今期睇睇，香港幾乎冚世界家家戶戶都去之而後快的兩條拎。
第一條，聯繫匯率呢條Currency link，前金融管理局總裁任志剛，有今生冇來世死守十幾廿年的的命根，退咗休做善事唔去賣旗，失驚無神又高談闊論「香港貨幣體制的未來」。
之前講過，「脫鈎」同埋「港獨」，屬於香港經濟政治上最敏感的兩個議題，講都唔講得，行長長官曾蔭權就講過，邊個提親改變聯匯呢條拎，佢就「兜巴星」，當奴仲有兩個禮拜任期，如果坐言起行，公開用力，正手反手，冚任志剛個咀幾嘢，民望肯定谷低反彈。
任志剛份所謂「學術論文」出街之後，上到現政府高官，下至財經茄哩啡，政壇左中右，無論識唔識金融，個個冷嘲熱諷，你可以話任志剛言論仲好有份量，但係又幾時見過一位公眾人物，公開提出一個唔少香港人支持的建議，會引起全城負評，好簡單，任志剛建議檢討聯匯、引發公眾關心討論這個遲早出現的大約，冇人會話唔啱，不過一個掌管金管局16年、車牌號碼都掛住「AM78」的人打倒昨日之我，呢個遲來的動作，特別乞人憎囉。
任志剛話身在其位時，「不便」表達檢討聯匯的立場，大佬，金管局被稱為「獨立王國」，任志剛被稱為「金融沙皇」，花名唔會改錯，任志剛當年冇任期限制，長官意志可以自己動用納稅人錢在國金頂樓自置物業，坐在金融雲端惡足16年，咁多年嚟，有權有力掂聯繫匯率貞節牌坊的人，全香港只有一個，就係未退休時的任志剛，在其位不謀其政，「任總」都唔方便，仲有邊個方便？
任志剛又話選擇在新舊特首權力交接期間發表有關論文，冇政治目的，呢句說話，好多人會信，因為佢老兄的政治智慧，就算唔接近零，都唔高得去邊。任志剛鴻文裡面有句，「多年來，近觀微察政治人物的言行舉止，讓我對政治敬而遠之」，真係咁有智慧咁憎政治，就唔應該參與特首跑馬仔呢淌混水，本來地位超然，家陣老婦失貞，呢啲咪叫政治智慧囉。
呢單嘢大家唔使睇得太複雜，更加唔需要浪費時間講陰謀論，一個頭都白晒但係仍然大唔透的大細路，認叻幾十年，又點會接受自己只係一個二打六，被人跣咗一鑊，唔忿氣發出噪音吸引吓注意力，又或者陰陰濕濕在背後閹同學一嘢以為係報復，可以理解。
當然啦，特首選舉之後，任志剛在沙田「鄭裕彤樓」閉關幾個月寫出嚟的幾十版字，香港人都應該望吓，不過如果講到水平問題，大家就不如睇吓，金管局前副總裁黎定德(Tony Latter)嗰本《Hong Kong’s Money: The History, Logic and Operation of the Currency Peg》，有說服力好多囉。
拎嚟拎去拎不清，如果冇興趣睇金融八股，亦無謂花時間，睇一樣嘢就得，人仔兌港元的匯價走勢，2007年1月，人仔兌港元，自1994年以來，第一次突破一算，去到今日，差唔多100兌125，過去5年時間，內地同胞購買力增加四份一，嚟香港掃貨變化75折，香港的奶妢海味樓價又點會唔貴，任志剛咪又係年年同香港人講，匯率同物價冇關係？
任志剛「任一招」的花名，亦係冇改錯的，攬住聯繫匯率廿幾年，只係識在同一個貨幣政策環境，在位時怕亂怕揹鑊，冇勇氣做大動，今日拍拍屁股走人，又叫人要有勇氣面對改變，可能個個高官都係冇得留低，良心先會迴光反照。
講到尾，阿水都知道，聯匯遲早要改，步伐取決於人民幣國際化的步伐，任志剛今日帶頭帶起討論，都唔算壞事，當年佢老哥自認係「中央銀行家」時，都特別得閒特別多咀，周周一「觀點」，今後如果佢老人家在自己網誌，個個星期都寫篇嘢，同香港市民及散戶，解釋吓改變聯匯的影響、要做乜嘢準備，順叔就信佢真心為香港市民謀福祉。
關連文章:
1. 抽水兩條拎（上）、（下）
沒有留言:
發佈留言