2012年7月12日星期四

文化富士康(上)


今期唔係開富士康(2388),而係講電視廣播(0511),香港一間慘不忍睹的娛樂文化血汗工廠。

TVB雖然係夢工場,而家大部分華語片巨星,都係在TVB木人巷打拼出嚟,但係又冇幾多個華仔可以變身華叔,就算係當家小生花旦、一線配角大茄,日拍夜拍乜都殘,周不是睇到新聞話藝員或藝員家人在微博狂鬧無記無人性,唔計知名度同埋其他隱性職業福利,可能衰過砌iPhone零件的工廠女工。

藝員受罪,受眾亦唔好過,有少少叫坐力的演員,好多都北上搵人仔,小生花旦買少見少,嚟嚟去去都係嗰幾件,近年仲唱埋歌添,大佬,仙女下凡西施再世除埋衫你睇,都會睇厭,更攞胆係套套劇集都一樣,同工廠啤機冇分別,法證先鋒拍過N次,換上古裝做大宋提刑官又炒多N鑊,唔好話觀眾中晒劇毒變得呆呆滯滯,創作人員都冇癮,如果無記已經係香港娛樂文化的少林寺,唔怪得香港創意活力谷晒去網上惡搞。

TVB節目內容冇乜好睇,但係作為上市公司,電視廣播股票又大有睇頭,呢樣嘢前年寫過篇《電視風雲》已經講過,電視廣播有併購概念,派息亦唔失禮,進可攻退可守,今日電視廣播控制權已經易手,併購概念似係告一段落,但係第二樣賣點仍然存在,尤其係投資者近排鐘情防守性股份,連衰咗五、六年的中國電力股都炒起埋,電視廣播股價,日前創咗10年新高,最高見過60元(港元,下同)。

電視廣播話賣盤,講咗十年八年,舊年一月終於成事,牌面上,由有爆棚哥陳國強,拍住台灣新首富王雪紅,仲有個私募基金,買咗六叔邵逸夫手上的26%股權,不過通告節單過公司MEMO,交易細節同同隔離台亞視幾次的股權易手一樣,神神秘秘,好似總係有啲嘢要收埋唔講得出嚟,而香港政府同交易所又容許呢件事發生。

唔好話TVB只此一家,影響力在香港咁大,一間普通上市公司控股權易手,就算買家擺明想避過全面收購,小股東都想知道,新大股東心目中,公司的合理價錢係幾多,根據後來的交易所資料披露,26%電視廣播股權,每股作價55蚊,代價62億元,即係話當時的三方財團入股時,電視廣播估值約238億,同今日最新市值相約。

陳國強之後又同傳媒披露,成項收購代價約80個億,包括西貢清水灣的邵氏片場舊址地皮,財經茄哩啡唔得閒搵資料,證實唔到有關地皮權益屬於電視廣播上市資產,定係六叔私人持有,不過據電視廣播最新年報顯示,土地及物業固定資產未有太大變動,對呢隻嘢有興趣就要留意吓清水灣地皮究竟邊個擁有,順叔搞清楚之後會在網誌上面寫兩句。

TVB近乎壟斷香港的免費電視市場,但係由香港市民到電視廣播股東,都而家查實都唔知邊個係大股東,涉及港資台資外資的三方財團,邊份大邊份細,大家都係估估吓,或者靠爆棚哥間唔中透露的一兩句。老實講,唔係睇少爆棚哥,收購亦好可能有銀行借錢,唔係睇少爆棚哥,坐擁幾十個億身家好味,陳國強就算幾爆,絕對唔似會一掟成副、或者大半副身家,押落一嚿自己冇絕對控制權的敏感資產囉。

爆棚哥早年已經幫襯過電視廣播的收費電視業務,明知蝕章都肯制,今日終於食舖爆棚,鈎到TVB呢條好多富豪都有興趣但又買唔到的大魚,咁有人脈去佈一個局,咁有耐性去鈎一條魚,亦唔似爆棚哥作風,呢類做生意的手法,地球上唔多,香港更少,按照劇情發展,電視廣播賣盤呢局牌,好可能只係打到一半,仲有幾圈未打完。

下回再續。

關連文章:
1. 文化富士康(上)、(下)
2. 電視風雲(上)(下)

1 則留言:

  1. 地皮同上市公司分開

    http://realblog.zkiz.com/greatsoup38/31247
    地產電視業務分家
    至 於接手無綫的大股東,陳國強、王雪紅、跟私募基金Providence Fund,去年一月擊敗四叔李兆基的兒子李家傑入主後,似乎並未有太大動作,最多在無綫大型活動亮相。無綫員工最稱頌是今年的新年開工利是由以往二十元漲 至一百五十元,其中一百元要多謝陳國強自掏腰包。 財團買入的邵氏兄弟,其資產除了TVB股份,還有清水灣舊電視城地皮。外界估計,建築起家的陳國強會在該地皮有一番動作。果然,去年十一月,他們進行重整 架構,首先將邵氏兄弟(香港)有限公司改名為Clear Water Bay Land Company Limited(按:公司沒有中文名),跟前朝的邵氏劃清界線,公司名也顯示部署未來的土地發展。 改名同一日,他們將無綫股份注入新公司Young Lion(Hong Kong)Limited,股東是Clear Water Bay Land Company Limited的主要人馬陳國強、邵逸夫姪孫邵在純、陳文琦、基金代表陳弦等。換言之,原先同屬邵氏兄弟的地產及無綫股份,已分開給兩間公司持有。 但陳國強等人要發展舊電視城,仍要過關斬將。根據城規會資料,清水灣電視城及邵氏片場原本作片場之用,後來電視城不敷應用,無綫於○三年遷往將軍澳工業邨 現址。

    回覆刪除