小南大國

股壇魯芬

開心星期五，今期學人講飲講食。

磚頭貴對推動經濟有乜貢獻，唔知，不過可以幾肯定，房屋開支壓縮咗大部分香港人的可支配收入，衣食住行，如果想叫做追求吓生活享受，唯有間唔中食餐好啲或者刁鑽啲，所以報紙電視講飲講食成行成市，諗落都幾悲。

咩名人「邊食邊吹邊拉關係」飯局之風，已經老翻覆製到報紙，搵件風水師加幾條女四圍食飯灌水又可以放上電視，已經到咗氾濫的地步，當中最經典頂唔順場面，莫過於見到條女，含住嚿嘢成口都係，瞇埋眼揈晒頭，好用力又好享受咁「嗯」聲「唔」聲，明明已經食緊蕉，同你講好有蕉味，每逢睇到呢啲節目，都希望政府可以發多幾個牌，搞個電視版《無人駕駛》分分鐘仲好睇啲。

聽講全香港有一萬四千幾間大小食肆，五百個香港人就會有人開一間，好少少食材，入境香港唔夠一粒鐘可能已經被買手搶清光，過幾層銷售渠道或去到普通街市，已經冇乜好嘢剩低，加上租金貴亦壓縮埋大廚選購食材的能力，有時見到枱面上的垃圾食物，例如厚達半厘米的雞皮，又會覺得怪錯咗飲食節目中「嗯」嚟「唔」去的美女，飯有飯味菜有菜味，本來係食物最低要求，湮遠的味道，今時今日可能真係變咗「享受」的一種。

飲食節目唔會幫襯連鎖餐廳，食物茶式公式一條大量覆製，人人都試過，唔通搵名人索女行入麥記，咬住個漢堡包同你講好有包味，點都要搵啲叫做有特色的食肆，講到全球獨步咁款先冇咁行貨，咁又即係話，食物菜式唔似其他普通商品，唔可以大量覆製，除非有朝一日肯德基變成米芝蓮星級餐廳，否則食物質素及食肆規模成反比呢個定律，冇人可以打破。

十幾前，財經茄哩啡重遊上海，去小南國(3666)虹橋店食飯，真係飯有飯味菜有菜味，加上久別重逢良朋碰杯，在小南國起家老店呢一餐，記憶甚深；舊年在香港請幾位小朋友食飯，被捉咗去時代廣場小南國分店，順叔唔識寫食經，不過水準反差之大更加印象深刻，最記得有碟類似排骨糯米飯的東東，放上枱已經嚇咗一跳，幾粒排骨鋪面，同糯米完全冇溝通，唔係搞爛Gag，真係唔熟。

小南國當年一間老店，最新中港分店61家，小南國經過幾翻波折，日前終於在香港上市，一間上市前谷到盡都係賺1億銀(人民幣，下同)左右的連鎖食肆，最新市值都要20個億，廿倍市盈率，唔知道買咗落邊度。

小南國上市的賣點，係十大名店加標準化管理，不過出晒名的食店，老闆或大廚多數好有性格，絕大多數拒絕開太多分店，因為冇可能管理得好。一間上市食肆，一係賣管理能力，一係賣大廚能力，兩樣嘢炒埋一碟放上枱，肯有是但一樣唔熟。

強如香港大家樂(0341)，夾在公司管理及廚房管理中間，近年亦開始顯得進退失據，大家樂至3月底純利，自2003年的「非典」期以來，第一次倒退，經濟學家當然可以指住最低工資，不過呢 ，大家樂好似冇講到，中港員工人數比例有冇此消彼長。大家樂過去咁多年被視為優質管治的港企代表，即係話壓縮成本已經做到好盡，未來增長唯有靠殺入大陸，但係中國市場個個地方唔同，例如唔係咁多人會出街食早餐，暫時見唔到大家樂可以好似香港咁，將運作模式及產品標準化大量覆製。

聽講仲有幾間類似概念的新股，排緊隊上市，包括香港翠華，香港茶餐廳唔敢包，不過幾間內地連鎖食肆，應該總有一兩間，上市最終目的，就係搞到自己能見度高啲，第二時可以好似小肥羊咁賣盤。

小南國老闆話齋，吃飯是件快樂的事，但人生的快樂不僅只有吃飯，變化小小，就係好食的食肆唔上市，上市的食肆唔好食。

關連文章:
1. 十年大膠鑊（上）、（中）、（下）