2012年8月31日星期五

Overvalued Partners(下)


上回講到,惠理集團(0806) 2007年港股最高位集資上市,變成香港唯一一間上市基金管理公司,主要收入來自旗下基金收取客戶的各種收費,包括管理費及表現費,上市公司向基金客戶收取的費用越多,股東越著數。

2007年亦係惠理集團及旗下基金,成績最靚仔的一年,公司招股文件話基金管理資產(AUM)有57億美元,至2007年12月底的年度業績,已經增加至73個億美金,全年平均股本回報接近130%,基金客戶賺到笑,上市公司收入亦按年增加70%至25億元(港元,下同),當中超過20億元係「表現費」,4億幾係「管理費」,純利亦升65%至超過14億元。

惠理集團上市第二年,全球信貸危機,股市一仆一碌,從「贖回費」冇出現大升嚟睇,唔係咁多客仔走路,不過管理資產大幅縮水至32億美元,旗艦「惠理價值基金」跌咗近一半,不過,上市公司仲收到超過3億銀「管理費」,同埋竟然都仲有近7,000萬元「表現費」,純利有6千幾萬,派股息近9千萬,高過公司純利,在這風起雲湧的一年,大股東兼主席兼投資總監謝清海,人工1.05億銀,佔整體員工薪酬一半,賺多過上市公司。

從惠理集團2008年最核突的成績表,可以見到呢間上市基金公司幾個特點,包括旗下基金表現幾差,只要客仔唔用腳投票出現贖回潮,上市公司就穩袋管理費;惠理基金作風相對穩健,主要資產「偏持長倉」,唔係槓桿槓桿再槓桿的對沖基金,在2008年呢啲股災大時代,可以繼續扮蟹坐貨;仲有就係,謝清海持有惠理集團超過3成股權,未有大肆減持套現的動作,不過上市公司對謝清海嚟講,既收股息亦袋人工,係一個好重要的搵銀「Partner」。

基金客戶幫襯得芬佬,最重要目的就係要你跑羸大市,否則不如買盈富基金(2800),惠理集團指住93年成立的「惠理價值基金」,年度化平率回報一定跑贏大市,因為好早投資在中國,中國經濟由世界第6變到第2,回報好難唔靚仔,不過如果由2007年惠理集團上市作為分水嶺計的話,惠理集團旗下的基金經理,暫時未展現到跑贏大市的金手指能力。

至今年7月底,惠理集團管理資產71億美元,同舊年底數字相若,同2007年底數字亦差唔多,即係話上市4年半,冇乜特別進步,用旺市及淡市的AUM做比較,當然唔係咁公道,基本上可以假設,惠理集團的管理資產,原本市值縮水咗唔少,不過同時亦有唔少新客幫襯,所以AUM保持到咁上吓大嚿,問題係惠理集團現在的AUM成份,同上市之前有乜唔同。

上市之前,惠理集團除咗謝清海,只有10個基金經理,絕大部份都係90年代初已經在惠理打工,之外仲有13個分析員,成間公司有62人。謝清海話惠理集團投資團隊的座右銘係「Small enough to be effective, big enough to be strong」,講緊投資團隊唔可以太多人,先可以做到有效靈活的投資決定。

呢個「小得有效大得夠撐」又合作十幾年的投資團隊,近年有幾個執行董事或高級基金經理已經離開,去到2011年底,惠理集團的員工數目,增加近1倍至122人,員工數目急增,查實反映惠理集團的業務,已經多咗唔少雜嘜基金,例如收購內地的基金公司,又例如ETF產品,未來唔知會唔會出現面向散戶的基金類別,例如強積金。

一個基金可唔可以兜到大客,好多時靠口啤,惠理基金用於「分銷」的成本,2011年大升超過6成到1.7億元,同2007年的高位已經相當接近,呢個分銷成本,查實可以作為「Value Partners」呢個招牌的叫座力指標,真係多人幫襯,查實唔需要搵太多分銷渠道。

關連文章:
1. Overvalued Partners(上)(下)

伸延閱讀:
1. 金手指斬手指

6 則留言:

  1. 你個插圖都幾有骨下喎。當日金價不斷升,瑞金就不斷跌,笨如小弟都唔會沾手此股。

    至於惠理806,如何買呢隻股已經有得執,仲有人會俾高昂費用買佢旗下基金咩?!笨如小弟就係咁諗。

    回覆刪除
    回覆
    1. 此留言已被作者移除。

      刪除
    2. 估乜刪咗個留言?頂級基金好多時會發刁瘟,一兩劑失敗投資唔可以作準,不過瑞金呢隻嘢,真係好多人都睇得出有問題,禾到而家,都搞唔清楚究竟坐咗貨的是806定係金手指自己

      刪除
  2. 順叔,你今日篇文講中我想講既。香港樓市只能疏不能堵,政府既政策對症下藥。政策訊號明顯,按步就班,若還要進場的,日後便不能輸打贏要了。

    市場有需求,政府滿足便了,只要不像貪曾般助地產佬控制供應,屯積居奇,又何懼內地購買力?

    回覆刪除
  3. 哈哈,刪左係因為見錯字,再post一段修正時,原本的一段都唔見埋,為免是blogspot有問題,意見會時隱時現,就刪左先,而家至記得上來睇有冇出番。既然你睇左,就得啦。=)

    回覆刪除
    回覆
    1. 哈哈哈,禾驚自己唔小心DE-尻-LETE咗人哋的留言

      刪除