香港主權回歸15年，唔少「難忘回憶」，人總要向前看，不如試吓想像15年後，2027的香港，又係點樣。
梁振英競選總綱叫做「穩中求變」，多番強調「不需要政策大變」，只要「適度有為」，不過梁振英在接受香港親中報章訪問時，又話香港過去15年來，經濟社會發展「失速」或「龜速」，透露短期內會大力推動「地區經濟」，利用「全面提速」的經濟發展，解決社會積壓的深層次矛盾咁，「穩中求變」定係「全面提速」，唔知佢開邊辨。
如果純粹講緊影響香港臉貌的硬件規劃，所謂「不需要政策大變」，可能仲有啲道理，因為好多嘢已經講晒通晒天，好似涉及香港同珠三角地區融合的規劃及「被規劃」，只係做得慢咁解。
舉個例，為咗配合咩嘢《珠江三角洲地區改革發展規劃綱要（2008—2020年）》，粵港澳三地政府，查實破天荒在舊年9月，開始搞個聯合公眾諮詢，要三地合作共建「綠色宜居城鎮群」，搞咗大半年，有冇邊位香港人聽過或者仲記得有個《共建優質生活圈專項規劃》？香港政府搞呢個諮詢，不但冇聲冇氣，大家可以試吓上網下載有關諮詢文件，下載速度唔知點解認真「龜速」，分分鐘要半粒鐘。
又舉個例，中國「十二五」規劃，涉及粵港澳合作查實有七大項目，當中有三個涉及大型跨境基建，包括港珠澳大橋及廣深港高鐵，仲有港深西部快速軌道線，要起一條直通過境輕鐵，經前海連接香港及深圳國際機場，呢三條將香港澳門緊扣住珠三角的大型交通幹線，最後一條仍在「論證當中」，不過港珠澳大橋及廣深港高鐵，在香港先後引發政治大風波，前者因為環保問題一度被司法程序拖住，後者更加唔使多講，搞到立法會被圍堵，成為「八十後」打起招牌熱情投入參政的導火線。
港珠澳大橋及廣深港高鐵，兩個大頭佛，看似巧合，不過諗深一層就知並非偶然，阿公要在粵港澳三地插幾條「拎」，「拎」到邊全香港嘈到邊，又司法覆核又立法會抗爭，雖然企最前排的，只是香港環保份子或八十後新一代，不過阿公睇在眼裡，好自然會有一個政治判斷，認為香港背後有一股力量，抗拒同內地的融合，「兩制」凌駕「一國」，拖得就拖，當日國家副席習近平嗰句「三權合作」，分分鐘就係因為呢個政治判斷有感而發。
「十二五」粵港澳七大合作項目，包括在文錦渡以東建設蓮塘香園圍的新口岸，可以縮短香港至深圳東部的車程，2006年底「十一五」已經講緊，研究到「十二五」，而家聽講最快在2018年啟用，其餘三個項目，近年亦都浮出水面密鑼緊鼓，最凸出的就係在深圳前海搞個港深「特特區」，剩低兩個項目，涉及兩個巨型但未開發的新區，包括廣州南沙仲有珠海橫琴。
唔知道香港小學而家仲有冇「社會科」，中學又係咪讀緊EPA(Economics and Public Affiars)，不過斷估香港教科書裡面啲香港地圖，都只係去到深圳河以南，再加上香港地產商咁多年來的天花龍鳳，將軍澳變咗「九龍東」，唔好話前海、南沙呢啲名咁陌生，分分鐘唔少香港人，識過大海，其實唔知澳門向西向東，對區域發展缺乏方向感及大局觀，可能因為咁，國家主席胡錦濤嚟香港，臨走前放低十六字「真言」，要香港新管治團隊及香港人，「登高望遠」。
下回再續。
關連文章:
1. 二零二七（上）、（下）
2. 港深特特區（上）、（下）
3. 港深特區（上）、（下）
伸延閱讀:
1. 文匯報: 梁振英 - 經濟提速追回蹉跎歲月
沒有留言:
發佈留言