，如果同一班友仔同你講，又要擔心香港被上海新加坡超越的話，就屬於硬膠性的自相矛盾。假如一黨專政的上海、一家專政的新加坡，都有條件成為國際金融中心，咁香港經濟體系向大陸靠攏，又點會影響競爭力？

當然啦，最能將香港阻隔於大陸經濟，同陰司紙體系緊緊綁埋一齊的，就係聯繫匯率呢條冚家拎，而最出力捍衛呢條冚家拎的，之唔係就係任一蕉。任一蕉執掌金管局呢個獨立王國16年，咬住七點八唔放，拍拍屎忽走人之後，2012年又話係時候檢討聯匯，邊度有人咁屎忽架，可以好公道咁講句，全香港最冇資格講檢討聯匯的，就係任一蕉。

講到呢度，近排陰毛上腦的順叔，忍唔住要引述羅亞有關98年亞洲金融風暴的陰謀論（見《香港絕密檔密》第90頁）：

「九八年來政局氣象，似乎也因應過渡後而趨新，陰謀論者以為前港英政府開始發動其隠藏殺著，出手狠毒，招招針對要害，向本港命脈痛下殺手。局內人以為過去港英運作百年，香港成功因素己是公開秘密，前朝鷹犬如肥彭之流，「俸祿」仍舊照支，未致貽害特區，但若能泄漏玄機，把本港賴以謀生的金融經濟要害公諸西方財閥，利用本港自由銀行體系弱點，投下賭注一舉而攻下香港。

深諳前朝歷史讀者，當會知道過去最少英裔官員控馭的部門，正是金融銀證經貿機關，全數任用華人忠貞分子，為港英最早實驗「本地化」計劃之所。此批前高官技藝招式有限，份屬英式流派，此時任由其施展所長，全部不出對手所料。國際投機打手如索羅斯之輩，早己獲前朝傳授絕招解拆，只懂一式半招的特區高官，早在敵方掌握之中。

事有湊巧，過渡後港府屢遭考驗，特區危機此起彼落，最早有禽流感事件，經而有港元遭受衝擊脫鈎可能，近日發展金融體系更受創，港府官員笨拙手法，一一表現無遺…」

話時話，98年三英戰大鱷，氣吞天下的當奴，臨退休幾乎過唔到世，肥龍當然亦一身蟻，唯獨任一蕉繼續風騷人間。查實，任一蕉都有鋪癮買Penthouse的，近的唔使講，真金白銀買落IFC頂樓的金融雲端，幫外匯基金增值唔少，跑馬地蔚雲閣頂層複式單嘢，唔知又有幾多人記得？

關連文章:
1. 老美二五仔（上）｜（下）
2. 抽水兩條拎（上）｜（下）
3. 脫鈎任尻噏

伸延閱讀:
1. 羅亞：《香港絕密檔密》第121-123頁
2. 羅亞： 《香港絕密檔密》第89-90頁
3. 壹周刊：任志剛的不尋常交易
4. 星島日報：任總自爆20年買樓詳情
5. 林本利：新地優質品牌的背後

同場加映：

同場再加映：