財政失算（下）

(刊於2011年2月25日am730)

上回講到，政府話要增加房屋供應，二手居屋大大嚿現成資源唔用，講到要鑿山填海搵新土地咁跨張，正正反映曾財爺及其同姓老闆，冇誠意冇決心冇膽色落重藥調控樓市。

如果香港土地資源真係咁貧乏，帶頭搬入岩洞者，應該係各個政府部門。大家去政府產業署網頁望望，淨係香港島，已經有十幾二十楝政府大樓，渣華道東行，又整咗三棟新嘢，政府合署、海關、廉記各佔一楝，如果政府真係要釋放市區土地供應，真係有心收窄區域性發展差距，新政府總部，唔應該喺天馬艦，而係天水圍。

勾地表而家加到足足64幅土地，但主動權喺大孖沙手上，人哋有默契集體唔勾，等自己手上土儲奇貨可居，政府吹佢哋唔脹，連恢復定期賣地，攞番土地供應主導權都唔夠膽，其他大動作，例如復建居屋，更加唔使諗。

講到復建居屋呢個敏感政策，順叔偷懶，想引用一位讀者來信。上集星期四見報，即日收到一封電郵，怒插順叔，並要求喺財經茄哩啡一欄刊出其讀後感，老編話如果全文刊登，等如俾順叔扼稿費，所以只能節錄，欲睹全文，可以上順叔個臨時博客望望，原文節錄如下：

今天看完你寫的「財政預算（上）」，忍不住要花時間回應你．．．我不知道你有沒有相關專業資格，如果你有的話，容我得罪講句：是高分低能．．．假如豁免或者大折扣補地價，那麼對早前已在自由市場買樓的巿民，有何影響．．．請你查清楚再發謬論．．．以我個人意見，政府想壓抑樓價再升，基本只需出三招就可以：

1）復建居屋、夾屋，以解決基層、中產對擁有自置物業的期望
2）限制內地人（非本港居民）購買物業，只可購一層
3）無論以公司名義或個人名義買樓收租，由現在的15%的稅收，增加至30%

所有人都知道，現在的物業市場已被扭曲，太多內地人拿着錢來買樓．．．他們咪就係和我們搶奶粉的內地人。明明奶粉供應商已表明有足夠供應，但為何我們仍買不到奶粉？我真不明白為何政府不聽市民的建議，容忍內地人無限量購買住宅、奶粉....等

呢位朋友三點建議，可能反映咗唔少香港人心聲，不過曾蔭權剩番年幾兩年貨仔，一定係鵪鶉政府，攞多幾塊地出嚟定期拍賣都唔夠膽，涉及重新參與私人住宅市場、實施局部資本限制、改變低稅率原則等咁大動作，唔使問阿季，留番下位。（今日本來想插強積金，有機會再開火。）

關連文章:
1. 財政失算（上）、（下）

申延閱讀：
1. 讀者YAN的讀後感