2011年11月22日星期二

財經CSI(上)

(刊於2011年11月23日am730)


今期冇力諗新題目,翻叮一吓隻資本策略地產(0497),星期二啱啱出中期業績,都叫做新鮮熱辣。

先睇大數,至9月底半年,資本策略未經審核純利,勁升超過10倍,賺13幾億銀(港元,下同),權益總額當係「資產淨值」的話,膨脹30%至55億元,星期二收市,市值近18億港元,市帳率0.3倍,折讓近7成,當下半年冇賺冇蝕,市盈率1.38倍,如果只係計算行使價低於市價的認股權,攤薄後每股盈利15.5港仙,相對星期二收市價21.8港仙,市盈率都係1.4倍,分別不大。

聽落好筍,唔知全港九芬老盲咗,定係冇人敢掂。

可能唔怕生壞命,最怕改錯名,上市公司都係,資本策略個名,英文係「CSI」,04年未賣殼之前,叫做「Capital Strategy Investment」,之後招牌變咗縮寫,咁就捉蟲,因為「CSI」三個英文字,太深入電視迷心,「Crime Scene Investigation」呢家嘢,美國大大話話拍咗幾百集,嚟到香港,由大宋提刑官做到香港差佬法證科,歐陽震華做到柴九,翻醃十劑八劑都仲未悶,問你死未。

好死唔死,資本策略主席鍾楚義,又係當年策劃電盈(0008)蛇吞香港電訊,呢場香港金融史上最催淚苦情財經大戲的幕後監制,玩資本耍策略太多年太出色,套現電盈股份發達後,04年買隻殼又叫「資本策略」,就算最新近加咗「地產」兩個字跟尾,但之前路過軌跡寸草不生,似乎都冇乜人夠膽信佢,會發財立品轉行兼轉性。

既然係咁,順叔都扮吓法證,仔細鑑鑑呢隻嘢。

首先睇睇本帳簿,唔知係乜的東東,例如「可供出售投資」等項目,唔算太多,亦冇產生「或然負債」,冇「衍生工具」,「證券經紀所持現金」(可能係孖展)本來超過1億銀,有啲擔心,但最新帳目已經降至2,500萬元,睇落唔似有問題。

資本策略最大嚿資產,叫做「持作出售物業」,即係早幾年買落的物業,雖然相當部份係有租金收入的商業地產,但當係流動資產,講明隨時會賣出街套現,咁做法,以財經茄哩啡有限會計知識,會當佢係最大賣點,唔會因為「投資物業公平值變化」,每年所出現的波動,影響咗資產值能見度。

三四線地產股,資產值折讓例牌好大,例如市值規模相約的金朝陽(0878),最新市值25億元,至6月底權益總額91億元,折讓超過7成,仲深過資本策略,但係「投資物業」已經入帳近100億元,過去幾年加多幾多水份,就冇咁容易還原。資本策略物業資產,以成本價入帳,加上營運歷史得幾年貨仔,每一單重要物業買賣,都容易追查到價錢,單單講磚頭部分,好難喺條數做乜嘢手腳。

資本策略在財政年度上半年,溢價連息贖回近1億元明年到期的可換股票據,蝕大約1,600萬元,反映鍾楚義唔係好想股權點樣被溝淡,間公司現在坐住22億元現金,26億元銀行貸款,接近一半5年後先到期,總括嚟講,資本策略本帳簿算幾乾淨易睇,如果未來一兩年,有融資需要時,有銀行肯借錢或發債,而唔係透過可換股債、批股供股等有攤薄效應的方法,可以加分。

跟住到損益表,資本策略上半年純利勁升10倍,因為期內沽咗唔少磚頭出街,租金收入大約1億,暫時可以唔理,分拆寫字樓物業出售,包括尖沙咀模漢大廈,同埋灣仔國衛中分6層寫字樓,賣呢兩嚿嘢,經營溢利已經十幾億;住宅項目, 08年在藍塘道買咗棟舊樓華群軒,11個單位,唔使3億銀,係咁意包裝下變成The Hampton,而家賣咗兩個單位,已經收返1.7億元。

鑑證到呢度,好似幾靚仔,冇乜「犯罪證據」,下回再續再鑑,睇睇係咪可以幫襯鍾楚義,俾錢佢幫小股東炒樓。

關連文章:
1. 財經CSI(上)(下)
2. 舊地新磚(下)
3. 信佢就托(上)(下)


同場加映

犯罪現場鑑證,Crime Scene Investigation,作為一個電視劇主題,有幾爛?

老祖宗,美國《CSI》,好似已經拍到第12個SEASON,仲分裂咗幾個版本,由CSI - Miami幾乎去到CSI - Alaska,死未...當然未死,抄到嚟香港,《洗冤錄》已經食咗兩劑;又未死,抄埋去大陸,《大宋提刑官》,執多52集,今次死得喇啩...佢老味,都仲未死,《法證先鋒》又食多三劑,仲要係咩嘢「死實死」邁向45周年台慶鉅製,你唔死順叔都悶死...

6 則留言:

  1. 順叔, Your CTF Series is wonderful. How about the forthcoming one 時代集團? Thx.

    回覆刪除
  2. Sorry dude, don't have time to study the Sitoy Group. HEHEHE, you may notice that there are only FOUR series under the "IPOld-1000 Focus" category...

    回覆刪除
  3. ok la. Thanks. Waiting for your another CTF article. Btw, seems that not much (or no) cornerstone investor for this IPO. Hard to earn a penny from "Uncle Tao"'s pocket.

    回覆刪除
  4. This one is easy. Cornerstone investors are guaranteed big slices in an IPO in return for a typically six-month lock-up period. Another mega IPO, New China Life Insurance's US$3B offering, has secured US$780M in cornerstone tickets, which include Malaysia's sovereignty fund. It tells you all... (LINK: http://www.businessweek.com/news/2011-11-28/new-china-life-may-sell-780-million-to-cornerstone-ipo-buyers.html)

    回覆刪除
  5. Hello, 順叔.典解如此奇奇奇?老散不愛大戶愛? 早前傳出內地投資者對其路演反應淡靜的新華人壽,近日氣勢忽然轉強。繼早前傳出 A股機構投資者部份超額認購逾 50倍後,昨又傳出 H股國際配售暫錄超額認購逾 3倍,並有內地機構投資者因怕 A股中籤率低,故將轉來港搶 H股貨源。

    回覆刪除
  6. 新華人壽冇認真望過,唔知班友玩成點,不過,A股唔少所謂「芬佬」,操盤水平可以嚇死人的,所以A股「機構投資者」動向,應該唔太可以作準...

    回覆刪除