2012年3月23日星期五

次輪好戲(下)

先嚟一個同場加映,各位觀眾:

ICAC大踢爆: 許仕仁監制幕後大戲

上回講到,幾個當年幫行政長官曾蔭權上位兼冧庄的人,除咗永遠「兩袖清風」的肥龍許仕仁,其他核心人物,好似東亞(0023)李國寶、金管局總裁陳德霖,政界商場都出現突破性發展。

權力遊戲遊戲幾精采都好,局外人,要過一段時間,等所有人事起跌沉澱一下,先可以睇到大概輪廓,㷫烚烚當時,好多嘢會忽略咗。舉個例,香港今日仲有好多人相信,03年七一遊行,係導致董建華的原因,忘記咗,香港上一輪權力集團的更替,董落曾上,戰況有幾激烈。

03年50萬人七一遊行,董建華都未覺腳痛,仲可以「自由行」加「屍爬」(CEPA),香港經濟甚至有啲起色,但係2004年聖誕節之前,房委會分柝領匯(0823)撻Q,就成為老董背上最後一根稻草,兩三個月就腳痛。司法覆核挑戰領匯上市這一役,除咗要爛熟相關法律知識,仲要精通政府行政程序,「出錢」兼出力的「靈魂」人物,正正是啱啱在商台被封咪的名咀鄭經瀚。

當年商台續牌跟名咀封咪,發生時間出奇地巧合,唔使問阿桂,背後有人刻意無意間,將兩者拉埋一齊,例如縮短牌照年期作威脅,不過,呢兩件事,同香港上一輪權力之巔的拗手瓜,發生時間亦出奇地巧合。言論自由唔單止係香港價值,亦係普世價值,最重要係,攞住支咪嗰個,為咩人發聲,劃公仔劃出腸就太核突,發動政變的時候,搵軍隊控制電台電視台,其實亦係對新聞自由的終極干預。

共產黨雖然在中國一黨專政,但唔喺香港「存在」;選舉法其中一個最荒謬設計,行政長官唔可以有政黨背景,所以香港權力之巔,唔會有政黨更替,只有權力集團爭櫈仔,捧咗一個代理人做行政長官,身邊人以後好辦事,當然,亦要講本身有冇牙力,例如在05年之後,東亞在內地發展迅速,內地銀行盈利增長平均40%,但東亞純利舊年冇增長,冇獨立帳目,亦睇唔到東亞發展內地業務揹多咗咩風險,東亞主席李國寶,如果呢期做唔到「造王者」,兩位公子就要爭氣啲,未來五年做靚盤數,避免黃雀在後成為被狙擊目標。

今期特首選舉,押注落梁振英的大孖沙,最初為數不多,最中堅份子,就係恒隆(0101)主席陳啟宗,無獨有偶,恒隆策略同東亞一樣,在內地晒泠,如果梁振英跑出,以「首席政治官」(Chief Political Office)自居的陳啟宗,最低限度,可以比以前更牙擦,吔文吔武。

當然啦,次輪好戲,又點會少得新地(0016)

準確時間已經唔記得,大約9月左右,梁營搞咗個「富豪夜宴」,地產同銀行大孖沙,幾乎冇人俾臉出席,只有兩個主人家,一個係陳啟宗,一個就係新地前主席郭炳湘,之前財經茄哩啡講過,特首選舉之後,可能到新地有新戲上演,估唔到咁快今個星期已經開畫。

新地日前宣布,開國功臣兼執行董事陳鉅源,被廉政公署拘留,請留意,係「拘留」,懷疑涉及觸犯防止賄賂條例,呢種事情,同埋講到咁白的通告,好少在大型藍籌身上發生,廉政公署做嘢原來咁快手,一個星期都唔等得,要在特首選舉前做嘢,香港,原來仲有ICAC。

郭氏三兄弟,一個挺梁,兩位細佬撐唐,今次選情激烈,唔知有冇人需要轉軚,從正面角度睇,可能成為新地管理層,重新一團和氣的「導火線」都唔定呢。

講咗咁多,其實都係因為今期行政長官選舉太熱鬧,吹吓水,大家聽吓就算,今過呢,今次頭場大戲已經咁大龍鳳,次輪好戲,應該唔會好似05年嗰劑咁收收埋埋,好多嘢會即時浮上面,好簡單,9月又立法會選舉,大家擔定櫈仔,繼續睇好戲。


關連文章:
1. 次輪好戲(上)(下)

伸延閱讀:
1. 財經茄哩啡: 新地之料(外篇)
2. 壹周刊: 新地太子復仇記
3. 蘋果日報: 許仕仁住新地樓手尾長
4. 東方日報: 許仕仁否認受查傳聞

5 則留言:

  1. 第四段說得真好。不過寫得咁「藝術」唔合乎本地主流傳媒風格呢。

    回覆刪除
    回覆
    1. 牛哥,第四段係尋日睇到你同另外一位「匿名」網友有關商台的留言後,臨時加落去的,真係劃唔出條腸,就算咁「藝術」,還是被人罵了...

      刪除
    2. 其實續牌單野,既然N年前大班已經吹風識得指控人,即係N年前已經有人疑似洩密,嗰條腸唔駛你老哥劃N年前都突咗出嚟啦。

      順叔,時下興樣板戲,睇吓各大報紙(不論立場)嘅選角,清一色嘅打手,仲以為拍邵氏武打片;"包"新聞台仲玩埋剪接,揀邊段說話甚至邊句說話報真係好專業的,幾乎神不知鬼不覺。你啲由外到內再到外嘅演繹,仲要再「藝術」啲?太高喇,想像唔到。

      刪除
  2. 順叔,剩係講guts你已係財金界最佳男主角啦。我有時都會擔心你咁到肉既言論會唔會影響人身安全。

    回覆刪除
  3. 仲有八粒鐘左近就係涼粉天下了。或許正如鐵頭所說,不希望思歪五年,便要靠"大家"了!但觀乎一向自視甚高的歌頓要親自到梁營傾計和葉劉瘋狂補飛,要爆冷真係靠粒糖了。

    拔,梁鄭配似樣啲,但葉劉入直路後瘋狂抽鞭,行會一席應該有嘅。

    回覆刪除