放眼中電（下）

（呢篇嘢急就章，遲啲會作出一些改動）

上回講到，中電控股(0002)壟斷九龍新界的電力市場，相對於局限港島的電能國際(0006)，中電的本土市場仲有相當發展空間，例如西九南九兩大發展項目，仲有在新界可能出現的新市真，都可以帶嚟以萬計甚至十萬計的新增商住用戶，仲未計中港邊境的發展，例如河套區的發展，供電好可能都係幫襯中電。

中電本身已經有相當規模的內地業務，一直有賣電到內地，仲有25%的大亞灣核電站，中電大本營，地理環境上連接中國大陸，比起電能旗下的港燈有更大自然增長空間。不過有辣亦有唔辣，同大陸市場更貼近，唔需要過大海，駁條電纜過嚟都易一點，中電的壟斷性優勢，所以亦較容易因為監管環境的轉變，例如開放電網，受到內地國企的挑戰。

除咗潛在的市場機會或競爭，內地市場對香港電力市場的最大影響力，在於燃料供應，香港政府近年推動更清潔能源，為本地發電廠設定更嚴格的排放上限，能源結構向天然氣靠攏，可以話係近年電力市場監管的最重要變化。

從中電管理層早幾年的言論，同埋年報的表述，相信中電本來有興趣染指天然氣業務，包括在大鴉州發展液化天然氣接收站，中電曾經提及，如果成事，有助香港在國際市場入口價格更具競爭力的天然氣，再搞大啲，香港甚至可以在液化天然氣接收站市場，同新加坡爭吓飯食。

2008年港府同兩電簽署新的利潤管理協議，同年電力市場的能源供應亦出現咗一個突變因素，作為中央政府「挺港」措施之一，港府同中國國家能源局，簽署咗一項能源供應諒解備忘錄，簽咗呢個備忘錄之後，中電好快放棄咗大鴉州起接收站的計劃。

絕大部分「挺港」措施，其實一家便宜兩家著，例如呢份能源供應備忘錄，香港叫做未來20年有穩定的能源供應，包括核電及天然氣，大陸亦唔會蝕底，有關天然氣部分，中海油(0883)集團會繼續以市價向香港供應海上天然氣20年，中石油(0857)集團亦會透過西氣東輸二線向香港供應液化天然氣，不過接收站設於內地一邊。

中電目前天然氣供應，主要來自中海油母公司旗下的崖城氣田，合約20年前簽落時，油價20蚊美金一桶， 據中電星期二業績記者會時透露，中石油12個月內會向中電供氣，不過供氣價格相等於現時的三倍。

從中電角度睇，港府選擇內地作為長期天然氣來源，客觀效果上，避免咗興建接收站所需的巨額資本開支，降低咗加電費的誘因，不過同時令香港電力市場的燃料供應，掌握在大型國企手中，國企市價供氣，中電將燃料成本轉嫁予香港用戶時，港府又加入輿論鬧埋一份，中電主席米高嘉道理當然氣頂。

氣頂一件事，數仍然要講，今年底就要進行利潤管制計劃的中期檢討。中電同電能實業同撈同煲，食同一行飯又唔需要爭飯碗，多得長和系的強大政經力量，中電多年來應該慳返唔少游說政府的財力物力精力，已經可以坐享電力市場的政策便利。兩電過去咁多年，同政府拗手瓜都站在同一陣線，一齊加價一齊轉軚，連拒絕向立法會透露「機密商業資料」的理由都一模一樣，即係好好傾。

不過中電在香港的本業，燃料供應既扼在大型國企手中，更重要係仲有自然增長的空間，用戶增加可以溝淡燃料上升的成本，呢個形勢上的分別，有可能反映在兩電在未來監管架構上的取態，中電同港燈未必會站在同一陣線。

中電本來傾緊收購埃克森美孚手上的60%青山發電股權，3月時突然宣布南方電網在後期加入洽購，最少反映中電都有意思受埋南方電網一齊玩，最近中電重新委任行政會議成員羅范椒芬做董事，放眼中電近來的部署，或者可以見到未來電力市場發展的脈絡。

關連文章：
1. 放眼中電（上）、（下）
2. 公用功用（上）、（中）、（下）

伸延閱讀：
1. 中港能源供應諒解備忘錄