拆解僭建聯（上）

今期湊熱鬧，拆解香港一個象徵身份地位的組織：「僭建聯」。

香港市區一個普通分層單位，唔計縮水都得幾百呎，冇空間冇風景，僭建條毛咩，所以夠班加入「僭建聯」者，多數件物業有咁上下價值，加入「僭建聯」而成為新聞人物者，亦肯定有頭有臉。

「僭建聯」最具代表性人物，當然要數前政務司司長唐英年，參選特首期間被踢爆住宅僭建二千呎地下巨宅，成為選戰轉捩點，勢估唔到，唐宮醜聞最大受益者，候任行政長官梁振英，仍然選擇加入「僭建聯」，奇怪當日唐唐被萬箭穿心時，點解唔搵直升機或者Google衛星，走去梁振英屋企上空掃兩掃，睇睇有冇違規建築。

政客講嘢靠得住，乜乸都識上樹，今期唔係討論政治誠信問題，而係想探討吓，香港政府打擊住宅違規建築咁多年，點解僭建問題仲係咁嚴重，尤其係在達官貴人雲集、人傑地靈的豪宅區獨立屋，點解仲有咁多知法犯法的猛人，點解咁多拆唔清的僭建物。

先講講少少背景資料，「僭建聯」成員逐一曝光，呢場由住宅違規建築引發的政治風波，查實已經吹咗超過一年，風眼源頭，來自去年4月申訴專員公署一份調查報告，批評政府在處理市區及新界違規建築時，選擇性執法，令輿論矛頭，直指新界的僭建及佔用官地問題。

其後唔少住在新界的達官貴人，當然仲包括土豪鄉紳，逐一被踢爆家有僭建，照香港政治生態推斷，可能有唔少人為咗分散注意力，放吓風爆吓陰毒，將傳媒目光被吸引到一個在市區同樣普遍、亦容易踢爆的「知法犯法」現象，結果發現「僭建聯」成員星光熠熠，港九新界「個個身有屎」，由行政長官曾蔭權到問責高官，新舊行政會議成員到立法會民意代表，個個同坐一條船。

隨便引用舊新聞舉幾個例子。

孫明揚，官至教育局局長，曾幾何時港府房策地政的最高話事人，知法犯法的教壞細路的最佳案例，跑馬地住宅僭建雜物房，收清拆令甚至被釘契都當冇件事。

李國寶，前行政會議成員，最資深立法會議員，山頂頂層複式單位，加建千呎天台屋，據報道又係收埋清拆令兼被釘契，可能李國寶唔需要幫襯電能實業(0006)買電，聽講有關建築只係「太陽能板」，叫記者坐直升機睇清楚咁話。

陳鑑林，民建聯中堅份子，沙田丁屋門口僭建花園，天台僭建玻璃屋，更佔用官地放置貨櫃放雜物，「真誠為香港」的民意代表，當然唔會承認知法犯法，不過「法律不外乎人情」，僭建「只因村屋設施不足」。

梁振英被踢爆「僭建聯」成員身份後，最少願意立即洗底，毁屍滅跡，其他李國寶陳鑑林之類的「僭建聯」代表，相信唔少人，繼續側側膊，風頭火勢後就當冇件事，唔通屋宇署夠膽引用法例所賦予權力，入屋視察，甚至爆入山頂白加道27號Altadena House頂樓，強拆「太陽能板」呢類「環保設施」咩。

僭建風波炒大咗之後，舊年年中，曾蔭權已經大大聲提醒所有問責官員及行會成員，家有僭建就請立即拆彈，唐宮風暴對唐英年有咁大殺傷力，就係咁解。

梁振英山頂住宅有僭建，唔涉及入假圖則的欺詐行為，不過，經過逾一年的僭建風暴後，梁振英仲戇居居在「僭建聯」冇跳船，一句「無心之失」，好冇說服力囉。

拆解「僭建聯」坐大的成因，首先可以排除執法不力的因素，因為政府近年打擊市區違規建築，重拳重藥，絕不手軟。早在2000年初，當時的規劃地政局，已經成立專責小組，在所謂諮詢公眾後，在2001年4月，公布咗針對僭建物的新執法政策，重點係「優先處理」有即時危險、對環境造成嚴重滋擾，以及新建的僭建物。

下回再續，睇睇「優先處理」呢項新政出台之後，對拆解「僭建聯」各個組成部分，有乜影響，打擊咗邊個，又放生咗邊個。

關連文章：
1. 拆解僭建聯（上）、（下）
2. 僭建演義（上）、（中）、（下）

伸延閱讀:
1. 申訴專員公署有關新界僭建報告（1996年｜2005年｜2011年)
2. 維基百科: 2011年香港僭建風波
3. 明報: 梁振英「家中所有建築物都有入則」(2011年5月15日)
4. 蘋果: 彤叔女婿山頂大宅地底疑僭建逾萬呎