鴻海成個集團，包括香港上市的富士康國際(2038)，有過百萬人幫老闆郭台銘打工，廉價勞工密集，好似出事的太原廠，閒閒地十萬八萬人，生產線的轉移往大陸，帶動內陸省市城填化，打公仔唔再需要穿州過省落深圳打工，有乜唔順超返鄉吓都容易啲，亦即係話，鴻海降低咗「生產成本」同時，新一批員工劈炮唔撈的「機會成本」亦大大降低，更容易拍拍屁股走人，更容易企起身反抗過度剝削，鴻海的生產大軍變得更唔穩定，管理更難。
近年大陸的勞工市場，每逢見到富士康或鴻海大舉請人，就知道美國蘋果好快有新型號出街，山西省傳媒今年3月已經報道過，鴻海攞咗愛瘋快的大單，即時要請2萬新工人，臨時拉伕，模式同香港建築業勞工供應的判頭制已經冇乜大分別，邊個有大單就大量請人搶人，周不時出現大量的勞動力缺口，好多時要出動到地方政府出面，層壓式要下面市縣級政府幫手請人，好似鴻海太原工廠，請咗大量山東及河南工人，更加容易因為地域主義出現「群眾事件」。
當然啦，「鴻海」及「富士康」兩牌招牌，多得之前的員工連環自殺，已經洗唔甩「血汗工廠」的味道，更成為勞工權益的最有影響力反面教材，新一批民工，講緊好多90後，唔似得上一輩咁任勞任怨任打任捱，鴻海等工廠老闆，如果掟錢唔夠毫，類似太原單一工廠的「群眾事件」，肯定陸續有來。
一部愛瘋快當賣5000蚊港紙，如果蘋果賺500蚊，鴻海可能只係賺5蚊，甚至更少，所以要用規模搭救，用錢掟工人會壓縮所剩無幾的毛利，過份壓窄生產力又會引爆社會或政治炸彈，一句到尾，就係一盤不可持續發展的生意，「代工」查實係已經落後的經濟發展模式，鬥胆正命平，亦係中國所謂「經濟轉型」最想擺脫的發展模式。
鴻海做代工做到最大，主要隨身個人電子物品，乜都袋，都有一個好處，最少唔使點擔心客仔的產品被市場淘汰，一雞死一雞鳴點都有生意做，不過富士康國際叫單飛，Nokia被蘋果及三星打到變豬頭，富士康國際亦冇得撈嗱，越嚟越乾溏，近幾年差唔多年年見紅，啱啱爆發騷亂的太原廠房，就係舊年賣俾鴻海，生產線繼續縮水，上個月公布半年成績表，又係蝕兩億幾美金，市值仲有200億港元，股價其實絕對未算殘。
鴻海成個集團，唔係冇賺錢能力，最近仲話大舉進軍光伏產業，執吓平貨，不過在系內分工分餅，面對最大轉型壓力的富士康國際，暫時仍然只係含住條豬頭骨， 最弊公司透明度接近零，年年都話「專注智能手機市場新客戶」，「研發投資實起作用」，大佬，阿水都話識得自制工業革命，究竟你想點啫？
富士康國際主席，唔係郭台銘，而係一個叫陳偉良的香港人，當年為咗Nokia呢個大客，全家搬咗去芬蘭，終於拎到大單，造就富士康國際2005年上市前後的幾年黃金時期，市值一度接近二千億港紙，幾年時間做咗一個「小鴻海」。
富士康國際上市之後，鴻海冇話點賣舊股套現，亦冇乜發行新股集資，最多因為行使認股權先出現股本變化，似乎富士康國際在鴻海集團的最重要角色，係要獎勵好似陳偉良呢類高層，對於母公司嚟講，好似可有可無咁， 陳偉良舊年唔再兼任行政總裁，新官程天縱上任，唔夠一年，早幾個月又劈炮，聽講因為本來想搞自己品牌，但大老闆郭台銘反對，結果要反枱。鴻海系管理過百萬工人已經一頭煙，系內高層的關係亦似乎今非昔比，挾在中間的富士康國際，越嚟越似一個孤兒仔，公司大幅提高透明度之前，投資價值接近零。
關連文章:
1. 乾溏小鴻海（上）、（下）
2. 鴻海迷航（上）、（下）
伸延閱讀:
1. 視頻: 郭台銘訪問（上集）|（下集）|（文字實錄）
2. 中國經營報: 河南巨額補貼助富士康招工
3. 商業周刊: 陳偉良兩年創造小鴻海
順叔，其實鴻海同富士康賺錢並唔系全靠代工。台灣代工有幾間，但係通常富士康價錢最平，因為佢夠大可以做埋低技術零件（如電線，機殼，標籤，紙盒）。同華碩的Pegatron比，大家都有做水果生意，但系富士康可以白做代工但系做零件賺翻。
回覆刪除幾年前我問一個台灣光寶做野的朋友，話代工利潤通常系人工的百分五到六。假設如果愛瘋快工錢要一千，代工可能會賺五、六十，但系如果同華碩鬥只收三、四十，就要靠零件賺多三、四十搭救。
大陸人工其實比越南要高，不過始終開發得早所以大部分代工仲系大陸做。鴻海、富士康其實都有系更平地方開廠，不過越南同你無統戰利用價值，可能有事件就會比較麻煩。