二零二七（下）

上回講到，中央政府要將香港同珠江三角洲搓埋一嚿，在香港總係遇到唔少有形無形的阻力，「十二五」規劃香港「被規劃」，七個粵港澳合作項目第一二炮，港珠澳大橋同埋廣深港高鐵，先後在香港司法及立法機關搞出政治大頭佛，看似巧合，實非遇然，搞到國家副主席習近平噏三噏四乜嘢「三權合作」，國家主席胡錦濤嚟到又十六字真言要香港管治團隊「登高望遠」。

特首梁振英當選之後幾個月，多次提及香港過去的「蹉跎歲月」，「失速」發展，斷估亦係睇到呢種情況，香港回歸15年，中國變強國，但係港人心仲未回歸甚至越行越遠，阿公要規劃一個有實力超越紐約東京的超級經濟城市群，搓嚟搓去都搓唔掂香港呢一嚿，梁振英上場後最重要任務之一，相信就係要扭轉呢個欲迎還拒的局面，利用粵港澳區域經濟發展，中和香港人心未歸的深層次矛盾，仲要做到無縫無罅。

近兩年七一回歸周年，北京領導人大鑼大鼓嚟香港，所謂「挺港」措施越「送」越多，查實已經講到越講越亂的地步，東一忽西一忽，七月第二個星期已經唔記得講過乜，明年今日好似又當「大禮」送多次。

舊年副總理李克強嚟香港，拎住「治港36條」，好多場大龍鳳，當時順叔寫咗篇《小強大禮》，怒炳當日的政策及內地事務局局長林瑞麟辦事不力，新聞及資訊發放亂過狗粥，而家睇返轉頭，公道啲講句，可能近年呢啲中港合作大場面，特區政府可能已經冇咗主導權。

舉個例，上個星期，出席香港慶回歸的中央代表團，包括發改委財政部人民銀行等中央部委，個個都有自己嘢講，例如財政部發人債，外管局講離岸人民幣等，五個部委又搞過一個聯合新聞發布會， 雖然聽講有個「新聞發放中心」，不過資訊發放極冇系統，咁多山頭，掟晒俾傳媒都處理唔切，幾場大騷，包括前海發展的聯合記者會，香港人如果想睇返當日講過乜，唔好話文字實錄或視頻，新聞稿都唔知去邊度搵，香港政府新聞處冇，深圳市政府又冇，去到前海管理局官方網頁都係乜都冇。

香港新聞處以前發放資訊好有系統好有水平，冇理由降低自己水準遷就內地政府，中港融合頭等大事之一，可能就係話俾內地官員知，公開透明的重要性，梁振英如果要幫香港人，好似國家主席胡錦濤所講，「登高望遠」，最低限度，下次有親呢類中港合作的大龍鳳，新聞及資料發放要做好啲，真係要認真檢討吓應該邊個負責，統一發放，最少等大家有個知字。

香港年青人無論幾抗拒都好，唔使咁悲咁谷氣，如果唔想離鄉別井，離開親戚朋友移民，就應該認真諗吓未來的香港會變成點，講緊一啲好俗氣的問題，包括可以喺邊度做嘢，喺邊度住，留意多啲香港未來規劃的大趨勢，例如香港政府想在新界邊忽大搞，周邊又有乜嘢基建配套，香港元朗樓都要五千幾六千蚊呎，仲貴過深圳幾條街，真係搓埋一嚿，好似AH股差價咁，終於會收窄。

有人預測到咗2027年，中國會超越美國，成為全球第一大經濟體系，查實呢樣嘢又唔係咁難估，按目前水平，每年高個位數字增長的速度，中國經濟15年內超越美國，只係數字遊戲。

香港需唔需要用自由換取經濟發展，又唔需要咁悲，中國實行規劃經濟，呢樣又管嗰樣又管，十個煲七個蓋，就快監管者多過經濟學家，絕對唔會係可持續發展，一個好簡單的結論就係，全球第一大經濟，冇乜可能係一個規劃經濟，形勢總會轉變的。

關連文章:
1. 二零二七（上）、（下）
2. 大禮露微
3. 小強大禮（上）、（下）
4. 港深特特區（上）、（下）
5. 港深特區（上）、（下）

伸延閱讀:
1. 文匯報: 梁振英 - 經濟提速追回蹉跎歲月