2012年7月22日星期日

有腦唔怕洗

(部分內容刊於2012年7月23日am730)


今期湊熱鬧,開洗腦。

最成功的洗腦工程,往往都是不著痕跡,例如廣告宣傳,唔經唔覺將觀念,建購、深植於目標受眾的行為意識,好似近年住宅樓盤,幾千呎大型豪華住客會所,成為指定賣點之一,買家甘之如飴,正正係地產商最成功的洗腦工程之一,將私人會所等富豪玩意,轉化成普通人對居住環境的追求,忘記咗住客會所其實係樓盤發水的主要元兇之一。

最大型的洗腦工程,往往亦打住最正義的旗幟,例如宗教。Dan Brown的《 Angels and Demons》 同埋《The Da Vinci Code》 咁賣得,正正因為唔少冇睇過《Holy Blood Holy Grail》、唔熟識宗教歷史的人,睇完小說之後,赫然驚覺被宗教洗腦多年。今日香港的小學生甚至幼稚園學生,中文字都未識寫幾個,已經要背主禱文聖母頌,香港的家長,斷估又唔會點擔心子女被有宗教背景的教育機構,日日夜夜在洗腦。

今時今日,成日閂埋門在互聯網世界橫衝直撞的後生仔,如果真係咁容易洗佢哋個腦,相信千千萬萬的家長老師,就唔使日日咁勞心勞氣啦。長輩同你講「打得飛機多會盲」,廿幾年前可能仲會有人信,今日的後生仔睬你都傻,分分鐘會反駁一句「只要還沒有放棄打手槍青春就不算結束」。

家長老師耳提面命式的教育,就算打正牌洗腦,難度高,好多時甚至會有反效果,反而廣播傳媒耳濡目染的宣傳,洗腦效果更大,影響層面更唔止係年青一代。

有冇留意,近年香港傳媒,尤其係免費電視及電台,「中國國家主席」等北京領導人大號,已經變咗「國家主席」,「中國國家女排代表隊」,已經變咗「國家女排代排隊」或「國家隊」,這個抺去「中國」的表述,新聞傳媒看似漫不經意的「Style」的轉變,其實亦係最不著痕跡的國民意識宣傳之一,甚至可能係中央政府搵香港傳媒高層食飯灌水兼照肺之後才出現的轉變。

傳媒幫手洗腦,有時未必係受到政治干預,更多時只係習慣壞習慣,舉個例,近年北京有關促進中港融合的經濟措施,全部都係雙方互利的動作,香港傳媒日日「大禮」前「大禮」後,查實自己幫手洗香港人腦都唔知,好似年年七月一日皇恩浩蕩,成日將「大禮」兩個字掛在咀邊,久而久之,由大陸同胞到香港人自己,好似覺得香港冇咗中央支持就唔得。

又舉個例,唔少香港人好擔心大亞灣核電廠的安全問題,如果今日宣布擴建增產,好可能即時在香港引起極大反對聲浪,不過鏡頭一轉,上個星期,美軍海軍的核動力航空母艦喬治華盛頓號,裝住核子反應埋加埋幾千噸炸藥,停靠香港泊足一個星期,又好似冇乜香港人會擔心唔安全,美國核動力航母,就算泊埋日本,每次都有一千幾百個反核人士示威抗議,喬治華盛頓號定期停靠香港,香港傳媒的焦點,反而只係有幾多官兵,準備為中環灣仔酒吧帶嚟幾多幾多生意。

講咗咁多,查實只係想講,商業宗教政治文化,地球上,每一分每一妙,都有千千萬萬的人,為咗唔同目的,刻意無意的進行洗腦工程,正正反反,有時成功有時失敗,冇乜需要大驚小怪。

國民教育呢單嘢,2007年香港回歸十周年,中國國家主席胡錦濤嚟香港講到出口,「要重視對青少年進行國民教育」,明顯係政治任務,前特首曾蔭權,先後兩次在施政報告講到要大搞國民教育,一直冇乜人反對,2012年7月4日之後,反而會因為其中一份教材的其中一兩句低能表述,引起全港爭議,大家可以配合埋香港最新的政治形勢,退一步諗吓點解,就算唔用陰謀論去埋解呢件事,目前傳媒鋪天蓋地的「反洗腦」 輿論,其實正正係洗腦工程的一種。

一個人大吓大吓,隨住眼界的拓濶,「Unlearn」以前「Learn」咗的觀念,配合自己對人生的領悟,「Relearn」自己的立身之本,只是最自然不過的成長歷程,有腦唔怕洗,洗完再洗做人先會有進步,最緊要保持獨立思考的能力,投資如是,做人亦如是。


關連文章:
1. 大禮露微

伸延閱讀:
1. 蝸牛路: 鬥洗腦
2. 憤怒荷馬:爸爸媽媽,放過我吧!


同場加映

第一段片,原片應該係《長征組歌》裡面一段「四渡赤水出奇兵」,邊位高人將片段配上《Beat It》,查唔到,不過曾經在網上引發一段惡搞配樂風潮,配上唔同兒歌怪曲,惡搞到當年的紅劇演員發火,叫人「歷史不能拿来好玩」。

第二段《被迫的》,輯自胡戈短片《007大戰黑衣人》

19 則留言:

  1. 最後嗰段聽落好「梁」, 其實無得彈... 讚!

    回覆刪除
    回覆
    1. 哈哈,「娘」冇問題,「梁」就受唔起了...

      刪除
    2. 哈哈哈... 前者前者, leong4

      刪除
  2. 題目起得真好!可惜「洗腦」呢單洗腦,應驗咗題目嘅反義。

    回覆刪除
    回覆
    1. 牛哥,唔好陷禾於不義,禾都係睇完你篇「鬥洗腦」,先至諗起可以寫呢篇「有腦唔怕洗」的...

      刪除
  3. 跟據我父母當年在文革做紅衛兵同外公做教師被批鬥的經歷,可以話現時香港見到的少先隊、華青會(國內叫共青團)、工聯會、民建聯其實有兩種黨員:為功利保利益如自由黨和唐營,同為報仇為搵個大佬照著如被歧視的新移民和為當年老豆被鬼佬蝦現要不澤手段做特首的梁振英。有internet,共產黨想洗腦跟本無可能,就算武力振壓都只能洗到口服心不服。當年的黃秋生同長毛是真正思想愛國愛民的共產黨人(很難想象吧),長大之後都會看到當權者的黑暗而倒戈相向。

    的課程搞到咁核突一定系粗製劣做臨時拉夫。啊爺可能本來只想有個面子工程,搞到咁其實好無面。我估第二版應該會好好多,起碼會避開政治批鬥、民主、共產、等等,搞到好似以前社會科改少少大家當無件事好落台就算。少先隊共青團會變成課外活動自由加入拿著數,好似禮義廉派米咁。

    洗腦有好多種,至高境界如猶太人可以洗到自己侵略了阿拉伯人的土地復國,把人趕入難民營仲話人地革命系恐怖襲擊。基督教同回教猶太教打仗幾百年,回教猶太教同一陣線直到以色列搶地复國,竟然美國鄉下基督教徒會被洗腦到支持猶太人立場去打回教。不只美國鄉下人,我老婆都曾經以為猶太人同基督教關系密切,想送一本『猶太的智慧』比個牧師,我認識的一個舊同學,也被洗腦到在強國人搶新西蘭奶粉個新聞上留言話『猶太人創造,美國人破壞,強國人复制』, 呢的咪就系洗腦至高境界咯。但系中央跟本無在香港國情教育問題上做過野,梁同志話要立即推行,下面的人趕工趕唔切就將大陸文革年代黨綱搬字過紙就騙左幾千萬稿費。如果中央肯花幾億請的國際公關律師等人幫手,就會連侯賽因都可以幫底特律同巴格達做姐妹城市,侯賽因自己仲可以拿到底特律市友誼之匙添(是事實)。

    如果中央要你屈服,就會將愛國教育成績同埋愛國課外活動加入去升中、考大學、獎學金、申請政府工等去逼你背書講大話。好多基層同新移民家長會屈服,但系政府會用好多錢同有好大機會被平機會告。

    如果只從左派愛國band 3,4,5強制推行,一般學生同家長真系睬你都傻。最賤招系好似大陸現時從名校入手,到你如果想入拔瑞皇仁要靠少先隊幫手,入大學熱門主修又要靠共青團課外活動,到時你如果想做政府工都無辦法一定要入黨了。

    今次整個計劃曝光,搞到畫虎不成反類犬,引發出學民思潮等組織,你可以放心洗腦一定不成了。教育局搞到咁一定有人要孭鍋。我覺得可能呢次是唐營有心跣梁營,梁同志心想可能九月立會選情不妙,要趁現時還控制立法會背水一戰,不過得罪太多唐營人所以失敗了。中央也是無腦的,從小洗腦一定要先從做義工、參觀博物館、搞畫劇等軟招開始。你見人地教會小朋友主日學、少年團契都是玩、做義工、唱歌演劇等,邊有人搞持槍步操、背黨綱、鬥異己鬥外國勢力?就算玩畫劇唱歌都應該系古裝懷舊曲而不是樣板戲紅歌。負責人個職位變了政治肥缺無做野,今次一定有人要炒,成個計劃要從新來過。

    回覆刪除
  4. 呃人係冇衰,最緊要係唔好連自己都呃埋!

    回覆刪除
  5. 其實今次政府個方案都真係俾好大自由度學校同老師,不過有班擦鞋仔搏出位,整本洗腦中國模式出黎。講真,以而家香港社會資訊流通同小朋友成熟程度,邊有咁易洗腦呀。不過我都支持今次學生同家長行出黎,話俾班擦鞋仔同政府知道唔好當市民白癡,唔好諗住係香港攪河蟹。仲有,呢排好多反洗腦海報漫畫,其實都係好洗腦式宣傳,根本就係係度抽政治水。

    回覆刪除
    回覆
    1. 閒話一句,呢單嘢之後,好肯定老師會更辛苦,在學校想話教訓吓個細路,個靚仔一句「洗腦」頂返轉頭,可能仲全班喝采拍手,冇眼睇...

      刪除
    2. 其實不少港人正不知不覺地被媒體洗腦而不自知,其口中的紅衞兵尚未出現,自己便可能先有紅衞兵的影子。

      小飛飛

      刪除
    3. 所以,禾建議嗰班自己在後面大大聲吹雞,推班細路衝最前排的人,唔該順手爭取埋,將投票及扑嘢的合法年齡,降至11歲...

      刪除
    4. 順叔,我都覺得無眼睇,今日如果d父母一味同個仔講「反洗腦」,希望總有一兩個父母會同小朋友講解一下啦,呢d野處理得唔好,到時個仔女一味同你講「唔好洗我腦呀」就大件事。

      刪除
  6. 順叔,一直拜讀你老人家大作,但這篇文章不敢苟同!國民教育課程內容就算係洗腦/荒謬都好,小朋友可以判斷嗎? 愛國不等於愛黨,一味讚頌共產黨的好,很恐怖,竟然要向毛澤東學習,但他是民革的大魔頭,學生亦學習毛澤東書法,有何學習價值?為何不是王羲之的書法?最重要的是,評分準則,學生聽到國歌不感動就要回家反醒,同學間亦要互相評分,學生為求取得高分數兼得到同學認同,一定會給洗腦,這是PEER PRESSURE的問題。小朋友需要的是公民教育!

    回覆刪除
    回覆
    1. 其實順叔也不是支持國民教育,只是點出洗腦的行為無處不在,一則廣告、一段評論其實都在植入「觀念」,沒有獨立思考的,很難免於被洗,更多是被大洗特洗。

      相比路人皆知的國民教育,媒體對新政府形象的塑造可能更值得大家警惕。

      刪除
    2. 「形象的塑造」真係貼切。

      刪除
    3. 這位無名兄,相信好多人冇留言屌尻順叔呢篇嘢,已經好俾臉,你不認同我,是很自然的事,我沒打算、更沒能力去改變你的看法。

      我以前落嚟香港,試過被人笑阿燦;近年返大陸,又試過被人笑港燦,這幾年香港的「反陸」情緒,我感受甚深。

      死還死,七孔流血還七孔流血,兩樣嘢嚟,千奇咪搞錯;反共反專制一回事,去國去民族另一回事。拔,我看不到亦感受不到,部分站在「道德最高地」的「香港人」想搞清楚這兩回事,所以就算我覺得國民教育呢單嘢幾柒都好,也不想加入反對的陣營。

      國族分界身份認同,是非常個人的感受,有理說不清的,夾硬進群體,會蘊釀出非常危險的情緒,人類歷史太多斬斬殺殺(看看新疆),都是在這個模糊界域中進行。談起這事,友好間大動肝火,我近來看得多了,我自己可以做的,就是叫自己的朋友不要太勞氣,避免火上加油,只可以這樣了。

      刪除
  7. 相比路人皆知的國民教育,媒體對新政府形象的塑造可能更值得大家警惕。

    非常同意
    似乎有某種勢力係後面推波助瀾

    SHAN

    回覆刪除