抽水兩條拎（下）

上回講咗金管局前總裁任志剛條Currency Link，聯繫匯率命根咁拎足廿幾年，在其位不謀其政，耍足香港人十幾年，今日忽然建議檢討聯匯，就算時機及建議都冇乜點錯，拎不唔拎的轉變，乞人憎。

香港仲有一條拎，一樣咁乞人憎，叫領匯(0823)，英文叫Link REIT，早排學人搞搞新意思，推出所謂「尋味時光」的宣傳活動，出晒飲食指南上晒Facebook，推廣旗下商場老字號美食，原意係淡化領匯迫死迫走小商戶的冷漠形象，點知引爆反效果，網民「尋你那個味」之聲此起彼落，可見領匯公眾形象有幾低落。

最唔受公眾歡迎的公司，往往亦係最受投資者歡迎的公司，領匯05年底上市，每股10.3元(港元，下同)，最近股價已經突破30蚊，未計股息回報已經近兩倍，計埋過去六七年的股息分派，回報率更加接近250%。

呢個其實又係香港政府的優良記錄，之前已經講過，港府拎資產出街賣，由盈富基金(2800)到港鐵(0066)再到領匯，由五隧一橋到iBond，暫時未試過要投資者損手，件件又平又靚。

當年香港面對結構性財赤，打住「大市場小政府」招牌，變賣家當幫補生計，今日香港公共理財哲學大有逆轉之勢，政府總部都搬咗去添馬艦，在一個好似「門」字的甲級寫字樓，掛個「小」字就唔係咁好睇，候任特首梁振英已經講明，要改變「小政府」的做法，要大有為，早排打開報紙，見到梁振英又拎住張摺櫈四圍走，被街坊問到有冇可能回購領匯，降低公屋商舖租金及貨品價格時，竟然話有得諗，會認真研究回購領匯的可能咁話，嚇咗一跳。

上市之後，領匯總資產已經膨脹一倍，主要來自由公轉私、翻新門面所釋放的物業價值，近年亦開始併購毗鄰的同級零售物業，領匯擁有全港最大的零售商場面積，在大眾化市場搵食，可以想像，呢隻怪獸出現後，唔單止屋邨小商戶，左右隔離的同類商場，同様冇啖好食，好似信和(0083)將軍澳海悅豪園商場，唔夠領匯爭，不如賣盤俾佢，領匯越膨脹，規模效益越大，亦可能出現越多併購機會。

領匯最新市值超過700個億，股價對資產淨值，近年長期處於溢價，新世界發展(0017)市值反而唔夠600億，屋邨街市停車場，竟然仲值錢過一間又百貨又豪宅的綜合企業，除咗話新世界管理唔見得人，亦見到領匯已具備晉身籃籌的實力。當日私營化政府賣到一股不留，領匯主要股東都係大型基金，流通量高，政府低賣高買，今日要回購所有股份，3成溢價好未，都要成千億，財政儲備就冇咗六份一，唔單止係「大動作」，直頭係超高難度動作，咪玩啦。

房委會近幾年的商業物業組合，至2010年3月，已經又增加到近17萬平方米水平，泊車位2萬幾個，復建居屋增建公屋，作為大眾化市場的包租公，房委會又可以同領匯拗手瓜，今日全面回購領匯，可能性等如零，政府最可以做的，只係利用房委會重新膨脹的物業組合，重新揹起政府津貼商戶租金這項隱性福利，將領匯呢個親生仔一手打殘，以政策風險扭轉市場對領匯前景的樂觀印象，先至會出現回購的契機，呢個亦係領匯股東需要留意的可能性。

假如回購領匯，前題是壓抑價格減輕民生負擔，梁振英又並非口噏噏當秘笈的話，動用財政儲備進行「公營化」的最可行目標，唔係領匯，而係港鐵。

橫掂近年沙中線、港深廣高鐵等大型鐵路項目，都係納稅人而唔係港鐵出錢，港鐵作為上市公司的融資功能從來冇好好利用。領匯市值超過700個億，百分百街貨，港鐵政府持股以外只有25%街貨，市值都係360億元，回購港鐵呢條冚家拎，用錢少啲，難度低啲，又更加多人拍手掌，更加實際囉。

(順叔有事離港，周三及周四財經茄哩啡專欄，由阿瞬代筆兩天。)

關連文章:
1. 抽水兩條拎（上）、（下）