大禮露微

（哈哈哈，都係嗰句，見報版標題，冇咁斯文的．．．）

開心星期五，風花雪月，睇睇北京年年向香港送「大禮」，顯露咗乜嘢細微之事，香港人應該留意。

香港回歸十五年，國家主席胡錦濤親自落嚟贈慶，唔知中央政府下面個「人工影響天氣辦公室」，係咪真係咁呼風喚雨，周未長假好可能打風，小雲叮噹孫悟空等七一上街撐Hello Kitty，Cosplay遊行可能有啲麻煩。

每逢有北京領導人嚟香港，例行公事，公布吓一堆中港經濟互動新措施，今年胡錦濤親自南下，斷估會有更多場大龍鳳，官方新華社在星期三首先熱身，引述國務院消息，事先張掦中央政府將制定一系列政策，「進一步支持香港經濟社會發展」。

呢個幾乎一年一度的指定動作，香港傳媒，香港人，慣咗以「大禮」形容之，星期四揭吓香港報紙，頭版頭條大字標題，乜嘢「阿爺送六大禮」，乜嘢「中央六路惠港」，電台電視報道有關消息，有係「大禮」前「大禮」後，越聽越「銀」耳，越睇越扯火。

內地傳媒比較注動行文用字，早年報道有關消息的時候，全部採用較中性的字眼，例如「加強中港合作」、「促進兩地經貿融合」等，近兩日的內地報章，尤其係同香港接近的華南地區傳媒，亦都用晒「大禮」二字，官方新華社評論文章，總結香港回歸以來保持「繁榮安定」的「泉源」，仲掟咗一句「問渠哪得清如許，為有源頭活水來」，問你死未。

洗腦式的「皇恩浩盪」，做得多講得多，好似香港冇咗中央「大禮」就死得，好記得幾年前好似又係打風，部分內地旅客滯留香港機場，電視台扑咪，有位大陸同胞大大聲向各位港燦講：「如果不是中央政府照顧你們香港，完蛋了」。

順叔冇意挑撥兩地同胞感情，只不過，想同香港各位傳媒朋友講一句，最好減少使用「大禮」呢兩個字，既不大，亦非禮，講得多，人哋都會睇你唔起。

港府確保水電供應穩定，乃份內之事，唔需要掛在口邊向全港居民送「大禮」，旅發局在海外宣傳吓，老襯亭維港夜景，乃自身優勢，唔會有人話向山頂居民送「大禮」，經濟融合雙贏共利，中港兩制互補長短，僅此而己，「大」咩「禮」咩啫。

由03年開始，種種所謂挺港「大禮」，邊個可以舉一個例子，只係對香港有著數，要大陸同胞或企業向香港「讓利」？就算自由行，大佬，國民外遊乃公民自由，又係乜嘢「大禮」；國務院話支持香港強積金等投資內地金融資產，中國證監會其實咪又係四圍鼓勵長線投資者入市，呢個又係乜嘢大禮。講嚟講去，例如人民幣業務乜乜物物，年年係咁講，唔等如歲歲送「大禮」，中央政府自己金融改革手腳慢，唔放膽而矣。

之前講過，舊年副總理李克強嚟香港，由新華社公布的所謂「挺港36條」，潛治辭其實係「治港36條」，變相等如中央政府規劃香港的「施政報告」，要中港兩地在政治經濟社會文化上全面接軌，想飛都飛唔出，今次胡錦濤訪港的所謂「大禮」，唔會超出「治港36條」範疇。

兩地兩制磨合，以大溝細，中強港弱之勢無可逆轉，但香港回歸十五年，中國並非冇受香港影響，例如民運人士李旺陽「被自殺」一事，香港人的反映及傳媒的窮追猛打，最低限度，起到此少監察的作用。

香港全球獨有的「核心價值」，只有一國兩制，如何在兩地兩制磨合過程中，讓北京明白到自由民主人權等普世價值的重要。講就偉大，其實只是香港人做翻一直做緊的事，建華八年當奴七年，回歸後冰火煎熬十五載，香港仲咁有生命力，查實已經係最大成就，同根同發展，無需自我婑化，由拒絕將「大禮」二字掛在咀邊開始。

關連文章：
1. 治港鐵道（上）