王子個頭（上）

今期開李寧有限公司(2331)，下文用「李寧公司」代表呢隻上市體育用品股，「李寧」代表公司創辦人兼那些年的中國體操王子。

提起李寧，一係講佢運動場的威水史，一係講佢在商場的成就，唔少人更指住李寧近年越見稀疏的額髮，英雄遲暮乜乜物物，李寧剃光頭，一髮不留做大茄哩啡一幕，反而唔係咁多人記得。

王子個頭，正正是分析李寧公司過去一系列高難度動作的起點。

跟據史書記載，李寧在88年奧運「兵敗漢城」(當年真正兵敗的其實是金牌數目排在蘇聯及東德之後的美國)，89年退役從商，提出「李寧牌」概念，鏡頭一轉，已經係李寧公司上市成為中國最大體育用品股的風光時刻，查實在九十年代初期，李寧一度有意挾知名道進運娛樂圈，客串過幾部電影，更加參演過香港電視劇《武尊少林》，飾演少林俗家高手，落山搵洗髓經，撞到當年卜卜脆的港姐冠軍郭藹明，出世入塵之間徘徊。

當年的李寧，廣東話口音唔係太純正，飾演身懷絕技但木木獨獨的角色，查實度身訂造，演技雖然相當幼嫩，但去到落髮為僧拒絕郭藹明一刻，剃光個頭在鏡頭前出現一幕，李寧所表現出的身不由己的掙扎，竟然好似做緊自己，幾交到戲(相關視頻上載到順叔網誌，不過好快會剷走)。

92年巴塞隆拿奧運，李寧牌被選為中國代表隊指定體育用品，可以話係李寧公司業務發展突破性一刻，呢個時候作為公司生招牌，拍吓戲增加曝光率，無可厚非，但李寧在自己風華最茂之時，竟然曾表現出棄商從影的取向，諗返轉頭，耐人尋味。

內地重點培訓的運動員，退休前全力投入，應該冇乜時間讀吓書見吓世面，財經茄哩啡作為李寧當年的粉絲，好想問吓佢，呢廿幾年究竟發生咗乜事，今日的李寧同當日的體操王子又有乜唔同，最重要係，想問吓佢點解咁少展現笑容。

上幾代中國人集體回憶中的李寧，是八十年代初期威振世界的體操王子，改革開放之初，中國國力及經濟條件有限，體育場上的國際成就等別難得，好似中國女排咁，在幾代國人心中建立不可替代的地位，2008年京奧由李寧做最後一棒火炬手，代表中國運動員吊威吔鳥巢升天點火，就係咁解。

今日的李寧，成為矚目民企老闆，公司招牌仲揹住自己姓名，不過相信唔少投資者眼中，對在中國商海打滾超過廿載的李寧，反而覺得面目模糊，因為李寧自公司在2004年上市後，多數時候保持低調，業績記者會股東會甚少親自露面，亦甚少接受傳媒專訪。

早幾日，李寧罕有咁現身香港見人，為公司管理層變動及未來計劃解畫，鏡頭所見，相對4年前鳥巢上空的李寧，額髮更少，雙鬢更白，唔好話搵唔到1984年的自信，亦唔似一個縱橫商場廿幾年的民企老闆，好似平機會主席林煥光做行政會議召售人，好似唔知俾邊個用鎗指住個頭咁，眉宇間帶住一絲萬分的不情願。

李寧公司以李寧命名，就係以中國最具代表性的運動員做生招牌，李寧早年有冇拍廣告做代言人，已經唔記得搵唔到資料(當年中國怕且都未冇「代言人」呢個概念)，體操王子歲月催人，對講求活力形象的體育品牌可能有反效果，李寧唔再以運動健將形象示人，情有可願，但體操王子個朵咁響，新一代基金經理分析員，就算未親眼見過「李寧交叉」的雄風，亦應該聽過李寧的大名，知道佢在中國的地位，李寧在公司對外事務上的低調，就低調得不乎尋常。

下回再續，睇睇李寧作為中國第一體育服飾企業的創辦人，同其他白手興家的民企老闆有乜唔同。

關連文章:

1. 王子個頭（上）、（中）、（下）
2. 王子壞孩子（上）、（下）
3. 體育戰場（上）、（下）

伸延閱讀:
1. 土豆網《武尊少林》片段: 李寧誤窺郭藹明全相 
2. 土豆網《武尊少林》片段: 李寧送佛珠請郭藹明食檸檬