強國通渠

堂堂中國首都，一場雨變成澤國，規劃經濟，規劃唔到幾條渠．．．

今期打八號波，為咗唔阻住老編放工（雖然佢改咗噚日一句嘢做「打得機多會盲」，但順叔決定原諒她），撞啱北京又係打風水浸，食住條水講吓水務水股，開開心心早啲收工，呃多日稿費。

近年地球越嚟越危險，氣候越變越怪，唔係百年一遇的天旱地震，就係千年一遇的狂風暴雪， 天災人禍特別多，怪唔得保險公司成日話生意難做。北京周未一場豪雨，連落20粒鐘，全市平均降雨量170毫米，聽講又係60年一遇的破記錄降雨量，天子腳下一夜變澤國災區，最少37人死亡，當中25人浸死，市政府估計財物損失超過100個億人仔。

公平啲講句，近幾年唔少主要城市，落雨打風的非常時期，都有出現水浸市中心的所謂「內澇」情況，例如美國紐約，舊年8月超級颶風吹襲東岸期間，曾經出現一日200毫米的「116年一遇」的降雨量，結果全市都係多處嚴重水浸，電力中斷，再之前一個月，南韓首爾亦出現過所謂「百年一遇」的豪雨，不過人哋預警系統可能做得好啲，市區好少話出現廿幾人被浸死的悲劇。

查實大陸主要城市，面對市區雨後水浸應該好有經驗，唔係北京獨有的問題，大城市暴雨後一片汪洋，好似已經見怪不怪，歌仔都大把得唱，例如南泥灣紅歌惡搞版《泥水灣》、「廣州市歌」《落大雨水浸街》等；「廣州地鐵瀑布」、「成都碼頭」等「景點」，相繼出現，網民苦中作樂比較邊個城市「海景」最壯觀，以前中國水災的防禦對象是大江大河，近年「內澇」已經成為最多人關注的城市病，官方數字統計，舊年縣級以上出現嚴重水浸的城市，高達258個，幾乎全部因為城市地底去水系統應付唔到忽然而來的暴雨。

市區水浸問題咁嚴重，就算係城市規劃外行人都睇得出，因為地下排水系統出咗問題，分分鐘唔少所謂去水管虛有其表，打開個蓋原來就係泥地冇渠，講到尾，就係城市化步伐太快，掛住建設地面，少理地底，投資唔夠，又或者規劃唔夠長遠完善。

唔好話地底的長遠規劃，近年中國成日有類似「深圳第一爆」及「江門第一爆」等新聞標題，講緊好多大型建築物，因為配合唔到城市發展，需要用炸藥一炮過移平，呢類新聞聽落好爆，但係睇真啲，唔少都係落成冇耐，十年八載貨仔，已經變得多餘；又舉多個例，過去五年，遼寧瀋陽已經炸平咗兩個加埋唔夠30歲大型體育場，包括中國足球隊第一次取得世界杯決賽圈資格的五里河體育場，大型體育場絕大部分南北向，避免兩個龍門對正太陽作賽，但係五里河體育場竟然係「東西向」，犯咗最基本的設計錯誤。

地面上的城市建設，已經咁亂咁冇長遠規劃，地底的排水系統，更加唔使講，唔使問阿桂，大把中國觀察家，可以指住中國雨後必澇的城市病，作為不相信中國模式的又一力證，就好似話中國國企銀行咁，表面上帳簿好靚仔，但係唔知下面收埋乜嘢爛數。

今次內澇重災區在中國首都出現，北京領導人都幾冇面，斷做唔認真搞吓城市規劃，都會落足本錢根治城市水患，強國治水，部分A股上市的城市水利工程企業，星期一股價逆市被炒起，財經茄哩啡都盡咗少少力，試吓搵吓港股有冇公司做呢類生意，搵咗半粒鐘，終於搵到半間，以前叫做「進業控股」(8356)，創業板上市，主力做香港渠務生意，近5年唔知有冇賺到一嚿水純利，最近新華社借殼上市，注入新華電視業務，改咗名做「中國新華電視」，大家冇聽錯，通渠公司變身中國官方喉舌。

趕稿，臨尾搞個爛Gag，北京有興趣派官方喉舌嚟香港「通渠」，不如先搞好全國的城市建設。

傳說中的去水位

伸延閱讀：
1. 廣州市歌: 落大雨水浸街