2012年1月17日星期二

中華台企(下)


上回講到,香港大孖沙在中國市場,過去十幾年,冇乜邊間上市公司搵到大錢,唔少台資企業反而搵到盤滿砵滿,做到全國甚至全球最大,好難唔令人懷疑,更有統戰價值的台灣資本家,在大陸做生意特別有著數。

八十年代初香港前途談判,部分有銀士全家連人帶資產走夾唔抖,夠薑留低信者得救,包括趁低狂掃地產的幾位大孖沙;台灣資本家差唔多,做得最成功的,絕大部分就係晨早登陸大陸市場的一班。

如果共產黨因為要搞統戰、刻意該台企坐大、等台灣資本家成副身家放晒喺大陸呢個推斷成立的話,過去十幾年,因為對大陸冇信心而錯失最大大達機會的,應該算係統一國際(0220),統一集團本來係台灣最大食品公司之一,不過當康師傅(0322)以「頂益」之名在大陸輸到損手爛腳之時,統一集團掛住在台灣陰陰咀笑,不思進取冇話俾心機反功大陸,如果今日在大陸搵銀最大市值最有代表性的台灣企業,叫做「統一」,你話幾開心呢。

以財經茄哩啡幾十年捱餐腸麵經驗,統一的「福字麵」,應該最健康,因為最冇味最唔好食,幾十年冇乜點變的包裝,反映咗一定管理思維,裡面包味精都孤寒過人,又點說服到人「再來一個」,統一國際07年底香港上市,積極進軍大陸,推出更多款式變化,康師傅已經霸咗最大市場份額。

十二年前的康師傳,最低每股HK$0.4元,艱難時期引入日本三洋食品,33%股權作價10億銀(港元,下同)左右,今日市值1300億港元,十幾年時間回報四、五十倍,康師傅主力中國市場,香港超級市場到今日搵碗杯麵都冇,如果當日買咗隻重組頻頻的「頂益」,相信唔會有好多香港人,識得坐到佢變成今日龍頭的康師傅。

即食麵加味精,係一種食多咗想嘔的垃圾食物,冇時間冇得揀先會隊落肚,不過未食過又會好恨食,康師傅已經炒到近40倍市盈率,日清食品,即係做「出前一丁」同埋「合味道」嗰間,在中國唔係咁賣得,但賣通全球,市盈率都係15倍,市值等如康師傅3成左右,唔係話康師傳一定增長見頂,不過牙煙啲咁解。

中國消費品牌,尤其係食得落肚嗰啲,食物安全稍有負面消息,股價可以即日唔見幾成,就算自己穩穩陣陣,競爭對手攞住你碗味精水,驗屍咁化驗,好難樣樣合乎規格,味千(0538)霸王(1338)都係人版,呢個亦係所有中國食品消費股的共同風險。

做大咗,就要禮尚往來,大家識做,例如富士康(2038)及母公司鴻海,要帶頭加人工,唔可以再側側膊違返最低工資規定,康師傅要加價,亦試過被發改委請去飲咖啡。

近年去得最勇一位台資老闆,應該係旺旺(0151)主席蔡衍明,可能見當時郭台銘咁成功,08年終於覺悟,私有化咗在新加坡上市的公司,嚟香港上市,同年收購台灣中時集團,避免壹傳媒(0282)及黎智英在台灣影響力進一步坐大,跟住入股香港亞視,從此旺旺發展一帆風順。

香港電視台控制權,國企資金唔方便出手,香港地產商幫拖又話地產霸權,蔡衍明入股亞視,宏達電子王雪紅又出錢收購TVB(0511),台灣資金出手就冇位俾人入,呢啲可能就係「協同效應」,唔怪得香港傳媒幾垃圾都有老闆肯埋單。

在中國共產黨眼中,最唔聽話的人,最有統戰價值,從呢個角度睇,壹傳媒應該算係奇貨可居,如果賣盤,叫價再貴都有代理人接貨,如果肥佬黎肯招安,分分鐘拆本Book B入大陸賣都仲得,呢個只係天方夜譚,暫時睇,馬英九睇重自己名聲,但唔似一個有野心要在兩岸關係留低乜嘢Legacy的政治人物,未來4年,中華台企睇怕可以疊埋心水,食幾年安樂茶飯。

關連文章:
1. 中華台企(上下)

沒有留言:

發佈留言