 |
| 人頭: 好似 |
上回講到，李寧有限公司(2331，下稱「李寧公司」)主席李寧，作為中國民族品牌的民企老闆，多年來對外事務低調得不乎尋常，冇好好利用本身的知名度，爭取投資者對公司的信任。
一個白手興家的民企大款，好多時會流露出自信爆棚、甚至財大氣粗的意態，可能同個人作風及當年的刻苦鍛有關，呢種氣質幾乎在體操王子身上搵唔到，將李寧同其他稍為知名的民企老闆拍埋一齊，好容易睇到極大分別。
民企老闆多數落手落腳參與管理，唔會有幾多間，好似李寧公司咁，在創辦人仍當盛年之時，已經將主席及行政總裁位置分開；如果話李寧深知自己非企管之才，願意放權放手予手下辦事，仲講得通，更奇怪一點，李寧好似連公司控股權都唔係咁著緊，多年來減持套現絕不惜售惜貨，2004年香港上市之時，李寧及其關連人士，透過幾間控股公司，持有李寧公司46%股權，去到舊年底，減持到3成，今年初獲得私幕基金TPG及新加波政府投資公司GIC注資後，5年期可換股債全部行使的話，李寧持股量可能進一步攤薄至約22%，上市8年，持股量降低超過一半，唔係咁多民企老闆，對管理權及控制權都視若浮雲，講緊李寧公司金漆招牌上，仲刻住體操王子的鼎鼎大名。
民企老闆在中國搵食，好多要錢唔要臉，李寧唔同，作為公司生招牌，理論上應該係全中國最著緊自己形象的企業家，財經茄哩啡早兩年寫篇《王子壞孩子》講過，李寧失驚無神同香港股壇「壞孩子」馮永祥行埋，反向收購非凡中國(8032)，借體育之名行地產之實，其實係攞自己名譽教非，人哋搞完「中山愛迪生」就搞中國體操王子，最多輸隻殼，壞孩子哋出豉油，王子要出自己隻豬(舊年年中，更一度傳出李寧有意成立「李寧娛樂公司」進軍娛樂圈)，李寧好似完全唔擔心會刮花自己貞節牌坊。
成功運動員背後，總有多年的刻苦堅毅，李寧在08年京奧開幕前狂操吊威吔淩波微步，顯示體操王子仍保留這一點特質，一個如此成功的運動員，以自己之名創立一個如此規模的商業王國，應該見慣風浪氣度不凡，但今日李寧行出來，沉穩有餘，自信不足，雖然不染常見的股壇古惑仔的邪氣，但總似帶著一絲身不由己的矛盾，樣樣嘢加埋一齊，如果有人話李寧之在李寧公司，只是一個掛名的「人頭」，並無控制大權，財經茄哩啡會相信。
背後有乜故事，無謂作大多猜測，不過可以肯定，刮花李寧的貞節牌坊以致李寧公司呢個民族品牌，除咗競爭對手之外冇乜邊個有著數， TPG及GIC入股注資，條件擺明係股權又要管理權都要，搵人執正盤數，解決目前燃眉之急，短期內各戶面應該利益一致。
李寧公司上星期宣布人事大變動，繼首席產品官、首席品牌官等相繼離去後，廿年老臣、行政總裁張志勇都要起身，而且係未有繼任人選之下即日宣布即日離任，TPG合伙人金珍君獲委為執行副主席及執行董事，變相全力幫李寧公司打公三年，李寧公司同時宣布體操王子的「回歸」，擴大執行主席的角色及責任，以前低調得不乎尋常的李寧，將會專注管理「對外事務和關係」，基本年薪增加近3成至370萬人仔，即係要真真正正落手落腳打工，如無意外，李寧日後會多啲出嚟見人，最少做生招牌，挽回投資者對「李寧牌」的信心，大家有機會多啲了解呢位那些年的體操王子。
下回再續，睇睇李寧公司同埋思捷(0330)，分別受管理高層震動影響，兩間公司處理危機上有乜唔同。
關連文章:
2. 王子壞孩子（上）、（下）
3. 體育戰場（上）、（下）
伸延閱讀:
1. 土豆網《武尊少林》片段: 李寧誤窺郭藹明全相
2. 土豆網《武尊少林》片段: 李寧送佛珠請郭藹明食檸檬
沒有留言:
發佈留言