2012年3月20日星期二

依依俄俄

除咗湯顯明忽現大將之風,老廉拘留新地(0016)陳鉅源之外,近排股壇仲有一單奇怪事。

俄鋁(0486)。

上星期五,俄鋁公布,委任張震遠做主席。(俄鋁通告)

張震遠做得梁振英競選辦公室主任,早排缺席流浮山飯局,因為身在英國。選戰入直路,心戰室統帥竟然去咗倫敦,究竟有乜大茶飯,對張震遠嚟講緊要得過香港特首選舉,諗翻轉頭,好可能就係傾俄鋁單嘢。

俄鋁呢隻嘢有幾重要,可以諗吓一樣嘢,過去咁多年,有幾多個俄羅斯元首,曾經訪問香港?答案係只有一個,普京條靚,梅德韋杰夫,舊年嚟咗香港。(梅德韋杰夫訪港YOUTUBE視頻)

香港冇外交,俄鋁在香港,係中俄關係的一個神秘標誌,無論俄鋁背後代表咩政經利益關係,人哋放得袋錢落你個場,你就要搵個信得過的睇場,所以,俄鋁其中一個非執行獨立董事,係香港700萬人當中,中央政府最信得過的梁愛詩(賭王分燊家,都係詩姐出面做魯仲連兼信差)。

如果在中央政府眼中,張震遠的可信程度,拍得住詩姐,咁梁振英即係更加信得過?

差啲唔記得,星期一,張震遠之前另一個奇怪東家,泰山石化(1192)宣布,因為欠債,可能需要引入新股東,控股權有機會易手...(泰山石化通告)

張震遠搞泰山石化搞到唔湯唔水,商品交易所長年TRADE空氣,市建局起埋晒啲「華而不實貴到無倫」的樓,呢幾份成績表,樣樣都炒得,但繼續做「公職王」,7月之後可能再上一層樓,唔係「自己友」,真係做過McKinsey識飛咩...

19 則留言:

  1. 順叔分析力太強了!!!!

    陳小二

    回覆刪除
    回覆
    1. 小二哥,你隻恒隆個陳啟宗,今次應該終於押中JACKPOT了...

      刪除
    2. 有道理,除咗市建局外都十二分同意。
      俄鋁真係由始至終都令人目瞪口呆。
      其實仲有邊個公眾人物係出自傳說中嘅McKinsey呢......

      刪除
    3. 最後一段寫錯咗,應該係「泰山石化」,拔,俄鋁「令人目瞪口呆」,又真係事實,港交所搵咁多過江龍嚟香港,遲早爆鑊甘...

      市建局禾借咗唐唐把口啫,自負盈虧又要四圍保育,一盤咁生意,在埃及或者有得做...

      刪除
    4. 最慘唔知係咪真係「龍」,個P&L嚇死你。

      係喎!又借唐少把口,原來我同人相反,睇文章冇睇標點符號,哈哈!
      如果市建局賣啲樓比市價平幾成,就真係被人插浪費公帑插到反肚喇。

      刪除
    5. 真係?不過陳資源幾乎係內地哂左冷,捧梁未必有多大私心吧?

      陳小二

      刪除
    6. 我錯了,順叔,看了你今日篇文章。東亞捧曾曲綫利內地發展,陳捧梁,日後國內發展必暢通無阻。

      陳小二

      刪除
    7. 搵人打招呼肯定會方便啲,尤其係開拓唔熟於自己地頭的新市場或新領域,拔,最後都係講自己食力,東亞舊年已經冇增長...

      刪除
  2. 順叔,洞察力超勁呀,小第服矣!難怪小第偶像林少陽都推介您的專欄。

    明天如果時這兩段出街,大可以用"落孖葉知秋"。

    我估如果馬會有開盤,1號應該封左盤了。

    John

    回覆刪除
    回覆
    1. 有咁事?!有冇hyperlink可以睇吓?

      落孖葉知秋,hahaha,LIKE!

      刪除
    2. 順叔點睇蔡東豪近日一係列批狠捧豬文章?有無少少違反選舉條例?

      陳小二

      刪除
    3. 算啦小二哥,第一,我好少評論人哋講乜;第二,特首產生辦法太膠,講選舉條例都多餘的...

      刪除
    4. 查實蔡力批梁亦無不可,當然若有實在證據會更好。但一力維護唐就太黑暗了,妄照市民死活。

      如果梁係真小人,咁蔡咪偽君子羅。我挑!

      仲有,順便講埋,佢早前以專家口吻係電台笑坊間財演11年睇錯市。實則佢先係神燈。10年末以經濟一片昇平的倒後鏡大力唱好股市11必好,然後11年末跌至底部時,又係電台講生意極難做,股市極不樂觀。

      不過咁,睇錯市人之常情,但唔該唔好扮失憶又扮專家去取笑同行羅。

      有聽ltv cafe既應會明白我係度講咩。


      陳小二

      刪除
    5. 之前兩度在華富財經請教林少陽隻1929, 佢都係咁答. (1) 順叔那個欄質素頗高,值得參考。 (2)..... 另外,AM730順叔那個專欄最近幾期寫「周街是福」,值得認購新股者參考。

      刪除
    6. 哦,原來都係迎賓周大福單嘢...

      刪除
  3. hehe, 有時覺得順叔講政治& 時事, 仲精彩過講財經。

    BTW, 「港交所搵咁多過江龍嚟香港,遲早爆鑊甘」, 何解呢?

    回覆刪除
    回覆
    1. 唔係話港交所會爆鑊甘,而係想講,咁多乜叉外國公司嚟香港,等如要香港投資者隔山買牛,牙煙過買香港一手樓花。

      香港散戶個個識中文,國企出事,有乜風吹草動,上大陸網站好易好到風,如果俄鋁出事,一來時區唔著數,二來,有幾多人識俄文?

      好人好姐,點會嚟香港,順叔相信,香港上市的大型外國企業當中,遲早一日,會有一兩隻爆大鑊,時間問題...

      刪除
  4. 順叔都講得有道理, 好在呢樣野暫時唔會係問題, 事關呢d 外國大企既成交額長期偏低。

    回覆刪除
  5. 蘋果既丘亦生已經有講俄侶既風險

    http://hk.apple.nextmedia.com/template/apple/art_main.php?iss_id=20120323&sec_id=15307&subsec_id=15320&art_id=16182860&cat_id=15523460&coln_id=15523464

    回覆刪除