惡魔華裳（上）

(刊於2011年6月9日am730)

今期開Prada，聽講股票號碼1913，即係Prada現任女老闆個阿爺，創立公司之年。

同Prada一樣，大部分意大利名牌，例如Versace及Krizia等，多年前一針一線手作仔起家，唔少創辦人，好似「啫啫」Armani，至今仍然健在，自己個朵等如公司生招牌，二戰後成意大利時裝統治世界，裁縫小店變時尚巨企，仍然拒絕上市，或堅持家族式經營。

突然之間，Prada嚟香港上市，Ferragamo同Moncler又排隊集資，意國名牌，齊齊反傳統急急腳集資，賓架梗係同你講，因為中國大富豪揮金如土又唔用大腦，奢侈品越賣越有，但當人人兜街叫你買同一樣產品，供應多但係價錢冇跌，中間一兩件嘢多數有問題。

06年中，《穿著Prada的惡魔》，由一部小職員唱衰八婆波士小說，拍成荷李活巨製，Prada全球知名度更上層樓，幾個月後，大股東賣咗半成股權畀意大利一間銀行，作價都係1億歐元(下同)，即係Prada當時估值，只係20億元。

如果班賓架喺條街吹緊數可信，Prada嚟香港兜售16.5%擴大後股本， 86%仲要係舊股，上限定價，集資202億港元，以最新匯率計，市值107億元，五年暴增4.3倍，至今年1月年度，Prada純利約2.5億元，往績市盈率43倍！香港名店門口條人龍，LV仲長過Prada，人哋法蘭西名牌，全球第一時裝巨企，舊年賺30億，市盈率都係19倍，06年中至今，股價累積升幅都只不過7成，條數點計，都唔明點解Prada夠班賣咁貴。惡魔穿上華裳，唔等如可以搵狗扮賊。

Prada大股東兼管理層，即係創辦人孫女同佢老公，唔計股息及董事袍金，齋收設計顧問費，過去3年，每人袋2500萬，係咪物有所值，可以搵個闊太名媛問吓，但夫妻檔管理技巧，認真麻麻。過去十年，Prada其實好努力咁模仿LV企業策略，包括學人四出收購，例如買咗Jil Sander，同埋Fendi兩成幾股權，不過唔太識整合業務，Sander女士兩嘢已經頂唔順兩公婆，拍枱走人，幾個收購翻嚟歐洲名牌，最後都搞唔掂賣盤收場，今日Prada上市，夫妻檔大賣舊股，套現一大筆之餘，亦係為咗為當年收購積落債務埋數。

過去十年，Prada先後五次嘗試上市，一間有計劃、有質素企業，冇理由次次咁黑仔，多次臨門甩轆，如果因為大股東大食，未到天價唔肯賣，最多接貨者冇肉食，最驚係間公司有啲問題，以前喺歐洲，過唔到監管機構嗰關，今日港交所打開大門跪迎西賓，求神拜佛上市科位位精通八國外語，個個熟悉外國規例，唔會故意鬆章或無意疏忽。

呢個亦係投資過江龍最大問題，國企有乜嘢醜聞事故，香港即時知道，上網大把中文資訊睇，管理層喺歐洲，散戶意文唔識句，有乜東瓜豆腐，個市震完都未知乜頭乜路，呢樣嘢遲早發生，只不過唔知喺邊間過江龍上市公司發生。

Prada股票賣得超貴，產品當然唔平，明天再續，睇睇「Made in Italy」嘜頭，有幾值錢。

關連文章:
1. 惡魔華裳（上）、（下）