中華台企（上）

今期開台灣，講吓在大陸搵食的台資企業。

台灣第五屆總統選舉，可以話最理性一次，亦係最悶一次，冇軍演冇開槍，無驚無險，國民黨馬英九擊敗民進黨的「女版馬英九」蔡英文，再坐4年，兩岸政策繼續「不統不獨不武」路線，「先急後緩、先易後難、先經後政」。

小馬哥冧莊最少有個「 三不」，民進黨再上台唔知會搞乜嘢大頭佛，台灣選舉政治越見成熟，今次選舉結果，與其話「一中各表」的「九二共識」路線，擊敗內容更空泛的「台灣共識」，不如話台灣選民明知兩岸關係可見將來難以破局，「票投民進黨」可能換來不穩定因素，不如短期內「盡食共產黨」，穩穩陣陣「有經冇政」賺多4年錢再講嘢。

台灣商家挺藍挺綠唔係新鮮事物，今期多個大資本家，包括台灣女首富王雪紅，同埋富士康(2038)話事人郭台銘，在選戰後期公開撐「九二共識」，反而冇點名支持邊個候選人，潛台辭就緊要穩定。

79年前港督麥理浩上北京摸底，鄧小平叫佢帶兩句說話返香港，第一句係北京一定收會香港主權，第二就係請投資者放心，麥理浩返到嚟，公開只係講咗第二句。經濟捆綁政治，插翼難飛，呢個係北京的殺手鐧，香港係最佳例子，幾大華資財團，除咗近年幾千億元投資英國的長和系，其他新地(0016)恒地(0012)咁，間間全副身家9成9放喺大陸及香港，荷包指揮腦袋，在有利用價值的地方或時候，自然會發揮親北京的政治力量。

香港地產大財閥，有關中國的私人投資，例如炒大型國企新股咁，應該賺唔少，不過自己間上市公司，在過去十幾年，冇話邊間搵到乜嘢大錢，相對台灣資本家，簡直好似唔識做生意咁。

求其舉幾個例子，富士康母公司鴻海做電子代工、冠捷(0903)做電腦屏幕、裕元(0551)造波鞋、真明麗(1868)做LED燈飾，都做到全球最大或者數一數二中；高鑫零售(6808)做巨型超市、九興(1836)幫歐洲名牌做鞋、味丹國際(2317)做味精，又係做到全國最大，當然唔少得兩隻食品消費股龍頭，康師傅(0322)同埋旺旺(0151)，舊年12月，做埋恒指成份股添，以當日市值及流通量計，澳門賭場其實更有代表性，不過染藍台企做招牌，政治更加正確，可以鼓勵更多台資企業嚟香港上市，最理想程況，就係全部有代表性的台灣企業嚟晒香港上市，進一步邊緣化台灣股市，港交所(0388)萬一有機會收購台灣證券交易所，阻力都會細啲。

將香港及台灣最叻的一班資本家相比，台商在大陸可以賺到盤滿砵滿，大家當然可以話，香港地產商剩係識炒樓炒地炒通脹，但係唔可以忽略一個因素，就係台商的統戰價值，尤其係97年之後，相對香港資本家高得多，多間台企在中國霸佔到市場領導位置，應該在政策上有唔少優惠，北京在有意無意間，讓多間台企在大陸坐大，總理溫家寶早年都講到開晒口，台灣同胞係兄弟，可以「讓利」咁話啦。

「讓利」都有個譜，向台資的政策傾斜，亦可能只係相對外資而唔係國企，做得大的台灣企業，多數冇同國企直接競爭，台泥國際(1136)，後台勁到係前海基會董事長辜振甫家族，但水泥業太多大型國企，台泥就做唔到乜嘢成績。

當然啦，如果宏觀因素大轉向，亦唔係間間公司可以繼續一帆風順，例如中國近幾年調整經濟結構，內需行頭，出口暫時行埋一邊，匯率人工齊升，靠出口靠低勞工成本的富士康及裕元，隱性埋名幫外國牌子做代工，已經冇晒當日風光，被踢出香港藍籌，被康師博及旺旺取而代之。

下回再續。

關連文章:
1. 中華台企（上、下）