2012年10月12日星期五

間諜公司(中)

(刊於2012年10月12日am730)



美國佬國會查找咗年幾兩年,在冇任何具體證據之下,一句有古怪,認定華為同埋中興通訊(0763)威脅美國國家安全,「冷戰思維」又點,「有罪推定」又點,將件事推至國家安全的高度,封殺你就封殺你,講多無謂。

前蘇聯瓦解之後,美國佬獨霸全球十幾廿年,近年中國變成唯一可以拗吓手瓜的對手,Rambo打完越南阿富汗兼緬甸之後,怕且就快又要復出拍《第9滴血》打中國,從中興華為被開刀的經驗睇嚟,中美G2之間的磨擦,只有升溫唔會降火,中國公司要去美國搵食,恐怕未來十年都冇乜運行。

普通香港人無乜機會走去做間諜,身處間諜之都而唔會特別留意各方利益集團的滲透活動,美國佬對間諜的敏感,唔使問阿桂,正正源於自己本身日日夜夜做緊同一件事,美國近年打住反恐的招牌,監聽竊聽國內電訊網絡的間碟活動,之唔係大間特間。

全地球最巨型的間諜軟件(Spyware),叫做「視窗」,佢老闆,裝咗微軟佢老闆蓋茨的Window,越嚟越唔得閒,日久日要更新下載乜嘢最新配套軟件,順叔都唔算係電腦文盲,懶得搞防火牆,成日被視窗的操作系統搞到成個電腦都係Trojan,強力建議中國政府如果搵間美國公司開刀還拖,唔該搵微軟。

從美國佬今次封殺報告的著墨,似乎主力打擊目標係華為,順手做埋中興通訊,華為冇上市,有機會再講,集中睇睇中興通訊,呢隻嘢係香港第一間先A股後H股的上市公司,而咁容易突破先例的公司,唔使問阿桂,概有啲嘢,後台有咁上下硬淨。

美國佬的調查,花咗唔少精神口水,要兩間公司解釋同中國政府以至中國共產黨的關係,包括兩間公司究竟係「國企」定「民企」。改革開放之初,在深圳特區跑出來的企業,特事特辦之下,國企民企點區分,有冇國有資產流失,真係雞同鴨講,舉個好簡單例子,平安保險(2318)究竟係國企定係民企?對於呢個問題,中興通訊答得好妙:「只有極少數有見識的人會將中興通訊區別為國有或政府控制企業」(Very few knowledgeable individuals in China would characterize ZTE as a state-owned entity or a government-controlled company) 。

中興通訊最大股東叫「中興新」,本身股東有國控背景,冇上市,控制權更加唔清楚,持有中興通訊30%股權,重點係,同平保一樣,中興通訊在股權結構上,唔似得中國人壽(2628)咁,7成股權由國有企業控制,阿公並冇絕對控股權,中興平保呢類公司,與其話「國控」,不如話「黨控」,例如中興通訊就向美國國會的調查委員會供稱,公司有個共黨組織,有19名黨委,當中2個同時係董事局成員,在中興通訊要求下,冇開名。

中國共產黨聽講有成8千萬黨員,多國英國人口,所有大型公司差唔多後面都有個黨委組織,如果因為高層係共產黨員就唔做生意,可能9成以上中美貿易要斬纜,中興通訊主要收入唔係美國,可以想像,反而唔少美國公司有興趣拍住中興通訊進入大陸市場。

唔做美國生意,大陸市場怕且仲有得做啩,2008年全球信貸危機之後,阿公除咗開水喉搞基建,派錢俾人買車買電器,另外一個大動作就係搞3G網絡,2009年初,中興通訊等電訊設備公司,股價反彈速度幅度,不亞於汽車製造商,當時電訊業啱啱完成重組,變成中移動(0941)中聯通(0762)中電信(0728)三大巨頭,大量資本開支投入搞3G,結果電訊公司股價殘咗幾年,到舊年開始先有返少少起色。

3G起步幾年,而家聽講又話要搞4G,順叔唔知乜係LTE,純粹將內地傳媒報道搬字過紙,LTE頻譜規劃會在11月左右出場,工信部部長苗圩亦講咗,以前講法係發4G牌照大約仲兩至三年時間,最近講緊一年之內發牌。

下回再續。

關連文章:
1. 間諜公司(上)(中)(下)

伸延閱讀:
1. Economist: Techno-nationalism isn't the answer
2. 經濟參考報: 中移動1800億啟動4G建設

2 則留言:

  1. 是否國企其實跟本不重要,一個大到不能倒的行業或公司就算不是國企也是有足夠影響力去左右政府決策的。美國的汽車、銀行、飛機、石油等公司就是最好的例子了。不同的是,大陸是黨國控制公司,歐美是公司控制政府。

    回覆刪除
  2. 2G,3G同4G在用戶方面主要分別在於速度同多少人可以同時使用。3G以前因為有兩種基本上不同的規格(CDMA同GSM),行家坐低談判得出了共同可以接受的4G規格叫LTE(Long Term Evolution)。不過中國不甘被屈要付出高昂的技術專利,在3G時就自己搞了個名為優化實為保護主義的規格(TD-SCDMA),將它變成國內標準規格而斷絕外來競爭。4G方面也出了個TD-LTE來保護國內企業和技術。

    雖然4G設備華為也有做,但賣歐美就當然不及歐美行家Ericsson, Alcatel-Lucent。TD-LTE在國內流行所以市場也是華為中興天下,在第三世界國家如印度和非洲也非常流行,因為夠平。

    回覆刪除